Jueces 16:1-31
16 Wüxi ga ngunexü̃gu ga Chanchóü̃ rü ĩane ya Gáchawa naxũ. Yéma nüxü̃ nadau ga wüxi ga ngexü̃ ga naxü̃nemaxã taxexü̃ rü yemapatagu naxücu nax yexma napexü̃ca̱x.
2 Rü yexguma yema Gáchacüã̱x nüxü̃ cua̱xgügu ga guma ĩanewa nax nayexmaxü̃ ga Chanchóü̃ rü ínanachomaeguãchi ga guma ĩane, rü guxü̃ma ga yema ngunexü̃gügu nüxna nadaugü ga norü ĩã̱x. Rü chütacü rü napee yerü nagu naxĩnüegu rü ngunecü rü tá nayama̱xgü.
3 Natürü nüma ga Chanchóü̃ rü ngãxü̃cüxü naba̱i̱xãchi rü guma ĩanearü ücuchicawa naxũ rü nanabüxü̃ ga norü ĩã̱xgü guxü̃ma ga norü nacüwagümaxã rü norü chotaruü̃gümaxã. Rü guxü̃ma ga yema rü nügüãtügu nananugü. Rü ñu̱xũchi guma Ebróü̃arü to̱xma̱xtawa yexmane ya ma̱xpǘnewa nanana.
Chanchóü̃ rü Daríra
4 Rü yemawena ga Chanchóü̃ rü wüxi ga nge ga Daríragu ãégacüxü̃ nangẽ̱xẽ. Rü ngĩma rü Choréxarü tuãchigu ĩ̱xãchiü̃.
5 Rü nümagü ga yema Firitéugüarü ãẽ̱xgacügü rü Daríraxü̃tawa naxĩ rü ñanagürügü ngĩxü̃: —¡Chanchóü̃xü̃ nawomüxẽxẽ, rü nüxna naca nax ngextá ne naxũxü̃ i ngẽma norü pora, nax ngẽmaãcü nüxü̃ tarüporamaegüxü̃ca̱x, rü tayayauxgüxü̃ca̱x, rü tayana̱i̱xgüxü̃ca̱x! Rü wüxichigü i toma rü tá cuxna ngĩxü̃ taxã i 1,100 tachinü i diẽru ega cunaxüxgux i ngẽma —ñanagürügü ngĩxü̃.
6 Rü yexguma ga ngĩma rü Chanchóü̃xü̃ ngĩgürügü: —¡Chomaxã nüxü̃ ixu nax ngextá ne naxũxü̃ i ngẽma curü pora! ¿Rü ñuxãcü cuxü̃ ina̱i̱xgu nixĩ i taxuacü cugü iquiwẽxü̃? —ngĩgürügü.
7 Rü Chanchóü̃ rü ngĩxü̃ nangãxü̃ga rü ñanagürü: —Ngẽxguma chi 7 i würatü̱xü i naxcha̱xmüü̃naxca̱x i tauta mea ipagüxü̃maxã choxü̃ yana̱i̱xgügu, rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ —ñanagürü.
8 Rü nümagü ga Firitéugüarü ãẽ̱xgacügü rü Daríraxü̃tawa nanana ga 7 ga würatü̱xü ga naxcha̱xmüü̃naxca̱x ga tauta ipagüxü̃ Rü yemamaxã Chanchóü̃xü̃ íyana̱i̱x ga Daríra ga yexguma ínapeyane.
9 Rü naxü̃pa ga nax yanáiãxü̃ rü wüxi ga ucapugu iyacu̱xgü ga ñuxre ga Firitéugü. Rü ñu̱xũchi aita ixü rü ngĩgürügü: —¡Pa Chanchóü̃x, Firitéugü rü cuxca̱x ínayaxüãchi —ngĩgürügü. Rü yexguma ga Chanchóü̃ rü nanacaü̃gü ga yema würatü̱xü ga naxcha̱xmüü̃naxca̱x, ñoma wüxi i napana̱xã i marü ixaxü̃rüxü̃. Rü yemaacü ga Firitéugü rü tama nüxü̃ nacua̱xgü nax ngextá ne naxũxü̃ ga norü pora.
10 Rü ga Daríra rü Chanchóü̃xü̃ ngĩgürügü: —Choxü̃ cuwomüxẽxẽ rü chomaxã quidora. ¡Natürü i ñu̱xma rü aixcüma chomaxã nüxü̃ ixu rü ñuxãcü cuxü̃ ina̱i̱xgu nixĩ i taxuacü cugü iquiwẽxü̃! —ngĩgürügü.
11 Rü Chanchóü̃ ngĩxü̃ nangãxü̃ga rü ñanagürü: —Ngẽxguma chi ngexwacaxü̃xü̃chixü̃ i napana̱xãmaxã choxü̃ pina̱i̱xgügu, rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ —ñanagürü.
12 Rü yexguma ga Daríra rü wüxi ga ngexwaca̱xü̃xü̃ ga napana̱xã iyaxu, rü yemamaxã Chanchóü̃xü̃ iyana̱i̱x ga yexguma ínapeyane. Rü noxrirüü̃tama rü wüxi ga ucapugu ñuxre ga Firitéugüxü̃ iyacu̱xgü. Rü ñu̱xũchi ga ngĩma rü aita ixü rü ngĩgürügü: —Pa Chanchóü̃x, Firitéugü rü cuxca̱x ínayaxüãchi —ngĩgürügü. Rü yexguma ga Chanchóü̃ rü nagu nacauü̃gü ga yema napanaxã ñoma tünüta ga i̱xnütaxü̃gu icauü̃güxü̃rüxü̃.
13 Rü yexguma ga Daríra rü Chanchóü̃xü̃ ngĩgürügü: —Ñu̱xmarüta wena choxü̃ cuwomüxẽxẽ rü wena chomaxã quidora. ¡Rü chomaxã nüxü̃ ixu rü ta̱xacü ixüxü̃ nax cuxü̃ ináixü̃ca̱x! —ngĩgürügü. Rü nüma ga Chanchóü̃ rü ngĩxü̃ nangãxü̃ga, rü ñanagürü: —Ngẽma tá cuxüxü̃ nixĩ i 7 cütagu choxü̃ ícumuxü̃yaexü̃ rü ngẽma 7 cüta i chauyae tá ngẽma naxchiruarü muruü̃wa meamatama cunawãxcu. Rü ngẽxguma i choma rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ —ñanagürü. Rü yexguma ga Daríra rü Chanchóü̃xü̃ ipexẽxẽ. Rü 7 cütagu ínamuxü̃ ga nayae nawa ga yema naxchiruarü muruxü̃.
14 Rü yemawena rü meama nanapu ga yema naxchiruarü muruxü̃. Rü ñu̱xmachi aita ixü rü ngĩgürügü: —Pa Chanchóü̃x, Firitéugü rü cuxca̱x ínayaxüãchi —ngĩgürügü. Rü yexguma nayuxnagü ga Chanchóü̃ rü nanapu ga yema naxchiruarü muruxü̃ ga nayae nawa nadachapa̱xaxü̃.
15 Rü yexguma ga ngĩma ga Daríra rü Chanchóü̃xü̃ ngĩgürügü: —Idorata̱a̱xüchixü̃. ¿Rü ñuxãcü chomaxã nüxü̃ quixu nax cuchoxwa̱xexü̃? Rü marü tomaepü̱xcüna nixĩ i choxü̃ cuwomüxẽẽxü̃ rü ñomarüta tama chomaxã nüxü̃ quixu nax ngextá ne naxũxü̃ i ngẽma curü pora —ngĩgürügü.
16 Rü ngĩma ga Daríra rü wüxichigü ga ora nüxü̃ ica̱a̱xü̃echa rü yemaca̱x ga nüma ga Chanchóü̃ rü düxwa tama yáxna namaxã naxĩnü rü yuxgu nügümaxã narüxĩnü.
17 Rü düxwa Daríramaxã nüxü̃ nixu rü ñanagürü: —Chorü bucürüwa taxúema choxü̃ tiyoeru, yerü naxü̃pa ga nax chabuxü̃ rü Tupanaca̱xtama woe íchaxüxüchi. Natürü ngẽxguma chi choxü̃ yayoerugügu rü ngẽxguma i choma rü tá íchanaturaãchi rü ngexü̃rüüxü̃ i duü̃xü̃rüü̃mare tá chixĩ —ñanagürü.
18 Rü yexguma ga Daríra rü nüxü̃ nax nacuáxü̃ rü aixcümaxü̃ ngĩmaxã nax yaxuxü̃ ga Chanchóü̃ rü Firitéugüarü ãẽ̱xgacügüca̱x íyacaxẽxẽ, rü ngĩgürügü: —¡Ñu̱xmawaxix nua pexĩ! Erü Chanchóü̃ rü marü chomaxã nüxü̃ nixu nax ngextá nüxü̃́ nangẽxmaxü̃ i norü pora —ngĩgürügü. Rü yexguma ga Firitéugüarü ãẽ̱xgacügü rü yéma naxĩ ngĩmaxã ga yema diẽru ga ngĩxna ngĩxü̃ naxuaxü̃gücü.
19 Rü yexguma ga Daríra rü Chanchóü̃xü̃ ngĩgüperemawa inapexẽxẽ. Rü wüxi ga yatüca̱x ica nax yayoõxü̃ca̱x ga yema 7 cüta ga nayae. Rü ñu̱xmachi ga ngĩma rü inaxügü ga nax nacua̱i̱xãxü̃.
20 Rü aita ixü rü ngĩgürügü: —Pa Chanchóü̃x, Firitéugü rü cuxca̱x ínayaxüãchi —ngĩgürügü. Rü nüma ga Chanchóü̃ rü naba̱i̱xãchi. Rü nagu narüxĩnü ga yema togü ga ngunexü̃gurüxü̃ nügü nax ínapoxü̃xü̃, natürü tama nüxü̃ nacua̱x ga Cori ya Tupana rü marü nüxna nax yaxũgachixü̃.
21 Rü yexguma ga nümagü ga Firitéugü rü nayayauxgü rü nanacaxü̃xetügü. Rü ĩane ga Gáchawa nanagagü ga ngextá cadéna ga bróũchenaxca̱xmaxã ínangaxü̃güaxü̃wa. Rü poxcupataü̃arü caerúxü̃arü dixeguwa nanapuracüxẽẽgü.
22 Natürü ga yema nayae ga Chanchóü̃ rü inanaxügü nax wena nayaxü̃.
Chanchóü̃arü yuxchiga
23 Rü nümagü ga Firitéugüarü ãẽ̱xgacügü rü nataãẽgü rü nanaxüchíügü ga Chanchóü̃xü̃ nax yayauxgüxü̃. Rü norü tupana ga Dagóü̃ca̱x naxü̃na nadai rü ñu̱xũchi naxca̱x ínanagu. Rü ñaãcü nawiyaegü: —Tórü tupana rü taxme̱xgu nananguxẽxẽ i tórü uanü i Chanchóü̃ —ñanagürügü.
24 Rü yexguma yema togü ga Firitéugü nüxü̃ daugügu, rü nümagü rü ta nawiyaegü rü norü tupanaxü̃ nicua̱xüü̃gü rü ñanagürügü: —Tórü tupana rü taxme̱xgu nananguxẽxẽ i tórü uanü i Chanchóü̃ ga tórü naanegü chixexẽẽxü̃ rü tamücügü tüxü̃ daixü̃ —ñanagürügü.
25 Rü poraãcüxüchi nataãẽgü, rü yemaca̱x Chanchóü̃ca̱x ínacagü nax nape̱xewa nagagüãxü̃ca̱x rü nagu nax yadauxcüraxü̃güxü̃ca̱x. Rü poxcupataü̃wa Chanchóü̃xü̃ ínagaxüchigü rü norü tupanapatawa nanagagü. Rü taxre ga caxtaarü ngaxü̃gu nanachixẽẽgü. Rü yéma ĩnüca̱xü̃ nayaxĩxẽẽgü rü nagu nidauxcüraxü̃gü.
26 Rü yexguma ga nüma ga Chanchóü̃ rü yema buxü̃ ga yapuchigüxü̃xü̃ ñanagürü: —¡Yima taxre ya caxtagü ya daa ngutaque̱xepataü̃arü ngãxü̃wa ngẽxmagünegu choxü̃ ingĩxẽxẽ nax yimagu changũxü̃xü̃ca̱x! —ñanagürü.
27 Rü guxü̃ma ga Firitéugüarü ãẽ̱xgacügü rü nawa nayexmagü ga guma ngutaque̱xepataxü̃ ga yatüxü̃gümaxã rü ngexü̃gümaxã ããcune. Rü dauxnawa nayexmagü ga 3,000 ga duü̃xü̃gü ga yéma nüxü̃ rüdaunüxü̃ ga yema Chanchóü̃gu idauxcüraxü̃güxü̃ ga ñatüchiü̃wa.
28 Rü yexguma ga nüma ga Chanchóü̃ rü Cori ya Tupanana naca rü ñanagürü: —¡Cuxü̃ chaca̱a̱xü̃, Pa Corix, rü ñu̱xmarica choxna nacua̱xãchi rü pora choxna naxã nax chaugü chaxütanüxü̃ca̱x naxca̱x ga guma taxre ga chauxetü ga Firitéugü choxü̃́ caxü̃ne! —ñanagürü.
29 Rü ñu̱xũchi naxme̱xmaxã naxca̱x nangógü ga gumá taxre ga caxta ga ngãxü̃wa ügüne ga guma ngutaque̱xepataxü̃ nagu ütaxü̃ne, rü gumagu ningĩgü ga naxme̱xgü.
30 Rü aita naxü rü ñanagürü: —¡Chomaxã wüxigu nayue i Firitéugü! —ñanagürü. Rü yexguma rü guxü̃ma ga norü poramaxã nüxü̃ nacu̱xneta ga guma taxre ga caxta. Rü guma ngutaque̱xepataxü̃ rü naétügu nangu ga yema Firitéugüarü ãẽ̱xgacügü, rü guxü̃ma ga duü̃xü̃gü ga yéma yexmagüxü̃. Rü yema namaxü̃gu nada̱i̱xü̃arü yexera narümumae ga yema Firitéutanüxü̃ ga Chanchóü̃ daixü̃ ga yexguma nayu̱xgu.
31 Rü yemawena rü ínangugü ga naenexẽgü rü natanüxü̃ ga Chanchóü̃. Rü nanayauxgü ga naxü̃ne. Rü nanatü ga Manóa ítáxü̃gu nayata̱xgü ga Chorá rü Etaóü̃arü ngãxü̃wa. Rü 20 ga taunecü nixĩ ga Chanchóü̃ ga Iraétanüxü̃maxã inacuáxü̃.
