Jueces 17:1-13
17 Nayexma ga wüxi ga yatü ga Micaíagu ãégacü ga Efraíü̃arü ma̱xpǘneanewa maxü̃cü.
2 17:2-3 Rü wüxi ga ngunexü̃gu rü naéxü̃ ñanagürü: —Cuxü̃ chaxĩnü nax chixexü̃ namaxã quixugüxü̃ i ngẽma ngĩ́ta̱xaxü̃ i 1,100 tachinü i curü diẽruca̱x ngĩ́xü̃. Natürü choma nixĩ ga cuxü̃́ tümaca̱x changĩ́xü̃ rü daxe tixĩ, rü cuxü̃́ tüxü̃ chatáeguxẽxẽ i ñu̱xmax. Erü cuxü̃ chaxĩnü nax Tupanamaxã nüxü̃ quixuxü̃ nax wüxíexü̃ tá cumuxü̃ nax naiwa cuxü̃́ naxüaxü̃ca̱x i wüxi i naxchicüna̱xã i ngẽma diẽrumaxã pexenexü̃ —ñanagürü. Rü yemaacü naéaxü̃́ tüxü̃ natáeguxẽxẽ ga guxema diẽru. Rü ngĩma ga naé rü ngĩgürügü: —¡Tupana cuxü̃ rüngü̃xẽxẽ, Pa Chaunex! —ngĩgürügü.
3 Nüü̃ nadau 17:2
4 Nawena nax Micaía naéaxü̃́ tüxü̃ taeguxẽẽxü̃ ga guxema diẽru, rü ngĩma ga naé rü wüxi ga naxchicüna̱xãarü üruü̃na ngĩxü̃ ixã ga 200 tachinü ga diẽru nax ngĩxü̃́ naxüaxü̃ca̱x i wüxi i naxchicüna̱xã i nainaxca̱x i diẽrumümaxã tüxünexü̃. Rü yexguma marü yanguxgu rü Micaíapatagu iyaxǘ.
5 Yerü nüma ga Micaía rü napatawa nüxü̃́ nayexma ga wüxi ga nachica ga naxchicüna̱xãgüxü̃mare nawa yacua̱xüüxü̃. Rü yema nachicawa rü nüxü̃́ nayexma ga toamachigü ga naxchicüna̱xãgü rü wüxi ga naxchiru ga chacherdótearü efóx ixĩxü̃. Rü ñu̱xũchi wüxi ga nanexü̃ naxuneta nax norü chacherdóte yixĩxü̃ca̱x.
6 Rü yexgumaü̃cüxü nüma ga Iraétanüxü̃ rü nangearü ãẽ̱xgacüã̱x. Rü yemaca̱x ga wüxichigü rü nüma nagu naxĩnüexü̃ naxüemare.
7 Rü yexgumaü̃cüxü rü Yudáanearü ĩane ga Beréü̃wa nayexma ga wüxi ga ngextü̱xücü ga tama yémacüã̱x ixĩcü. Rü nüma rü Lebítanüxü̃ nixĩ.
8 Rü nüma ga gumá ngextü̱xücü rü ínaxũxũ ga Beréü̃wa rü naxca̱x nayadau ga to ga nachica ga nagu naxãchiü̃xü̃. Rü yemaca̱x Efraíü̃arü ma̱xpǘneanegu nixũãgüchigü rü Micaíapatawa nangu.
9 Rü nüma ga Micaía rü nüxna naca rü ñanagürü: —¿Ngextá ne cuxũ? —ñanagürü. Rü nüma ga gumá ngextü̱xücü rü nanangãxü̃ rü ñanagürü: —Choma rü Beréü̃ ya Yudáanewa ngẽxmanewa nixĩ i ne chaxũxü̃. Rü choma rü Lebítanüxü̃ chixĩ, rü wüxi i nachicaca̱x chadau i nagu chaxãchiü̃xü̃ —ñanagürü.
10 Rü yexguma nüma ga Micaía rü nüxü̃ ñanagürü: —Name nixĩ i nua chauxü̃tawa cumaxü̃ nax chorü chacherdóte quixĩxü̃ rü ñoma chaunatürüxü̃ quixĩxü̃. Rü choma rü tá 10 tachinü i diẽrumaxã cuxü̃́ chanaxütanü i wüxichigü ya taunecü. Rü ngẽxgumarüxü̃ tá ta cuxna chanaxã i naxchiru rü õna —ñanagürü.
11 17:11-12 Rü gumá ngextü̱xücü rü naxca̱x name, rü Micaíaxü̃tawa nayexma. Rü ñoma wüxi ga nanerüxü̃ nixĩ. Rü nüma ga Micaía rü norü chacherdótexü̃ nayaxĩxẽxẽ rü yemaacü ga nüma rü Micaíaxü̃tawa namaxü̃.
12 Nüü̃ nadau 17:11
13 Rü nüma ga Micaía rü nagu narüxĩnü rü Tupana rü tá nüxü̃ narüngü̃xẽxẽ yerü nüxü̃́ nayexma ga norü chacherdóte ga Lebítanüxü̃ ixĩxü̃.
