Jueces 19:1-30
19 Yexguma nataxuxguma ga ãẽ̱xgacü ga Iraétanüxü̃tanüwa, rü wüxi ga Lebítanüxü̃ rü Efraíü̃arü máxpü̱xanexü̃ ga yáxü̃negu naxãchiü̃. Rü wüxi ga nge ga Yudáanearü ĩane ga Beréü̃cüã̱xmaxã naxããrüã̱x.
2 19:2-3 Natürü wüxi ga ngunexü̃ rü namaxã inu rü ngĩnatüchiü̃ca̱x itaegu ga Beréü̃wa. Rü yexguma marü ãgümücü ga tauemacü ngĩnatüchiü̃wa nayexmagu, rü nüma ga yema Lebítanüxü̃ rü ngĩwe narüxũ nax ngĩxü̃ yanangüxmüxẽẽxü̃ca̱x rü nataeguxü̃ca̱x. Rü yéma nanaga ga wüxi ga norü duü̃xü̃ rü ñu̱xũchi taxre ga búrugü. Rü ngĩma rü mea inayaxu ga ngĩnatüpatawa.
3 Nüü̃ nadau 19:2
4 19:4-5 Rü ngĩnatü rü ta taãẽãcü tanayaxu rü ñu̱xũchi nüxna taxu nax tümaxü̃tawa nayexmaxü̃ca̱x. Rü nüma ga Lebítanüxü̃ rü norü duü̃xü̃ rü tomaepü̱x ga ngunexü̃ ngĩnatüpatawa nayexmagü rü nachibüe rü naxaxegü rü yexma napegü. Rü norü ãgümücü ga ngunexü̃gu rü pa̱xmamaxü̃chi naba̱i̱xãchie nax nawoeguxü̃ca̱x. Natürü yexguma marü nawoeguchaü̃gu rü ngĩnatü ga yema ngecü rü tümaã̱xtexü̃ ñatagürü: —Nachibüxíra naxü̃pa nax cutaeguxü̃, rü marü name nax wüxi i paũchipe̱xe cungṍxü̃ nax ngẽmaãcü cuporaxü̃ca̱x —ñatagürü.
5 Nüü̃ nadau 19:4
6 Yema taxre rü wüxigu ínarütogü nax nachibüexü̃ca̱x rü ñu̱xũchi naxaxegüxü̃ca̱x. Rü ngĩnatü rü nüxü̃ ñatagürü: —¿Taxũ chi name i ñu̱xmarica ñaa chütaxü̃ nua cungexma nax wüxigu itaãẽgüxü̃ca̱x? —ñatagürü.
7 Rü nüma ga Lebítanüxü̃ rü woo pa̱xmamaxü̃chi nax ínadaxü̃ nax nataeguxü̃ca̱x, natürü ga na̱xtü rü yexma tayachuxchigüama rü düxwa tama nataegu.
8 Rü norü wüxime̱e̱xpü̱x ga ngunexü̃gu rü nüma ga yema Lebítanüxü̃ rü pa̱xmamaxü̃chi ínarüda nax nataeguxü̃ca̱x. Natürü guxema ngĩnatü ga yema ngecü rü wena nüxna taxu nax nachibüxíraxü̃ naxü̃pa nax inaxũãchixü̃ nax yemaacü naporaxü̃nexü̃ca̱x. Rü nüma rü wüxigu nachibüe, rü düxwa nayáuane.
9 Rü yexguma chibüwa inachixgu ga Lebítanüxü̃ nax nataeguxü̃ca̱x ngĩmaxã ga yema nge ga ngĩmaxã naxããrüã̱xcü rü namaxã ga norü duü̃xü̃, rü tüma ga na̱xtü rü ñatarügü: —¡Nuxãtama rüxã̱ũ̱x erü marü nachütachaü̃! ¡Rü nua nangupetüxẽxẽ i ñaa chütaxü̃ nax mea cupexü̃ca̱x! ¡Rü moxü̃ pa̱xmama írüda nax cupataca̱x cutaeguxü̃ca̱x! —ñatarügü.
10 19:10-11 Natürü nüma ga Lebítanüxü̃ rü tama to ga chütaxü̃ yexma narüxã́ũxchaxü̃. Rü yemaacü inaxũãchiama ngĩmaxã ga yema nge ga ngĩmaxã naxããrüã̱xcü rü namaxã ga norü duü̃xü̃ rü ñu̱xũchi yema taxre ga norü búrugü ga toruxü̃ã̱xgüxü̃. Rü yexguma Yerucharéü̃wa nangugügu rü yema norü duü̃xü̃ rü ñanagürü nüxü̃: —¿Ñuxũ ñacuxü̃ i cumax ega chi daa Yebútanüxü̃arü ĩanegu ipegügu? —ñanagürü.
11 Nüü̃ nadau 19:10
12 19:12-13 Rü nüma ga Lebítanüxü̃ rü nanangãxü̃ rü ñanagürü: —Taxũtáma wüxi ya ĩane ya tama Iraétanüxü̃arü ĩanegu tayapegü. ¡Rü ngĩxã itaxĩ ñu̱xmatáta Guibeáwa ingugü! Rü narümemae nixĩ nax Guibeágu rüe̱xna Ramágu yarüpegüxü̃ —ñanagürü.
13 Nüü̃ nadau 19:12
14 Rü yemaacü inaxĩãma rü yexguma marü yanaxücu̱xgu ga üa̱xcü rü Guibeáwa nangugü. Rü guma ĩane rü Bẽyamíü̃tanüxü̃arü ĩane nixĩ.
15 Rü yemaacü nüxna ínachocu ga yema nama rü Guibeágu nachocu nax yéma nangupetügüxẽẽãxü̃ca̱x ga chütaxü̃. Rü nüma ga yema Lebítanüxü̃ rü guma ĩanearü plazawa nayarüto, yerü nataxuma ga duü̃xü̃ ga nügüxü̃ta napexẽẽxü̃.
16 Rü düxwa marü nachütagu yéma taxüpetü ga wüxi ga o̱xi ga tümaanewa puracüwa ne ũxẽ. Rü guxema o̱xi rü Efraíü̃tanüxü̃arü ma̱xpǘnecüã̱x tixĩ. Rü yexma Guibeágu taxãchiü̃ woo tama yémacüã̱x tixĩ. Rü yema duü̃xü̃gü ga Guibeáwa maxẽxü̃ rü Bẽyamíü̃tanüxü̃ nixĩgü.
17 Rü yexguma guxema o̱xi plazawa nüxü̃ da̱u̱xgu ga yema Lebítanüxü̃ ga yéma ngucü, rü nüxna taca rü ñatarügü: —¿Ngextá nixĩ i ne cuxũxü̃ rü ñu̱xũchi ngextá tá cuxũ? —ñatagürü.
18 Rü nüma ga Lebítanüxü̃ rü nanangãxü̃ rü ñanagürü: —Rü Yudáanewa ngẽxmane ya ĩane ya Beréü̃wa ne taxĩ rü ñu̱xmax rü nua tachopetümare. Rü yima Efraíü̃tanüxü̃arü ma̱xpǘne ya yáxü̃wa ngẽxmanewa taxĩ erü choma rü yimagu nixĩ i chaxãchiü̃xü̃. Rü Beréü̃gu chanaxũane rü ñu̱xma rü chopataca̱x chataegu. Natürü nua rü taxúxexü̃ma ichayangau nax texé tügüxü̃ta choxü̃ pexẽẽxü̃.
19 Toxü̃́ nangẽxma ya maxẽ ya pacü nawemüxü̃ i búrugü. Rü cha̱u̱xca̱x rü cho̱xma̱xca̱x rü choxrü duü̃xü̃ca̱x toxü̃́ nangẽxma i paũ rü bínu. Rü taxuxü̃ma toxü̃́ nataxu —ñanagürü.
20 Natürü guxema o̱xi rü tanangãxü̃ rü ñatagürü: —Choma rü tá mea pexü̃ chayaxu. Rü tá pexü̃ charüngü̃xẽxẽxü̃ i guxü̃ma i ta̱xacü i pema penaxwa̱xexü̃wa. Rü tama chanaxwa̱xe nax plazagumare quingunexü̃ —ñatarügü.
21 Rü yemaca̱x nüma ga o̱xi rü napatawa nanagagü. Rü yexguma nügü íyayauxcutügüyane rü ínachibüeyane rü naxaxegüyane, rü nüma ga o̱xi rü yoxni yema norü búrugüxü̃ nachibüexẽxẽ.
22 Rü yexguma ínataãẽgüyane, rü ñuxre ga yatügü ga chixexü̃gu maxẽxü̃ ga guma ĩanewa rü o̱xipataxü̃ ínachomaeguãchi rü norü ĩã̱xwa nanacua̱i̱xcagü, rü ñanagürügü o̱xixü̃: —¡Ínamuxũchi i ngẽma yatü i cuxü̃tawa nguxü̃! Erü tanaxwa̱xe nax namaxã ngúchaü̃ taxüexü̃ —ñanagürügü.
23 Natürü ga guxema ĩpataarü yora rü nüxü̃ ñatagürü: —¡Taxṹ, Pa Chomücügüx, i chixexü̃gu perüxĩnüexü̃! ¡Taxṹ i penaxüxü̃ i ngẽma chixexü̃! Erü yima yatü rü choma nüxna chaxu nax chopatawa nanguxü̃ca̱x.
24 ¡Dücax, ñaa iyixĩ i chauxacü i taguma yatüxü̃ cua̱xcü rü ñaa iyixĩ i ngẽma ngĩmaxã naxããrüã̱xcü ya yima yatü! Rü tá pexca̱x ngĩxü̃ íchamuxü̃. ¡Rü ngẽmamaxã penaxü̱x i perü ngúchaü̃! Natürü tama chanaxwa̱xe ya daa yatü ya chauxü̃tawa ngucümaxã penaxü i ngẽma chixexü̃ —ñanagürü.
25 Natürü ga nümagü rü tama guxema o̱xiga naxĩnüechaü̃. Rü düxwa ga guma Lebítanüxü̃ rü guxema tümamaxã naxããrüã́xẽ tüxü̃ ínamuxũchi. Rü nüma ga yema yatügü rü tümamaxã namaxẽ guxü̃ma ga yema chütaxü̃ rü ñu̱xmata yangunemare. Rü yemaacü yéma tüxü̃ nata̱xgü.
26 Rü yexguma marü yangunechaü̃gu ga yema nge rü o̱xipataca̱x íitaegu ga yema ngĩte íyexmaxü̃wa. Rü yuxe yema ĩã̱xü̃tagu tayangu.
27 Yexguma pewa naba̱i̱xãchigu ga tümate rü nayawãxna ga yema ĩã̱x nax inaxũãchixü̃ca̱x. Rü yexma ĩã̱xü̃tagu yangücuchicü ngĩxü̃ inayangau ga yema nge ga ngĩmaxã naxããrüã̱xcü.
28 Rü ngĩxü̃́ ñanagürü: —¡Inachi rü ngĩxã itaxĩãchi! —ñanagürü. Natürü ga ngĩma rü tama inangãxü̃ yerü marü iyu. Rü yexguma ga nüma rü wüxi ga búrutagu ngĩxü̃ naxünagü. Rü nachiü̃wa nanange ga ngĩxĩne.
29 Rü yexguma napatawa nanguxgu rü wüxi ga cüxchi ngĩxü̃ nayaxu rü 12 gu inananawíü̃gü ga ngĩxü̃ne ga yema nge. Rü guxü̃ma ga Iraétanüxü̃tücumügüarü naanegu nayanu ga ngĩmachi.
30 Rü guxü̃ma ga yema nüxü̃ daugüxü̃ rü ñanagürügü: —Yexguma Equítuanewa ínachoxü̃gu ga Iraétanüxü̃ rü taguma nañu̱xmaraü̃xü̃xü̃ tadaugü. Rü name i nagu tarüxĩnüe nax ta̱xacü tá ixüxü̃ naxca̱x i ngẽma —ñanagürügü.
