Jueces 2:1-23
2 2:1-2 Rü Tupanaarü orearü ngeruxü̃ i dauxü̃cüã̱x rü Guirigáwa inaxũãchi rü Boquíü̃wa naxũ rü yéma Iraétanüxü̃xü̃ ñanagürü: —Choma nixĩ ga Equítuanewa pexü̃ íchagaxü̃, rü ñaa naane ga perü o̱xigümaxã nüxü̃ chixuxü̃wa pexü̃ chagagüxü̃. Yerü yexguma perü o̱xigümaxã nüxü̃ chixuxgu rü ñachagürü: “Ngẽma chorü uneta i pemaxã nüxü̃ chixuxü̃ rü tagutáma ichayanaxoxẽxẽ. Natürü tama chanaxwa̱xe i pema nax ta̱xacürü uneta namaxã pexügüxü̃ i ngẽma duü̃xü̃gü i ngéma maxẽxü̃. Rü ngẽma chanaxwa̱xexü̃ nixĩ nax nagu pepogüexü̃ i ngẽma norü ãmarearü guruü̃gü”, ñachagürü. Natürü i pema rü tama chauga pexĩnüe. ¡Rü dücax, nüxü̃ peda̱u̱x i ngẽma pexüxü̃!
2 Nüü̃ nadau 2:1
3 Ngẽmaca̱x ñu̱xmax rü pemaxã nüxü̃ chixu: “Rü taxũtáma pepe̱xewa íchanawoxü̃ i ngẽma duü̃xü̃gü. Rü nümagü rü ñu̱xmachi norü tupananetagü rü wüxi i perü toxyepe̱xeruxü̃ tá nixĩgü”, pemaxã nüxü̃ chixu —ñanagürü.
4 Rü yexguma yagúegagu ga yema Tupanaarü orearü ngeruxü̃ i dauxü̃cüã̱x, rü guxü̃ma ga Iraétanüxü̃ rü naxauxe rü tagaãcü aita naxüe.
5 Rü yemaca̱x ga yema nachica rü Boquíü̃gu nanaxüégagü.* Rü yema nachicawa Tupanaca̱x ínanagugü ga ãmaregü.
Nayu ga Yochué
6 Rü yexguma Yochué Iraétanüxü̃xü̃ íyamugügu, rü wüxichigü ga natücumü rü ínixĩ nax nayauxgüãxü̃ca̱x ga yema norü naane ga nüxna üxü̃.
7 Rü yexguma Yochué maxü̱̃xgu rü nüma ga yema Iraétanüxü̃ rü mea Tupanaga naxĩnüe rü naxca̱x namaxẽ. Rü woo ga Yochuéwena rü mea naga naxĩnüe ga yexguma taxũta nayuegu ga yema Iraétanüxü̃arü yaxguã̱xgü ga nüxü̃ daugüxü̃ ga yema taxü̃ ga mexü̃gü ga Cori ya Tupana naxca̱x üxü̃.
8 Rü nüma ga Yochué rü nayu ga yexguma 110 ga taunecü nüxü̃́ yexmagu.
9 Rü norü naanegutama nayata̱xgü ga Tináx-chéraarü ĩanewa ga Gaáxarü ma̱xpǘnearü nórtewa üxü̃ ga Efraíü̃arü naane ga máxpü̱xanexü̃wa.
10 Rü yexgumarüxü̃ ta nayue ga yema Iraétanüxü̃ ga Yochué maxü̱̃xgu maxẽxü̃. Rü yemaacü ga yema wixweama buexü̃ rü tama Cori ya Tupanaxü̃ nacua̱xgü rü tama nüxü̃ nacua̱xgü ga yema mexü̃gü ga Iraétanüxü̃ca̱x naxüxü̃.
Iraétanüxü̃ rü Cori ya Tupanana nixĩgachi
11 Rü nüma ga Iraétanüxü̃ rü Tupanape̱xewa chixexü̃ naxügü, rü inanaxügüe ga Baáchicüna̱xãxü̃ nax yacua̱xüü̃güxü̃.
12 Rü yema Iraétanüxü̃ rü nüxna nixĩgachi ga norü o̱xigüarü Tupana ga Equítuanewa tüxü̃ ínguxü̃xẽẽcü. Rü yema togü ga duü̃xü̃gü ga norü ngaicamagu pegüxü̃arü tupanagüxü̃ nicua̱xüü̃gü. Rü yemaacü Cori ya Tupanaxü̃ nanuxẽẽgü.
13 Rü yema Iraétanüxü̃ rü Cori ya Tupanana nixĩgachi nax yema togü ga duü̃xü̃güarü tupananetagü ga Baá rü Ataréchicüna̱xãgüxü̃ yacua̱xüü̃güxü̃ca̱x.
14 Rü yemaca̱x ga nüma ga Cori ya Tupana rü poraãcü yema Iraétanüxü̃maxã nanu rü nüxna nixũgachi nax yema ingĩ́ta̱a̱xgüxü̃ rü norü yemaxü̃güca̱x nangĩ̱xgüxü̃ca̱x, rü yema norü uanügü ga Iraéanearü ngaicamagu ngẽxmagüxü̃ rü guxü̃guma nüxü̃ naporamaegüxü̃ca̱x. Rü nüma ga Iraétanüxü̃ rü taxucürüwama nügü ínapoxü̃gü.
15 2:15-16 Rü yexguma Iraétanüxü̃ norü uanügümaxã nügü daixgu, rü nüma ga Cori ya Tupana rü nüxü̃́ nanaguxchaxẽxẽ, rü yemaca̱x chixri nüxü̃́ ínanguxuchi yema nümatama ga Cori namaxã naxueguxü̃rüxü̃. Natürü woo yema Iraétanüxü̃ca̱x ínananguxẽxẽ ga guxchaxü̃gü, natürü yemaétüwa rü nüma ga Tupana rü Iraétanüxü̃tanüwa nanangucuxẽxẽ ga ãẽ̱xgacügü nax yema ínapoxü̃güxü̃ca̱x norü uanügüna.
16 Nüü̃ nadau 2:15
17 Natürü nümagü ga Iraétanüxü̃ rü tama naga naxĩnüe ga yema ãẽ̱xgacügü. Rü yexgumarüxü̃ ta tama Cori ya Tupanaga naxĩnüe, rü togümare ga tupanagüxü̃ nicua̱xüü̃gü. Rü nũxcüma ga guxema norü o̱xigü rü Tupanaarü mugüga taxĩnüe, natürü i nümagü rü tama norü o̱xigücümagu naxĩ.
18 Rü yexguma Cori ya Tupana yamucuchixü̃gu ga ãẽ̱xgacü ga namaxã icuáxü̃, rü nüma ga Tupana rü nüxü̃ narüngü̃xẽxẽ ga yema ãẽ̱xgacü, rü yema Iraétanüxü̃xü̃ ínanguxü̃xẽxẽ naxme̱xwa ga norü uanügü. Yerü nüma ga Tupana rü yexguma nüxü̃ naxĩnügu ga nax naxauxexü̃ ga yema duü̃xü̃gü nagagu ga yema guxchaxü̃gü ga yangegüxü̃, rü nüxü̃́ nangechaü̃tümüxü̃gü.
19 Natürü yexguma nayu̱xgu ga yema ãẽ̱xgacü ga Tupana nüxü̃ unetaxü̃, rü nümagü ga Iraétanüxü̃ rü wena chixexü̃ca̱x nawoegu rü nanatügüarü yexera chixexü̃ naxügü rü togümare ga tupananetagüxü̃ nicua̱xüü̃gü. Rü tama nüxü̃ narüxoechaü̃ ga yema chixexü̃ nax naxügüxü̃, rü tama ínanata̱xgüchaü̃ ga nacüma ga chixexü̃.
20 Rü yemaca̱x ga Tupana rü Iraétanüxü̃maxã nanu rü ñanagürü: —Ñaa duü̃xü̃gü rü nayanaxoxẽẽgü ga yema uneta ga norü o̱xigümaxã nüxü̃ chixuxü̃, rü tama chauga naxĩnüechaü̃.
21 Rü ngẽmaca̱x i choma rü taxunetáma ya ĩane Iraétanüxü̃pe̱xewa tá íchawoxü̃ãcu ga guma ĩanegü ga Yochué tama íwoxü̃ãcune naxü̃pa ga nax nayu̱x —ñanagürü.
22 Rü ngẽma guxchaxü̃maxã nüxü̃ naxü i ngẽma Iraétanüxü̃ rü aixcüma tá yema nüxíraxü̃güxü̃ ga Iraétanüxü̃rüxü̃ naga naxĩnüe rüe̱xna tama.
23 Rü yemaca̱x ga nüma ga Cori ya Tupana rü tama yexgumatama ínanawoxü̃ãcu ga guma ĩanegü ga tama Yochuéme̱xẽwa ínawoxü̃ãcune. Rü yématama nanayexmagüxẽxẽ ga yema duü̃xü̃gü.
Notas
^ 2:5 Rü ngẽma naéga rü Naxauxe ñaxü̃chiga nixĩ.
