Jueces 21:1-25
21 Rü Iraétanüxü̃ rü Mispáwa nügümaxã nanaxuegugü nax tama nanaxwa̱xegüxü̃ nax naxacügü rü Bẽyamíü̃tanüxü̃maxã yaxãtexü̃.
2 Natürü yemawena rü Betégu nangutaque̱xegü, rü yéma Cori ya Tupanape̱xewa nayexmagü ñu̱xmata nachüta. Rü poraãcü nüxü̃́ nangu̱x ga yema Bẽyamíü̃tanüxü̃maxã ngupetüxü̃ rü naxauxe. Rü Cori ya Tupanamaxã narüxutagü rü ñanagürügü:
3 “¡Pa Corix, Pa Torü Tupanax! ¿Tü̱xcüü̃ ñaa toxü̃ nangupetü? ¿Ta̱xacüca̱x ngẽmaãcü tomaxã nangupetü i ñu̱xma nax wüxitücumü i totanüxü̃ i Iraétanüxü̃ natauxexü̃?” ñanagürügü.
4 Moxü̃ãcü pa̱xmama ga Iraétanüxü̃ rü ẽxü̃wama ínarüdagü, rü wüxi ga ãmarearü guruxü̃ naxügü. Rü yemawa Cori ya Tupanaca̱x ínanagu ga norü ãmaregü nax yemaacü Tupana namaxã irüngüxmüxü̃ca̱x.
5 Rü nügüna nacagüe rü ñanagürügü: —¿Texé ga tatanüwa tataxu nawa ga yema ngutaque̱xe ga Mispáwa ixügüxü̃? Yerü yema ngutaque̱xewa rü Tupanape̱xewa tanaxuegugü nax tüxü̃ ida̱i̱xü̃ ga guxema taxue nawa ga yema ngutaque̱xe —ñanagürügü.
6 Nümagü i Iraétanüxü̃ rü poraãcüma naxca̱x nangechaü̃gü ga yema naenexẽgü ga Bẽyamíü̃tanüxü̃xü̃ ngupetüxü̃, rü ñanagürügü: —Ñaa ngunexü̃gu rü Iraétanüxü̃tanüwa inayarüxo i wüxitücumü.
7 ¿Ta̱xacü ixüexü̃ nax yaxãmaxü̃ca̱x i ngẽma Bẽyamíü̃tanüxü̃ i maxẽxü̃? Yixemagü rü Cori ya Tupanape̱xewa tanaxuegu nax tama inaxwa̱xexü̃ nax taxacügü rü namaxã yaxãtegüxü̃.
8 ¿Rü nangẽxma ngürüãchi i Iraé i duü̃xü̃gü ga tama Cori ya Tupanape̱xewa yexmaxü̃ ga Mispáwa ingutaque̱xegügu? —ñanagürügü. Rü nüxna nacua̱xãchie nax yema ngutaque̱xewa natauxexü̃ ga ĩane ga Yabécüã̱xgü ga Garaáxanewa yexmane.
9 Rü guxü̃ma ga yema yexmagüxü̃égaca̱x ínacagü, rü yexguma yema ĩanecüã̱xégawa nangugügu rü taxúema tanangãxü̃.
10 21:10-11 Rü yexguma guxü̃ma ga yema duü̃xü̃gü ga yéma yexmagüxü̃ rü inanamuãchitanü ga 12,000 ga churaragü ga nüxü̃ rücua̱xmaegüxü̃. Rü nüxna naxãgagü nax nadaiaxü̃ca̱x ga guxü̃ma ga Yabécüã̱xgü rü bai ga buxü̃gü ínayaxügü rü bai ga ngexü̃gü ga marü yatüxü̃ cua̱xgüxü̃ ínayaxügü.
11 Nüü̃ nadau 21:10
12 Yéma duü̃xü̃gü ga Yabécüã̱xtanüwa rü nayemagü ga 400 ga paxü̃gü ga taguma yatü nüxü̃ cuáxü̃. Rü Canaáü̃anearü ĩane ga Chilówa ngĩxü̃ nagagü ga Iraétanüxü̃ íyexmagüxü̃wa.
13 Rü guxü̃ma ga yema Iraétanüxü̃ rü nanamu ga ñuxre ga orearü ngeruü̃gü nax yema Bẽyamíü̃tanüxü̃ ga nuta ga Rimóü̃wa yexmagüxü̃maxã nüxü̃ yanaxugüexü̃ca̱x rü marü namexü̃ nax nangüxmüexü̃.
14 Rü yema Bẽyamíü̃tanüxü̃ rü napatagüca̱x nawoegu. Rü nümagü ga Iraétanüxü̃ rü nayaxüxma̱xgü ngĩmaxã ga yema pacügü ga Yabéwa ngĩxü̃ ne nagagücü. Natürü tama iyangu naxca̱x ga guxü̃ma ga Bẽyamíü̃tanüxü̃.
15 Rü nümagü ga Iraétanüxü̃ rü poraãcü Bẽyamíü̃tanüxü̃ca̱x nangechaxü̃gü, yerü Cori ya Tupana rü nanatauxchicaxẽxẽ ga wüxitücumü ga Iraétanüxü̃.
16 Rü Iraétanüxü̃arü ãẽ̱xgacügü rü nügüna nacagüe rü ñanagürügü: —¿Ñuxãcü tá ngexü̃güta irüngauxü̃ naxca̱x i ngẽma Bẽyamíü̃tanüxü̃ i ngẽmaxü̃? Yerü guxcüma ga ngecügü ga Bẽyamíü̃tanüxü̃ rü marü iyue.
17 Rü tama tanaxwa̱xe nax iyanaxoxü̃ i Bẽyamíü̃tanüxü̃. Rü tanaxwa̱xe nax ngẽma íyaxügüxü̃wa wena yamuxü̃ i tatanüxü̃ nax ngẽmaãcü taxuxü̃ma i wüxi i Iraétücumü tauxchicaxü̃ca̱x i tatanüwa.
18 Natürü yixemagü rü taxucürüwama ta̱xacügümaxã tayaxü̱xma̱xgü. Yerü yixema i guxãma i Iraétanüxü̃ rü tanaxuegugü nax taxúxetáma Bẽyamíü̃tanüxü̃xü̃ ümaxü̃, rü texé ya tatanüwa Bẽyamíü̃tanüxü̃xü̃ ümáxe rü Tupana rü tá chixexü̃ tümamaxã naxuegu.
19 Natürü wüxichigü ya taunecügu rü nangẽxma i taxü̃ i peta i Cori ya Tupanaca̱x naxügüxü̃ i Chilówa i Betéarü nórtewa rü nama i Beté rü Chiquéü̃wa daxü̃arü éstewa, rü Lebonáarü súrwa —ñanagürügü.
20 Rü yexguma ga nüma ga Iraétanüxü̃arü ãẽ̱xgacügü rü Bẽyamíü̃tanüxü̃ca̱x nimuga rü ñanagürügü: —¡Rü ñu̱xmatama ipixĩãchi nax úbanecügu i Chilóna ngaicamaxü̃gu peyarücu̱xgü!
21 ¡Rü ngéma pengugütaegü! Rü ngẽxguma ngĩxü̃ pedaugügu i ngẽma Chilócüã̱x i pacügü nax ínachoxü̃xü̃ nax ñaãchixü̃wa naxĩxü̃ca̱x rü ngẽxguma i pemax rü tá ípechoxü̃ i ngẽma ípicu̱xgüxü̃wa. Rü wüxíechigü i pema rü wüxica̱x tá pengĩ̱x rü ngĩmaxã tá pechixü̃anewa pexĩ.
22 Rü ngẽxguma tá tümanatü rüe̱xna tümaenexẽ toxna tümaca̱x nua yacagügu, rü toma rü tá tüxna tachogü rü ñatarügügü tá: “Toma rü wüxi i ngü̃xẽẽca̱x pexna taca nax toxü̃́ penaxüxü̃ca̱x. ¡Rü taxṹ i chixexü̃ namaxã pexüexü̃ i ngẽma Bẽyamíü̃tanüxü̃! Erü tomagü rü yexguma Yabécüã̱xgüxü̃ tadaixgu rü tama muxe ga ngexegüxü̃ tayangaugü nax yemaacü guxü̃ma ga Bẽyamíü̃tanüxü̃xü̃ tixüxma̱xgüxü̃ca̱x. Rü ñu̱xũchi pemax rü tama aixcüma nüxna tüxü̃ pimugü ya pexacügü, rü ngẽmaca̱x tama nixĩ i tama naga pexĩnüexü̃ ga yema uneta ga Tupanape̱xewa ixüxü̃”, ñatarügügü tá —ñanagürügü.
23 Rü nümagü ga Bẽyamíü̃tanüxü̃ rü nanayauxgü ga yema ore ga namaxã nüxü̃ yaxugüexü̃. Rü yemaacü ga wüxichigü rü wüxi ga pacüca̱x nangĩ̱xgü rü ngĩxü̃ niga ga yema iyüxparagücü. Rü norü naaneca̱x ngĩmaxã nawoegu. Rü nanamexẽẽgü ga norü ĩanegü rü wenaxarü nagu nixãpatagü.
24 Rü yema togü ga Iraétanüxü̃ ga yexma ngutaque̱xegüxü̃ rü wüxichigü norü naaneca̱x rü natanüxü̃ca̱x nawoegu.
25 Rü yexgumaü̃cüxü ga Iraétanüxü̃ rü nangearü ãẽ̱xgacüxã̱x. Rü wüxichigü ga yatü rü nüma nagu naxĩnüxü̃ãcü namaxü̃.
