Jueces 3:1-31
3 Rü ñaagü nixĩ ga yema duü̃xü̃gütücumü ga Canaáü̃arü naanewa Cori ya Tupana yéma yaxügüxẽẽxü̃ nax yemaacü nüxü̃ naxüxü̃ca̱x ga yema Iraétanüxü̃ ga taxũta buexü̃ ga yexguma norü o̱xigü Canaáü̃tanüxü̃maxã nügü nadaixgu.
2 Nüma ga Cori ya Tupana rü yéma Canaáü̃arü naanewa nayaxügüxẽxẽ ga yema duü̃xü̃gütücumü nax yemaacü daixü̃ yacuáxü̃ca̱x ga yema Iraétanüxü̃ ga taguma daiwa ĩxü̃.
3 Rü yéma nayaxügü ga 5 ga Firitéugüarü ãẽ̱xgacügü, rü guxü̃ma ga yema Canaáü̃tanüxü̃ ga taxũta napuarü ĩaneã̱xgüxü̃, rü yema Chidóü̃tanüxü̃, rü yema Ebéutanüxü̃ ga máxpü̱xanexü̃ ga Líbanuanewa maxẽxü̃. Rü norü naane ga nawa nayexmagüxü̃ ga yema Ebéutanüxü̃ rü Baá-emóü̃wa inaxügü ñu̱xmata Amáwa nangu.
4 Rü yemagümaxã nixĩ ga Iraétanüxü̃xü̃ naxüxü̃ ga Cori ya Tupana. Erü nüma rü nüxü̃ nacuáxchaü̃ rü aixcüma naga tá naxĩnüe ga yema mugü ga Moichéwa Iraétanüxü̃arü o̱xigüna ãxü̃.
5 Rü yemaacü nixĩ ga Iraétanüxü̃ ga inaxügüãxü̃ nax Canaáü̃tanüxü̃tanüwa, rü Itítanüxü̃tanüwa, rü Amoréugütanüxü̃tanüwa, rü Ferechéutanüxü̃tanüwa, rü Ebéutanüxü̃tanüwa, rü Yebuchéutanüxü̃tanüwa nax namaxẽxü̃.
6 Rü nanegü, rü naxacügü ga yema Iraétanüxü̃ rü yema togü ga duü̃xü̃güacümaxã nixãxma̱x rü nixãte. Rü yemaca̱x yema togü ga duü̃xü̃güarü tupanaxü̃ nicua̱xüü̃gü.
Otonié rü Cucháü̃-richataíü̃me̱xẽwa Iraétanüxü̃xü̃ ínanguxü̃xẽxẽ
7 Rü yema nacümagü ga Iraétanüxü̃ nagu maxẽxü̃ rü Cori ya Tupanape̱xewa rü poraãcü nachixe. Yerü Cori ya Tupanaxü̃ inarüngümae rü Baáchicüna̱xãgüxü̃ rü Acheráchicüna̱xãgüxü̃ nicua̱xüü̃gü.
8 3:8-9 Rü yemagagu nixĩ ga Cori ya Tupana ga Iraétanüxü̃maxã nanuxü̃ rü Cucháü̃-richataíü̃ ga Mechopotámiaarü ãẽ̱xgacüme̱xẽwa nayexmagüxẽẽãxü̃. Rü 8 ga taunecü yema ãẽ̱xgacüme̱xẽwa nayexmagü rü nüxü̃́ napuracüe ñu̱xmata wena Cori ya Tupanana nacua̱xãchie rü nüxü̃ naca̱a̱xü̃gü nax ínanguxü̃xẽẽãxü̃ca̱x. Rü nüma ga Cori ya Tupana rü Otoniéxü̃ naxuneta nax Iraétanüxü̃xü̃ ínanguxü̃xẽẽxü̃ca̱x. Rü Otonié rü Quená nane nixĩ. Rü nüma ga Quená rü Caréxenexẽ ga rübumaecü nixĩ.
9 Nüü̃ nadau 3:8
10 Rü Cori ya Tupanaãxẽ rü Otoniéwa nangu. Rü nüma ga Otonié rü Iraétanüxü̃maxã inacua̱x. Rü inaxũãchi nax Cucháü̃-richataíü̃maxã nügü yadaixü̃. Rü Cori ya Tupana rü pora nüxna naxã rü Cucháü̃-richataíü̃ narüporamae.
11 Rü yemawena rü 40 ga taunecü taguma nayexma ga dai ga yema naanewa. Rü yemawena nayu ga Otonié ga Quená nane.
Aóx rü Iraétanüxü̃xü̃ ínanguxü̃xẽxẽ Moáme̱xẽwa
12 Nawena ga nax nayuxü̃ ga Otonié, rü Iraétanüxü̃ rü wenaxarü Cori ya Tupanape̱xewa chixexü̃ i nacümagu namaxẽ. Rü yemaca̱x nüma ga Cori ya Tupana rü Eglóü̃ ga Moáanearü ãẽ̱xgacüna pora naxã nax Iraétanüxü̃xü̃ naporamaexü̃ca̱x.
13 Rü nüma ga Eglóü̃ rü Amóü̃tanüxü̃na rü Amaréxtanüxü̃na naxu nax nüxü̃ nangü̃xẽẽgüxü̃ca̱x nax Iraétanüxü̃xü̃ nada̱i̱xü̃ nax yemaacü yapugüãxü̃ca̱x ga guma ĩane ga Yericú ga Cucunecügu ãégane.
14 3:14-15 Rü yema Iraétanüxü̃ rü 18 ga taunecü Eglóü̃me̱xẽwa nayexmagü rü nüxü̃́ napuracüe ñu̱xmata wena Cori ya Tupanana nacua̱xãchie rü nüxü̃ naca̱a̱xü̃gü nax ínanguxü̃xẽẽãxü̃ca̱x. Rü nüma ga Cori ya Tupana rü Aóx ga Guerá nanexü̃ naxuneta nax Iraétanüxü̃xü̃ nangü̃xẽẽxü̃ca̱x. Rü nüma ga Aóx rü nato̱xwechacüxü rü Bẽyamíü̃tanüxü̃ nixĩ. Rü wüxi ga ngunexü̃ rü nüma ga Iraétanüxü̃ rü Aóxü̃ namu nax yaxütanüãxü̃ca̱x ga yema diẽru ga ãẽ̱xgacü ga Eglóü̃ nagu unetaxü̃.
15 Nüü̃ nadau 3:14
16 3:16-17 Natürü naxü̃pa ga nax inaxũachixü̃ ga Aóx rü wüxi ga tara ga taxrewa ãmaguxü̃ ga ngãxü̃ ga metrugu ixüxü̃ naxü. Rü norü goyexü̃wa nanatuxẽxẽ ga norü tügünecüwawa. Rü ñu̱xũchi inaxũãchi nax Iraétanüxü̃arü ngetanü yaxütanüxü̃ca̱x naxü̃tawa ga ãẽ̱xgacü ga Eglóü̃ ga íngüxüchixü̃.
17 Nüü̃ nadau 3:16
18 Nawena ga nax marü Eglóü̃axü̃́ naxütanüãxü̃ ga yema ngetanü, rü nüma ga Aóx rü ínaxũxũ namaxã ga yema íyaxümücügüxü̃.
19 Natürü yexguma nawa nanguxgu ga yema tupananetachicüna̱xãgü íyexmagüxü̃wa ga Guirigáarü ngaicamana, rü nüma ga Aóx rü nataegu. Rü ãẽ̱xgacü ga Eglóü̃xü̃tawa naxũ rü ñanagürü nüxü̃: —Choxü̃́ nangẽxma i wüxi i ore i cumaxã nüxü̃ chixuxchaü̃xü̃, Pa Ãẽ̱xgacüx, natürü chanaxwa̱xe i cuxicatama cumaxã nüxü̃ chixu —ñanagürü. Rü nüma ga ãẽ̱xgacü nanamu ga yema norü ngü̃xẽẽruü̃gü nax yaxĩgachitanüxü̃ca̱x. Rü guxü̃ma ga duü̃xü̃gü ga yéma yexmagüxü̃ rü nixĩgachitanü.
20 Rü nüma ga Eglóü̃ rü nüxicatama yema norü ucapu ga nanaianegu nagu yanaxã̱xũũxü̃wa nayarüto. Rü nüma ga Aóx rü Eglóü̃ca̱x nixũ rü ñanagürü nüxü̃: —Ngẽma ore i cuxca̱x nua changexü̃ rü Cori ya Tupana nua cuxca̱x muxü̃ nixĩ —ñanagürü. Rü yemaxü̃ naxĩnügu ga Eglóü̃ rü inachi ga norü tochicaxü̃wa.
21 Natürü Aóx rü nato̱xwechacüxü, rü yemaca̱x bexma norü to̱xwechacüümaxã ngĩxü̃ nanatúuchi ga yema tara ga norü tügünecüwawa yexmacü rü Eglóü̃pütüwewa ngĩxü̃ narüwa̱xẽxẽ.
22 Rü poraãcüma ngĩxü̃ ínipocuchi rü ñu̱xmata guxü̃ma i ngĩxchaquexü̃maxã íiyangaxi. Rü Eglóü̃xü̃negu iyarütaxu ga yema tara yerü ningüxüchiama. Rü yemaca̱x ga norü tara rü tama ngĩxü̃ nayatuxuchi.
23 Nawena nax Eglóü̃xü̃ nayamáxü̃ ga Aóx, rü nanawãxtagü ga ĩã̱xgü norü chotaruxü̃gümaxã. Rü ñu̱xũchi nüma rü beü̃tánawa ínaxũxũ.
24 Rü yexguma Aóx marü taeguxguwena rü yéma naxĩ ga ãẽ̱xgacü ga Eglóü̃arü ngü̃xẽẽruü̃gü rü nüxü̃ inayangaugü ga ĩã̱xgü ga rüwãxtagüxü̃. Rü yemaca̱x ga yema norü ngü̃xẽẽruü̃gü nagu narüxĩnüe nax gumá ãẽ̱xgacü rü norü wo̱e̱xtaü̃wa naxũxü̃, rü yemaca̱x yexma nügü narüwãxtaxü̃ nagu ga yema ucapu ga nanaianegu nagu yanaxã̱xũũxü̃.
25 Natürü nax yéma nangu̱xẽẽgüechaãxü̃, rü düxwa naxoegaãẽgü, yerü ga norü ãẽ̱xgacü rü taxucüma ínaxũxũ. Rü yemaca̱x chawi nayauxgü rü nayawãxnagü ga ĩã̱x, rü nüxü̃ inayangaugü ga norü ãẽ̱xgacü ga ĩxmachiü̃gu idacü.
26 Rü yexguma yema duü̃xü̃gü rü norü ãẽ̱xgacüxü̃ ínanguxẽẽgüyane, rü nüma ga Aóx rü yoxni niña. Rü yexguma marü nüxü̃ nagopetügu ga yema tupananetachicüna̱xãgü ga Guirigáarü ngaicamana yexmagüxü̃, rü nüma ga Aóx rü Cheiráxgu nayarücu̱x.
27 Rü yexguma Iraégüarü naanewa nanguxgu, rü Efraíü̃arü máxpü̱xanexü̃wa cornétagu nayarücue nax yemaacü Iraétanüxü̃ca̱x naca̱xaxü̃. Rü guxü̃ma ga nüma ga yema duü̃xü̃gü rü ma̱xpǘnegüwa narüchoü̃ namaxã ga Aóx ga nape̱xegu ixũxü̃.
28 Rü nüma ga Aóx rü ñanagürü: —¡Chowe perüxĩ! Erü Cori ya Tupana rü pora tüxna naxã nax nada̱i̱xü̃ca̱x i ngẽma tórü uanügü i Moácüã̱xgü —ñanagürü. Rü nüma ga Iraétanüxü̃ rü Aóxwe narüxĩ nax nüxna nadaugüxü̃ca̱x ga natü ga Yudáü̃ ínuxtamayexü̃wa nax taxúxema yéma choü̃xü̃ca̱x.
29 Rü yema ga ngunexü̃gu rü 10,000 ga Moácüã̱xgüxü̃ nadai woo guxü̃ma ga yemagü rü churaragü ga poraexü̃ rü tama muü̃ewa̱xexü̃ nixĩgü. Rü taxuxü̃ma niñaxẽẽgü.
30 Rü yemaacü nixĩ ga Iraétanüxü̃ ga Moácüã̱xgüxü̃ naporamaegüxü̃. Rü yemawena rü 80 ga taunecü nataxuma ga dai ga Iraéanewa.
Chamgáx rü Iraétanüxü̃xü̃ ínanguxü̃xẽxẽ Firitéugüme̱xẽwa
31 Rü Aóxwena rü to ga Iraétanüxü̃maxã icuáxü̃ rü Chamgáx ga Anáx nane nixĩ. Rü nüma rü wüxi ga naixmena̱xã ga fierumaxã ãmaguxü̃maxã nanadai ga 600 ga Firitéugü. Rü yemaacü nüma ga Chamgáx rü ta rü Iraétanüxü̃xü̃ ínanguxü̃xẽxẽ.
