Jueces 4:1-24
4 Rü yexguma Iraétanüxü̃arü ãẽ̱xgacü ga Aóx yuxguwena, rü nüma ga Iraétanüxü̃ rü wenaxarü Cori ya Tupanape̱xewa chixexü̃ naxügü.
2 Rü yemaca̱x ga nüma ga Cori ya Tupana rü wüxi ga Canaáü̃tanüxü̃ ga ãẽ̱xgacü ga Yabíü̃me̱xẽgu nanayixẽxẽ ga yema Iraétanüxü̃. Rü nüma ga Yabíü̃ rü ĩane ga Achóxarü ãẽ̱xgacü nixĩ. Rü yema norü churaragüarü ãẽ̱xgacü rü Chíchara nixĩ ga naéga. Rü nüma ga Chíchara rü Aróche-goíü̃gu naxãchiü̃.
3 Rü nüma ga Yabíü̃ rü nüxü̃́ nayexma ga 900 ga daiwexü̃ ga fierunaxca̱x ga cowaru itúgüne. Rü 20 ga taunecü poraãcü chixri Iraétanüxü̃maxã inacua̱x. Rü yemaca̱x ga yema Iraétanüxü̃ rü düxwa Cori ya Tupanaarü ngü̃xẽẽca̱x ínacagüe.
4 Rü yexgumaxü̃cüü rü wüxi ga nge ga Déboragu ãégacü iyixĩ ga Iraétanüxü̃maxã icua̱xcü. Rü ngĩma rü Tupanaarü orearü uruxü̃ iyixĩ rü Lapidóx nixĩ ga ngĩte.
5 Rü ngĩma ga Débora rü wüxi ga cucutüü̃wa irütooxü̃, rü yemaca̱x ga yema cucu rü Déboraarü cucu nixĩ ga naéga. Rü yema cucu rü Efraíü̃anearü ma̱xpǘneanewa nayexma ga ĩanegü ga Ramá rü Betéarü ngãxü̃machate̱xewa. Rü yéma nixĩ ga ngĩxca̱x naxĩĩxü̃́xü̃ ga Iraétanüxü̃ nax norü guxchaxü̃gü namexẽẽgüxü̃ca̱x.
6 Rü wüxi ga ngunexü̃ ga Débora rü naxca̱x ingema ga wüxi ga yatü ga Baráxgu ãégacü ga Abinuáü̃ nane ixĩcü. Rü nüma ga Baráx rü naxãchiü̃ nagu ga wüxi ga ĩane ga Quédexgu ãégane ga Netaríanewa yexmane. Rü ngĩgürügü nüxü̃: —Cori ya Iraétanüxü̃arü Tupana rü cuxü̃ namu rü ñanagürü cuxü̃: “¡Rü Netarítanüxü̃wa rü Chaburóü̃tanüxü̃wa nade i 10,000 i yatügü, rü yima ma̱xpǘne ya Tabóxgu nangutaque̱xexẽxẽ!
7 Rü choma rü tá nüxna chaxĩnü i Chíchara ya Yabíü̃arü churaragüarü ãẽ̱xgacü nax Quichóü̃arü doxonexü̃wa naxũxü̃ca̱x nax ngẽmaãcü norü churaragümaxã rü naweü̃gümaxã cuxca̱x nax íyaxü̃ãchixü̃ca̱x. Natürü i choma ya Cori ya Tupana rü tá cuxü̃́ chanatauxchaxẽxẽ nax cunada̱i̱xü̃ca̱x”, ñanagürü cuxü̃ ya Tupana —ngĩgürügü.
8 Rü nüma ga Baráx nanangãxü̃ga rü ñanagürü ngĩxü̃: —Ngéma tá chaxũ ega cuma rü ta ngéma cuxũxgu. Natürü ngẽxguma tama ngéma cuxũxgu i cumax, rü taxũtáma ngéma chaxũ —ñanagürü ngĩxü̃.
9 Rü yexguma ga ngĩma ga Débora rü inangãxü̃ga rü ngĩgürügü: —Marü name rü cuxü̃ tá íchixümücü. Natürü taxũtáma cuma nixĩ i Chícharaxü̃ quimáxü̃ erü Tupana rü wüxi i ngexü̃me̱xgu tá nananguxẽxẽ nax yamáaxü̃ca̱x —ngĩgürügü. Rü yexguma ga ngĩma ga Débora rü Baráxü̃ íyaxümücü ga ĩane ga Quédexwa.
10 Rü yexguma Quédexwa nangugügu, rü nüma ga Baráx rü naxca̱x nangema ga Chaburóü̃tanüxü̃ rü Netarítanüxü̃ ga yatügü nax churarawa naxĩxü̃ca̱x. Rü yemaacü nananutaque̱xe ga 10,000 ga yatügü. Rü Débora rü íiyaxümücü.
11 Rü Quédexarü ngaicamagu ga Chaanaíü̃arü castañaarü ngaicamagu naxãchiü̃ ga Ébe ga wüxi ga Quenéutanüxü̃ ga natanüxü̃na ixũgachixü̃ rü nüxica tomagu ãchiü̃xü̃. Rü nüma ga Ébe rü gumá Moichéna̱xtü ga Obáxtanüxü̃ nixĩ.
12 4:12-13 Rü yexguma Chíchara nüxü̃ cua̱xgu ga Baráx rü ma̱xpǘne ga Tabóxwa nax naxũxü̃, rü nüma ga Chíchara rü nananutaque̱xe ga guxü̃ma ga norü churaragü rü gumá 900 ga carugü ga fierunaxca̱x. Rü gumágümaxã Aróche-goíü̃wa inaxũãchi rü ñu̱xmata doxonexü̃ ga Quichóü̃wa nangugü.
13 Nüü̃ nadau 4:12
14 Rü yexguma ga ngĩma ga Débora rü Baráxü̃ ngĩgürügü: —Ñu̱xmawaxix nixĩ namexü̃ nax Chícharaca̱x quixũxü̃, erü nüma ya Cori ya Tupana rü curü churaragüpe̱xegu tá nixũ, rü tá cuxü̃́ nanatauxchaxẽxẽ nax Chícharaxü̃ curüporamaexü̃ —ngĩgürügü. Rü nüma ga Baráx rü guma ma̱xpǘne ga Tabóxwa nayarüxüe namaxã ga yema 10,000 ga norü churaragü.
15 Rü yexguma inaxügüãgu ga Chíchara nax Baráxmaxã nügü nada̱i̱xü̃, rü nüma ga Cori ya Tupana rü poraãcü muü̃ naxca̱x ínangu̱xẽxẽ ga Chícharaarü churaragü ga carugu ĩxü̃ rü yema nacutügu ĩxü̃, rü woo nüma ga Chíchara rü norü caruwa ínaxüe rü nacutügumare niña.
16 Rü yexgumayane ga nüma ga Baráx rü yema Chícharaarü churaragüwe rü yema carugüwe nangẽ ñu̱xmata Aróche-goíü̃wa nangu. Rü yema ngunexü̃gu rü taxuxü̃ma ga Chícharaarü churaragü ínayaxü. Rü guxü̃ma nayue.
17 Rü yexgumayane ga nüma ga Chíchara rü Yaé ga Ébe naxma̱xchiü̃ca̱x niña. Yerü nüma ga Ébe ga Quenéutanüxü̃ rü Achóxarü ãẽ̱xgacü ga Yabíü̃maxã namecüma, rü nügü narüngü̃xẽẽgü.
18 Rü ngĩma ga Yaé rü Chícharaca̱x iyagó, rü ngĩgürügü nüxü̃: —¡Nuxã chauchiü̃gu nangaxi, Pa Corix, rü taxuca̱xma cumuü̃! Erü tá cuxna tadaugü —ngĩgürügü. Rü nüma ga Chíchara rü ngĩchiü̃gu nangaxi. Rü yexma wüxi ga düxruü̃maxã iyadüxü.
19 Rü nüma ga Chíchara rü ñanagürü ngĩxü̃: —¡Íxraxü̃ i dexá choxna naxã, erü chita̱xawaxüchi! —ñanagürü. Rü yexguma ga ngĩma ga Yaé rü lechi nüxna ixã. Rü wenaxarü iyadüxü.
20 Rü nüma ga Chíchara rü ñanagürü ngĩxü̃: —¡Ĩã̱xgu rüxã̱ũ̱x! Rü ngẽxguma wüxi i duü̃xü̃ ngéma ne ũxgu, rü cuxna nacaxgu rü: “¡Nataxuma nixĩ i ta̱xacü”, ñacuxü̃ tá nüxü̃! —ñanagürü.
21 Natürü nüma ga Chíchara rü poraãcü nipa rü yemaca̱x napexechi. Rü yexgumayane ga ngĩma ga Yaé rü inayaxu ga wüxi ga poruxü̃ rü wüxi ga nai ga ãmaguxü̃ ga ngĩpatacuna nagu ngãxü̃. Rü bexma Chíchara íyexmaxü̃wa ixũ. Rü naerugu inacaxü̃ rü yema poruü̃maxã yéma iyapocuchi ñu̱xmata yatoxpetüxerux rü mairaxü̃anewa nangu. Rü yemaacü nayu ga Chíchara.
22 Rü yexguma Baráx yéma nguxgu ga Chícharaca̱x nax nadauxü̃, rü ngĩma ga Yaé rü ngĩchiü̃wa iyagó ga Baráxü̃ nax nayaxuxü̃ca̱x. Rü ngĩgürügü nüxü̃: —¡Nua naxũ nax cuxü̃ chanawéxü̃ca̱x i ngẽma naxca̱x cudauxü̃! —ngĩgürügü. Rü nüma ga Baráx rü ngĩchiü̃gu naxücu. Rü yexma Chícharaxü̃ nayangau ga yexma üxü̃ ga mairaxü̃anewa ipotüeruxü̃ namaxã ga yema nai ga ãmaguxü̃.
23 Rü yemaacü ga yema ngunexü̃gu rü Cori ya Tupana nüxü̃ narüngü̃xẽxẽ ga Iraétanüxü̃ nax Canaáü̃tanüxü̃arü ãẽ̱xgacü ga Yabíü̃xü̃ naporamaegüxü̃ca̱x.
24 Rü yexgumacürüwa ga Iraétanüxü̃ rü yexeraãcü ãẽ̱xgacü ga Yabíü̃xü̃ narüporamaegü rü ñu̱xmata yama̱xgüã.
