Jueces 6:1-40
6 16 Natürü nüma ga Iraétanüxü̃ rü wena Cori ya Tupanape̱xewa chixexü̃ naxügü, rü yemaca̱x ga nüma ya Tupana rü 7 ga taunecü Madiáü̃tanüxü̃me̱xẽwa nanayexmagüxẽxẽ ga yema Iraétanüxü̃.
2 Rü nüma ga Madiáü̃tanüxü̃ rü niyexeragutanü nax chixri Iraétanüxü̃maxã inacua̱xgüxü̃. Rü yemaca̱x ga yema Iraétanüxü̃ rü Madiáü̃tanüxü̃xü̃ namuü̃e, rü ma̱xpǘnegü ga guxchaãcü nawa inguxü̃nearü ãxmaxü̃gu nicu̱xgü.
3 Rü yexguma Iraétanüxü̃ toegügu, rü nüma ga Madiáü̃tanüxü̃ rü Amaréxtanüxü̃ rü yema duü̃xü̃gü ga éstewa ne ĩxü̃, rü naxca̱x ínayaxüãchixü̃.
4 Rü Iraétanüxü̃arü naanewa nangugü rü guxü̃ma ga tümanetügügu nidaugü rü tümaxü̃nagü nanadai ñu̱xmata Gáchaarü naanewa nangu. Rü taxuxü̃ma ga Iraétanüxü̃arü ngõ̱xruxü̃ ínayaxügüxẽxẽ, rü bai ga carnérugü, rü bai ga wocagü, rü bai ga búrugü ga íyaxügüxü̃.
5 Rü yema duü̃xü̃gü rü muxũchixü̃ ga norü caméyugümaxã ínangugü, ñoma munügü i nanetüarü chixexẽẽwa ĩxü̃rüxü̃. Rü yexma nachocu namaxã ga norü wocagü rü napatagü ga naxcha̱xmünaxca̱x. Rü guxü̃ma ga yema Iraéanewa yexmaxü̃ ga nanetügü rü nanagu̱xẽxẽ.
6 Rü yemaacü ga yema Madiáü̃tanüxü̃gagu ga Iraétanüxü̃ rü taxü̃ ga guxchaxü̃wa nayexmagü. Rü düxwa Cori ya Tupanaarü ngü̃xẽẽca̱x ínacagü.
7 6:7-8 Rü yexguma Iraétanüxü̃ Cori ya Tupanaarü ngü̃xẽẽca̱x ínacagügu nax Madiáü̃tanüxü̃me̱xẽwa ínanguxü̃xü̃ca̱x, rü nüma ga norü Tupana rü yéma nanamu ga wüxi ga norü orearü uruxü̃ ga ñaxü̃: —Ñanagürü ya Cori ya Tupana: “Choma nixĩ ga pexü̃ íchagaxü̃xü̃ ga Equítuanewa ga norü puracütanüxü̃xü̃ pexü̃ íyaxĩgüxẽẽxü̃wa.
8 Nüü̃ nadau 6:7
9 Rü yema Equítuanegücüã̱xme̱xẽwa nax pexü̃ íchanguxü̃xẽẽxü̃rüxü̃, rü pexü̃ íchanguxü̃xẽxẽ naxme̱xwa ga yema togü ga perü uanügü ga pexü̃ daixchaü̃xü̃. Rü pepe̱xewa íchanawoxü̃ ga yema togü ga duü̃xü̃gü, rü pexna chanaxã ga norü naane.
10 Rü pemaxã nüxü̃ chixu nax choma yixixü̃ ya perü Cori ya Tupana chixĩxü̃, rü ngẽmaca̱x taxuca̱xma norü tupanagüxü̃ pemuü̃e i ngẽma Amoréutanüxü̃ i ñu̱xma norü naanewa pemaxẽxü̃. Natürü ga pema rü tama chauga pexĩnüe” —ñanagürü.
11 Rü wüxi ga ngunexü̃gu rü Tupanaarü orearü ngeruxü̃ i daxũcüã̱x rü yéma nangu rü gumá castaña ga Ofáwa yexmanetüü̃wa narüto. Rü gumá castaña rü Yoá ga Abiéchetanüxü̃arü nixĩ. Rü nüma ga Yedeóü̃ ga Yoá nane rü cúãcüma trigu ínabugüte̱xe nawa ga yema nachica ga úba íyapúmügüxü̃wa nax bínu naxügüxü̃ca̱x. Rü yéma napuracü nax yemaacü taxucürüwa Madiáü̃tanüxü̃ nüxü̃ daugüxü̃ca̱x.
12 Rü nüma ga Tupanaarü orearü ngeruxü̃ i daxũcüã̱x rü Yedeóü̃ca̱x nango̱x rü ñanagürü nüxü̃: —Cori ya Tupana rü cuxü̃tawa nangẽxma, Pa Yatü ya Poracü rü Tama Muü̃wa̱xecüx —ñanagürü.
13 Rü nüma ga Yedeóü̃ rü nanangãxü̃ rü ñanagürü: —¡Choxü̃ nangechaxü̃, Pa Corix! Rü ngẽxguma chi Cori ya Tupana toxü̃tawa ngẽxmagu ¿tü̱xcüü̃ toxü̃ nangupetü i ñaa guxchaxü̃gü i ñu̱xma ngẽxmaxü̃? ¿Rü ngexü̃ nixĩ i ngẽma norü pora ga namaxã naxüxü̃ ga yema mexü̃gü ga taxü̃gü ga torü o̱xigü nüxü̃ ixugüchigagüxü̃ ga yexguma Equítuanewa tüxü̃ ínanguxü̃xẽẽgu? Rü nüma ya Cori rü toxna nixũgachi i ñu̱xmax, rü Madiáü̃tanüxü̃na toxü̃ namugü —ñanagürü.
14 Rü nüma ga Cori ya Tupana rü Yedeóü̃xü̃ nadawenü rü ñanagürü: —Choma tá cuxü̃ chaporaxẽxẽ nax ngẽma Madiáü̃tanüxü̃me̱xẽwa ícunguxü̃xẽẽxü̃ca̱x i ngẽma Iraétanüxü̃. Rü choma nixĩ i cuxü̃ chamuxü̃ —ñanagürü.
15 Natürü nüma ga Yedeóü̃ rü wena Cori ya Tupanaxü̃ nangãxü̃ rü ñanagürü: —¡Ñu̱xmarica choxü̃ nangechaxü̃, Pa Corix! ¿Natürü ñuxãcü tá íchananguxü̃xẽxẽ i Iraétanüxü̃? Erü chautanüxü̃ nixĩ i ñaxtümaewa ügüxü̃ i Manachétücumütanüwa. Rü guxü̃ma i chautanüxü̃tanüwa rü choma nixĩ i guxü̃arü yexera taxuxü̃ma chixĩxü̃ —ñanagürü.
16 Rü nüma ga Cori ya Tupana rü nanangãxü̃ rü ñanagürü: —Choma ya Tupana rü cuxü̃tawa tá changexma. Rü tauxchaãcü tá cunadai i ngẽma Madiáü̃tanüxü̃ ñoma wüxitama i yatü quimáxü̃rüxü̃ —ñanagürü.
17 Yexguma Yedeóü̃ nanangãxü̃ rü ñanagürü: —Ega aixcüma cuxü̃́ chamexgux, rü name nixĩ i wüxi i cua̱xruxü̃ choxna cuxã nax ngẽmawa nüxü̃ chacuáxü̃ca̱x nax aixcüma cuma yixĩxü̃ i chomaxã quidexaxü̃.
18 ¡Rü nua choxü̃ nangu̱xẽxẽ! Rü tama chanaxwa̱xe i quixũgachi i nua ñu̱xmatáta íchangu namaxã i wüxi i ãmare i cuxna chaxãxchaü̃xü̃ —ñanagürü. Rü nüma ga Cori ya Tupana rü ñanagürü: —Nua tá cuxü̃ chanangu̱xẽxẽ ñu̱xmatáta nua cungu —ñanagürü.
19 Rü Yedeóü̃ rü napatawa naxũ, rü wüxi ga cabraxacü ga yatüxü̃ ga íxraxü̃ nima̱x, rü 20 litru naguxü̃ ga trigute̱xewa paũ ga ngearü pu̱xẽẽruü̃ã́xü̃ naxü. Rü marü guxü̃ma nüxü̃́ mexgu rü wüxi ga pexchigu nananucu ga namachi rü buetaregu nayange ga naxtüxü̃ rü yema castaña írüxüxü̃wa nanana.
20 Rü Cori ya Tupanaarü orearü ngeruxü̃ i dauxü̃cüã̱x rü wüxi ga nutaétügu nüxü̃ nananugüxẽxẽ ga yema namachi rü paũgü ga ingearü pu̱xẽẽruü̃ã́xü̃. Rü nanamu ta nax yemaétügu nabaãxü̃ca̱x ga yema naxtüxü̃.
21 Rü yexguma ga yema orearü ngeruxü̃ i daxũcüã̱x rü norü naixmena̱xã ga nangexü̃nemaxã nüxü̃ ningõgü ga yema namachi rü paũgü, rü gumá nuta rü ninai rü yema nixĩ ga yaxãxẽẽxü̃ ga namachi rü paũgü. Rü ñu̱xũchi nüma ga Tupanaarü orearü ngeruxü̃ rü inarütaxu.
22 Yexguma Yedeóü̃ nüxü̃ icua̱xãchigu rü ñanagürü: —¡Pa Corix, poraãcü chamuü̃! Erü chauxetümaxãxüchi nüxü̃ chadau i curü orearü ngeruxü̃ —ñanagürü.
23 Natürü Cori ya Tupana rü nanangãxü̃ rü ñanagürü: —Tama name i cumuü̃, rü taxũtáma nixĩ i cuyuxü̃. Erü marü pemaxã icharüngüxmü —ñanagürü.
24 Rü yexguma ga Yedeóü̃ rü yema nachicagu Tupanaca̱x nanaxü ga wüxi ga ãmarearü guruxü̃. Rü “Cori ya Tupana rü tamaxã narüngüxmü”, ñaxü̃gu nanaxüéga. Rü ngẽma ãmarearü guruxü̃ rü ñu̱xmarüta rü Ofáwa nangẽxma ya Abiéchetanüxü̃arü ĩanewa.
25 Rü yematama chütaxü̃gu rü Cori ya Tupana rü Yedeóü̃xü̃ ñanagürü: —Chanaxwa̱xe i cuyayaxu i wüxi i cunatüarü woca i yatüxü̃ rü ngẽma to i woca i yatüxü̃ i 7 ya taunecü nüxü̃́ ngẽxmaxü̃. ¡Rü ngẽma taxre i wocamaxã yatúxuchi rü nagu napogü i ngẽma Baáxarü ãmarearü guruxü̃ i cunatü nawa Baáca̱x yaguxü̃ i ãmaregü! ¡Rü ngẽxgumarüxü̃ ta natuxuchi rü yawa̱xẽxẽ i ngẽma tupananeta i Acheráchicüna̱xã i nainaxca̱x i ngẽma Baáarü ãmarearü guruü̃xü̃tawa ngẽxmaxü̃!
26 Rü ñu̱xũchi chanaxwa̱xe i yima ma̱xpǘnetape̱xegu cha̱u̱xca̱x cunaxü i wüxi i ãmarearü guruxü̃. ¡Rü ngẽmawena rü yama̱x i ngẽma woca i 7 ya taunecü nüxü̃́ ngẽxmaxü̃ rü cha̱u̱xca̱x yagu! ¡Rü ngẽma tupananetachicüna̱xã i cutúxü̃xü̃maxã naxüxüxü̃! —ñanagürü ga Tupana.
27 Rü yexguma ga Yedeóü̃ rü guxme̱e̱xpü̱x ga norü duü̃xü̃gümaxã nanaxü ga guxü̃ma ga yema Cori ya Tupana namaxã nüxü̃ ixuxü̃. Natürü chütacü nanaxü yerü nanatütanüxü̃xü̃ namuü̃, rü nüxü̃ namuü̃ ga yema duü̃xü̃gü ga guma ĩanecüã̱x ixĩgüxü̃.
28 Moxü̃ãcü ga pa̱xmama ga yexguma duü̃xü̃gü írüdagügu, rü nüxü̃ inayangaugü ga yema Baáxarü ãmarearü guruxü̃ ga yexma ñaxtüanegu yapuãchixü̃ rü yexgumarüxü̃ ta niwa̱x ga yema Acheráchicüna̱xã ga Baáxarü ãmarearü guruü̃xü̃tawa yexmaxü̃. Rü ñu̱xũchi yema nachicawa nayexma ga wüxi ga yexwaca̱xü̃xü̃ ga ãmarearü guruxü̃, rü yemaétüwa nayagu ga wüxi ga woca ga yatüxü̃.
29 Rü nügüna nacagüe rü ñanagürügü: —¿Texé tixĩ ya yíxema ngexü̃ wagüxe? —ñanagürügü. Rü yexguma guxü̃guma yadaugüetanügu, rü muxü̃nama yacagüetanügu, rü nüxü̃ nacua̱xgü ga Yedeóü̃ ga Yoá nane nax yixixü̃. Rü Yoáxü̃tawa naxĩ rü ñanagürügü nüxü̃:
30 —¡Inamuxũchi ya cune erü tá tayama̱x! Erü ñaxtügu nanatae i ngẽma Baáxarü ãmarearü guruxü̃ rü ñu̱xũchi nayawa̱xẽxẽ i Acheráchicüna̱xã i Baáxarü ãmarearü guruü̃xü̃tawa yexmaxü̃ —ñanagürügü.
31 Natürü nüma ga Yoá rü yema duü̃xü̃güxü̃ nangãxü̃ga rü ñanagürü: —¿Ẽ̱xna pema rü tá ípenapoxü̃ i Baá rü naxca̱x tá pegü pedai? Rü naxü̃pa nax yangunexü̃ rü name nixĩ nax tayuxü̃ i yíxema Baáxü̃ ípoxü̃xẽ. Rü ngẽxguma chi aixcüma tupana yixĩxgu i Baá ¡rü nügütama ínapoxü̃ rü tüxü̃ yamá ya yíxema nagu pogüxe i ngẽma nachica i nawa naxca̱x ítanaguxü̃ i ãmaregü! —ñanagürü.
32 Rü yexgumacürüwa ga yema duü̃xü̃gü rü Yerubaámaxã nanaxugü ga Yedeóü̃. Rü ñu̱xũchi ñanagürügü: —Ẽcüx, Baá rü Yedeóü̃me̱xẽwa nügü ínapoxü̃, erü Yedeóü̃ nixĩ i nüxü̃ nagu pogüxü̃ i norü ãmarearü guruxü̃ i Baá —ñanagürügü.
33 Rü yemawena rü guxü̃ma ga Madiáü̃tanüxü̃ rü Amaréxtanüxü̃ rü duü̃xü̃gü ga éstewaama ne ĩxü̃, rü wüxigu nangutaque̱xe. Rü natü ga Yudáü̃ nichoü̃ rü Yereéarü metachinüxü̃wa nangugü rü yexma napegü.
34 Natürü ga Cori ya Tupanaãxẽ ya Üünecü rü Yedeóü̃maxã inacua̱x. Rü nüma ga Yedeóü̃ rü carnéruchata̱xcuxregu nicue nax naxü̃tawa naxĩxü̃ca̱x ga Abiéchetanüxü̃ nax íyaxümücügüãxü̃ca̱x.
35 Rü ñu̱xũchi duü̃xü̃güxü̃ namu nax Manachétücumüca̱x yacagüexü̃ca̱x nax nüxü̃ nangü̃xẽẽgüxü̃ca̱x. Rü yexgumarüxü̃ ta duü̃xü̃güxü̃ namu nax Achétücumü rü Chaburóü̃tücumü rü Netarítücumüca̱x yacagüexü̃ca̱x. Rü nümagü rü yéma naxĩ rü yexma naxĩtaque̱xe.
36 Rü Yedeóü̃ rü Tupanamaxã ñanagürü: —¿Ta̱xacüwa tá nüxü̃ chacua̱x nax aixcüma cho̱xme̱xwa tá ícunguxü̃xẽxẽxü̃ i Iraétanüxü̃, yema cuma chomaxã nüxü̃ quixuxü̃rüxü̃?
37 Rü dücax, rü ngẽma nachica i trigu nawa puxü̃gu tá chanachaxa i wüxi i carnérucha̱xmüxü̃ i ãã̱xmüxü̃. Rü ngẽxguma moxü̃ pa̱xmama cherenamaxã yawaixgu i ngẽma carnérucha̱xmüxü̃, natürü waixü̃mü rü napaanegu i nacüwawa rü ngẽmawa tá nüxü̃ chacua̱x nax aixcüma tá choxü̃ curüngü̃xẽxẽxü̃ nax Iraétanüxü̃xü̃ íchanguxü̃xẽxẽxü̃, yema cumatama chomaxã nüxü̃ quixuxü̃rüxü̃ —ñanagürü.
38 Rü yemaacüxüchi ningu. Rü yexguma pa̱xmama ínadaxgu ga Yedeóü̃, rü ínanaxãũx ga yema naxcha̱xmüxü̃ ga ãã̱xmüxü̃ rü wüxi ga ngáxweãcu yema nanama̱i̱x ga dexá ga cherenawa ne ũxü̃.
39 Natürü ga Yedeóü̃ rü Tupanaxü̃ ñanagürüama: —¡Taxũtá i chomaxã cunuxü̃ nax wena cuxü̃ chaca̱a̱xü̃xü̃! Natürü i ñu̱xma chanaxwa̱xe i to i cua̱xruxü̃. Rü ngẽma chanaxwa̱xexü̃ nixĩ nax cunapaxẽxẽxü̃ i ngẽma carnérucha̱xmüxü̃, natürü i nacüwawa rü cherenamaxã tá cunawaianexẽxẽ —ñanagürü.
40 Rü yema ga chütaxü̃gu rü Tupana rü yema Yedeóü̃ naxca̱x ícaxaxü̃ãcü nanaxü. Rü moxü̃ãcü pa̱xmama rü yema carnérucha̱xmüxü̃ rü napamare, natürü ga waixü̃mü ga nacüwawa rü cherenamaxã nawaiane.
