Jueces 7:1-25
7 Rü Yedeóü̃ i ñu̱xma Yerubaámaxã naxugüãcü rü wüxigu namaxã ga guxü̃ma ga yema duü̃xü̃gü ga naxü̃tawa yexmagüxü̃ rü ngunetüxü̃ ínarüdagü. Rü inaxĩãchi, rü dexáarü chuchuxü̃ ga Aróxwa nangugü rü yexma nayapexgü. Rü yema nachica ga Madiáü̃tanüxü̃ nagu pegüxü̃ rü Yedeóü̃arü duü̃xü̃gü íyapegüxü̃arü nórtewaama nayexma ga ma̱xpǘne ga Moréarü tuãchiwa.
2 Rü Tupana rü Yedeóü̃xü̃ ñanagürü: —Ngẽma duü̃xü̃gü i nua cugagüxü̃ rü namuxũchi nax ngẽma Madiáü̃tanüxü̃maxã pegü pedaixü̃. Erü nüma i ngẽma Iraétanüxü̃ rü chope̱xewa tá nügü nicua̱xüü̃gü nax noxrütama poramaxã nügü ínanguxü̃xẽẽxü̃ i Madiáü̃tanüxü̃me̱xẽwa.
3 ¡Rü ngẽmaca̱x namaxã nüxü̃ ixu i ngẽma duü̃xü̃gü rü texé yamuü̃xe rü tümachiü̃ca̱x tawoegu! —ñanagürü ga Tupana. Rü yexguma nüma ga Yedeóü̃ rü yema duü̃xü̃gümaxã nüxü̃ nixu. Rü 22,000 nachiü̃ca̱x nawoegu, rü 10,000 yéma nayaxüãchi.
4 Natürü nüma ga Cori ya Tupana rü wenaxarü Yedeóü̃maxã nüxü̃ nixu rü ñanagürü: —Namuxũchiamatama. ¡Ẽcü dexáarü axwa nagagü! Rü ngéma tá cumaxã nüxü̃ chixu i ngexü̃rüüxü̃ tá nixĩ i cuwe rüxĩxü̃, rü ngexü̃rüüxü̃ tá nixĩ i napataca̱x cumuegutanüxü̃ —ñanagürü.
5 Rü nüma ga Yedeóü̃ rü dexáarü axwa nanagagü ga yema duü̃xü̃gü. Rü nüma ga Cori ya Tupana rü Yedeóü̃xü̃ ñanagürü: —Ngẽma duü̃xü̃gü i naxme̱xwa axegüxü̃ ñoma airugü nade̱xexcuxü̃chiüxü̃rüxü̃ rü chanaxwa̱xe i nüxrüguma cunachigüxẽxẽ nüxna i ngẽma duü̃xü̃gü i caxgüã́püxacü axegüxü̃ —ñanagürü.
6 Rü yema naxme̱xwa axegüxü̃ ñoma airugü nade̱xexcuxü̃chiüxü̃rüxü̃ rü 300 nixĩ. Rü guxü̃ma ga yema togü rü caxgüã́püxacü naxaxegü.
7 Rü yexguma ga nüma ga Cori ya Tupana rü Yedeóü̃xü̃ ñanagürü: —Ñaa 300 i yatügümaxã tá pexü̃ íchanguxü̃xẽxẽ, rü tá nüxü̃ charüporamae i ngẽma Madiáü̃tanüxü̃. Rü guxü̃ma i ngẽma togü i curü duü̃xü̃gü rü marü name i napataca̱x nawoegu —ñanagürü.
8 Rü nüma ga Yedeóü̃ rü guxü̃ma ga yema natanüxü̃ ga Iraétanüxü̃ rü ínayamugü nax napatawa naxĩxü̃ca̱x. Natürü naxü̃pa nax napatawa naxĩxü̃ rü nüxna nanade ga norü tü̃xü̃gü rü carnéruchatacu̱xregü. Rü yema 300 ga yatügü ga idexechixü̃maxãxicatama narüxã̱ũ̱x ga Yedeóü̃. Rü yema Yedeóü̃arü duü̃xü̃gü rü ma̱xpǘnewa nayexmagü, rü yema Madiáü̃tanüxü̃ rü doxonexü̃wa nayexmagü.
9 Rü yema ga chütaxü̃gu rü nüma ga Cori ya Tupana rü Yedeóü̃xü̃ namu rü ñanagürü: —¡Ẽcü curü churaragümaxã Madiáü̃tanüxü̃ca̱x ípeyaxüãchi! Rü choma rü tá pexü̃ charüngü̃xẽxẽxü̃ nax nüxü̃ perüporamaegüxü̃ca̱x.
10 7:10-11 Natürü ngẽxguma tá cumuü̃xgu ¡rü curü duü̃ ya Purámaxã írüxĩ ngẽma ínapegüxü̃gu, rü írüxĩnü nax ta̱xacü nügümaxã íyaxugüxü̃ i Madiáü̃tanüxü̃! Rü ngẽxguma rü tá cuxna niña i muü̃ rü tá ícunaporaãchi nax cunadaixü̃ca̱x —ñanagürü ga Tupana. Rü yexguma ga Yedeóü̃ rü norü duü̃ ga Purámaxã ínarüxĩ ñu̱xmata yema norü uanügüarü churaragü ídauxü̃taexü̃wa nangugü.
11 Nüü̃ nadau 7:10
12 Rü yema Madiáü̃tanüxü̃ rü Amaréxtanüxü̃ rü yema duü̃xü̃gü ga éstewaama ne ĩxü̃ rü yema doxonexü̃gu nügü nawoonemare ñoma munügürüxü̃. Rü namuxũchi ga norü caméyugü ñoma naxnücüte̱xe ya márcutüwa ngẽxmacürüxü̃.
13 Yexguma natanüwa nanguxgu ga Yedeóü̃ rü wüxi ga churaraxü̃ naxĩnü ga namücümaxã nanegüxü̃ ixuxü̃, rü ñanagürü: —Nagu chaxãnegü nax wüxi i paũ i chebádanaxca̱x ngẽma ípegüxü̃gu rüdixiexü̃. Rü ngẽxguma wüxi ya ĩpatamaxã nayarüña rü nayawa̱xtaü̃xẽxẽ —ñanagürü.
14 Rü namücü rü nanangãxü̃ rü ñanagürü: —Ngẽma rü Yedeóü̃ ya Iraétanüxü̃ ya Yoá nanechiga nixĩ. Rü norü Cori ya Tupana rü tá nanaporaexẽxẽ i ngẽma Yedeóü̃arü churaragü nax tórü churaragüxü̃ naporamaegüxü̃ca̱x —ñanagürü.
15 Yexguma Yedeóü̃ nüxü̃ ĩnügu ga yema taxre ga Madiáü̃tanüxü̃ nügümaxã nüxü̃ ixugüexü̃ nachiga ga yema wüxi nagu ãnegüxü̃ rü ñu̱xũchi ta̱xacüchiga nax yixĩxü̃, rü nüma ga Yedeóü̃ rü Cori ya Tupanaxü̃ nicua̱xüxü̃. Yemawena ga Yedeóü̃ rü Iraétanüxü̃ ípegüxü̃wa naxũ rü ñu̱xũchi nanamu rü ñanagürü: —¡Guxãma ichigü! Erü Cori ya Tupana rü taxme̱xgu tá nanayixẽxẽ i ngẽma Madiáü̃tanüxü̃ —ñanagürü.
16 Rü yexgumatama ga nüma ga Yedeóü̃ rü tomaepü̱xtücumügu nayatoye ga yema 300 ga norü duü̃xü̃gü. Rü carnéruchatacu̱xre nüxü̃ ninu, rü ñu̱xũchi tü̃xü̃gü ga aixepewa ixomüã́xü̃ nüxü̃ ninu.
17 Rü nüma ga Yedeóü̃ rü ñanagürü nüxü̃: —Ngẽxguma ngẽma tórü uanügü ípegüxü̃arü tocüwawa changuxgu ¡rü mea choxü̃ perüdaunü! Rü ngẽma chowa nüxü̃ pedauxü̃ rü ngẽma tátama nixĩ i pexüxü̃.
18 Rü ngẽxguma choma rü ngẽma chowe rüxĩxü̃maxã carnéruchata̱xcuxregu ticuegügu, rü ngẽxguma tá nixĩ i pema i peyacuegüxü̃ i perü carnéruchata̱xcuxregü naxpechinüwa i ngextá ínapegüxü̃ i ngẽma tórü uanügü. ¡Rü ñaãcü tá aita pexüe: “Cori ya Tupanaca̱x rü Yedeóü̃ca̱x yigü tadai, ñapegüxü̃ tá!” —ñanagürü.
19 Rü yemaacü ga Yedeóü̃ rü yema 100 ga yatügümaxã rü ngãxü̃cüxü yema Madiáü̃tanüxü̃ ípegüxü̃arü tocüwawa nangugü ga yexguma nügü ínaxüchicüügüyane ga yema dauxü̃taegüxü̃. Rü ñu̱xũchi ga Yedeóü̃ rü namücügü rü nagu nicuegü ga norü carnéruchatacu̱xregü rü nayapuexẽxẽ ga yema tü̃xü̃gü nax nangóxü̃ca̱x ga yema omüemagü ga yanaxü̃.
20 Rü yexgumatama ga yema tomaepü̱xtücumü rü nagu nicuegü ga yema carnéruchatacu̱xregü rü nayapuexẽxẽ ga tü̃xü̃gü. Rü norü to̱xweme̱xẽgu nayana ga norü omügü ga iya̱u̱xratanüxü̃, rü norü tügüneme̱xẽgu nayana ga carnéruchata̱xcuxregü, rü —Cori ya Tupanaca̱x rü Yedeóü̃ca̱x yigü tadai —ñaxü̃maxã aita naxüe.
21 Rü nüma ga Iraétanüxü̃ rü yema Madiáü̃tanüxü̃ ípegüxü̃pechinüwatama nayachaxãchitanü. Rü guxü̃ma ga yema Madiáü̃tanüxü̃arü churaragü rü aita naxüeãcüma nibuxmü.
22 Rü yexgumayane ga yema 300 ga Iraétanüxü̃ rü yexeraãcü carnéruchata̱xcuxregu nicuegü, rü nüma ga Cori ya Tupana rü yemagu Madiáü̃tanüxü̃xü̃ ínatüexẽxẽ nax nügütanüwatama nügü nada̱i̱xü̃ca̱x. Rü yáxü̃wa nabuxmü ñu̱xmata Bex-chitáarü ĩanewa nangugü ga Chereráarü ĩanearü ngaicamana, rü togü rü ñu̱xmata Abé-meuráarü üyeanewa nangugü ga Tabáxarü ngaicamana.
23 Rü yexguma nüma ga Yedeóü̃ rü naxca̱x nangema ga yema Netarítanüxü̃, rü Achétanüxü̃, rü Manachétanüxü̃ nax yemamaxã Madiáü̃tanüxü̃we nangegüxü̃ca̱x.
24 Rü nüma ga Yedeóü̃ rü yema ínamáxpü̱xanexü̃wa nanamugü ga norü orearü ngeruü̃gü nax yatüxü̃ i Efraíü̃tanüxü̃maxã nüxü̃ yanaxugüexü̃ca̱x ga ore nax yanachoü̃xü̃ca̱x nax Madiáü̃tanüxü̃xü̃ yanatoyepe̱xegüxü̃ca̱x. Rü namaxã nüxü̃ nixu rü naxü̃pa nax natü ga Yudáü̃wa nangugüxü̃ ga Madiáü̃tanüxü̃, rü nanaxwa̱xe nax Efraíü̃tanüxü̃ nawa yadauxü̃taegüxü̃ ga yema nachicagü ga ínatauxchaxü̃wa nax nawa ixüexü̃ ga Bex-baráwa. Rü nüma ga Efraíü̃tanüxü̃ rü nayanguxẽẽgü ga yema namaxã nüxü̃ yaxuxü̃.
25 Rü ñu̱xũchi ínanayauxü̃ ga yema taxre ga ãẽ̱xgacügü ga Madiáü̃tanüxü̃, ga Oréx rü Chéx. Rü nüma ga Oréx rü nayama̱xgü nagu ga gumá nuta i ñu̱xmax Oréxarü nutagu ãégacü. Rü nüma ga Chéx rü nayama̱xgü nagu ga yema nachica ga nawa úba nama̱i̱xtüxü̃güxü̃ nax bínu naxügüã̱xü̃ca̱x. Rü ngẽma nachica rü ñu̱xma rü Chéxarü ma̱i̱xtüxü̃ruxü̃ nixĩ i naéga. Rü nawena nax Madiáü̃tanüxü̃we nangegüxü̃ rü Yedeóü̃xü̃tawa nanangegü ga Oréxeru rü Chéxeru ga Yudáü̃arü tocutüwa.
