Jueces 9:1-57
9 Nüma ga Abimeréx ga Yedeóü̃ nane, rü Chiquéü̃wa naxũ nax norü mamatanüxü̃maxã yanadexaxü̃ca̱x rü ñanagürü nüxü̃:
2 —Name nax Chiquéü̃arü ãẽ̱xgacügümaxã pidexagüxü̃ rü namaxã nüxü̃ pixuxü̃ nax namexü̃ nax wüxitama i ãẽ̱xgacü tamaxã icuáxü̃, rü tama guxü̃ma i ngẽma 70 i Yedeóü̃ nanegü. ¡Rü nüxna pecua̱xãchi nax choma rü petanüxü̃xü̃chi chixĩxü̃! —ñanagürü.
3 Rü yema norü mamaenexẽgü ga Abimeréx rü guma ĩanearü ãẽ̱xgacügümaxã nidexagü nape̱xewa ga guxü̃ma ga duü̃xü̃gü. Rü nümagü ga Chiquéü̃cüã̱x rü Abimeréxü̃ nayauxgü yerü natanüxü̃ nixĩ.
4 Rü yema duü̃xü̃gü, rü 70 tachinü ga diẽru ngĩxü̃ nayauxgü ga Baá-beríxarü tupaucawa rü Abimeréxna ngĩxü̃ naxãgü ga yema diẽru. Rü Abimeréx rü yema diẽrumaxã, ñuxre ga máetatanüxü̃axü̃́ nanaxütanü nax nawe naxĩxü̃ca̱x. Rü yema yatügü rü Abimeréxwe narüxĩ.
5 Rü Ofáwa naxĩ rü nanatü ga Yedeóü̃ íxãpataxü̃wa nangugü. Rü nüma ga Abimeréx rü wüxitama ga nutapütaétügu yema 70 ga naenexẽgüxü̃ nadai. Rü Yotáü̃xicatama niña rü nicu̱x. Rü nüma nixĩ ga Yedexóü̃ nane ga rübumaecü.
6 Rü yemawena rü guxü̃ma ga Chiquéü̃cüã̱x rü nangutaque̱xe naxü̃tagu ga gumá castaña ga nuta ya üünecü íyemaxü̃wa ga Chiquéü̃wa. Rü Abimeréxü̃ nimucuchigü norü ãẽ̱xgacüxü̃.
7 Rü yemaxü̃ nacua̱xgu ga Yotáü̃, rü ma̱xpǘne ga Guerichíü̃gu naxĩnagü, rü yéma tagaãcü nica nax guxü̃ma ga duü̃xü̃gü nüxü̃ ĩnüxü̃ca̱x rü ñanagürü: —¡Mea choxü̃́ iperüxĩnüe Pa Yatügü i Chiquéü̃cüã̱x! Rü chanaxwa̱xe nax Tupana rü ta pexü̃ ĩnüxü̃.
8 Rü wüxicana ga naigü rü nanaxwa̱xegü nax naxãẽ̱xgacüã̱xgüxü̃. Rü yemaca̱x oribuna nacagüe nax norü ãẽ̱xgacü yixĩxü̃ca̱x.
9 Natürü nüma ga oribu rü nanangãxü̃ rü ñanagürü: “Tama chanaxwa̱xe nax perü ãẽ̱xgacü chixĩxü̃, erü ngẽxguma perü ãẽ̱xgacü chixĩxgu rü taxucürüwa ichanaxã i chorü chíxü̃ i duü̃xü̃gü namaxã Tupanaxü̃ yacua̱xüü̃güxü̃ rü namaxã yatügüxü̃ yacua̱xüü̃güxü̃”, ñanagürü.
10 Rü yexguma rü igunecüna nacagü nax norü ãẽ̱xgacü yixĩxü̃ca̱x.
11 Natürü nüma ga igunecü rü nanangãxü̃ rü ñanagürü: “Tama chanaxwa̱xe nax perü ãẽ̱xgacü chixĩxü̃, erü ngẽxguma perü ãẽ̱xgacü chixĩxgu rü taxucürüwa tá chaxo namaxã i chorü o i maixcuraxü̃ rü chi̱xichixü̃”, ñanagürü.
12 Rü yexguma rü úbana nacagüe nax norü ãẽ̱xgacü yixĩxü̃ca̱x.
13 Natürü nüma ga úba rü nanangãxü̃ rü ñanagürü: “Tama chanaxwa̱xe nax perü ãẽ̱xgacü chixĩxü̃, erü ngẽxguma perü ãẽ̱xgacü chixĩxgu rü taxucürüwa tá chaxo namaxã i chorü o i nawa nayaxuxü̃ ya bínu ya Tupanaarü rü yatügüarü taãẽxẽẽruxü̃”, ñanagürü.
14 Rü düxwa ga yema naigü rü tuxuna nacagüe nax norü ãẽ̱xgacü yixĩxü̃ca̱x.
15 Rü nüma ga tuxu rü nanangãxü̃ rü ñanagürü: “Ega ngẽxguma aixcüma pechoxwa̱xegu nax choma yixĩxü̃ i perü ãẽ̱xgacü, rü chanaxwa̱xe nax guxãma chauxchipetatüü̃gu chocuxü̃. Natürü ega ngẽxguma tama penaxwa̱xegu nax choma yixĩxü̃ i perü ãẽ̱xgacü, rü wüxi i üxüema tá chowa nango̱x, rü tá nayaxaexẽxẽ ya guxü̃nema ya ocayiwa ya Líbanuanewa rüxügüne” —ñanagürü.
16 Rü yexguma ga Yotáü̃ rü ñanagürü: —Rü ñu̱xma, Pa Yatügü i Chiquéü̃cüã̱x, rü pexna chaca ¿rü aixcüma yixĩxü̃ i meama nagu perüxĩnüeãcü Abimeréxü̃ pexunetaxü̃ perü ãẽ̱xgacüxü̃? ¿Rü aixcüma yixĩxü̃ ga Yedeóü̃maxã rü naxacügümaxã pemecümaxü̃ yema nüma pemaxã namecümaxü̃rüxü̃?
17 Yerü chaunatü ga Yedeóü̃ rü tümaarü maxü̃ itaxã pexca̱x ga yexguma Madiáü̃tanüxü̃maxã tügü tadaixgu nax yemaacü naxme̱xwa ípenguxü̃xü̃ca̱x.
18 Natürü pemax rü chixexü̃maxã penaxütanü ga yexguma namaxã penuegu ga chaunatütanüxü̃ rü penadaixgu ga yema 70 ga tümanegü naétügu ga wüxitama ga nuta. Rü pema rü perü ãẽ̱xgacüxü̃ nüxü̃ pexuneta i Abimeréx i chaunatüarü ngewáxü̃marexü̃ erü petanüxü̃ nixĩ.
19 Rü ñu̱xma i choma rü pemaxã nüxü̃ chixu rü ega ngẽxguma namaxã pixaixcümagu rü namaxã pemecümagu ya chaunatü ya Yedeóü̃ rü natanüxü̃, rü name i Abimeréxmaxã petaãxẽgü rü ngẽxgumarüxü̃ ta i nüma rü pemaxã nataãxẽ.
20 Natürü ñu̱xma nax tama chaunatü ya Yedeóü̃maxã rü natanüxü̃maxã pemecümagüxü̃, rü pemaxã chanaxuegu rü Abimeréxwa tá üxü niyauxra, rü yima üxü tá nanadai i guxü̃ma i pemax i Chiquéü̃cüã̱xgü rü Bex-milócüã̱xgü. Rü ngẽxgumarüxü̃ ta i pemax rü pewa tá ínaxũxũ i üxüema i tá yamáxü̃ i Abimeréx —ñanagürü.
21 Rü nawena nax yemaxü̃ yaxuxü̃ ga Yotáü̃ rü naenexẽcha̱xwa niña rü Beéxwa naxũ, rü yexma naxãpata, yerü naenexẽ ga Abimeréxü̃ namuü̃.
22 Rü nümax ga Abimeréx rü tomaepü̱x ga taunecü Iraétanüxü̃maxã inacua̱x.
23 Natürü Tupana rü chixexü̃ i naãxẽ Abimeréxwa rü Chiquéü̃cüã̱xgüwa ínangu̱xẽxẽ nax yemaacü ga Chiquéü̃cüã̱xgü rü Abimeréxmaxã nanuexü̃ca̱x.
24 Rü yemaacü nüxü̃ nangupetü ga Abimeréx nax naxütanüãxü̃ca̱x ga yema chixexü̃ ga naxüxü̃ ga yexguma 70 ga Yedeóü̃ nanexü̃ nadaixgu. Rü yematama nüxü̃ nangupetü ga Chiquéü̃cüã̱xgü nax naxütanügüãxü̃ca̱x nagagu nax Abimeréxü̃ nangü̃xẽẽgüxü̃ nawa ga yéma máeta.
25 Rü nüma ga Chiquéü̃cüã̱xgü rü nama ga ma̱xpǘnewa dapetüxü̃gu nanamugü ga natanüxü̃ nax tüxü̃́ nangĩ̱xgüxü̃ca̱x ga guxãma ga yéma chopetüxe. Rü nüma ga Abimeréx rü nüxü̃ nacuáchiga ga yema íngupetüxü̃.
26 Rü wüxi ga ngunexü̃gu rü ĩane ya Chiquéü̃wa nangu ga Gaá ga Ébe nane namaxã ga naenexẽgü. Rü yémacüã̱x rü mea nanayauxgü rü namaxã nataãẽgü.
27 Rü yémacüã̱x ga duü̃xü̃gü rü naanewa naxĩ nax norü úba yanabuxgüxü̃ca̱x. Rü norü bínu nanaxügü, rü yexguma marü nüxü̃́ namexgu ga norü bínu rü napetaegü. Rü norü tupananetapatawa nügümaxã nachibüe rü naxaxegü. Rü yéma chixexü̃ Abimeréxmaxã naxuegugü.
28 Rü yexguma ga Gaá rü ñanagürü: —¿Erü ta̱xacü nixĩ i ngẽma Abimeréx rü ngẽmaca̱x yixema i Chiquéü̃cüã̱xgü i naga ixĩnüexü̃? Abimeréx rü Yedeóü̃ nanemare nixĩ rü Chebúx nixĩ i norü ngü̃xẽẽruxü̃. Rü yixema i Chiquéü̃cüã̱xgü rü naxme̱xwa tangexmagü nax norü mugüruxü̃ ixĩgüxü̃ca̱x. Yixema rü Amóx ga Chiquéü̃xü̃ ngo̱xẽẽcüarü mugüruxü̃ tixĩgü. Rü tama nixĩ i Abimeréxarü mugüruü̃gü ixĩgüxü̃.
29 Rü dücax, ega ngẽxguma chi choma pemaxã ichacua̱xgu, rü ñu̱xmachitama nixĩ íchanata̱xüchixü̃ i Abimeréx —ñanagürü. Rü ñu̱xũchi ñanagürü: —¡Nua naxũ, Pa Abimeréx, rü nanutaque̱xe i curü churaragü rü ngĩxã yigü tadai! —ñanagürü.
30 Rü yexguma Chebúx ga guma ĩanemaxã icuácü nüxü̃ cua̱xgu nax Gaá rü yemaacü yanadexanexü̃xü̃, rü poraãcü nanu.
31 Rü yemaca̱x Abimeréxca̱x nimuga ga Arumáwa yexmaxü̃, rü ñanagürü: —Gaá ya Ébe nane, rü naenexẽgümaxã nua Chiquéü̃wa naxĩ rü ñu̱xma rü nua nangẽxmagü. Rü duü̃xü̃güxü̃ nixucu̱xẽgü nax cuxchi naxaiexü̃ca̱x.
32 ¡Rü ngẽmaca̱x ñomatama i chütaxü̃gu nua naxũ namaxã i curü churaragü rü naanegu picu̱xgü!
33 ¡Rü noxri yangunegu üa̱xcü ngexwaca rügoxgu rü daa ĩaneca̱x ípeyaxüãchixü̃! Rü ngẽxguma Gaá rü norü duü̃xü̃gümaxã pexca̱x íyayixgu nax pemaxã nügü nada̱i̱xü̃ca̱x, ¡rü cuma cunaxwa̱xexü̃ namaxã naxü! —ñanagürü.
34 Rü yema chütaxü̃tama inaxũãchi ga Abimeréx namaxã ga guxü̃ma ga norü churaragü, rü ĩane ga Chiquéü̃wa naxĩ. Rü yexguma marü ĩanearü ĩxpemawa nangugügu rü yéma ãgümücügu nitoye ga norü churaragü, rü yexma nicu̱xgü.
35 Rü yexguma Gaá guma ĩanearü ĩã̱x ga taxü̃wa ixũxü̃gu, rü Abimeréx rü norü churaragümaxã inayayi ga íyacu̱xgüxü̃wa.
36 Rü yexguma yema churaragüxü̃ nada̱u̱xgu ga Gaá rü Chebúxü̃ ñanagürü: —¡Dücax, ma̱xpǘnewa ínarüxĩgü i churaragü! —ñanagürü. Rü nüma ga Chebúx rü nanangãxü̃ rü ñanagürü: —Nataxuma i ta̱xacü. Ngẽma cuxca̱x naduü̃xü̃güraxü̃xü̃ rü ma̱xpǘnechipetamare nixĩ —ñanagürü.
37 Natürü nüma ga Gaá rü ñanagürüama —¡Dücax, mea ínadawenü! Rü gua ma̱xpǘne ya Naaneã́xpetüna̱xãgu ãéganewa ínarüxĩgü i churaragü. Rü totücumü rü nagu naxĩ i ngẽma nama i nawa nadapetüxü̃ i ngẽma castaña i nawa nangutaque̱xexü̃ i ngẽma ẽxü̃guxü̃ cua̱xgüxü̃ —ñanagürü.
38 Rü Chebúx nanangãxü̃ rü ñanagürü: —¡Ñu̱xma idexa, Pa Ídexaechaxü̃! Cumax, nixĩ ga ñacuxü̃: “Abimeréx rü taxuxü̃ma nixĩ, rü taxuca̱xma norü mugüruü̃gü tixĩgü i yixemagü”, ñacuxü̃. ¡Rü ñu̱xma nüxü̃ nadau rü ngẽmagü nixĩ i churaragü i cuxca̱x taxuxü̃ma ixĩgüxü̃! ¡Rü inaxũãchi rü namaxã cugü yadai! —ñanagürü.
39 Rü nüma ga Gaá rü guxü̃ma ga duü̃xü̃gü ga Chiquéü̃cüã̱xgüpe̱xegu nixũ nax Abimeréxmaxã nügü yadaixü̃ca̱x.
40 Natürü Abimeréx rü Gaáwe nangẽ. Rü nüma ga Gaá rü naxcha̱xwa niña. Rü guma ĩanearü ĩã̱xwa rü nayexma ga muxü̃ma ga yuexü̃.
41 Abimeréx rü Arumágutama narüxã̱ũ̱x. Rü nüma ga Chebúx rü Gaáxü̃ rü naenexẽgüxü̃ Chiquéü̃wa ínawoxü̃.
42 Moxü̃ãcü rü yema duü̃xü̃gü ga Chiquéü̃cüã̱x rü naanewa narüxĩgüxü̃. Rü yemaxü̃ nacua̱x ga Abimeréx.
43 Rü yemaca̱x tomaepü̱xgu nayayauxgü ga norü churaragü rü naanegu nayacu̱xgüxẽxẽ. Rü yexguma nüxü̃ nadaugügu ga duü̃xü̃gü ga Chiquéü̃cüã̱xgü ga ĩanewa nax ínachoxü̃xü̃, rü nüma ga yema íyacu̱xgüxü̃wa rü nichoxü̃, rü tüxü̃ nadai ga guxema Chiquéü̃cüã̱xgü.
44 Rü nüma ga Abimeréx rü yema natücumümaxã ĩanearü ĩã̱x ga taxü̃wa nabuxmü. Rü yéma nüxna nadaugü nax tama wena tümaarü ĩanegu tachocuxü̃ca̱x ga guxema marü íchoxü̃xẽ. Rü yema to ga taxrechimüxü̃ rü tüxü̃ nadai ga guxema tümaanewa ĩxẽ.
45 Rü guxü̃ma ga yema ngunexü̃ rü nüma ga Abimeréx rü norü churaragü yema Chiquéü̃cüã̱xgüxü̃ nadai rü ñu̱xmata nanapu ga guma ĩane. Rü ñu̱xũchi nagu napogü rü tüxü̃ nadai ga guxema duü̃xẽgü ga Chiquéü̃wa yaxügüxe. Rü ñu̱xũchi guxü̃wama yucüramaxã nanagüane.
46 Rü yexguma Midáx-chiquéü̃cüã̱xgü nüxü̃ cuáchigagügu ga yema Abimeréx üxü̃, rü nayarücu̱xgü nagu ga yema poxü̃chicaxü̃ ga norü tupana ga El-beríarü tupaucawa yexmaxü̃.
47 Rü nüma ga Abimeréx nüxü̃ nacua̱x nax yema poxü̃chicaxü̃gu yanacu̱xgüxü̃ ga guxü̃ma ga yema duü̃xü̃gü ga Midáx-chiquéü̃cüã̱x.
48 Rü nüma ga Abimeréx rü guxü̃ma ga norü duü̃xü̃gümaxã ma̱xpǘne ya Charmóü̃wa naxũ rü wüxi ga yuemamaxã naichacüxü nidae. Rü ñu̱xũchi nügüãtügu nayange. Rü guxü̃ma ga norü duü̃xü̃güxü̃ namu nax paxa naxügüã̱xü̃ca̱x ga yema nüma naxüxü̃.
49 Rü yemaacü ga guxü̃ma ga norü duü̃xü̃gü rü naichacüxü nidaegü. Rü ñu̱xũchi Abimeréxwe namaxã narüxĩ rü ñu̱xmata yema poxü̃chica ga tupaucawa yexmaxü̃wa nangugü. Rü yexma nananutaque̱xe ga yema naichacüügü rü ñu̱xũchi nawa nanangixichigü. Rü yemaacü tüxü̃ nadai ga guxema Midáx-chiquéü̃cüã̱x ga 1,000 ga duü̃xü̃gü ga iyatüxü̃ rü ngexü̃.
50 Yemawena ga Abimeréx rü ĩane ga Tebéxwa naxũ. Rü naxca̱x ínayagoõchi rü nayapu.
51 Rü guma ĩanearü ngãxü̃wa rü nayexma ga wüxi ga dauxü̃taechica rü yexma nicu̱xgü ga guxü̃ma ga duü̃xü̃gü ga guma ĩanecüã̱x ga iyatüxü̃ rü ingexü̃. Rü meama nanawãxtagü ga norü ĩã̱x rü naétügu naxĩgü.
52 9:52-53 Natürü nüma ga Abimeréx rü yema poxü̃chicaxü̃arü ĩã̱xwa nangu nax yaguãxü̃ca̱x rü nadaiaxü̃ca̱x ga yema duü̃xü̃gü ga yexma icu̱xgüxü̃. Rü yexguma marü yaguxchaü̃ã̱xgu ga yema poxü̃chicaxü̃ rü wüxi ga nge rü Abimeréxétügu inaña ga wüxi ga nuta ga camütaeruxü̃ ixĩcü. Rü guma nuta rü Abimeréxerugu nangu rü nipueru.
53 Nüü̃ nadau 9:52
54 Rü yemaca̱x ga nüma ga Abimeréx rü paxa norü ngü̃xẽẽruü̃ca̱x naca rü ñanagürü nüxü̃: —¡Nayaxu i curü tara rü choxü̃ ima̱x! Erü tama chanaxwa̱xe nax wüxi i ngexü̃ choxü̃ imáxü̃ ñagüxü̃ i duü̃xü̃gü —ñanagürü. Rü yexgumatama ga norü ngü̃xẽẽruxü̃ rü norü taramaxã nanacana. Rü yemaacü nayu ga Abimeréx.
55 Rü yexguma yema Iraétanüxü̃ nüxü̃ daugügu ga Abimeréx nax marü nayuxü̃, rü wüxichigü rü napatawa naxũ.
56 Rü yemamaxã nixĩ ga Tupana ga nüxü̃́ naxütanüãxü̃ ga Abimeréx naxca̱x ga yema máeta ga nanatümaxã naxüxü̃ ga yexguma 70 ga naenexẽgüxü̃ nadaixgu.
57 Rü Tupana rü Chiquéü̃cüã̱xgüxü̃ rü ta napoxcue naxca̱x ga yema máeta ga naxügüxü̃. Rü yemaacü ningu ga yema poxcu ga Yedeóü̃ nane ga Yotáü̃ yema duü̃xü̃gümaxã ueguxü̃.
