Lamentaciones 2:1-22
Norü taxre ga auxechiga
2 Cori ya Tupana rü poraãcü Yerucharéü̃maxã nanu, rü yemaca̱x ẽanexü̃ naétügu nanguxẽxẽ ga guma ĩane ga noxri mexẽchine. Rü yima Iraéanearü ĩane ga guxü̃nema ga Yudáanearü ĩanegüétüwa üchiréne rü Cori ya Tupana rü dauxü̃wa ne nanamu nax nagu napogüxü̃. Rü woo ga napata ga Chióü̃wa yexmane rü tama nüxna nacua̱xãchi.
2 Rü Cori ya Tupana rü noxtacüma guxü̃nema ga Acóbutanüxü̃patagü rü nayachixexẽxẽ, rü taxúnema ínayaxüxẽxẽ. Rü norü numaxã nagu napogüe ga norü poxeguxü̃ ga guma Yudáanearü ĩanegü ga imexẽchine. Rü guma ĩanegüarü ãẽ̱xgacügüxü̃ naxãneexẽxẽ namaxã ga norü ngü̃xẽẽruü̃gü.
3 Rü yexguma poraãcü nanuxgu ga Cori ya Tupana rü nüxna nanayaxu ga guxü̃ma ga Iraéanearü pora. Rü yexguma Iraétanüxü̃ norü uanügümaxã nügü nadaixgu, rü nüma ga Cori ya Tupana rü nüxna nixũgachi rü tama norü poramaxã nüxü̃ narüngü̃xẽxẽ. Rü wüxi ga üxüemamaxã nagu nanangixi ga guxü̃ma ga Iraéane.
4 Rü nüma ga Cori ya Tupana rü ñoma wüxi i uanü i marü norü würamaxã imaxnetachaxü̃xü̃rüxü̃ nixĩ. Rü ñoma wüxi i uanürüxü̃ nanadai ga guma ĩanearü ngextü̱xücügü rü pacügü. Rü ñoma wüxi ga üxüemarüxü̃ nixĩ ga Cori ya Tupanaarü nu ga namaxã yaguãxü̃ ga napata ga guma ĩane ga mexẽchine ga Chióü̃wa yexmane.
5 Rü nüma ga Cori ya Tupana rü ñoma wüxi i torü uanürüxü̃ nügü nixĩxẽxẽ. Rü nayachixexẽxẽ ga guxü̃nema ga ĩanegü ga Iraéanewa yexmagüne. Rü nagu napogü ga guxü̃nema ga norü ãẽ̱xgacügüpatagü rü nayawa̱xgüxẽxẽ ga guma ĩanegüarü poxeguxü̃tápü̱xgü. Rü yema naane ga mexẽchixü̃ ga Yudáane rü naxca̱x ínananguxẽxẽ ga guxchaxü̃gü rü axu ga nügüwe ãgüxü̃.
6 Rü nüma ga Cori ya Tupana rü ñoma wüxi ga ngĩ́ta̱xaxü̃rüxü̃ nanachixexẽxẽ ga napata ga üünene. Rü nanachixexẽxẽ ga yema nachica ga duü̃xü̃gü nawa ngutaque̱xegüxü̃. Rü nüma rü Chióü̃cüã̱xgüxü̃ nüxü̃ narüngü̃maexẽxẽ ga norü petachigagü rü ñu̱xũchi ngü̃xchigaarü ngunexü̃gü. Rü norü numaxã nüxü̃ naxo ga yema Yudáanearü ãẽ̱xgacü rü gumá chacherdóte.
7 Rü nüma ga Cori ya Tupana rü marü nüxü̃ naxo ga norü ãmarearü guruxü̃, rü marü ínanata̱x ga napata. Rü norü uanügüme̱xẽwa nanange̱x ga guma ĩanearü poxeguxü̃tápü̱x rü norü ãẽ̱xgacüpatagü. Rü guma napata ya üünenewa rü yema uanügü rü poraãcü aixta naxüe ñoma petaarü ngunexü̃gurüxü̃.
8 Rü nüma ga Cori ya Tupana rü nagu narüxĩnü nax yawa̱xgüxẽẽãxü̃ ga yema mexẽchine ga ĩane ga Chióü̃arü poxeguxü̃tápü̱x. Rü nüma ga Tupana rü mea nanangugü ga yema Chióü̃arü poxeguxü̃tápü̱x rü tama nüxü̃́ nangechaxü̃ãcü nayawa̱xgüxẽxẽ. Rü duü̃xü̃gü rü poraãcü naxca̱x naxauxe ga yema norü ĩanearü poxeguxü̃tápü̱x nax yawa̱xgüxü̃.
9 Rü yemaacü ga guma ĩane rü nüxü̃́ nataxuma ga norü ĩã̱xgü rü nüxü̃́ nataxuma ga norü chotaruü̃gü yerü naxtapü̱xmaxã wüxigu niwa̱xgü ga ĩã̱xgü rü nipue ga norü chotaruü̃gü. Rü Yerucharéü̃arü ãẽ̱xgacü rü norü ngü̃xẽẽruü̃gü rü duü̃xü̃gü i tama yaxõgüxü̃me̱xẽwa nangẽxmagü. Rü ngẽma Cori ya Tupanaarü mugü rü marü nataxuma i natanüwa. Rü ngẽma Tupanaarü orearü uruü̃gü rü nüma ya Tupana rü marü tama nanango̱xetüxẽẽgü.
10 Rü guma ĩane ya Chióü̃arü yaxguã̱xgü rü ngechaü̃maxã waixü̃müanewa narütogü, rü waixü̃müte̱xe nügüeru nagügü, rü naxchiru i techaraxü̃gu nicu̱xgü. Rü pacügü i Yerucharéü̃cüã̱xgü rü ngĩrü ãnemaxã waixü̃müanegu iyangücuchitanü.
11 Rü poraãcüxüchima chaxaxu rü ngẽmaca̱x marü düxwa chagúxgüxü̃xetü. Rü ngẽma nax poraãcü changechaü̃xü̃ rü chauremüwa nangu̱x. Rü nataxuma i chorü taãxẽ yerü chorü ĩane rü marü nagu napogü. Rü woo ya õxchanagü ya maixe rü taiyamaxã yima ĩanearü namagügu tayue.
12 Rü ngẽma buxü̃gü rü naégüxü̃ ñanagürügü: —Marü nagu̱x i tórü paũ rü bínu —ñanagürügü. Rü ngẽmaca̱x naturae rü yima ĩanearü namagügu niyuetanü. Rü naégüchacüügügu yáxna narüngü̃gü rü nayue.
13 ¿Rü ta̱xacügu tá cuxü̃ changu rüe̱xna ta̱xacümaxã yixĩxü̃ i cuwüxiguxü̃, Pa Mexẽchine ya Ĩane ya Yerucharéü̃x? ¿Rü ta̱xacürü cua̱xruxü̃ tá cuxü̃ chawe̱x nax cuxü̃ chataãẽxẽẽxü̃ca̱x, Pa Ĩane ya Mexẽchine ya Chióü̃x? Rü yema chixexü̃ ga cuxü̃ ngupetüxü̃ rü nataxüchi ñoma már i taxüchixü̃rüxü̃. ¿Rü texé tá cuxca̱x tayataanexẽxẽ nawa i ngẽma ngúxü̃ i quingexü̃?
14 Rü yema curü orearü uruü̃günetagü naxca̱x ngo̱xetüxü̃ rü wüxi ga doramare nixĩ. Rü tama cumaxã nüxü̃ nixugüe ga yema curü pecadu ga cuxüxü̃. Rü yemaacü tama nayanaxoxẽxẽ ga yema guxchaxü̃gü ga nawa cungexmaxü̃ i ñu̱xma nax to ga nachixü̃anewa nagagüxü̃ ga curü duü̃xü̃gü. Natürü ga cumax, Pa Yerucharéü̃x, rü cuyaxõ ga yema ore ga doramare ixĩxü̃ ga cumaxã nüxü̃ yaxugüexü̃ ga yema orearü uruü̃güneta.
15 Rü ngẽxguma cuxü̃ nadaugügu i ngẽma duü̃xü̃gü i namawa chopetüxü̃ rü napéxme̱xgüãcü cuxü̃ nacugüe. Rü cuxna nawíxgüe rü cuxü̃ nacugüeãcü nanexáerugü, rü ñanagürügü: —¿Daa e̱xna yixĩxü̃ ga guma ĩane ga mexẽchine ga Yerucharéü̃ ga ñoma ga naanewa guxü̃nema ga ĩanegüxü̃ rümemaene? —ñanagürügü.
16 Rü ñu̱xmax, Pa Yerucharéü̃x, rü guxü̃ma i curü uanügü rü chixexü̃ cumaxã nixugüe. Rü cuxü̃ naxãũxü̃negüãcüma cuxna nawíxgüe rü ñanagürügü: —Marü meama nagu tapogüe ya yima ĩane. Rü ñaa nixĩ ga yema ngunexü̃ ga írüngu̱xẽẽxü̃, rü ñu̱xma rü düxwa nüxü̃ tadau —ñanagürügü.
17 Rü nüma ga Cori ya Tupana rü marü nayanguxẽxẽ ga yema nagu naxĩnüxü̃. Rü marü nayanguxẽxẽ ga yema norü ore ga nüxü̃ yaxuxü̃. Rü marü tama nüxü̃́ nangechaü̃tümüxü̃ãcüma nagu napogü ga guma ĩane ga Yerucharéü̃. Rü nüma rü curü uanügüaxü̃́ nanatauxchaxẽxẽ nax cuxü̃ nacugüexü̃. Rü nanaporaexẽxẽ nax cumaxã inacuáxü̃ca̱x.
18 Pa Mexẽchine ya Ĩane ya Chióü̃x, ¡Cori ya Tupanana ngü̃xẽẽca̱x naca! Rü name nax ngunecü rü chütacü cuxaxuxü̃ nax yayáxü̃ca̱x i cu̱xgüxü̃etü ñoma wüxi i natü iyaxü̃rüxü̃. ¡Rü taxṹ i nüxü̃ curüchauxü̃ nax cuxaxuxü̃!
19 ¡Írüda! ¡Rü wüxichigü i chütaxü̃ rü wüxichigü i ora nayumüxẽ! ¡Rü Cori ya Tupanamaxã nüxü̃ ixu i curü guxchaxü̃gü! ¡Rü cugüwa ínaxũxü̃xẽxẽ i guxü̃ma i ngẽma nagu curüxĩnüxü̃, ñoma dexá iyáxü̃rüxü̃! Rü Tupanaca̱x dauxü̃ naxunagü rü curü yumüxẽwa curü buxü̃güca̱x ínaca nax tama ĩanearü namagügu taiyamaxã nayuexü̃ca̱x.
20 ¡Dücax, mea nagu rüxĩnü Pa Corix, nax cuma rü taguma texémaxã ngẽma cuxüxü̃! ¿Ẽ̱xna cunaxwa̱xe nax mamagü rü naxacügü ya tüxü̃ namaigüxemaxã naxãwemügüxü̃? ¿Ẽ̱xna cunaxwa̱xe nax curü chacherdótegü rü curü orearü uruü̃gü cupatagu nadaiaxü̃?
21 Rü ngẽma chorü ngextü̱xücügü rü pacügü rü yaxguã̱xgü rü taramaxã nanadai. Rü nüxü̃ tadau i ngẽma ngextü̱xücügü rü pacügü rü yaxguã̱xgü i yuexü̃ i ĩanearü namagüwa nuquegüxü̃. Rü ngẽma ngunexü̃ i nagu curü nu ínguxü̃ rü cunadai. Rü taxúema texé cuxü̃́ taxãũxãchitümüü̃gü.
22 Rü yema ngunexü̃ ga nagu tomaxã cunuxü̃ rü guxü̃wama toxca̱x ne naxĩ ga torü uanügü ñoma petawa naxĩxü̃rüxü̃ nax toxü̃ nada̱i̱xü̃ca̱x. Rü ngẽma ngunexü̃gu taxúema tamaxü̃. Rü guxü̃ma ga chopatacüã̱x ga chayaexẽẽxü̃ rü changúexẽẽxü̃ rü torü uanügü nanadai.
