Lamentaciones 4:1-22
Norü ãgümücü ga auxechiga
4 Ngẽma úiru i cupata namaxã tüchiãxü̃ rü nixo. Rü ngẽma cupataarü naxpáü̃gü i úiruxüchinaxca̱x rü marü tama niyauracüxü. Rü yima cupatata̱xpüxarü nutagü rü namagüarü poõchixü̃gu nawoonemare.
2 Rü ngẽma Chióü̃arü duü̃xü̃gü i ñoma úiru i mexẽchixü̃rüxü̃ ãtanüxü̃, rü ñu̱xma rü taxuwama name naxrüxü̃ ya yima buetaregü ya waixü̃münaxca̱x i wüxi i üwechiruxü̃ üxcü.
3 Rü ngẽma naixnecücüã̱x i airugü rü naxacü tüxü̃ nimaigü, natürü ngẽma duü̃xü̃gü i Yerucharéü̃cüã̱xgü rü tama ngechaü̃xü̃ nacua̱xgü naxrüxü̃ i ngẽma abetrú i nacharaü̃ chianexü̃wa wogümarexü̃.
4 Rü õxchanagü rü mixĩ́ca̱x tita̱xawae, rü tümaarü ta̱xawamaxã düxwa tümamanaawa nayaxũ̱xgü ya tümaarü conü. Rü buã̱xtagü rü paũca̱x ítacagü, natürü nataxuma i texé nax tüxna naxãxü̃ i paũ.
5 Rü yema ü̃paacü taxü̃ ga õna ngõ̱xgüxü̃ rü ñu̱xma rü taiyamaxã ĩanemagu nayue. Rü yema noxri ĩpatagü ga mexẽchixü̃wa maxẽxü̃ rü ñu̱xma rü guxchirewa namaxẽ.
6 Rü ngẽma chixexü̃ i naxüxü̃ ya chorü ĩane ya Yerucharéü̃ rü Chodómaarü pecaduxü̃ narüyexeramae. Rü guma Chodóma rü Cori ya Tupana rü noxtacüma nayagu taxúema texé naxca̱x íyagoãchiãcü.
7 Rü yema Yerucharéü̃arü ãẽ̱xgacügü, rü ñoma gauxü̃te̱xerüxü̃ nichoxochi ga noxri, rü lechiarü yexera nachoxochi ga naxcha̱xmüxü̃. Rü corálarü yexera nadau ga naxü̃negü. Rü nachametügü rü ñoma chafírurüxü̃ nimexẽchi.
8 Natürü i ñu̱xma rü nixãũãchi rü niwachametü. Rü ĩanearü namagu naxĩxgu rü taxúema nüxü̃ tacua̱x nax ãẽ̱xgacügü yixĩgüxü̃. Erü nixaexüchi rü naxcha̱xmüxü̃ rü naxchina̱xãwa nayaxũ̱xgü. Rü nipagümare ñoma nai i üxüwa mexü̃rüxü̃.
9 Rü narümemae nixĩ nax daigu nayuexü̃ i duü̃xü̃gü rü tama taiyamaxã. Erü ngẽma taiyamaxã yuexü̃ rü ngúxü̃ ningegümare. Rü tama paxa nayue erü nangearü õnaã̱xgü.
10 Rü yema nax nataxuxü̃ ga õna, rü yemaca̱x ga yema ngexü̃gü ga mamagü ga naxacügüxü̃ ngechaxü̃güchirexü̃ rü düxwa naxacü tüxü̃ nadai nax tüxü̃ namuxragüxü̃ca̱x nax yemaacü tümamaxã naxãwemügüxü̃ca̱x ga yexguma nagu napogüegu ga Yerucharéü̃.
11 Rü Cori ya Tupana rü poraãcü yema Chióü̃cüã̱xgümaxã nanu, rü düxwa marü tama yáxna namaxã naxĩnü ga norü nu. Rü yemaca̱x nayagu ga guma ĩane rü nixa ñu̱xmata nawa nangu ga gumá nutagü ga tacü ga nawa inaxügücü ga guma ĩane.
12 Rü guxü̃ma ga yema togü ga nachixü̃anegüarü ãẽ̱xgacügü ga ñoma ga naanewa yexmagüxü̃ rü taguma nagu narüxĩnüe nax wüxi ga ngunexü̃gu rü yema Yerucharéü̃arü uanügü rü tá guma ĩanearü ĩã̱xgüwa yaxücuxü̃.
13 Rü yema guma ĩane ga Yerucharéü̃maxã ngupetüxü̃ rü norü orearü uruü̃günetagagu nixĩ, rü norü chacherdótegüarü chixexü̃gagu nixĩ. Yerü nümagü rü guma ĩanewa nanadai ga duü̃xü̃gü ga taxuxü̃ma ga chixexü̃ ügüchiréxü̃.
14 Rü ngẽma orearü uruü̃netagü rü chacherdótegü rü ĩanearü namagügu narüxĩane ñoma duü̃xü̃gü i ngexetügüxü̃rüxü̃. Rü naxme̱xgü rü nagümaxã nayapagü, rü ngẽmaca̱x taxúema naxchirugu tingõgüchaü̃.
15 Rü duü̃xü̃gü rü nüxna nacagüe rü tagaãcü nüxü̃ ñanagürügü: —¡Toxna pixĩgachi rü ípechoxü̃ i nua! Duü̃xü̃gü i ãũãchixü̃ pixĩgü. ¡Rü taxṹ i toxü̃ pingógüxü̃! —ñanagürügü. Rü ngẽma togü i nachixü̃anecüã̱xgü i tama Tupanaaxü̃́ yaxõgüxü̃ rü nüxü̃ ñanarügügü: —Pemax rü duü̃xü̃gü i naxĩanemarexü̃ pixĩgü. Rü taxucürüwa daa ĩanegu pixãpatagü —ñanagürügü.
16 Rü nümatama ga Cori ya Tupana rü nanawoonemare, rü tama nüxü̃ narüngü̃xẽxẽ. Rü taxúema naga taxĩnüe ga yema chacherdótegü rü taxúema nüxü̃ tangechaü̃ ga yema ãẽ̱xgacügü.
17 Rü tipaexetümare nax itarüdaunüxü̃ rü ítayanguxẽẽxü̃ nax texé toxü̃ yarüngü̃xẽẽxü̃. Natürü taxuxü̃ma ínangu. Rü toma rü ítamegümare nax wüxi ga to ga nachixü̃ane toxü̃ íyapoxü̃xü̃ca̱x. Natürü yema nachixü̃ane rü tama toxü̃ ínapoxü̃.
18 Rü torü uanügü rü toxca̱x nadauxü̃taegü, rü yemaca̱x taxucürüwa ĩanearü namagüwa taxĩ. Rü marü ningaica nax tayuexü̃ rü marü nawa nangu i ora nax toxü̃ nada̱i̱xü̃.
19 Rü torü uanügü i towe ingẽxü̃tanüxü̃ rü ĩyürüxü̃ niporaxüchi. Rü máxpü̱xanexü̃wa towe ningẽxü̃tanü rü chianexü̃wa yütagü toxca̱x ninuagü.
20 Rü yimá tachixü̃anearü ãẽ̱xgacü ya Cori ya Tupana nüxü̃ unetacü ya tüxü̃ ípoxü̃cü rü ngẽma tórü uanügü rü marü nayayauxgü. Rü yimá tórü ãẽ̱xgacüchiga nixĩ ga ü̃pa ñagüxü̃: —Cuxme̱xwa tangexmagü nax toxü̃ ícupoxü̃xü̃ca̱x nüxna i ngẽma togü i nachixü̃anegü —ñagüxü̃.
21 Pa Edóü̃anearü Ĩane ya Taxü̃nex, rü cuma i Úxanewa cungexmaxü̃ rü ñu̱xma toxü̃ cucugü. Natürü cuxca̱x rü tá ta ínangu i ngẽma guxchaxü̃ i ñu̱xma tingegüxü̃. Rü ngẽmagagu rü ñoma wüxi i duü̃xü̃ i ngãxü̃xü̃ rü ngexchiruxü̃rüxü̃ tá quixĩ.
22 Pa Ĩane ya Chióü̃x, curü poxcu rü marü ngẽxma nayacua̱x. Rü nüma ya Cori ya Tupana rü taxũtáma wena to i nachixü̃anewa nanagagü i curü duü̃xü̃gü. Natürü cumax, Pa Edóü̃anearü Ĩane ya Taxü̃nex, rü curü chixexü̃ca̱x Tupana tá cuxü̃ napoxcu, rü ngóxü̃wa tá nanange i curü pecadugü.
