Levítico 12:1-8
12 Rü nüma ya Cori ya Tupana rü Moichémaxã nidexa rü ñanagürü:
2 —¡Iraétanüxü̃maxã nüxü̃ ixu i ñaa ore!: “Ngẽxguma wüxi i ngecü rü naxãxacügu rü nabuxgu rü nayatügu, rü ngĩma rü 7 i ngunexü̃ tá ixãũãchi, ngẽxguma ngĩrü tauemacüwa nanguxgurüxü̃.
3 Rü ngẽxguma marü 8 i ngunexü̃ nüxü̃́ inguxgu ya ngĩne rü tá ínawiecha̱xmüü̃pe̱xechiraü̃.
4 Natürü ngĩma i ngecü rü name nax 33 i ngunexü̃ ngĩgü namexẽẽxü̃ nawa ga gumá nagü ga ibacü ga yexguma naxíxraxacügu. Rü ngẽma ngunexü̃gü i nagu ngĩgü namexẽẽxü̃gu rü tama name nax nüxü̃ yangógüxü̃ i ta̱xacü i üünexü̃, rü tama name nax Tupanapatagu naxücuxü̃.
5 Natürü ngẽxguma ngẽma ngĩrü õxchana rü nangexgu, rü taxre i yüxü tá nixĩ i inaxãũãchixü̃, ñoma ngĩrü da̱xawexü̃ne ngĩxna nguxgurüxü̃. Natürü naétü rü tá 66 i ngunexü̃gü ngĩgü iyamexẽẽchigü nawa ga gumá nagü ga ibacü ga yexguma naxíxraxacügu.
6 Rü ngẽxguma marü yanguxgu nax ngĩgü namexẽẽxü̃ nawena nax nabuxü̃ ya ngĩne rüe̱xna ngĩxacü, rü wüxi i carnéru i wüxi ya taunecü nüxü̃́ ngẽxmaxü̃ tá nixĩ i Tupanapataarü ĩã̱xwa nagaxü̃, nax ngẽma rü ngĩrü ãmare i yaguxü̃ yixĩxü̃ca̱x. Rü ngẽxgumarüxü̃ tá ta ngéma inaga i wüxi i muxtucu rüe̱xna wüxi i muxtucuxacü nax ngẽma ãmaremaxã naxütanüãxü̃ca̱x i ngĩrü pecadu. Rü ngẽma ngĩrü ãmaregü rü tá chacherdótena inana.
7 Rü nüma ya chacherdóte tá nixĩ i Cori ya Tupanana naxãxü̃ i ngẽma ãmare nax ngẽmaãcü Cori ya Tupanana naxca̱x naca̱xaxü̃ nax ngĩxü̃́ nüxü̃ nangümaxü̃ca̱x i ngĩrü pecadu. Rü ngẽxguma i ngĩma rü tá marü ime rü tama nagümaxã ixãũãchi. Rü ngẽma nixĩ i chorü ucu̱xẽgü tümaca̱x ya yíxema íxraxacügüxe ya yatüxacügüxe rüe̱xna ngexacügüxe.
8 Natürü ngẽxguma ngẽma ngecü rü nangearü diẽruã̱xgu nax wüxi i carnéruca̱x nataxexü̃, rü name nax ngĩrü ãmareruxü̃ taxre i muxtucu rüe̱xna taxre i muxtucuxacü Tupanapataarü ĩã̱xwa igagü. Rü wüxi i ngẽma muxtucu rü chacherdóte tá Cori ya Tupanaca̱x nayagu. Rü ngẽma to i muxtucu rü ngĩrü pecaduarü ütanüruxü̃ Cori ya Tupanaca̱x tá nayama̱x rü nayagu. Rü ngẽmaãcü i nüma ya chacherdóte rü tá ngĩrü pecadu naxütanü. Rü ngĩma rü wena Tupanape̱xewa tá ime” —ñanagürü ga Cori ya Tupana.
