Levítico 13:1-59
13 13:1-2 Rü nüma ga Cori ya Tupana rü Moichéxü̃ rü Aróü̃xü̃ ñanagürü: —Rü ngẽxguma texé rüchaxgu, rüe̱xna tümaxü̃newa ta̱xacü rüyixgu, rüe̱xna tadauagüxü̃negu rüe̱xna o̱xri i chaxünerüxü̃ ixĩxü̃ tümawa rüyixgu, rü name nax chacherdóte i Aróü̃xü̃tawa tüxü̃ naga rüe̱xna wüxi i chacherdóte i nanexü̃tawa tüxü̃ naga.
2 Nüü̃ nadau 13:1
3 Rü nüma i ngẽma chacherdóte rü tá mea nanangugü i ngẽma o̱xri i tümaxü̃newa rügoxü̃. Rü ngẽxguma yacómüãchitanügu ya yima tümata̱xaxü̃negü i ngẽma ítarüxóxü̃wa rü ñu̱xũchi ngẽma o̱xri rü poraãcü ínape̱xgu i tümacha̱xmüxü̃wa, rü ngẽmawa tá nüxü̃ nacua̱x nax aixcüma chaxünearü o̱xri yixĩxü̃. Rü nawena nax nangugüãxü̃ i tümaarü o̱xri ya yíxema duü̃xẽ rü nüma ya chacherdóte tá nüxü̃ nixu nax taxãũãchixü̃.
4 Natürü ngẽxguma nacómügu i tümacha̱xmüxü̃ i ngẽma o̱xri íngẽxmaxü̃wa natürü tama ínape̱xgu i ngẽma o̱xri i tümacha̱xmüxü̃wa tüxü̃́ ngẽxmaxü̃ rü tama yacómüãchitanügu ya yima tümata̱xaxü̃negü i ngẽma ítarüxóxü̃wa, rü ngẽxguma i ngẽma chacherdóte rü 7 i ngunexü̃ tá wüxi i nachicagu tüxü̃ narüwãxtaxü̃.
5 Rü ngẽxguma marü norü 7 i ngunexü̃wa nanguxgu, rü wena tá tüxü̃ nadau i tümaarü o̱xri rü nanangugü. Rü ngẽxguma ngẽma tümaarü o̱xri rü naxairügumaraü̃maregu rü tama íyaxũxgu i tümacha̱xmüxü̃wa, rü wenaxarü tá to i 7 i ngunexü̃ tüxü̃ narüwãxtaxü̃.
6 Rü ngẽxguma to i norü 7 i ngunexü̃wa nanguxgu rü wena tá tüxü̃́ nüxü̃ nadau rü nanangugü i tümaarü o̱xri. Rü ngẽxguma iyanaxochigügu i ngẽma tümaarü o̱xri, rü tama íyaxũxgu i tümacha̱xmüxü̃wa, rü ngẽxguma i ngẽma chacherdóte rü tá tümamaxã nanaxuegu nax tama chaxüne yixĩxü̃ i tüxü̃́ ngẽxmaxü̃ rü wüxi i o̱xrimare yixĩxü̃ i ngẽma tümacha̱xmüxü̃wa rügoxü̃. Rü ngẽxguma i tüma ya yíxema ida̱xawexe rü tá tügü tayauxchiru rü taxũtáma taxãũãchi.
7 Natürü ngẽxguma chi ngẽma chacherdóte tüxü̃ nangugügu rü tümamaxã nüxü̃ yaxuxgu nax marü tamexü̃, rü ngẽmawena chi yaxũchigüamagu i tümacha̱xmüxü̃wa i ngẽma tümaarü o̱xri, rü name nax wenaxarü chacherdótexü̃tawa taxuxü̃ nax wena nangugüãxü̃ca̱x i ngẽma o̱xri.
8 Rü nüma i chacherdóte rü ngẽxguma tüxü̃́ nangugüãgu i ngẽma tümaarü o̱xri nax yaxũchigüamaxü̃ i tümacha̱xmüxü̃wa, rü ñu̱xũchi tá tümamaxã nanaxuegu nax chaxünemaxã tida̱xawexü̃ rü ngẽmaca̱x taxãũãchixü̃ i Tupanape̱xewa.
9 Rü ngẽxguma chaxünemaxã tida̱xawegu i wüxíe rü name nax chacherdótexü̃tawa tüxü̃ pegaxü̃.
10 13:10-11 Rü nüma i chacherdóte rü tá nanangugü i ngẽma nax nachaxü̃ i tümacha̱xmüxü̃. Rü ngẽxguma nacómügu i ngẽma rüchaxü̃ rü yacómüãchigu ya yima tümata̱xagü i ngẽma ítarüchaxü̃wa rü ngẽxguma ngẽma rüchaxü̃wa nüxü̃ da̱u̱xgu i tümamachi i maxü̃, rü ngẽmawa nüxü̃ tacua̱x nax aixcüma chaxü̃ne yixĩxü̃ i ngẽma da̱xawe. Rü nüma i chacherdóte rü tá tümamaxã nanaxuegu nax Tupanape̱xewa taxãũãchixü̃. Rü taxũtáma tüxü̃ narüwaxtaü̃gü erü Tupanape̱xewa taxãũãchi.
11 Nüü̃ nadau 13:10
12 13:12-13 Natürü ngẽxguma chacherdóte nüxü̃ da̱u̱xgu nax yaxũxü̃ i wüxíearü da̱xawe rü tümacutüwa inaxügüxü̃ rü ñu̱xmata tümaeruwa nangu, rü nüma ya chacherdóte rü tá mea nanangugü i ngẽma da̱xawe. Rü ngẽxguma nüxü̃ nada̱u̱xgu nax guxü̃ i tümaxü̃newa nanguxü̃ rü nax yacómüãchixü̃ i guxü̃ma i tümacha̱xmüxü̃, rü ngẽmawa tá nüxü̃ nacua̱x nax marü tümaca̱x yataanexü̃ rü tama taxãũãchixü̃.
13 Nüü̃ nadau 13:12
14 Natürü ngẽxguma tümaarü o̱xriwa nagóxgu i tümamachi i maxü̃xü̃, rü ngẽmawa tá nüxü̃ pecua̱x nax chaxünearü da̱xawemaxã tida̱xawexü̃, rü taxãũãchixü̃.
15 Rü ñu̱xũchi ngẽma chacherdóte rü tá nanangugü i ngẽma tümamachi i maxü̃xü̃, rü tá tümamaxã nanaxuegu nax chaxünearü da̱xawe nax yixĩxü̃. Rü tá taxãũãchi erü nixüe i ngẽma da̱xawe.
16 13:16-17 Rü ngẽxguma yacómüãchigu i ngẽma tümamachi i maxü̃xü̃, rü name nax chacherdótexü̃tawa taxuxü̃ nax tüxü̃ nadauxü̃ca̱x. Rü ngẽxguma chacherdóte nüxü̃ da̱u̱xgu nax yacómüãchixü̃ i tümaarü o̱xri, rü tá tümamaxã nanaxuegu nax tama tida̱xawexü̃ rü marü tama taxãũãchixü̃.
17 Nüü̃ nadau 13:16
18 13:18-19 Rü ngẽxguma texé o̱xri tümawa iyarügoxgu rü tüxü̃́ yaxẽ̱xgu, natürü nachicawa tüxü̃́ iyanagóxgu i wüxi i cómüxü̃ i rüchaxü̃ rüe̱xna wüxi i yadauãchixü̃, rü name nax chacherdótexü̃tawa taxuxü̃.
19 Nüü̃ nadau 13:18
20 Rü nüma i ngẽma chacherdóte rü tá mea nanangugü i ngẽma o̱xri i tümaxü̃newa rügoxü̃. Rü ngẽxguma ngẽma o̱xri rü poraãcü ínape̱xgu rü yacómüãchitanügu ya yima tümata̱xagü i ngẽma ítarüxóxü̃wa, rü ñu̱xũchi nüma ya chacherdóte rü tá tümamaxã nanaxuegu nax taxãũãchixü̃, erü aixcüma chaxünearü o̱xri nixĩ i ngẽma tümawa irügoxü̃.
21 Natürü ngẽxguma chacherdóte nüxü̃ da̱u̱xgu rü ngẽma ítarüxóxü̃wa nataxuxguma yacómüne ya tümata̱xaxü̃ne, rü tama ínape̱xgu i tümacha̱xmüxü̃, rü ngẽma tümaarü o̱xri rü yanaxochigügu, rü ngẽxguma ya chacherdóte rü 7 i ngunexü̃ tá tüxü̃ narüwãxtaxü̃ ya yíxema duü̃xẽ.
22 Natürü ngẽxguma yaxũchigüamagu i ngẽma o̱xri i tümacha̱xmüxü̃wa ngẽxmaxü̃, rü nüma i ngẽma chacherdóte tá tümamaxã nanaxuegu nax chaxünemaxã yixĩxü̃ nax tida̱xawexü̃, rü ngẽmaca̱x taxãũãchi i Tupanape̱xewa.
23 Natürü ngẽxguma ngẽma o̱xri iyanagóxü̃wa tama yaxũchigüamagu rü nachicamare ngéma ngẽxmagu i ngẽma o̱xri, rü ngẽxguma i nüma ya chacherdóte rü tá tümamaxã nanaxuegu nax tama tida̱xawexü̃ rü marü tama taxãũãchixü̃.
24 13:24-25 Rü ngẽxguma texe ixaxgu, rü ngẽma tümamachi i maxü̃xü̃wa nango̱xgu nax nadauãchixü̃ rüe̱xna nacómüxü̃, rü nüma ya chacherdóte rü tá tüxü̃́ nanangugü i ngẽma tümaarü o̱xri. Rü ngẽxguma ngẽma o̱xriwa yacómüãchitanügu ya yima tümata̱xaxü̃negü, rü ínape̱xgu i tümacha̱xmüxü̃wa, rü nüma ya chacherdóte rü ngẽmawa tá nüxü̃ nacua̱x nax chaxünearü da̱xawe yixĩxü̃ i ngẽma itixaxü̃wa iyarügoxü̃. Rü ngẽmaca̱x i nüma ya chacherdóte rü tá nüxü̃ nixu nax taxãũãchixü̃, erü ngẽma o̱xri i tüxü̃́ ngẽxmaxü̃ rü chaxüne nixĩ.
25 Nüü̃ nadau 13:24
26 Rü ngẽxguma ngẽma chacherdóte nüxü̃ da̱u̱xgu i ngẽma tümawa iyarügoxü̃, rü nüxü̃ nada̱u̱xgu nax marü nataxuxü̃ma ya tümata̱xaxü̃ne ya cómüne i ngẽma íyanagoxü̃wa, rü tama ínape̱xgu i ngẽma o̱xri i tümacha̱xmüxü̃wa tüxü̃́ ngẽxmaxü̃, rü ngẽma o̱xri rü iyanaxochigügu, rü ngẽxguma i ngẽma chacherdóte rü 7 i ngunexü̃ tá wüxi i nachicagu tüxü̃ narüwãxtaxü̃.
27 Rü ngẽma chacherdóte rü ngẽxguma ngẽma 7 i ngunexü̃guwena tá tüxü̃ nadau. Rü ngẽxguma nüxü̃ nada̱u̱xgu nax ngẽma o̱xri yaxũchigüamaxü̃ i tümacha̱xmüxü̃wa, rü tá tümamaxã nanaxuegu nax chaxünemaxã tida̱xawexü̃ rü ngẽmaca̱x taxãũãchixü̃ i Tupanape̱xewa.
28 Natürü ngẽxguma ngẽma o̱xri tama iyaxũxgu i tümacha̱xmüxü̃wa rü iyanaxochigügu, rü tá nüxü̃ nacua̱x nax ngẽma itixaxü̃arü nachicamare nax yixĩxü̃ i ngẽma ngéma rüchaxü̃. Rü ngẽxguma i nüma ya chacherdóte rü tá tümamaxã nanaxuegu nax tama tida̱xawexü̃ rü marü tama taxãũãchixü̃, erü nachicamare nixĩ i ngẽma itixaxü̃wa ngẽxmaxü̃.
29 13:29-30 Rü ngẽxguma wüxi ya yatü rüe̱xna wüxi ya ngexe tüxü̃́ nangẽxmagu i wüxi i o̱xri i tümaeruwa rüe̱xna tümachicürawa, rü ngẽma chacherdóte rü tá tüxü̃́ nüxü̃ nadau i ngẽma tümaarü o̱xri. Rü ngẽxguma ngẽma o̱xri rü ínape̱xgu i tümacha̱xmüxü̃wa, rü yadexãchitanügu rü nagu̱xgu ya yima tümata̱xaxü̃ne, rü ñu̱xũchi nüma ya chacherdóte rü tá tümamaxã nanaxuegu nax taxãũãchixü̃ ya yíxema duü̃xẽ, erü tümaeruwa rü tümachicürawa tüxü̃́ nangẽxma i chaxüne i tiñagu ãégaxü̃.
30 Nüü̃ nadau 13:29
31 Natürü ngẽxguma ngẽma chacherdóte tüxü̃́ nüxü̃ da̱u̱xgu i ngẽma tümaaarü o̱xri i tiñagu ãégaxü̃, rü nüxü̃ nada̱u̱xgu nax tama ínape̱xgu i tümacha̱xmüxü̃eruwa, rü ngẽma o̱xrichicawa nataxuxguma i tümayae i waxüxü̃, rü ngẽxguma i nüma ya chacherdóte rü 7 i ngunexü̃ tá wüxi i nachicagu tüxü̃ narüwãxtaxü̃.
32 13:32-33 Rü nüma ya chacherdóte rü ngẽxguma ngẽma norü 7 i ngunexü̃wa nanguxgu, rü wena tá tüxü̃́ nüxü̃ nadau i ngẽma tümaarüarü o̱xri. Rü ngẽxguma tama yaxũchigüamagu i ngẽma o̱xri i tümaeruwa yarügoxü̃, rü ñu̱xũchi tama ínape̱xgu i tümacha̱xmüxü̃eruwa rü tama nadexãchitanügu i tümayae, rü ñu̱xũchi nüma ya chacherdóte rü tá tüxü̃ namu nax tayadüxü̃ca̱x i tümayae. Natürü taxũtáma tayadü i ngẽma ítarüxóxü̃wa. Rü ngẽxguma i nüma ya chacherdóte rü wena to i 7 i ngunexü̃ tá tüxü̃ narüwãxtaxü̃.
33 Nüü̃ nadau 13:32
34 Rü ngẽxguma ngẽma norü 7 i ngunexü̃wa nanguxgu rü nüma ya chacherdóte rü wena tá tüxü̃́ nüxü̃ nadau i ngẽma tümaarü o̱xri. Rü ngẽxguma tama yaxũchigügu i ngẽma tümaeruwa iyarügoxü̃ i o̱xri, rü tama ínape̱xgu i tümacha̱xmüxü̃eruwa, rü ngẽxguma i ngẽma chacherdóte rü tá tümamaxã nanaxuegu nax tama Tupanape̱xewa taxãũãchixü̃ ya yíxema duü̃xẽ ya ida̱xawexe. Rü ngẽxguma i tüma rü tá tügü tayauxchiru rü taxũtáma Tupanape̱xewa taxãũãchi.
35 13:35-36 Rü nawena nax marüchire̱x tümamaxã naxueguãxü̃ nax tama Tupanape̱xewa taxãũãchixü̃, natürü yaxũchigüamagu i ngẽma tümawa iyarügoxü̃ i o̱xri, rü nüma ya chacherdóte rü wena táxarü tüxü̃́ nanangugü i tümaarü o̱xri ya yíxema ida̱xawexe. Rü ngẽxguma tümaarü o̱xri yaxũchigügu i tümaeruwa, rü taxuca̱xma naxca̱x nadau i tümayae i dexexü̃, erü yíxema ida̱xawexe rü Tupanape̱xewa taxãũãchi.
36 Nüü̃ nadau 13:35
37 Natürü ngẽxguma ngẽma chacherdóte nüxü̃ da̱u̱xgu rü marü nax íyachaxãchixü̃ nax naxoxü̃ i ngẽma o̱xri, rü nachicawa iyanayixgu i tümayae i wẽxẽxü̃, rü ngẽmawa tá nüxü̃ nacua̱x nax marü yaxẽxü̃ i tümaarü o̱xri rü tama Tupanape̱xewa taxãũãchi. Rü ngẽxguma i nüma ya chacherdóte rü tá tümamaxã nanaxuegu nax marü Tupanape̱xewa tamexü̃ ya yíxema duü̃xẽ ya ida̱xawexe.
38 13:38-39 Rü ngẽxguma wüxi ya yatüxü̃ rüe̱xna wüxi ya ngexe rü inacho̱xogügu i tümacha̱xmüxü̃, rü nüma ya chacherdóte rü tá tüxü̃́ nüxü̃ nadau i ngẽma chóxü̃ i tümacha̱xmüxü̃wa yarüyi̱xü̃. Rü ngẽxguma nüxü̃ nada̱u̱xgu nax nacho̱xagüxü̃ rü nawẽ̱xẽxagüxü̃, rü ngẽmawa tá nüxü̃ nacua̱x nax wüxi i wãxĩnemare nax yixĩxü̃ i ngẽma tümaxü̃newa yarüyixü̃. Rü ngẽxguma ya yíxema duü̃xẽ rü tama chaxünearü da̱xawemaxã tida̱xawe.
39 Nüü̃ nadau 13:38
40 13:40-41 Rü ngẽxguma wüxi ya yatü rü inagüyaegu rü naba̱i̱xerugu, rüe̱xna nacatüwa inagüyaegu rü nabáicatügu, rü tama nidawe.
41 Nüü̃ nadau 13:40
42 Natürü ngẽxguma wüxi i o̱xri i dauxraxü̃ nawa iyarügoxgu i ngẽma naweama ínabaixü̃wa rüe̱xna nacatüwaama, rü ngẽmawa nüxü̃ tacua̱x nax ngẽma o̱xri rü chaxünearü o̱xri nax yixĩxü̃.
43 13:43-44 Rü ngẽxguma i ngẽma chacherdóte rü tá tüxü̃́ nüxü̃ nadau i ngẽma o̱xri. Rü ngẽxguma nadauxragu i ngẽma o̱xri i ngẽma ítangeyaexü̃wa rügoxü̃, ngẽxgumarüxü̃ ega chi ngẽma chaxüne rü tümaxü̃newa iyanagóxgurüxü̃, rü ngẽmawa nüxü̃ nacua̱x nax chaxünearü da̱xawe nax yixĩxü̃. Rü ngẽxguma i nüma i chacherdóte rü tá nüxü̃ nixu nax chaxüne yixĩxü̃ i ngẽma tümaeruwa iyarügoxü̃ rü ngẽmaca̱x tá tümamaxã nanaxuegu nax Tupanape̱xewa taxãũãchixü̃.
44 Nüü̃ nadau 13:43
45 Rü yíxema chaxünearü o̱xri tümawa yarüyi̱xixe, rü tá naxchiru i rügáuxü̃gu ticu̱x rü tama tatüeru. Rü ñu̱xũchi tügü tidüxchíweãcü tá ñaãcü ticaechigü: “¡Chaxãũãchi! ¡Chaxãũãchi!” ñaãcü tá ticaechigü.
46 Rü ngẽxguma chaxünemaxã tida̱xawegu rü duü̃xü̃gü rü tá tüxü̃ nacua̱xgü nax wüxi i duü̃xü̃ i ãũãchixü̃ tixĩxü̃. Rü tá tüxica duü̃xü̃gü ípegüxü̃arü yáxü̃wa tamaxü̃xü̃.
Mugü i chúxü̃chiga
47 13:47-49 Rü ngẽxguma yachu̱xgu i wüxi i naxchiru i carnéruta̱xanaxca̱x, rüe̱xna línuchinaxca̱x, rüe̱xna línuchiwa mutachinüxü̃, rüe̱xna carnéruta̱xawa mutachinüxü̃, rüe̱xna wüxi i ngẽmaxü̃ i naxcha̱xmüü̃naxca̱x, rüe̱xna ngẽxü̃rüü̃xü̃mare i ngẽmaxü̃ i naxcha̱xmüü̃wa üxü̃wa nango̱xgu nax yachúxü̃, rü ngẽxguma nayáuxragu rüe̱xna nadauxragu i norü chu̱x i ngẽma naxchirugü, rü chaxünearü chu̱x nixĩ i ngẽma. Rü name nax chacherdótexü̃ peyawéxü̃
48 Nüü̃ nadau 13:47
49 Nüü̃ nadau 13:47
50 Rü ngẽxguma i ngẽma chacherdóte rü tá nüxü̃ nadau i ngẽma naxchiru i chúxü̃. Rü 7 i ngunexü̃ ta wüxi i nachicagu nanawãtaxü̃ i ngẽma ngẽmaxü̃ i chúxü̃.
51 Rü ngẽma norü 7 i ngunexü̃gu rü wena tá nüxü̃ nadau i ngẽma ngẽmaxü̃ i chúxü̃. Rü ngẽxguma yaxũchigügu nax yachúxü̃ i ngẽma naxchiruwa, rüe̱xna ngẽma mutachinüxü̃wa, rüe̱xna ngẽma naxcha̱xmüü̃wa, rüe̱xna ngẽma ngẽmaxü̃ i naxcha̱xmüü̃naxca̱xwa, rü ngẽmawa nüxü̃ tacua̱x i ngẽma norü chu̱x rü aixcüma chaxüne i ãũcümaxü̃chixü̃ nixĩ. Rü ngẽxguma i ngẽma ngẽmaxü̃ rü Tupanape̱xewa nixãũãchi.
52 Rü ngẽmaca̱x i ngexü̃rüüxü̃ i ngẽmaxü̃ i chúxü̃ rü name nixĩ i wüxicana yaguxü̃, erü chaxüne i ãũcümaxü̃ nawa nangẽxma.
53 13:53-54 Natürü ngẽxguma chacherdóte nüxü̃ da̱u̱xgu nax tama yaxũãmaxü̃ nax yachúxü̃ i ngẽma ngẽmaxü̃, rü tá nanamu nax dexáwa yayauxãxü̃ca̱x. Rü ngẽmawena rü to i 7 i ngunexü̃ tá wüxi i nachicagu nanawãtaxü̃.
54 Nüü̃ nadau 13:53
55 Rü nawena nax marü dexáwa naya̱u̱xãxü̃ i ngẽma ngẽmaxü̃ i chúxü̃, rü nüma i chacherdóte rü wena tá nüxü̃ nadau. Rü ngẽxguma nüxü̃ nada̱u̱xgu nax tama iyanaxoxü̃ nax yachúxü̃, rü ngẽmawa tá nüxü̃ nacua̱x nax chaxüne yixĩxü̃ i ngẽma nax yachúxü̃, rü name nax wüxicana yaguxü̃ i ngẽma ngẽmaxü̃ woo tama yaxũãmagu nax yachúxü̃. Rü ngẽxguma norü düxétüwa rü norü aixepewa yachu̱xgu, rü ngẽmawa nüxü̃ nacua̱x nax wüxi i ãũcümaxü̃ nax yixĩxü̃.
56 Rü nawena nax dexáwa naya̱u̱xãxü̃ i ngẽma naxchiru nax yachúxü̃, rü ngẽxguma chacherdóte nüxü̃ da̱u̱xgu nax marü yanaxochigüxü̃ nax yachúxü̃, natürü nüma ya chacherdóte rü tá ngẽma naxchiruwa, rüe̱xna ngẽma naxcha̱xmüü̃wa, rüe̱xna ngẽma mutachinüxü̃wa ínanayoeama i ngẽma noxri íyachu̱xchiréxü̃wa.
57 Natürü ngẽxguma wena nango̱xamagu rü yaxũchigüamagu nax yachúxü̃ i ngẽma naxchiruwa, rü ngẽma mutachinüxü̃wa rüe̱xna ngẽma ngẽmaxü̃ i naxcha̱xmünaxca̱xwa, rü tá wüxicana peyagu i ngẽma ngẽmaxü̃ i chúxü̃.
58 Rü ngẽxguma marü nayaxu̱xguwena rü iyanaxoxgu nax yachúxü̃ i ngẽma naxchiru, rüe̱xna ngẽma mutachinüxü̃, rüe̱xna ngẽma ngẽmaxü̃ i naxcha̱xmünaxca̱x, rü ngẽxguma rü tá wena niyauxgü nax ngẽmaãcü aixcüma namexü̃ca̱x —ñanagürü ga Cori ya Tupana.
59 Rü ngẽma nixĩ i ngẽma ucu̱xẽgü nachiga i ngẽma chaxünearü chúxü̃ i naxchiru i carnéruta̱xanaxca̱xwa, rüe̱xna línuchinaxca̱xwa, rüe̱xna mutachinüxü̃wa, rüe̱xna ngẽmaxü̃ i naxcha̱xmünaxca̱xwa ngẽxmaxü̃, nax ngẽmaãcü nüxü̃ picuáxü̃ca̱x nax ngexü̃rüüxü̃ yixĩxü̃ i ngẽma Tupanape̱xewa mexü̃ rü ngẽma nape̱xewa ãũãchixü̃.
