Levítico 14:1-57
14 Rü nüma ga Cori ya Tupana rü Moichémaxã nidexa rü ñanagürü nüxü̃:
2 14:2-4 —Ñaagü nixĩ i mugügü naxca̱x i ngẽma chaxünemaxã ida̱xawexü̃. Nüma ya chacherdóte rü ĩanearü yáxü̃wa tá naxũ nax ngẽma ida̱xawexü̃xü̃ íyadauxü̃ca̱x. Rü ngéma rü tá naxü̃tawa nanagagü. Rü ngẽxguma chacherdóte nüxü̃ da̱u̱xgu nax marü nüxü̃́ yaxẽxü̃ i norü o̱xrigü i ngẽma chaxünemaxã ida̱xawexü̃, rü nüma ya chacherdóte rü tá duü̃xü̃güxü̃ namu nax ngẽma ida̱xawexü̃ca̱x naxü̃tawa nagagüãxü̃ca̱x i taxre i werigü i maxẽxü̃ i ngearü chixexü̃ã́xü̃. Rü ngẽxgumarüxü̃ tá ta nanamu nax naxü̃tawa nangegüãxü̃ca̱x i wüxi i mürapewaxacü i ocayiwanaxca̱x rü wüxi i daucharaxü̃ i naxchiru rü wüxi i ichópuchacüxü i maxcuruxü̃ nax ngẽmamaxã Tupanape̱xewa ínapiãxü̃ca̱x i ngẽma da̱xawe.
3 Nüü̃ nadau 14:2
4 Nüü̃ nadau 14:2
5 Rü duü̃xü̃güxü̃ tá namu nax tüxü̃ yamáxü̃ca̱x ya wüxi ya yíxema weri naétügu ya wüxi ya buetare i waixü̃münaxca̱x ya dexá i íchuxchuxü̃wa yaxuxü̃maxã ããcucü.
6 Rü nüma ya chacherdóte rü tá tüxü̃ nayaxu ya yíxema toguxe ya weri ya maxü̃́xẽ, rü ngẽma mürapewaxacü i ocayiwanaxca̱x, rü ngẽma naxchiru i daucharaxü̃, rü ñu̱xũchi ngẽma maxcuruxü̃. Rü guxü̃ma i ngẽma rü tá nayawaixẽxẽ namaxã ya tümagü ya yíxema weri ya tüxü̃ yamáxe naétügu ya yimá buetare i dexá i íchuxchuxü̃wa yaxuxü̃maxã ãcucü.
7 Rü ngẽmawena rü 7 e̱xpü̱xcüna tá yíxema werigümaxã nanamaxcuxü̃ne i ngẽma chaxünemaxã ida̱xawexü̃. Rü ñu̱xũchi tá namaxã nanaxuegu nax marü naxca̱x yataaneexü̃. Rü ngẽma weri i maxü̃xü̃ rü tá nayange̱x nax yaxũxü̃ca̱x.
8 Rü yíxema marü tümaca̱x yataanexe, rü name nax tügü tayauxchiruxü̃ rü tügü mea taxaiyaxü̃, rü guxü̃wama tügü tidüxü̃ nax ngẽmaãcü tamexü̃ca̱x. Rü ngẽmawena tá nixĩ i duü̃xü̃gü íxãpataxü̃wa taxũxü̃. Natürü 7 i ngunexü̃ tá nixĩ i tümapataarü düxétüwa tangexmaxü̃.
9 Rü norü 7 i ngunexü̃gu rü mea tá tügü tidüxpü̱xüeru, rü tügü tidüxchinagu, rü tügü tidüxü̃catü, rü tügü tidüxta̱xaxü̃ne. Rü tá tügü tayauxchiru rü ñu̱xũchi mea tá tügü taxaiya, rü ngẽxguma tá nixĩ i tangearü da̱xaweã́xü̃.
10 Rü ngẽma norü 8 i ngunexü̃gu ya yíxema tümaca̱x yataanexe rü tá tayayaxu i taxre i carnéruxacü i yatüxü̃ i ngearü chixexü̃ã́xü̃, rü ñu̱xũchi wüxi i carnéruxacü i ngexü̃ i wüxi ya taunecü nüxü̃́ ngẽxmaxü̃ i ngearü chixexü̃ã́xü̃. Rü ñu̱xũchi tá tanayaxu i 6 quíru i trigute̱xe i rümemaexü̃ i chíxü̃maxã ãéü̃xü̃. Rü ngẽxgumarüxü̃ tá ta tanayaxu i ngãxü̃ i litru i chíxü̃.
11 Rü ngẽma chacherdóte i tá naxüxü̃ i ngẽma mexẽẽchiga rü Cori ya Tupanapatape̱xegu tá tüxü̃ namu ya yíxema duü̃xẽ wüxigu namaxã i tümaarü ngẽmaxü̃gü.
12 Rü ngẽmawena nüma ya chacherdóte rü tá tüxü̃ niyaxu i wüxi ya yíxema carnéruxacü rü ñu̱xũchi tá nanayaxu i ngẽma ngãxü̃ i litru i chíxü̃ rü Tupanape̱xewa tá nanange i ngẽma ãmare i ngẽma duü̃xẽarü chixexü̃gagu ixãxü̃. Rü ngéma Tupanape̱xewa tá nayachü̱xüxacüüxẽxẽ.
13 Rü tá nayama̱x i ngẽma carnéruxacü nagu i ngẽma nachica i nagu nadaiaxü̃ i ngẽma naxü̃nagü i pecaduarü ütanüruxü̃gü rü ngẽma naxü̃nagü i ãmare i Tupanaca̱x ínaguxü̃. Rü ngẽma ãmare i pecadu i naguãchixü̃ca̱x inaxãxü̃, rü ngẽxgumarüxü̃ ta i ngẽma ãmare i pecaduarü ütanüca̱x inaxãgüxü̃, rü chacherdótearü tá nixĩ i ngẽma namachi, erü ngẽma rü naxüüne.
14 Rü nawena nax yamáaxü̃ i ngẽma naxü̃na i pecadu i naguãchixü̃ca̱x yamáxü̃, rü nüma ya chacherdóte rü íxracü ya yimá nagü tá nayaxu, rü yíxema duü̃xẽ ya chaxünewa tüxü̃ namexexẽẽarü tügünechinüpünewa tá yimá nagümaxã tüxü̃ nacha. Rü ngẽxgumarüxü̃ tá ta nanacha ya yima tügüneme̱xẽarü tatarene rü yima tügünecutüarü tatarene.
15 Rü ngẽmawena ya yimá chacherdóte rü íxraxü̃ i chíxü̃ tá nayaxu rü norü to̱xoweme̱xẽgu tá nanaba.
16 Rü norü tügüneme̱xẽarü unetaruü̃maxã tá nawa naxue i ngẽma chíxü̃ i norü to̱xoxweme̱xẽwa ngẽxmaxü̃. Rü yimatama norü unetaruü̃maxã tá 7 e̱xpü̱xcüna ngẽma ãmarearü guruü̃guama nanamaxgü i ngẽma chíxü̃.
17 Rü nüma ya chacherdóte rü ngẽma chíxü̃ i naxme̱xwa yáxü̃wa tá nanayaxu i íxraxü̃ rü ngẽmamaxã tá tüxü̃ nacha ya yíxema duü̃xẽ ya chaxünewa tüxü̃ namexexẽẽarü tügünechinüpünewa rü yima tügüneme̱xẽarü tatarenewa rü yima tügünecutüarü tatarenewa. Rü ngẽmaãcü ngẽma naxü̃na i pecadu i naguãchixü̃ca̱x yamáxü̃arü nagüétüwa tá tüxü̃ nacha namaxã i ngẽma chíxü̃.
18 Rü ngẽma chíxü̃ i naxme̱xwa íyaxüxü̃maxã tá tüxü̃ nachaeru ya yíxema duü̃xẽ ya chaxünewa tüxü̃ namexexẽxẽ. Rü ngẽmaãcü ya chacherdóte rü tá tümaétüwa nachogü, nax ngẽmaãcü Tupana tüxü̃́ nüxü̃ iyarüngümaxü̃ca̱x i tümaarü pecadu.
19 14:19-20 Rü ngẽmawena i ngẽma chacherdóte rü tá Tupanana nanaxuaxü̃ i ngẽma naxü̃na i pecaduarü ütanüruxü̃ nax ngẽmaãcü tarümexü̃ca̱x ya yíxema chaxünemaxã ida̱xawexe. Ngẽmawena rü tá nayama̱x i ngẽma naxü̃na rü ãmarearü guruü̃wa tá nayagu wüxigu namaxã i ngẽma ãmare i trigute̱xe. Rü ngẽmaãcü ya chacherdóte rü tá tümaétüwa nachogü, nax ngẽmaãcü Tupana tüxü̃́ nüxü̃ iyarüngü̃maxü̃ca̱x i tümaarü pecadu. Rü ngẽmaãcü tá Tupanape̱xewa tame.
20 Nüü̃ nadau 14:19
21 Rü ngẽxguma chi taxíxraarü diẽruã̱xgu ya yíxema ida̱xawexe, rü tama tinguarü diẽruã̱xgu rü wüxitama carnéruxacü tá cha̱u̱xca̱x tima̱x naxca̱x i ngẽma pecadu i tümaguãchixü̃. Rü nüma ya chacherdóte rü Tupanape̱xewa tá nayachü̱xüxãcüüxẽxẽ i tümaarü ãmare nax ngẽmaãcü Tupana tüxü̃́ nüxü̃ nangümaxü̃ca̱x i ngẽma tümaarü pecadu. Rü naétü tá itanaxã i tümaarü ãmare i taxre i quíru i rümemaexü̃ i trigute̱xe i chíxü̃maxã ãéü̃xü̃ rü ngãxü̃gu i litru i chíxü̃.
22 Rü ñu̱xũchi tá itanaxã i taxre i muxtucugü rüe̱xna taxre i muxtucuxacügü i ngẽma tüxü̃́ tauxchaxü̃ nax itanaxãxü̃. Rü wüxi tá nixĩ i pecaduarü ütanüruü̃ca̱x timáxü̃ rü ngẽma to tá nixĩ i ãmare nax tayaguxü̃ca̱x.
23 Rü tüma rü ngẽma 8 i ngunexü̃gu rü Tupanapataarü ĩã̱xwa tá chacherdótena tayana i guxü̃ma i ngẽma ãmaregü i tümaarü pecaduarü ütanüruxü̃ nax ngẽmaãcü Tupanape̱xewa tamexü̃ca̱x.
24 Rü nüma i ngẽma chacherdóte rü tá nanaganagü i ngẽma carnéruxacü i tümaarü pecadu i tümaguãchixü̃ca̱x imáxchaü̃xü̃. Rü tá nanayaxu i ngẽma ngãxü̃gu i litru i chíxü̃ rü wüxigu ngẽma carnéruxacümaxã tá Tupanape̱xewa nayachü̱xüxãcüüxẽxẽ i ngẽma ãmare i mexẽchixü̃ i Tupanaca̱x ixĩxü̃.
25 Rü nüma ya chacherdóte tá nayama̱x i ngẽma carnéruxacü i pecadugagu imáxü̃. Rü tá nanayaxu ya íxracü ya nagü i ngẽma carnéruxacü, rü yimá nagümaxã tá tüxü̃ nacha ya tügünechinüpünewa ya yíxema duü̃xẽ ya tümaarü pecaduwa tüxü̃ namexexẽxẽ. Rü ngẽxgumarüxü̃ tá ta nanacha ya yima tügüneme̱xẽarü tatarene rü yima tügünecutüarü tatarene.
26 14:26-27 Rü ngẽmawena ya yima chacherdóte rü íxraxü̃ i chíxü̃ tá nayaxu rü norü to̱xweme̱xẽgu tá nanaba. Rü norü tügüneme̱xẽarü unetaruü̃maxã tá nawa naxue i ngẽma chíxü̃ i norü to̱xweme̱xẽwa ngẽxmaxü̃. Rü yimatama norü unetaruü̃maxã tá 7 e̱xpü̱xcüna ngẽma ãmarearü guruü̃guama nanamaxgü i ngẽma chíxü̃.
27 Nüü̃ nadau 14:26
28 Rü nüma ya chacherdóte rü ngẽma chíxü̃ i naxme̱xwa yaxüxü̃wa tá nanayaxu i íxraxü̃ rü ngẽmamaxã tá tüxü̃ nacha ya yíxema duü̃xẽ ya chaxünearü o̱xrimaxã ida̱xawexearü tügünechinüpünewa rü yima tügüneme̱xẽarü tatarenewa rü yima tügünecutüarü tatarenewa. Rü ngẽmaãcü ngẽma naxü̃na i pecadu i naguãchixü̃ca̱x yamáxü̃arü nagüétüwa tá tüxü̃ nacha namaxã i ngẽma chíxü̃.
29 Rü ngẽma chíxü̃ i naxme̱xwa yaxüxü̃maxã tá tüxü̃ nachaeru ya yíxema duü̃xẽ ya chaxünewa tüxü̃ namexexẽxẽ. Rü ngẽmaãcü ya chacherdóte rü tá tümaétüwa nachogü, nax ngẽmaãcü Tupana tüxü̃́ nüxü̃ iyarüngü̃maxü̃ca̱x i tümaarü pecadu.
30 Rü ñu̱xũchi nüma i chacherdóte rü tá Tupanana nanaxã i wüxi i butünaxacü rüe̱xna wüxi i muxtucuxacü i ngẽma tüxü̃́ tauxchaxü̃ nax itanaxãxü̃ ya yíxema duü̃xẽ ya chaxünewa tüxü̃ namexexẽxẽ.
31 Rü wüxi i ngẽma weri tá nixĩ i pecaduarü ütanüruü̃ca̱x timáxü̃ rü ngẽma to tá nixĩ i ãmare i Tupanaca̱x tiguxü̃ wüxigu namaxã i ãmare i trigute̱xe. Rü ngẽmaãcü ya chacherdóte rü tá tümaétüwa nachogü, nax ngẽmaãcü Tupana tüxü̃́ nüxü̃ iyarüngü̃maxü̃ca̱x i tümaarü pecadu ya yíxema duü̃xẽ ya chaxünewa tüxü̃ namexexẽxẽ.
32 Rü ngẽmagü nixĩ i ngẽma mugü naxca̱x i ngẽma duü̃xü̃gü i chaxünearü o̱xrimaxã ida̱xaweexü̃ i taxucürüwa taxü̃ i ãmare norü mexẽẽruü̃ca̱x ixãgüxü̃ —ñanagürü.
Mugü nax ñuxãcü yamexẽxẽxü̃ ya ĩpatagü ya ichúene
33 Rü nüma ga Cori ya Tupana rü Moichéxü̃, rü Aróü̃xü̃ ñanagürü:
34 14:34-35 —Rü ngẽxguma ngẽma naane i pexna chaxãxü̃ i Canaáü̃anewa pengẽxmagügu, rü choma rü ñuxre ya ĩpatagu chananguxẽxẽ nax yachúexü̃ca̱x ya yima ĩpatagü, rü yíxema ĩpataarü yora rü tá chacherdótexü̃tawa taxũ, rü nüxü̃ tá ñatagürü: “Chopata i nawa changexmane rü nichu̱x”, ñatagürü tá.
35 Nüü̃ nadau 14:34
36 Rü nüma ya chacherdóte rü naxü̃pa nax nagu naxücuxü̃ ya yima ĩpata, rü tá tüxü̃ namu ya yíxema nawa ngẽxmagüxe nax ítachoxü̃xü̃ca̱x namaxã i guxü̃ma i tümaarü ngẽmaxü̃gü nax ngẽmaãcü tama nüxna naxüexü̃ca̱x i guxü̃ma i ngẽma ngẽmaxü̃gü ya yima ĩpatawa ngẽxmagüxü̃. Rü ngẽmawena rü nüma ya chacherdóte rü tá nagu naxücu ya yima ĩpata nax nangugüãxü̃ca̱x rü aixcüma yachú ya yima ĩpata.
37 14:37-38 Rü ngẽxguma ngẽma chacherdóte nüxü̃ da̱u̱xgu nax naxtapü̱xwa yachúxü̃ rü naxtapü̱xarü aixepegu nax naxücuxü̃ rü naya̱u̱xãchixü̃ rü nadauãchixü̃, rü ngẽxguma i nüma ya chacherdóte rü tá ínaxũxũ nawa ya yima ĩpata, rü tá nanamu nax 7 i ngunexü̃ nawãxtaxü̃.
38 Nüü̃ nadau 14:37
39 14:39-40 Rü nüma ya chacherdóte rü norü 7 i ngunexü̃gu wena tá ínayadau ya yima ĩpata. Rü ngẽxguma yayexerachigügu nax nayáua̱xgüxü̃ rü nadáua̱xgüxü̃ i ngẽma chúxü̃ i naxtapü̱xwa ya yima ĩpata, rü duü̃xü̃güxü̃ tá namu nax nadeaxü̃ca̱x ya yimá ĩpataarü nutagü ya ichúecü rü ñu̱xũchi wüxi i nachica i ãũãchixü̃ i ĩanearü yáxü̃wa ngẽxmaxü̃wa nax yawogüãxü̃ca̱x.
40 Nüü̃ nadau 14:39
41 Rü ñu̱xũchi duü̃xü̃güxü̃ tá namu nax nadüxtapü̱xgüãxü̃ca̱x i norü aixepemachiãwa ya yima ĩpata, rü ngẽma ínadügüxü̃ i nachitügü rü wüxi i nachica i ãũãchixü̃ i yima ĩanearü yáxü̃wa ngẽxmaxü̃wa nayagügü.
42 Rü yimá nutagü ya nadecüchicüxü tá nai ya nutagü ngéma nanucu, rü ngexwaca̱xü̃xü̃ i ñaxruü̃maxã tá nanachaxtapüxgü ya yima ĩxtapü̱x.
43 14:43-44 Rü ngẽxguma wenaxarü yima ĩpatawa nango̱xomagu i ngẽma chúxü̃ nawena nax marüchire̱x nadeaxü̃ ya yimá nutagü, rü marüchire̱x nadüxtapü̱xgüãxü̃ rü ngexwaca̱xü̃xü̃ i ñaxruü̃maxã nachaxtapü̱xgüãxü̃, rü ngẽxguma ya chacherdóte rü wena tá nagu naxücu ya yima ĩpata nax nüxü̃ nadauxü̃ca̱x rü nangugüãxü̃ca̱x. Rü ngẽxguma guxü̃wama nanguxgu nax yachu̱xüxtapǘxü̃, rü ngẽma rü ãũcümaxü̃ nixĩ nax yachúxü̃ ya yima ĩpata, rü Tupanape̱xewa naxãũãchi.
44 Nüü̃ nadau 14:43
45 Rü ngẽmaca̱x name i wüxicana nagu napogüe ya yima ĩpata. Rü ñu̱xũchi guxcüma ya norü nutagü wüxigu namaxã i naachina̱xãgü rü name i wüxi i nachica i ãũãchixü̃wa nayawogü i ĩanearü yáxü̃wa.
46 Rü ngẽxguma chacherdóte marü nüxü̃ ixuxgu nax nawãxtaxü̃ ya yima ĩpata, rü texé ya nagu ücuxe rü tá tüxü̃ nacua̱x nax taxãũãchixü̃ rü ñu̱xmata nachüta.
47 Rü yíxema yima ĩpatawa chibüxe rüe̱xna ngẽxma pexe, rü name nax tügü tayauxchiruxü̃ nax tangearü ãũãchiã́xü̃ca̱x.
48 Rü nawena nax marü to i chauxruü̃maxã nachaxtapǘxü̃ ya yima ĩpata, rü ngẽxguma chacherdóte nagu ücugu nax nangugüãxü̃ca̱x rü nüxü̃ nada̱u̱xgu nax tama iyaxũxü̃ nax yachúxü̃, rü ñu̱xũchi tá nüxü̃ nixu nax marü namexü̃ ya yima ĩpata, erü marü inarüxo nax yachúxü̃.
49 Rü Tupanape̱xewa nax namexẽẽxãxü̃ca̱x ya yima ĩpata, rü nüma ya chacherdóte tá nanayaxu i taxre ya werixacügü, rü wüxi i mürapewaxacü i ocayiwanaxca̱x, rü wüxi i daucharaxü̃ i naxchiru, rü wüxi i tüxa̱xmü i naigu rübuxü̃ nax ngẽmamaxã Tupanape̱xewa ínapiãxü̃ca̱x i ngẽma norü chu̱x ya yima ĩpata.
50 Rü tá tüxü̃ nima̱x ya wüxi ya weri naétügu ya wüxi ya buetare ya waixü̃münaxca̱x i dexá ichuchuxü̃wa yaxuxü̃maxã ããcucü.
51 Rü nüma ya chacherdóte rü tá nanayaxu i ngẽma mürapewaxacü i ocayiwanaxca̱x, rü ngẽma tüxa̱xmü i naigu rübuxü̃, rü ngẽma naxchiru i daucharaxü̃, rü yíxema weri ya maxü̃́xẽ. Rü tá nayawaixẽxẽ i guxü̃ma i ngẽma namaxã ya tümagü ya yíxema toguxe ya weri ya tüxü̃ yamáxe rü namaxã i ngẽma dexá i íchuchuxü̃wa yaxuxü̃. Rü 7 e̱xpü̱xcüna tá nanamaxcu ya yima ĩpata.
52 Rü ngẽmaãcü tá Tupanape̱xewa ínanapi ya yima ĩpata tümagümaxã ya yíxema werixacü ya tüxü̃ yamáxe, rü namaxã i ngẽma dexá i íchuxchuxü̃wa yaxuxü̃, rü tümamaxã ya yíxema werixacü ya maxü̃́xẽ, rü namaxã i ngẽma tüxa̱xmü i naigu rübuxü̃, rü namaxã i ngẽma naxchiru i dauxü̃ nax iyanaxoxü̃ca̱x nax yachúxü̃ ya yima ĩpata.
53 Ngẽmawena rü yima ĩanearü düxétüwaama tá tüxü̃ nimu ya yíxema werixacü ya maxü̃́xẽ. Rü ngẽmaãcü tá inayanaxoxẽxẽ nax yachúxü̃ ya yima ĩpata. Rü wenaxarü tá Tupanape̱xewa name ya yima ĩpata —ñanagürü ga Cori ya Tupana.
54 14:54-57 Rü ngẽmagü nixĩ i ore nachiga i naguxü̃raü̃xü̃ i chaxüne, rü dawe i tiñagu ãégaxü̃, rü naxchiru i chúxü̃ rü ĩpatagü ya ichúene, rü dawe i namaxã rüchaxü̃, rü waiãchixü̃ne, rü churixü̃ne i chóxü̃. Rü ngẽma orewa tá nüxü̃ pecua̱x i ta̱xacü nixĩ i Tupanape̱xewa mexü̃ rü ta̱xacü nixĩ i nape̱xewa ãũãchixü̃. Rü ngẽma nixĩ i ore nachiga i ngẽma chaxüne i naxcha̱xmüü̃wa rü naxchiruwa rü chúxü̃wa pexna üexü̃.
55 Nüü̃ nadau 14:54
56 Nüü̃ nadau 14:54
57 Nüü̃ nadau 14:54
