Levítico 16:1-34
16 Rü nüma ga Cori ya Tupana rü Moichémaxã nidexa nawena ga nax nayuexü̃ ga yema taxre ga Aróü̃ nanegü, yerü nagu nachocu ga yema naxmachiã ga Üünexüchixü̃ ga Cori ya Tupana nawa yexmaxü̃.
2 Rü Cori ya Tupana rü ñanagürü Moichéxü̃: —¡Namaxã nüxü̃ ixu ya cuenexẽ ya Aróü̃ rü tama name i ngexü̃rüüxü̃ i ngunexü̃gumare nagu naxücu i ngẽma naxmachiã i Üünexüchixü̃ i tüyemachiü̃ca̱xwena ngẽxmaxü̃ rü bai nüxna nangaicama i ngẽma baúátaü̃ nax tama nayuxü̃ca̱x! Erü choma rü tá ngẽma baúátaü̃étüwa caixanexü̃wa chaugü chango̱xẽxẽ.
3 Rü nüma ya Aróü̃ rü wüxi i wocaxacü i yatüxü̃maxã tá chopataa̱xtügu naxücu nax ngẽxma yamáãxü̃ca̱x noxrütama chixexü̃tanü. Rü ngẽxgumarüxü̃ tá ta ngéma nanaga i wüxi i carnéru nax cha̱u̱xca̱x yaguãxü̃ca̱x.
4 Rü nüma ya Aróü̃ rü naxü̃pa nax nagu yacúxü̃ i ngẽma chacherdótechiru rü tá naxaiyaxíra. Rü ngẽmawena rü tá nicuxcuchi i ngẽma natüü̃chiru i línuchinaxca̱x rü nagu tá nicu̱x i naxchiru i máxpaxü̃ i línuchinaxca̱x i woetama ngẽmaca̱x ixĩxü̃. Rü tá nügü nigoye rü nayanga̱xcuchi i napate̱xe i línuchinaxca̱x. Erü ngẽma nixĩ i naxchirugü i woetama ngẽmaruxü̃ ixĩgüxü̃.
5 Rü nüma i Iraétanüxü̃ rü tá Aróü̃na nanamugü i taxre i chíbuxacügü, rü ngẽma tá nixĩ i duü̃xü̃güarü pecaduca̱x nada̱i̱xü̃. Rü ngẽxgumarüxü̃ tá ta ngéma nanaga i wüxi i carnéru nax ngéma cha̱u̱xca̱x yaguãxü̃ca̱x.
6 Rü tá cha̱u̱xca̱x nayagu i ngẽma wocaxacü i noxrütama pecadugüarü ütanüruxü̃ rü napatacüã̱xarü pecadugüarü ütanüruxü̃.
7 Ngẽmawena rü tá tüxü̃ niyaxu ya yíxema taxre ya chíbugü, rü ñu̱xũchi Tupanapataarü ĩã̱xpe̱xewa tá tüxü̃ nagagü nax ngéma Cori ya Tupanana tüxü̃ namugüxü̃ca̱x.
8 Ngẽmawena rü tá nanasortéu i ngẽma taxre i chíbugü nax ngẽmawa nüxü̃ nacuáxü̃ca̱x nax ngexü̃rüüxü̃ tá yixĩxü̃ i Tupanaca̱x yamáxü̃ rü ngexü̃rüüxü̃ tá yixĩxü̃ i chianexü̃ i Achachéwa namuxü̃.
9 Rü ngẽma chíbu i nagu nanguxü̃ nax Cori ya Tupanaca̱x yamáaxü̃, rü Aróü̃ rü tá nayama̱x rü nayagu pecaduarü ütanüruxü̃.
10 Natürü ngẽma chíbu i nagu nanguxü̃ nax chianexü̃ i Achachéwa namuxü̃, rü maxü̃xü̃ tá Cori ya Tupanana namu nax Iraétanüxü̃axü̃́ nüxü̃ iyanangümaxü̃ca̱x i norü pecadugü. Rü ngẽmawena rü chianexü̃ i Achachéwa tá nanamu.
11 Rü nüma ya Aróü̃ rü tá cha̱u̱xca̱x nayagu i ngẽma wocaxacü i noxrütama pecaduarü ütanüruxü̃ nax nüxü̃́ nüxü̃ icharüngümaxü̃ca̱x i noxrütama pecadugü rü napatacüã̱xarü pecadugü.
12 Rü ñu̱xũchi nüma ya Aróü̃ rü tá nanayaxu i wüxi i pumarate̱xepáü̃. Rü ngẽma Tupanapatape̱xewa ngẽxmaxü̃ i guruü̃wa tá nanayaxu ya ã́xwe ya naicü, rü yimamaxã tá nanaxüãcu i ngẽma pumarate̱xearü guruü̃páü̃. Rü tá nanayaxu i taxreãcume̱xẽ i pumarate̱xe i yixichixü̃. Rü ngẽmamaxã tá ngẽma tüyemachiü̃arü aixepeguama naxücu.
13 Rü ngéma, Cori ya Tupanape̱xewa, tá yimá ã́xweétügu nanagü i ngẽma pumarate̱xe. Rü ngẽma norü caxixü̃ i ngẽma pumarate̱xe rü tá ngẽma baúátaü̃étügu nacaixnagü. Rü ngẽmaãcü tá nixĩ i taxũtáma nayuxü̃ ya Aróü̃.
14 Rü yimá nagü i ngẽma wocaxacü rü tá íxracü ngéma nanange rü naxme̱xmaxã tátama yimá nagümaxã nanamaxcuétü i ngẽma naxã́taxü̃ i ngẽma baú i norü éstecüwawaama. Rü ñu̱xũchi tá nanamaxcuétü i 7 e̱xpü̱xcüna i ngẽma naxã́taü̃pe̱xewaama.
15 Rü ngẽmawena rü tá nayama̱x i ngẽma chíbu i duü̃xü̃güarü pecaduarü ütanüruxü̃ ixĩxü̃. Rü yimá nagü i ngẽma chíbu rü tá ngẽma Tupanapataarü tüyemachiü̃arü aixepewa nanange. Rü ngéma aixepewa rü yimá nagümaxã tá nanamaxcuétü rü nanamaxcupe̱xe i ngẽma baúátaü̃ ngẽxgumarüxü̃ nax wocaxacügümaxã namaxcuãxü̃rüxü̃.
16 Rü nüma i Aróü̃ rü ngẽmaãcü tá nixĩ i chopataarü naxmachiã i üünexüchixü̃wa iyanaxoxẽẽãxü̃ i guxü̃ma i ngẽma Iraétanüxü̃arü ãũãchixü̃gü rü yema nax tama chauga naxĩnüexü̃, rü yema togü ga pecadugü ga naxügüxü̃. Rü ngẽma duü̃xü̃güpatagüarü ngãxü̃tanüwa ngẽxmane ya chopata, rü nüma i Aróü̃ rü ngẽxgumarüxü̃ tá ta nawa inanaxoxẽxẽ i ngẽma Iraétanüxü̃arü ãũãchixü̃gü.
17 16:17-18 Rü ngẽxguma Aróü̃ ngẽma naxmachiã i üünexü̃chixü̃arü aixepewa nangẽxmagu nax Tupanape̱xewa naxca̱x íyaca̱xaxü̃ca̱x nax duü̃xü̃güarü pecaduxü̃ íyanangü̃maxü̃ca̱x, rü taxúetama nüxna tangaicama ya yima Tupanapata. Rü ngẽxguma Tupana Aróü̃xü̃ ngãxü̃gu rü marü nüxü̃́ nüxü̃ iyanangümagu i Aróü̃arü pecadugü rü Aróü̃patacüã̱xarü pecadugü rü guxü̃ma i Iraétanüxü̃arü pecadugü, rü nüma i Aróü̃ rü tá ínaxũxũ nax Tupanaarü puracüca̱x namexẽẽãxü̃ca̱x i ngẽma ãmarearü guruxü̃ i Tupanapatape̱xewa ngẽxmaxü̃. Rü yimá nagü i ngẽma wocaxacü rü ngẽma chíbu rü tá íxracü ngéma nange, rü yimámaxã tá nanacha i ngẽma ãmarearü guruü̃chatacu̱xregü rü nacüwagü.
18 Nüü̃ nadau 16:17
19 Rü ñu̱xũchi yima norü unetame̱xẽmaxã rü 7 e̱xpü̱xcüna tá yimá nagümaxã nanamaxcuétü i ngẽma ãmarearü guruxü̃. Rü ngẽmaãcü tá ínanayixẽxẽ nawa i ngẽma Iraétanüxü̃arü ãũãchixü̃. Rü ngẽmaãcü Cori ya Tupanaca̱x tá nanamexẽxẽ i ngẽma ãmarearü guruxü̃.
20 Rü ngẽxguma Aróü̃ marü Tupanaarü puracüca̱x namexẽẽgu i naxmachiã i Üünexüchixü̃, rü yima napata, rü ngẽma ãmarearü guruxü̃, rü ngẽxgumawena tá wüxíexü̃ namu nax yagaãxü̃ca̱x i ngẽma chíbu i maxü̃xü̃.
21 Rü Aróü̃ rü ngẽma chíbuerugu nanuxme̱xãcüma tá Tupanamaxã nüxü̃ nixu i guxü̃ma i ngẽma Iraétanüxü̃arü chixexü̃gü, rü norü nuwa̱xegü, rü norü pecadugü. Rü ngẽmaãcü tá chíbuwa naxüe i guxü̃ma i ngẽma duü̃xü̃güarü pecadugü. Rü ngẽmawena rü wüxi i duü̃xü̃ tá nayaga rü ínachianexü̃wa tá nayata̱x.
22 Rü ngẽma chianexü̃gu tá inayarütaxu i ngẽma chíbu namaxã i guxü̃ma i Iraétanüxü̃arü chixexü̃gü.
23 Rü ngẽmawena ya Aróü̃ rü wena Tupanapatagu tá naxücu rü tá ínacu̱xü̃ i ngẽma naxchirugü i línuchinaxca̱x i noxri nagu yacúxü̃ nax nagu naxücuxü̃ca̱x i ngẽma naxmachiã i Üünexüchixü̃. Rü ñu̱xũchi ngẽxma Tupanapatagu tá nananu i ngẽma naxchirugü.
24 Rü wüxi i nachica i üünexü̃wa tá nügü naxaiya, rü ngẽmawena tá nicuxcuchi i noxrütama naxchiru. Rü tá ínaxũxũ nax Tupanape̱xewa yaguãxü̃ca̱x i ngẽma naxü̃na i noxrütama pecaduca̱x yaguxü̃ rü ñu̱xũchi ngẽma duü̃xü̃güarü pecaduca̱x yaguxü̃. Rü ngẽmaãcü tá nanaxü i Aróü̃ nax Tupana nüxü̃ rüngü̃maxü̃ca̱x i norü pecadugü rü duü̃xü̃güarü pecadugü.
25 Rü ãmarearü guruü̃wa tá nayagu i norü chíxü̃ i ngẽma naxü̃na i pecaduarü ütanüca̱x yamáxü̃.
26 Rü ngẽma yatü i ngẽma chíbuxü̃ íyatáxü̃ nawa i chianexü̃ i Achaché, rü name nax nügü naya̱u̱xchiruxü̃ rü naxaiyaxü̃. Rü ngẽmawena rü name nax duü̃xü̃gü íxãpataxü̃wa naxũxü̃.
27 Rü ngẽma wocaxacü rü ngẽma chíbu i pecaduca̱x daixü̃, rü yimá nagü i Aróü̃ rü naxmachiã i üünexü̃wa ngecü nax choma pexü̃́ nüxü̃ icharüngümaxü̃ca̱x i perü pecadugü. Rü pema ípexãchiü̃güxü̃arü yáxü̃wa tá ípenagu i naxcha̱xmüxü̃, rü namachi, rü naü̃.
28 Rü yíxema duü̃xẽ ya ínaguxe, rü name nax tügü tayauxchiruxü̃ rü taxaiyaxü̃ rü ngẽmawena rü name nax duü̃xü̃gü ípegüxü̃wa taxũxü̃.
29 Rü ñaa tá nixĩ i wüxi i mu i guxü̃gutáma nagu pexĩxü̃ i pemax. Rü ngẽxguma yimá 7 ya tauemacüarü 10 i ngunexü̃wa nanguxgu, rü tá penaxaure i ngẽma ngunexü̃. Rü ngẽma ngunexü̃gu rü guxãma i pema i Iraétanüxü̃ rü tá iperüngügü i perü puracüwa. Rü ngẽxgumarüxü̃ ta i ngẽma duü̃xü̃gü i to i nachixü̃anecüã̱xgü i petanügu ãchiü̃güxü̃, rü ta nanaxauregü i ngẽma ngunexü̃.
30 Rü ngẽma ngunexü̃gu tá nixĩ i pexü̃́ nüxü̃ icharüngümaxü̃ i perü pecadugü, rü ngẽmaãcü tá nixĩ i chope̱xewa pengearü pecaduã̱xgüxü̃.
31 Rü ngẽma tá nixĩ i wüxi i mu i guxü̃gutáma nagu pexĩxü̃. Rü pema i ngẽma ngunexü̃gu rü tá iperüngügü, rü tama pechibüeãcüma tá perücho.
32 Rü ngẽma ngunexü̃gu rü nüma i ngẽma chacherdóte i nüxü̃ chaxunetaxü̃ rü pora nüxna chaxãxü̃ nax nanatüchicüxü chacherdóte yixĩxü̃ca̱x, rü ngẽma chacherdóte tá nayanguxẽxẽ i ngẽma mugü i cumaxã nüxü̃ chixuxü̃ nax ngẽmaãcü pexü̃́ nüxü̃ charüngümaxü̃ca̱x i perü pecadugü. Rü nüma ya chacherdóte rü tá nagu nicu̱x i naxchiru i üünexü̃ i línuchinaxca̱x.
33 Rü nüma i chacherdóte rü ngẽmaãcü tá nixĩ i chopataarü naxmachiã i üünexüchixü̃wa rü yima chopatawa, rü ãmarearü guruü̃wa iyanaxoxẽẽãxü̃ i guxü̃ma i ngẽma Iraétanüxü̃arü ãũãchixü̃gü. Rü ngẽmaãcü ya chacherdóte rü tá guxü̃ma i chacherdótegüétüwa rü guxü̃ma i duü̃xü̃güétüwa nachogü, nax ngẽmaãcü Tupana nüxü̃́ nüxü̃ iyarüngü̃maxü̃ca̱x i norü pecadugü.
34 Rü ngẽma tá nixĩ i wüxi i mu i guxü̃gutáma nagu pexĩxü̃. Rü guxcüma ya taunecügu rü ngẽma chacherdóte tá wüxicana tátama nanaxüchiga i ngẽma cumaxã nüxü̃ chixuxü̃ nax ngẽmaãcü nüxü̃́ nüxü̃ charüngümaxü̃ca̱x i Iraétanüxü̃arü pecadugü —ñanagürü ga Tupana. Rü yema Cori ya Tupana Moichémaxã nüxü̃ ixuxü̃ãcüma nayanguxẽxẽ ga guxü̃ma.
