Levítico 17:1-16
17 17:1-2 Rü nüma ga Cori ya Tupana rü Moichémaxã nidexa rü ñanagürü nüxü̃: —¡Aróü̃maxã rü nanegümaxã, rü ñu̱xũchi guxü̃ma i Iraétanüxü̃maxã nüxü̃ ixu i ñaa mugü i choma ya Cori ya Tupana cumaxã nüxü̃ chixuxü̃!
2 Nüü̃ nadau 17:1
3 17:3-4 Rü yíxema Iraétanüxü̃ i ngextamare yamáxe i tümaarü ãmare i wüxi i woca i yatüxü̃, rüe̱xna wüxi i carnéru i yatüxü̃, rüe̱xna wüxi i chíbu i ngexü̃ i timáxü̃ i ĩanearü aixepegu rüe̱xna ĩanearü düxétügu rü chixexü̃wa tangexma. Erü tama chopatape̱xewa tanaga i tümaarü ãmare nax ngéma choxna tayaxuãxü̃xü̃ca̱x. Rü tümagagu tátama petanüwa tüxü̃ ípeta̱xüchi.
4 Nüü̃ nadau 17:3
5 Rü ngẽma nixĩ i chorü mu naxca̱x i ngẽma Iraétanüxü̃ i naanegumare nada̱i̱xü̃ i naxü̃nagü i ãmaregü rü ngẽmawena chacherdótexü̃tawa nanaxü̃ nax nüma ya chacherdóte chopatape̱xewa yaguãxü̃ nax ngẽmaãcü choxü̃ nangüxmüxẽẽgüxü̃ca̱x.
6 Rü name i duü̃xü̃gü rü namaxẽãcüma chopatape̱xewa nanagagü i norü ãmaregü nax nüma i chacherdóte yimá nagümaxã namaxcuãxü̃ca̱x i ngẽma chorü ãmarearü guruxü̃ i chopatape̱xewa ngẽxmaxü̃ rü ñu̱xũchi ngéma ínaguaxü̃ i ngẽma norü chíxü̃ nax naemamaxã chataãẽxü̃ca̱x.
7 Rü ngẽma Iraétanüxü̃ rü chanaxwa̱xe i nüxü̃ narüxoe nax ãmare naxca̱x ínaguxü̃ i ngẽma chíbuchicüna̱xãgü i noxri nüxü̃ yacua̱xüü̃güxü̃ rü chixexü̃wa nagagüxü̃. Rü ngẽma pemaxã nüxü̃ chixuxü̃ i mu nixĩ i guxü̃gutáma nagu pexĩxü̃ i pema rü penegü rü petaagü.
8 17:8-9 Rü namaxã nüxü̃ ixu rü ngẽma Iraétanüxü̃ rüe̱xna ngẽma to i nachixü̃anecüã̱x i petanügu ãpataxü̃ rü ngẽxguma chi ãmare inaxãxgu, rü tama chopataarü ĩã̱xwa nangeãgu nax ngéma choxna naxããxü̃ca̱x, rü pema rü wüxicana tá petanüwa ípenata̱xüchi.
9 Nüü̃ nadau 17:8
Cori ya Tupana rü Iraétanüxü̃na nayanuxũ nax nagü nangõ̱xgüxü̃
10 Choma rü tá naxchi chaxai i guxü̃ma i ngẽma Iraétanüxü̃ rüe̱xna ngẽma to i nachixü̃anecüã̱x i petanügu ãpataxü̃ i nagü ngṍxü̃. Rü ngẽma duü̃xü̃gü i nagü nangõ̱xgüxü̃ rü choma rü wüxicana tá íchanawoxü̃ i Iraétanüxü̃tanüwa.
11 Erü guxü̃ma i ta̱xacü i maxü̃xü̃ rü yimá nagüwa nixĩ i nangẽxmaxü̃ i norü maxü̃. Choma rü marü pexna chanaxã ya yimá nagü nax ãmarearü guruü̃wa yimá nagümaxã penaxütanüxü̃ca̱x i perü pecadugü. Erü yimá nagü nixĩ i chope̱xewa naétüwa chogücü i perü maxü̃ nax pexü̃́ nüxü̃ charüngümaxü̃ca̱x i perü pecadugü.
12 Rü ngẽmaca̱x Iraétanüxü̃xü̃gümaxã nüxü̃ chixu rü ñachagürü: Taxúxetáma i petanüwa, rü ngẽma to i nachixü̃anecüã̱x i petanügu ãpatagüxü̃tanüwa rü tá nanangõ̱xgü ya nagü.
13 Rü ngẽxguma ngexü̃rüü̃xü̃ i Iraétanüxü̃ rüe̱xna ngẽma to i nachixü̃anecüã̱x i petanügu ãpataxü̃ wüxi i naeü̃ rüe̱xna wüxi i weri ingṍxü̃ yama̱xgu, rü name nixĩ nax inabagüxẽẽãxü̃, rü ñu̱xũchi yimá nagü rü waixü̃mümaxã nagüétüãxü̃.
14 Erü guxü̃ma i ta̱xacü i maxü̃xü̃ rü yimá nagüwa nixĩ i nangẽxmaxü̃ i norü maxü̃. Rü ngẽmaca̱x nixĩ i pemaxã nüxü̃ chixuxü̃ nax tama penangṍxü̃ ya yimá nagü, erü yimá nixĩ i norü maxü̃ i guxü̃ma i ta̱xacü i maxẽxü̃. Rü ngẽma duü̃xü̃ i nagü nangṍxü̃ rü wüxicana tá ínata̱xüchi i Iraétanüxü̃tanüwa.
15 Rü yíxema Iraétanüxü̃ rüe̱xna to i nachixü̃anecüã̱x ya petanügu ãpataxe rü naeü̃ i yumarexü̃machi rüe̱xna naeü̃ i ai nagu wagüxü̃machi tangõ̱xgu, rü tanaxwa̱xe nax tügü tayauxchiruxü̃ rü tügü taxaiyaxü̃, erü tá taxãũãchi ñu̱xmata nachüta. Rü ngẽmawena rü marü tama taxãũãchi.
16 Natürü ngẽxguma taxũtáma nügü naya̱u̱xchirugu rü taxũtáma nügü naxaiyagu, rü nawa tátama nangẽxma i ngẽma norü chixexü̃ —ñanagürü ga Cori ya Tupana.
