Levítico 18:1-30
18 Rü nüma ga Cori ya Tupana rü Moichémaxã nidexa rü ñanagürü nüxü̃:
2 —Choma nixĩ i Iraétanüxü̃arü Cori ya Tupana chixĩxü̃. ¡Rü namaxã nüxü̃ ixu i ñaa chorü ucu̱xẽ!:
3 “Pema i Iraétanüxü̃ rü noxri Equítuanewa pemaxẽ, natürü tama chanaxwa̱xe nax nagu pexĩxü̃ i nacümagü i ngẽma Equítuanecüã̱x. Rü Canaáü̃anewa tá pexü̃ chagagü, natürü tama chanaxwa̱xe nax nagu pexĩxü̃ i nacümagü rü norü mugü i ngẽma Canaáü̃cüã̱x.
4 Natürü ngẽma chanaxwa̱xexü̃ nixĩ nax nagu pexĩxü̃ i chorü ucu̱xẽgü rü nagu pemaxẽxü̃ i chorü mugü. Erü choma nixĩ i perü Cori ya Tupana chixĩxü̃.
5 Rü chanaxwa̱xe i aixcüma nagu pexĩ i ngẽma chorü mugü rü chorü ucu̱xẽgü. Rü yíxema nagu maxü̃́xẽ rü tá tamaxü̃. Erü choma nixĩ i perü Cori ya Tupana chixĩxü̃.
6 ¡Rü taxuxü̃táma i wüxi i yatü rü wüxi ya ngexe ya natanüxü̃xüchi ixĩxẽ nüxü̃́ tangúchaü̃ nax tümamaxã namaxü̃xü̃ca̱x! Rü choma nixĩ i Iraétanüxü̃arü Cori ya Tupana chixĩxü̃.
7 ¡Rü taxṹ i cuémaxãtama ngúchaü̃ cuxüxü̃! Erü ngẽxguma ngẽma cuxü̱xgu rü tama tüxü̃ cungechaü̃ ya cunatü. Rü cué tixĩ rü tama name nax tümamaxã cuxunearü ngúchaü̃ cuxüxü̃.
8 ¡Rü taxṹ i cuérücümaxã cuxunearü ngúchaü̃ cuxüxü̃! Erü ngẽxguma ngẽma cuxü̱xgu rü tama tüxü̃ cungechaü̃ ya cunatü. Rü cuérücü tixĩ rü tama name nax tümamaxã cuxunearü ngúchaü̃ cuxüxü̃.
9 ¡Rü taxṹ i cueya̱xmaxãtama cuxunearü ngúchaü̃ cuxüxü̃! Rü woo ega nai i ngewáxü̃ yixĩxgu i ngẽma cueya̱x rüe̱xna nai ya yatüwaxü̃ yixĩxgu, rü woo cupatagu naxíragu rüe̱xna nai ya ĩpatagu naxíragu, ¡rü taxṹ i ngĩmaxã cuxunearü ngúchaü̃ cuxüxü̃!
10 ¡Rü taxṹ i cutaxamaxã cuxunearü ngúchaü̃ cuxüxü̃! Rü woo cunexacü tixĩxgu rüe̱xna cuxacüxacü tixĩxgu, rü tama name nax ngĩmaxã cuxunearü ngúchaü̃ cuxüxü̃. Erü ngẽxguma ngẽma cuxü̱xgu rü cugütama cuchixexẽxẽ.
11 ¡Rü taxṹ i cunatü naxma̱xacümaxãtama cuxunearü ngúchaü̃ cuxüxü̃! Erü woo tama cuéxacü tixĩ natürü cunatüxacü tixĩ, rü ñu̱xũchi cueya̱xtama tixĩ. Rü ngẽmaca̱x tama name nax cuxunearü ngúchaü̃ ngĩmaxã cuxüxü̃.
12 ¡Rü taxṹ i cunatüeya̱xmaxã cuxunearü ngúchaü̃ cuxüxü̃! Erü ngẽma tümaeya̱x rü yimatama nagü ngĩxü̃́ nangẽxma.
13 ¡Rü taxṹ i cuéeya̱xmaxã cuxunearü ngúchaü̃ cuxüxü̃! Erü cuégütama ngĩxü̃́ nangẽxma.
14 ¡Rü taxṹ i cunepü naxma̱xmaxã cuxunearü ngúchaü̃ cuxüxü̃! Erü ngĩma rü cunepüma̱x iyixĩ. Rü ngẽxguma ngẽma cuxü̱xgu rü tama tüxü̃ cungechaü̃ ya cunepü.
15 ¡Rü taxṹ i cuneã̱xmaxã cuxunearü ngúchaü̃ cuxüxü̃! Erü cune naxma̱x iyixĩ. Rü ngẽmaca̱x tama name nax cuxunearü ngúchaü̃ ngĩmaxã cuxüxü̃.
16 ¡Rü taxṹ i cuenexẽ naxma̱xmaxã cuxunearü ngúchaü̃ cuxüxü̃! Rü ngẽxguma ngẽma cuxü̱xgu rü tama tüxü̃ cungechaü̃ ya cuenexẽ.
17 ¡Rü taxṹ i cuxunearü ngúchaü̃ ngĩmaxã cuxü i wüxi i nge, rü ñu̱xũchi ngĩxacümaxã rü ta! ¡Rü taxṹ i ngĩtaxamaxã cuxunearü ngúchaü̃ cuxüxü̃! Rü woo ega ngĩnexacü tixĩxgu, rüe̱xna ngĩxacüxacü tixĩxgu, rü tama name nax ngĩmaxã cuxunearü ngúchaü̃ cuxüxü̃. Rü ngẽma rü wüxi i nacüma i chixexü̃ nixĩ, erü tügütanüxü̃ tixĩgü.
18 ¡Rü taxṹ i cuxma̱xeya̱xmaxã cuxãmaxü̃ rü cuxunearü ngúchaü̃ ngĩmaxã cuxüxü̃ ega namaxyane i cuxma̱x nax tama ngĩgüchi naxaiexü̃ca̱x!
19 ¡Rü taxṹ i cuxunearü ngúchaü̃ ngĩmaxã cuxüxü̃ i wüxi i nge ega ngĩrü da̱xawexü̃newa nangẽxmagu!
20 ¡Rü taxṹ i cumücü naxma̱xmaxã cupexü̃ rü cuxunearü ngúchaü̃ ngĩmaxã cuxüxü̃! Erü ngẽxguma ngẽma cuxü̱xgu rü cugü cuxãũãchixẽxẽ.
21 ¡Rü taxṹ i tupananeta i Molóxarü ãmareca̱x cuyaguxü̃ ya wüxi ya cune! ¡Rü taxṹ i ngẽmamaxã choxü̃ cunuxẽxẽxü̃! Erü choma nixĩ i Iraétanüxü̃arü Tupana chixĩxü̃.
22 ¡Rü taxṹ i cuxrüü̃tama yatüxü̃maxã icupexü̃ ñoma wüxi ya ngexemaxã icupexü̃rüxü̃! Erü ngẽma rü wüxi i nacüma i chixexü̃ nixĩ.
23 ¡Rü taxṹ i wüxi i naeü̃maxã cumaxü̃xü̃! Erü ngẽxguma ngẽma cuxü̱xgu rü cugü cuxãũãchixẽxẽ. ¡Rü ngẽxgumarüxü̃ ta i ngexü̃ rü taxṹ i wüxi i naeü̃maxã ngĩxü̃nearü ngúchaü̃ naxüxü̃! Erü ngẽma rü wüxi i nacüma i poraãcü chixexü̃ nixĩ.
24 ¡Rü taxṹ i ngexü̃rüü̃xü̃ i ngẽma nacümagümaxã pegü pechixexẽẽxü̃! Erü ngẽma nacümagümaxã nixĩ ga nügü yachixexẽẽxü̃ i ngẽma duü̃xü̃gütücumügü i pepe̱xewa tá íchawoxü̃xü̃.
25 Rü guxü̃ma ga yema naane rü nüxna naxüe i ngẽma chixexü̃gü ga duü̃xü̃gü ügüxü̃. Rü ngẽmaca̱x tá chanapoxcue i ngẽma duü̃xü̃gü naxca̱x i ngẽma chixexü̃ i ngẽma naanewa naxügüxü̃. Rü nümatama i ngẽma naane rü ínanawoxü̃ i ngẽma duü̃xü̃gü i nagu ãchiü̃güxü̃.
26 Rü ngẽmaca̱x i pema i Iraétanüxü̃, rü ñu̱xũchi ngẽma to i nachixü̃anecüã̱x i petanügu ãpatagüxü̃ rü name nixĩ i aixcüma nagu pemaxẽxü̃ i chorü mugü rü chorü ucu̱xẽgü. ¡Rü taxṹ i penaxüxü̃ i bai i wüxi i ngẽma nacüma i poraãcü chixexü̃!
27 Yerü guxü̃ma ga yema nacümagü ga chixexü̃gü rü nagu namaxẽ ga yema duü̃xü̃gü ga nüxíra yema naanegu ãpatagüxü̃. Rü yemaca̱x ga yema naane rü poraãcü nachixe.
28 Rü name i pegüna pedau nax tama ta̱xacürü chixexü̃ca̱x pexü̃ ínawoxü̃xü̃ i ngẽma naane, yema duü̃xü̃gü ga pexü̃pa nüxíra nawa maxẽxü̃ ínawoxü̃xü̃ruxü̃.
29 Rü yíxema naxǘxe i ngexü̃rüüxü̃ i ñaa chixexü̃, rü name nax wüxicana tüxü̃ ípeta̱xüchixü̃ i petanüwa.
30 Rü ngẽmaca̱x name i aixcüma nagu pemaxẽ i ngẽma chorü mugü. ¡Rü taxṹ i nagu peyi i ngẽma nacümagü i chixexü̃ ga yema pexü̃pa nüxíra ngẽma naanewa maxẽxü̃ ügüxü̃! ¡Rü taxṹ i ngẽmamaxã pegü pexãũãchixẽxẽxü̃! Erü choma nixĩ i perü Cori ya Tupana chixĩxü̃” —ñanagürü ga Cori ya Tupana.
