Levítico 20:1-27
20 Rü nüma ga Cori ya Tupana rü Moichémaxã nidexa rü ñanagürü nüxü̃:
2 —¡Iraétanüxü̃maxã nüxü̃ ixu i ñaa chorü mugü!: “Rü ngẽxguma wüxi i Iraétanüxü̃ rüe̱xna wüxi i to i nachixü̃anecüã̱x i petanügu ãpataxü̃ rü ngẽma tupananeta i Molóxca̱x naxacügü tüxü̃ iguxgu, rü name i ngẽma duü̃xü̃gü ya yima ĩanewa maxẽxü̃ noxtacüma nutamaxã ínanamuxũchigü. Rü ngẽmaãcü tá nayama̱xgü.
3 Choma rü tá namaxã chanu i ngẽma yatü, rü wüxicana tá ichayanaxoxẽxẽ i duü̃xü̃gütanüwa, nagagu nax tama chopataxü̃ nangechaxü̃xü̃ rü ñu̱xũchi nax naxãũãchixẽẽãxü̃ i chauéga i ngẽxguma wüxi ya nane ãmarexü̃ Molóxna tüxü̃ muxgu.
4 20:4-5 Rü ngẽxguma ngẽma duü̃xü̃gü ya yima ĩanewa maxẽxü̃ca̱x nataxuraxü̃maregu i norü chixexü̃ i ngẽma yatü i naxacü Molóxna tüxü̃ muxü̃, rü tama yama̱xgüãgu, rü choma rü tá ngẽma yatümaxã chanu rü guxü̃ma i napatacüã̱xmaxã chanu. Rü choma rü wüxicana tá Iraégütanüwa ichayanaxoxẽxẽ i ngẽma yatü wüxigu namaxã i guxü̃ma i ngẽma duü̃xü̃gü i naxrüxü̃ chixexü̃ ügüxü̃ rü Molóxü̃ icua̱xüxü̃güxü̃.
5 Nüü̃ nadau 20:4
6 Rü yíxema naxca̱x ixũxe i ngẽma chixexü̃ i naãẽgümaxã puracüexü̃ rü ngẽma nüxü̃ icuáxü̃ i ngẽma ẽxü̃guxü̃ i yixcüra tá ngupetüxü̃, rü tügütama tachixexẽxẽ. Rü choma rü tá tümachi chaxai ya yíxema duü̃xẽ rü wüxicana tá tüxü̃ ichayarüxoxẽxẽ i duü̃xü̃gütanüwa.
7 Rü name nixĩ i aixcüma mea cha̱u̱xca̱x pemaxẽxü̃ rü pixüünegüxü̃, erü choma nixĩ i perü Cori ya Tupana.
8 ¡Rü aixcüma mea nagu pemaxẽ i chorü mugü! ¡Rü peyangu̱xẽxẽ! Rü choma nixĩ i Cori ya Tupana i chaugüxü̃́ pexü̃ chimexẽẽgüxü̃.
9 Rü ngẽma nanatümaxã rüe̱xna naémaxã chixexü̃ ueguxü̃, rü wüxicana tá peyama̱xgü. Erü nanatümaxã rüe̱xna naémaxã chixexü̃ naxuegu, rü ngẽmaca̱x nügüca̱x tátama yu ínangu̱xẽxẽ.
10 Rü ngẽxguma wüxi i yatü i ãmaxü̃ namücüma̱xmaxã inapexgu, rü ngẽma yatü rü noxtacüma tá peyama̱x. Rü ngẽxgumarüxü̃ ta i ngẽma ngexü̃ rü noxtacüma peyama̱x.
11 Rü ngẽma nanatüma̱xmaxã ipexü̃, rü tama nanatüxü̃ nangechaü̃. Rü ngẽmaca̱x wüxicana tá peyama̱x i ngẽma yatüxü̃ rü ngẽma ngexü̃. Rü ngẽma taxre rü nagagutátama nayue.
12 Rü ngẽxguma texé tümaneã̱xmaxã ipexgu, rü ngẽma taxre rü wüxicana tá penadai. Rü nagagutama nayue i ngẽma taxre, erü ngẽma rü wüxi i pecadu i poraãcü chixexü̃ nixĩ.
13 Rü ngẽma naxrüü̃tama yatüxü̃maxã ipexü̃ ñoma wüxi ya ngexemaxã inapexü̃rüxü̃, rü ngẽma taxre rü wüxicana tá penadai. Rü nagagutama nayue i ngẽma taxre, erü ngẽma rü wüxi i pecadu i poraãcü chixexü̃ nixĩ.
14 Rü ngẽxguma wüxi i yatüxü̃ rü wüxi i ngexü̃maxã naxãxma̱xgu rü ñu̱xũchi ngĩémaxãtama naxãxma̱xgu, rü wüxi i pecadu i poraãcü chixexü̃ nixĩ i ngẽma naxüxü̃. Rü ngẽmaca̱x i nüma i ngẽma yatü rü ñu̱xũchi ngẽma taxre i ngexü̃gü rü name nax wüxicana maxü̃ãcü ípenaguxü̃. Rü ngẽmaãcü tá petanüwa inarüxo i ngẽma nacüma i chixexü̃.
15 Rü ngẽxguma wüxi i yatü rü wüxi i naeü̃maxã namaxü̃gu, rü wüxicana tá peyama̱x i ngẽma yatü. Rü ngẽxgumarüxü̃ ta i ngẽma naeü̃ rü wüxicana tá peyama̱x.
16 Rü ngẽxguma wüxi i ngexü̃ rü wüxi i naeü̃maxã namaxü̃gu, rü ngẽma ngexü̃ rü ngẽma naeü̃ rü wüxicana tá penadai. Rü ngẽma taxre rü nagagutátama nayue.
17 Rü ngẽxguma wüxi i yatü rü naeya̱xmaxãtama naxãxma̱xgu, rü woo nai i ngewáxü̃ tixĩxgu rüe̱xna woo nai ya yatüxacü tixĩxgu, rü ngẽxguma naxü̃nearü ngúchaü̃ nügümaxã naxügügu i ngẽma taxre, rü name nax wüxicana duü̃xü̃güpe̱xegu penadaixü̃. Erü ngẽma nax naeya̱xmaxãtama namaxü̃xü̃ rü wüxi i taxü̃ i ãne nixĩ. Rü yíxema ngẽma üxe rü tá tümaarü chixexü̃gagu tapoxcu.
18 Rü ngẽxguma wüxi i yatü rü wüxi i nge i ngĩrü da̱xawexü̃newa ngẽxmacüxü̃ nacaxgu, rü naxü̃nearü ngúchaü̃ ngĩmaxã naxü̱xgu, rü ngĩxü̃́ ínanangegü i ngextá ngĩgü íxũxü̃wa. Rü ngĩmatama nixĩ i naxca̱x ínacuxuchixü̃. Rü ngẽmaca̱x i ngẽma taxre rü name nax wüxicana tá ínawoxü̃xü̃ i duü̃xü̃gütanüwa.
19 Rü taxṹ i curü mamaeya̱xmaxã cumaxü̃xü̃ rüe̱xna cunatüeya̱xmaxã cumaxü̃xü̃, erü cutanüxü̃ iyixĩgü. Rü ngẽxguma ngĩmaxã cumaxü̃gu, rü tama ngĩxü̃ cungechaü̃. Rü pema i taxre rü tá pepoxcue naxca̱x i ngẽma chixexü̃.
20 Rü ngẽxguma wüxi i yatü rü nanepuma̱xmaxã inapexgu, rü nanepü̱xchi naxai. Rü ngẽmaca̱x i ngẽma taxre rü nawatama nangẽxma i ngẽma norü pecadu, rü ngexacü tá nayue.
21 Rü ngẽxguma wüxi i yatü rü naenexẽma̱xmaxã namaxü̃gu, rü tama naenexẽxü̃ nangechaü̃. Rü ngẽma rü wüxi i chixexü̃ nixĩ. Rü ngẽma taxre rü tá nangexacügü.
22 ¡Rü aixcüma nagu pemaxẽ i ngẽma chorü mugü rü chorü ucu̱xẽgü! ¡Rü guxü̃ma pinguxẽxẽ! Rü ngẽmaãcü i ngẽma naane i nawa pexü̃ chagagüxü̃ nax nawa pemaxẽxü̃ca̱x, rü taxũtáma pexü̃ ínawoxü̃.
23 Rü tama chanaxwa̱xe nax nacümagügu pexĩxü̃ i ngẽma duü̃xü̃gü i nüxíra nawa maxẽxü̃ i ngẽma naane i tá pepe̱xewa íchawoxü̃xü̃. Yerü nümagü rü nanaxügü ga guxü̃ma i ngẽma chixexü̃gü i pemaxã nüxü̃ chixuxü̃, rü yemaca̱x tama namaxã chapora ga yema duü̃xü̃gü.
24 Rü ngẽmaca̱x i choma rü pemaxã chanaxuegu nax pema tá pixĩgüxü̃ i ngẽma norü naanearü yora. Rü chomatátama pexna chanaxã i ngẽma naane i ngextá ñoma dexárüxü̃ yima lechi rü ira taguma ítaxuxü̃wa. Rü choma nixĩ i perü Cori ya Tupana ga yema togü ga duü̃xü̃gütanüwa pexü̃ chaxunetaxü̃ nax chorü duü̃xü̃gü pixĩgüxü̃ca̱x.
25 Rü ngẽmaca̱x i pema rü name nax nüxü̃ pecuáxü̃ nax ngexü̃rüüxü̃ yixĩxü̃ i ngẽma naeü̃gü i mexü̃ nax penangṍxü̃ rü naeü̃gü i tama mexü̃ nax penangṍxü̃, rü ñu̱xũchi ngẽma naeü̃ i ãxpe̱xatüxü̃ i mexü̃ nax penangṍxü̃ rü ngẽma tama mexü̃ nax penangṍxü̃. ¡Rü taxṹ i pegü pexãũãchixẽxẽxü̃ namaxã i ngẽma naeü̃gü i tama mexü̃ nax penangṍxü̃, rü ngẽma ãxpe̱xatüxü̃ i tama mexü̃ nax penangṍxü̃, rü ngẽma waixü̃mügu nügü itúgüxü̃ i nüxü̃ chixuxü̃ nax tama namexü̃ nax penangṍxü̃!
26 Rü pema rü name nax pengearü ãũãchiã́xü̃ rü pexüünegüxü̃, erü choma nax Cori ya Tupana chixĩxü̃ rü chaxüüne. Rü choma nixĩ ga yema togü ga duü̃xü̃gütanüwa pexü̃ chaxunetaxü̃ nax chorü duü̃xü̃gü pixĩgüxü̃ca̱x.
27 Rü ngẽma yatüxü̃ rüe̱xna ngexü̃ i chixexü̃ i naãxẽmaxã puracüexü̃, rü ngẽma duü̃xü̃ i nüxü̃ cua̱xnetaxü̃ nax ngẽma ẽxü̃guxü̃ i yixcüra tá ngupetüxü̃, rü tá nutagümaxã ípenamuxũchiãcü penadai. Rü nümagü rü nagagutátama nayue” —ñanagürü ga Cori ya Tupana.
