Levítico 22:1-33
22 Cori ya Tupana rü Moichémaxã nidexa rü ñanagürü nüxü̃:
2 —Aróü̃maxã rü nanegümaxã rü nataagümaxã nüxü̃ ixu rü name nax mea namaxã inacua̱xgüxü̃ i ngẽma ãmaregü i üünegüxü̃ i Iraétanüxü̃ choxna ãgüxü̃, nax taxúxema chixri chauchiga idexagüxü̃ca̱x. Erü choma nixĩ i perü Cori ya Tupana chixĩxü̃.
3 Rü Aróü̃maxã nüxü̃ ixu rü ngẽxguma ngexü̃rüüxü̃mare i nataagü rü ãũãchiãcü chope̱xewa nangegüãgu i ãmare i üünexü̃ i Iraétanüxü̃ choxna ãgüxü̃, rü choma rü tá íchanata̱xüchi i chope̱xewa. Erü choma rü Cori ya Tupana chixĩ.
4 Rü ngẽxguma wüxi i Aróü̃taxa chaxünemaxã ida̱xaweegu rüe̱xna inabamügu rü taxucürüwa õna i üünexü̃ nangõ̱x ñu̱xmata chope̱xewa nügü namexẽxẽ. Rü ngẽma Aróü̃taxa i nüxü̃ ingógüxü̃ i wüxi i yueta rü ngẽmagagu tá chope̱xewa naxãũãchi. Rü ngẽxgumarüxü̃ ta chope̱xewa naxãũãchi i ngẽma nüxü̃ ingógüxü̃ i wüxi i yatü i bamüxü̃.
5 Rü ngẽxgumarüxü̃ ta i Aróü̃taxa i nüxü̃ ingógüxü̃ i wüxi i naeü̃ i ñaxtüanegu nügü itúxü̃ rüe̱xna nüxü̃ ingógüxü̃ i wüxi i yatü i chope̱xewa ãũãchixü̃, rü nügü naxãũãchixẽxẽ.
6 Rü ngẽma Aróü̃taxa rü tá duü̃xü̃güca̱x naxãũãchi ñu̱xmata nachüta. Rü naxü̃pa nax nügü naxaiyaxü̃ rü taxucürüwa nanangõ̱x i ngẽma õna i üünexü̃.
7 Rü ngẽxguma yáuanecü üa̱xcü rüxücugu tá nixĩ i chope̱xewa namexü̃. Rü ngẽmawena rü marü name nax nangṍoxü̃ i ngẽma õna i üünexü̃ erü woetama ngẽma nixĩ i nawemü.
8 Rü tama name nax nangṍoxü̃ i namachi i naeü̃ i yumarexü̃ rüe̱xna naeü̃ i düraxü̃ nagu wagüxü̃ nax tama ngẽmamaxã nügü naxãũãchixü̃ca̱x. Erü choma nixĩ ya Cori ya Tupana.
9 Rü namaxã nüxü̃ ixu i ngẽma chacherdótegü nax yanguxẽẽgüãxü̃ca̱x i chorü mugü. Rü ngẽxguma mea naga naxĩnüegu rü taxuxü̃táma nayue nagagu nax naxãũãchixẽẽãxü̃ i chorü ãmaregü. Erü choma ya Cori ya Tupana nixĩ i chorü puracü i üünexü̃ca̱x nüxü̃ chaxunetaxü̃ i chacherdótegü.
10 Rü ngẽma duü̃xü̃ i tama chacherdóte ixĩxü̃ rü tama name nax õna i üünexü̃ nangṍxü̃. Rü woo ngẽma duü̃xü̃ i chacherdótexü̃tagu naxũanexü̃ rüe̱xna ngẽma norü puracütanüxü̃ rü tama name i ngẽma õna i üünexü̃ nax nangṍxü̃.
11 Natürü ngẽxguma ngẽma chacherdóte rü norü diẽrumaxã wüxi i norü mugüruxü̃ ya duü̃xẽca̱x nataxegu, rü ngẽma mugüruxü̃ rü name nax õna i üünexü̃ nangṍxü̃. Rü ngẽma mugüruü̃xacügü i chacherdótepatagu buexü̃ rü name nax ngẽma õna i üünexü̃ nax nangõ̱xgüxü̃.
12 Rü ngẽxguma naxacü i chacherdóte naxãtegu namaxã i wüxi i yatü i tama chacherdótetanüxü̃ ixĩxü̃, rü taxucürüwama õna i üünexü̃ ingõ̱x.
13 Natürü ngẽxguma nayutegu rüe̱xna ngĩte ngĩxü̃ íta̱xgu, rü nangexacügu rü ngĩnatüpataca̱x nataeguxgu noxri nangetegurüxü̃, rü name i nangõ̱x i ngẽma õna i ngĩnatü ngṍxü̃. Natürü ngẽma duü̃xü̃ i tama chacherdótetanüxü̃ ixĩxü̃, rü taxucürüwa ngẽma õnamaxã naxãwemü.
14 Rü ngẽxguma texe tümaechita nangõ̱xcüraxü̃gu i ngẽma õna i üünexü̃, rü chacherdóteaxü̃́ tá tanaxütanü i ngẽma õna. Rü naétü tá nüxna tanaxã i wüxi i norü 5 arü yauxye i ngẽma õnatanü.
15 Rü ngẽma chacherdótegü rü tama name i chixri namaxã inacua̱xgüxü̃ i ngẽma ãmaregü i üünexü̃ i Iraétanüxü̃ choxna ãgüxü̃.
16 Rü ngẽma chacherdótegü rü taxũtáma ngẽma togü i tama chacherdóte ixĩgüxü̃xü̃ nanangõ̱xẽxẽ i ngẽma õna i üünexü̃, erü ngẽxguma ngẽma naxü̱xgu rü nügüca̱x pecadu naxü. Rü ngẽma pecaduarü mexẽẽca̱x tá ãmare cha̱u̱xca̱x nigu. Erü choma ya Cori ya Tupana nixĩ i chorü puracü i üünexü̃ca̱x nüxü̃ chaxunetaxü̃ i chacherdótegü —ñanagürü.
Mugü i nagu ixũxü̃ ega Tupanana ãmare ixãxgu
17 Rü nüma ga Cori ya Tupana rü Moichémaxã nidexa rü ñanagürü nüxü̃:
18 22:18-19 —¡Aróü̃maxã rü nanegümaxã rü Iraétanüxü̃maxã nüxü̃ ixu i ñaa ore!: “Rü ngẽxguma ngexü̃rüüxü̃mare i Iraétanüxü̃ rüe̱xna to i nachixü̃anecüã̱x i petanügu ãpataxü̃ rü Cori ya Tupanaca̱x ãmare i naxü̃na iguxgu nax yanguxẽẽxü̃ca̱x i norü uneta rüe̱xna norü ngúchaü̃maxã ãmare inaxãxgu, rü name i wüxi i naxü̃na i yatüxü̃ i taxuwama chixexü̃ inamu nax Tupana nüxü̃́ nayaxuxü̃ca̱x. Rü name nax wüxi i woca i yatüxü̃, rüe̱xna wüxi i carnéru i yatüxü̃ rüe̱xna wüxi i chíbu i yatüxü̃ nax yixĩxü̃.
19 Nüü̃ nadau 22:18
20 Natürü tama name nax wüxi i naxü̃na i chixexü̃ nax yixĩxü̃ erü ngẽxguma wüxi i naxü̃na i tama mexü̃ yixĩxgu, rü Tupana rü taxũtáma nüxü̃́ nanayaxu.
21 Rü ngẽxguma texé Tupanaca̱x wüxi i naxü̃na ima̱xgu nax Cori ya Tupana tümamaxã rüngüxmü̃xü̃ca̱x, rü woo tümaarü uneta tinguxẽẽxü̃ca̱x yixĩxgu, rü woo tümaarü ngúchaü̃maxã ãmare itaxãmaregu, rü name nax wüxi i woca i taxuwama chixexü̃ rüe̱xna wüxi i carnéru i taxuwama chixexü̃ itaxãxü̃ nax Tupana tüxü̃́ nayaxuxü̃ca̱x.
22 Rü tama name nax Tupanape̱xewa penagagüxü̃ i naxü̃nagü i ngexetügüxü̃, rüe̱xna napíexü̃, rüe̱xna ibüyeparagüxü̃, rüe̱xna büxchixünegüxü̃, rüe̱xna churiã̱xgüxü̃, rüe̱xna rüxo̱xõnegüxü̃. Rü guxü̃ma i ngẽma rü tama name i Tupanape̱xewa penagagü nax norü ãmarearü guruü̃wa ípenaguxü̃ca̱x.
23 Rü ngẽxguma ãmare i perü ngúchaü̃maxã ipexãxgu rü marü name i penaxã i wüxi i woca i rünuxmaeparaxü̃ rüe̱xna wüxi i carnéru i rünuxmaeparaxü̃. Natürü ngẽxguma wüxi i uneta pingu̱xẽẽxü̃ca̱x ipenaxãxgu i wüxi i naxü̃na i ngẽmaãcü chixexü̃, rü Tupana rü taxũtáma pexü̃́ nanayaxu.
24 Rü tama name nax Tupanana penaxãxü̃ i wüxi i naxü̃na i rüxópü̱xüchareexü̃, rüe̱xna ipomüxü̃pü̱xüchareexü̃, rüe̱xna caupü̱xüchareexü̃, rüe̱xna chexepü̱xüchareexü̃. Rü taxũtáma ngẽma pexü i pechixü̃xanewa.
25 Rü tama name i wüxi i duü̃xü̃ i to i nachixü̃anecüã̱xaxü̃́ penayaxu i nangexgumaraü̃xü̃ i naxü̃na nax curü Cori ya Tupanana penaxãxü̃ca̱x. Erü ngẽma naxü̃nagü nüxü̃́ nangẽxma i norü chixexü̃ rü ngẽmaca̱x Tupana rü tama nanayaxu” —ñanagürü.
Ngẽma nagu ixũxü̃ ega naxü̃nagü i ãmaregü ixĩgüxü̃ Tupanaca̱x idaixgu
26 Rü Cori ya Tupana rü Moichémaxã nidexa rü ñanagürü nüxü̃:
27 —Ngẽxguma wüxi i wocaxacü, rüe̱xna wüxi i carnéruxacü, rüe̱xna wüxi i cabraxacü buxgu, rü name nax 7 i ngunexü̃ naéxü̃tawa nangẽxmaxü̃. Natürü ngẽxguma norü 8 i ngunexü̃wa nanguxgu rü marü name nax Tupanaarü ãmareruxü̃ peyaguxü̃.
28 Rü tama name i ngẽmatama ngunexü̃gu peyama̱x i wüxi i woca i ngexü̃ naxacümaxã. Rü tama name i ngẽmatama i ngunexü̃gu peyama̱x i wüxi i carnéru i ngexü̃ naxacümaxã.
29 Rü ngẽxguma ngẽma chacherdótegü choxna naxãxgu i duü̃xü̃güarü ãmare nax ngẽmamaxã moxẽ choxna naxãgüxü̃ca̱x, rü name i ngẽma chacherdótegü choma chanaxwa̱xexü̃ãcü nanaxü nax choma mea nüxü̃́ chanayaxuxü̃ca̱x.
30 Rü nüma ya chacherdótegü rü ngẽmatama ngunexü̃gu tá nanangõ̱xgü i namachi i ngẽma ãmare. Rü taxuxü̃táma ínayaxüxẽxẽ i norü moxü̃ãcüruxü̃. Rü choma nixĩ ya Cori ya Tupana.
31 Rü pemax, ¡rü aixcüma nagu pexĩ i chorü mugü rü mea peyanguxẽxẽ! Rü choma nixĩ ya Cori ya Tupana.
32 ¡Rü taxṹ i chauéga i üünexü̃chiga chixri pidexagüxü̃! Rü ngẽmaãcü i ngẽma Iraétanüxü̃ rü tá nüxü̃ nacua̱x nax aixcüma chaxüünexü̃ i chomax. Rü choma nixĩ ya Cori ya Tupana ga pexü̃ chaxunetaxü̃ nax chorü puracü i üünexü̃ pexügüxü̃ca̱x.
33 Rü choma nixĩ ga Equítuanewa pexü̃ íchagaxü̃xü̃ nax perü Tupana chixĩxü̃ca̱x. Rü choma nixĩ ya Cori ya Tupana —ñanagürü.
