Levítico 27:1-34
27 Rü nüma ga Cori ya Tupana rü Moichémaxã nidexa rü ñanagürü nüxü̃:
2 27:2-3 —¡Iraétanüxü̃maxã nüxü̃ ixu i ñaa ore!: “Rü ngẽxguma texé tümatanüxü̃ choxna muxe rü wena tügüca̱x nataeguxẽẽchaü̃gu ya tümatanüxü̃, rü ngẽma chopatawa ngẽxmaxü̃ i ngugüruü̃wa tá tanangugü i tümatanü. Rü ngẽxguma yatüxe ya 20 ya taunecü rü ñu̱xmata 60 ya taunecü tüxü̃́ ngẽxmaxe rü 50 tachinü i diẽru tá taxãtanü.
3 Nüü̃ nadau 27:2
4 Rü ngẽxguma wüxi ya ngexe tixĩxgu rü 30 tachinü i diẽru tá taxãtanü.
5 Rü ngẽxguma 5 ya taunecü rü ñu̱xmata 20 ya taunecü tüxü̃́ ngẽxmaxe rü 20 tachinü i diẽru tá taxãtanü ega tayatügu. Natürü ngẽxguma tangexgu rü 10 tachinü i diẽru tá taxãtanü.
6 Rü buxe ya yatüxe i wüxi ya tauemacü rü ñu̱xmata 5 ya taunecü tüxü̃́ ngẽxmaxe, rü 5 tachinü i diẽru tá taxãtanü. Natürü ngẽxguma tangexgu rü 3 tachinü i diẽru tá taxãtanü.
7 Rü duü̃xẽgü ya yatüxe ya 60 ya taunecüarü yexera tüxü̃́ ngẽxmagüxe, rü 15 tachinü i diẽru tá taxãtanü. Natürü ngẽxguma tangexgu, rü 10 tachinü i diẽru tá taxãtanü.
8 Rü ngẽxguma texé tümatanüxü̃ choxna muxe rü wena tügüca̱x natáeguxẽẽchaü̃gu ya tümatanüxü̃, natürü tangearü diẽruã̱xü̃chigu nax tanaxütanüxü̃ i ngẽma nagu chaxunetaxü̃e̱xpü̱x, rü chacherdótexü̃tawa tá taxũ nax nüma ya chacherdóte nüxü̃ yaxuxü̃ca̱x i ñuxre tá nixĩ i taxütanüxü̃. Rü tá tümamaxã nüxü̃ nixu i ngẽma tüxü̃́ natauxchaxü̃e̱xpü̱x nax tanaxütanüxü̃.
9 Rü ngẽxguma texé choxna namuxgu i wüxi i naxü̃na, rü choxrüxicatama tá nixĩ.
10 Rü ngẽmaca̱x taxucürüwama to i naxü̃na i rümemaexü̃ rüe̱xna naxü̃na i rüchixemaexü̃maxã naxüchicüü. Rü ngẽxguma chi to i naxü̃namaxã naxüchicüügu, rü ngẽma naxü̃na i nüxíra choxna pemuxü̃ rü ngẽma naxü̃na i namaxã üchicüxüxü̃ rü ta rü choxrügü tá nixĩgü.
11 Rü ngẽxguma wüxi i naxü̃na i tama mexü̃ nax nangṍxü̃ yixĩxgu i Cori ya Tupanana ixãxü̃, rü ngẽma naxü̃na rü chacherdótepe̱xewa tá naga.
12 Rü nüma ya chacherdóte tá nüxü̃ nixu i natanü nax ñuxregu naxãtanüxü̃, ngẽxgumarüxü̃ nax ta̱xacürü naeü̃ yixĩxü̃. Rü ngẽma diẽru i chacherdóte nüxü̃ ixuxü̃gu tá nixĩ i naxãtanüxü̃.
13 Rü ngẽxguma norü yora naxwa̱xegu nax wenaxarü noxrü yixĩxü̃ca̱x i ngẽma naxü̃na, rü tá nanaxütanü i ñuxregu naxãtanüxü̃ i ngẽma naxü̃na. Rü naétü tá nanaxütanü i wüxi i norü 5 arü yauxye i ngẽma diẽru.
14 Rü ngẽxguma texé Cori ya Tupanana naxãxgu ya tümapata, rü nüma ya chacherdóte tá nixĩ i nüxü̃ ixuxü̃ nax ñuxregu naxãtanüxü̃, ngẽxgumarüxü̃ nax nañuxraxü̃xü̃ i norü me ya yima ĩpata. Rü ngẽma natanü rü taxũtáma naxüchicüü.
15 Rü yíxema duü̃xẽ ya Cori ya Tupanana naxãxe ya tümapata, rü wenaxarü naxca̱x tataxechaü̃gu, rü ngẽma natanü i chacherdóte nüxü̃ ixuxü̃e̱xpü̱x tá tanaxütanü. Rü naétü tá tanaxütanü i wüxi i norü 5 arü yauxye i ngẽma diẽru. Rü ngẽxguma ya yima ĩpata rü wenaxarü tümaarü tá nixĩ.
16 Rü ngẽxguma texé Cori ya Tupanana tanaxãxgu i wüxi i üye i tümaarü naane, rü natanü i ngẽma naane rü ngẽma nawa ibuxuxü̃ i chebádaarü mu tá nixĩ i nangugüxü̃ i natanü. Rü wüxichigü i 220 litru i chebáda rü 50 tachinü i diẽru tá nixĩ i naxãtanüxü̃ i ngẽma naane.
17 Rü ngẽxguma yimá yatü rü meama taunecü ya ngúxü̃chigaarü taunecügu Tupanana naxããgu i ngẽma naane, rü ngẽma natanü i chacherdóte marü ixüxü̃ rü taxucürüwama naxüchicüü.
18 Natürü ngẽxguma ngúxü̃chigaarü taunecüwena Cori ya Tupanana naxããgu, rü nüma ya chacherdóte tá nixĩ i naxüaxü̃ i natanü nae̱xpü̱x ya yimá taunecügü ya taxucü nax wena ngúxü̃chigaarü taunecüwa nanguxü̃. Rü yimá taunecüe̱xpü̱x tá nixĩ i naxãtanüxü̃ i ngẽma naane.
19 Rü ngẽxguma yíxema duü̃xẽ ya Cori ya Tupanana naxãxe i tümaarü naane, rü wenaxarü naxca̱x tataxechaü̃gu, rü ngẽma natanü i chacherdóte nüxü̃ ixuxü̃e̱xpü̱x tá tanaxütanü. Rü naétü tá tanaxütanü i wüxi i norü 5 arü yauxye i ngẽma diẽru. Rü ngẽxguma i ngẽma naane rü wenaxarü tümaarü tá nixĩ.
20 Natürü ngẽxguma chi tüma tama wenaxarü naxca̱x tataxegu i ngẽma naane, rü chi chacherdóte to i duü̃xü̃xü̃ namaxã nataxegu, rü tüma rü taxucürüwa wena naxca̱x tataxe.
21 Rü ngẽxguma ngúxü̃chigaarü taunecüwa nanguxgu, rü ngẽma naane rü wenaxarü Tupanaarü tá nixĩ. Rü nüma ya chacherdóte rü tá nanayaxu i ngẽma naane nax noxrü yixĩxü̃ca̱x.
22 27:22-23 Rü ngẽxguma wüxi i duü̃xü̃ rü Cori ya Tupanana naxãxgu i wüxi i naane i naxca̱x nataxexü̃ i tama natanüxü̃arü ixĩxü̃, rü nüma ya chacherdóte rü tá nanangugü nax ñuxre ya taunecü nataxuxü̃ nax ngúxü̃chigaarü taunecüwa nanguxü̃, rü yimá taunecü ya taxucüe̱xpü̱x tá nixĩ i natanü. Rü ngẽma duü̃xü̃ i Tupanana naxãxü̃ i ngẽma naane rü ngẽmatama i ngunexü̃gu tá nanaxütanü i natanü. Erü ngẽma naane rü marü Tupanana nanaxã.
23 Nüü̃ nadau 27:22
24 Rü ngẽxguma ngúxü̃chigaarü taunecüwa nanguxgu, rü ngẽma naane rü wenaxarü ngẽma nüxíraxü̃ i norü yoraarü ta nixĩ, yerü nanatü ga yuxe nüxna tanaxã.
25 Rü ngẽxguma ta̱xacü ingugütanügu, rü guxü̃ma tá tanangugü nawa i ngẽma ngugüruxü̃ i chopatawa ngẽxmaxü̃. Rü wüxichigü i diẽru rü 10 gramu tá nixĩ i nayaxü̃.
26 Rü ngẽma naxü̃naxacügüwa rü ngẽma nüxíra buexü̃, rü woetama marü Cori ya Tupanaarü nixĩgü. Rü ngẽmaca̱x taxucürüwa texé Tupanana tanaxã, erü woetama marü noxrügü nixĩgü. Rü woo wüxi i wocaxacü i yatüxü̃ yixĩxgu rüe̱xna carnéruxacü i yatüxü̃ yixĩxgu rü Cori ya Tupanaarü nixĩgü.
27 Rü ngẽxguma wüxi i naxü̃na i tama mexü̃ nax nangṍxü̃ yixĩxgu, rü ngẽma norü yora rü nüxü̃́ nangẽxma i tauxcha nax wena naxca̱x nataxexü̃. Rü ngẽma natanü i chacherdóte nagu unetaxü̃ẽ̱xpü̱x tá nixĩ i tanaxütanüxü̃. Rü naétü tá tanaxütanü i wüxi i norü 5 arü yauxye i ngẽma diẽru. Natürü ngẽxguma chi norü yora tama naxca̱x taxegu rü togü naxca̱x taxegu rü tá nanaxütanü i ngẽma natanü i chacherdóte nagu unetaxü̃e̱xpü̱xicatama.
28 Rü ngẽxguma texé ta̱xacü Tupanana ãxgu nax noxrüxicatama yixĩxü̃ca̱x, rü taxucürüwa wena namaxã tataxe rüe̱xna naxca̱x tataxe. Rü woo ega tümaarü duü̃xü̃gü yixĩxgu, rüe̱xna tümaxü̃nagü yixĩxgu, rüe̱xna tümaarü naanegü i noxri tümanatüarü ixĩxü̃ yixĩxgu, rü taxucürüwa wena namaxã tataxe rüe̱xna naxca̱x tataxe. Erü ngẽma Cori ya Tupanana ixãxü̃ nax guxü̃gutáma noxrü ixĩxü̃ rü naxüüne.
29 Rü ngẽxgumarüxü̃ ta i ngẽma duü̃xü̃ i marü yu namaxã ueguxü̃ rü taxucürüwa naétüwa tachogü. Rü noxtacüma tá nayu.
30 Rü ngẽxguma penetügüarü owa pexü̃́ nangẽxmagu i 10 wetaxü̃ i norü o, rü wüxiwetaxü̃ rü Tupanaarü nixĩ rü woo trigu rüe̱xna woo ta̱xacürü ori̱x yixĩxgu. Erü nümatama nixĩ i marü nüxü̃ naxunetaxü̃ nax norü yixĩxü̃.
31 Rü ngẽxguma texé naxwa̱xegu nax tüxü̃́ natáeguxẽẽxü̃ i ngẽma wüxiwetaxü̃ i marü Tupanana taxãxü̃, rü tá tanaxütanü nax ñuxregu naxãtanüxü̃ i ngẽma wüxiwetaxü̃. Natürü ngẽma natanüétü tá tanaxütanü i wüxi i norü 5 arü yauxye.
32 Rü perü wocagütanüwa rüe̱xna perü carnérugütanüwa rü wüxichigü i 10 wa rü wüxi i ngẽma naxü̃na rü choxrü tá nixĩ.
33 Rü ngẽxguma choxna penamuxgu i wüxi i pexü̃na, rü tama name nax nüxü̃ pidaugüxü̃ nax ngexü̃rüüxü̃ nixĩ i rümemaexü̃ rü ngexü̃rüüxü̃ nixĩ i rüchixemaexü̃. Rü ngẽxguma choxna penamuxgu i wüxi i pexü̃na rü taxucürüwa to i pexü̃namaxã penaxüchicüxü. Rü ngẽxguma penaxüchicüügu rü ngẽma taxre i pexü̃nagü rü choxrü tá nixĩ, rü taxucürüwa wena naxca̱x petaxe” —ñanagürü ga Tupana.
34 Rü yema nixĩ ga mugü ga Tupana Iraétanüxü̃ca̱x Moichémaxã nüxü̃ ixuxü̃ ga ma̱xpǘne ga Chinaíwa.
