Levítico 4:1-35
4 Rü Cori ya Tupana rü Moichémaxã nidexa rü ñanagürü:
2 —¡Iraétanüxü̃maxã nüxü̃ ixu, rü ngẽxguma texé ngürüãchi tümaechita chixexü̃ ücüraxü̃gu rü tama tayangu̱xẽẽgu i ngexü̃rüüxü̃ i chorü mugü, rüe̱xna tanaxü̱xgu i ngẽma choma chachu̱xuxü̃, rü ñaãcü tá nixĩ i tanamexẽẽxü̃ i tümaarü guxchaxü̃:
3 Rü ngẽxguma chacherdótegüarü ãẽ̱xgacü yixĩxgu i chixexü̃ üxü̃, rü ngẽma chixexü̃ i naxüxü̃gagu rü guxchaxü̃wa tá nangẽxmagü i guxü̃ma i duü̃xü̃gü. Rü ngẽma chacherdótearü ãẽ̱xgacüarü pecaduarü ütanüca̱x rü nüma rü choxü̃ tá namaxã naxãmareã̱x i wüxi i wocaxacü i yatüxü̃ i taxuwama chixexü̃.
4 Rü ngẽma wocaxacü rü chopataca̱x íxücuxü̃wa tá nanaga, rü naxü̃pa nax yamáaxü̃ rü naerugu tá naxǘxme̱x. Rü ngẽmawena rü chope̱xegu tá nayawíyenaxã.
5 4:5-6 Rü ngẽmawena rü nüma tátama nanayaxu ya íxracü ya nagü i ngẽma wocaxacü, rü ñu̱xũchi chopataarü aixepewa tá nanange. Rü ngéma rü tá yimá nagüwa naxue, rü chope̱xewa rü 7 e̱xpü̱xcüna tá ngẽma chopataarü tüyemachiãguama nanama̱xgü ya yimá nagü.
6 Nüü̃ nadau 4:5
7 Rü íxracü ya yimá nagümaxã tá nanacha i naxchata̱xcuregü i ngẽma pumarate̱xearü guruxü̃ i chopatawa ngẽxmaxü̃. Rü yimá nagü ya tacü ya íyaxücümaxã tá ínanabaegu i ngẽma ãmarearü guruxü̃ i chopatape̱xewa ngẽxmaxü̃.
8 Rü ngẽmawena rü ngẽma wocaxacü i pecaduarü ütanüca̱x yamáxü̃ rü tá nanade i guxü̃ma i ngẽma chíxü̃ i ngẽma naü̃nütawa ngẽxmaxü̃.
9 Rü tá nanayaxu ya yima taxre ya norü ñuxmi, rü ngẽma norü chíxü̃ i namachica̱xwe̱xwa ngẽxmaxü̃, rü ngẽma nacaarü chíxü̃ i wüxigu norü ñuxmigümaxã nayaxuxü̃.
10 Rü ngẽma woca i yatüxü̃ i Cori ya Tupanaarü ngüxmüxẽẽruü̃ca̱x yama̱xgüxü̃rüxü̃ tá penayauxarü chíxü̃ã̱x i ngẽma naxü̃na i chacherdótearü guxchaxü̃ca̱x imáxü̃. Rü nüma ya chacherdóte rü ngẽmawena tá ãmarearü guruü̃wa nayagu i ngẽma chíxü̃.
11 4:11-12 Natürü guxü̃ma i ngẽma wocaxacü íyaxüxü̃ i naxcha̱xmüxü̃ rü guxü̃ma i namachi, rü naeru, rü naparagü, rü naü̃nütagü rü nabünegü rü wüxigu tá wüxi i nachica i tama ãũãchixü̃ i ngẽma ípepegüxü̃arü düxétüwa tá penana i ngextá tanimaca ípeyagü̱xüxü̃wa. Rü tanimaca ya ngẽxma ãũxchitacüétüwa tá penaxü ya üxü. Rü yimáétügu tá penanu rü ípenagu i ngẽma wocaxacüwa íyaxüxü̃.
12 Nüü̃ nadau 4:11
13 Rü ngẽxguma guxü̃ma i Iraétanüxü̃ tama nagu naxĩnüeãcüma pecadu naxügügu, rü taxuxü̃ma i duü̃xü̃ nüxü̃ cua̱xgu nax chorü mugüwa nachu̱xuxü̃ i ngẽma pecadu i naxügüxü̃, rü ngẽma pecadu rü ninaguãchi i guxü̃ma i Iraétanüxü̃.
14 Natürü ngẽxguma nüxü̃ yacuã̱xãchitanügu i ngẽma pecadu i naxügüxü̃ rü name i guxü̃ma i ngẽma duü̃xü̃gü rü wüxigu wüxi i wocaxacü i yatüxü̃ norü pecadutanü nima̱xgü nax ngẽmaãcü nüxü̃́ nüxü̃ icharüngümaxü̃ca̱x i norü pecadu. Rü ngẽma wocaxacü rü chopatape̱xewa tá nanagagü.
15 Rü nüma i Iraétanüxü̃arü ãẽ̱xgacügü rü chope̱xewa tá naerugu ningõgügü rü ñu̱xũchi ngẽxma tátama nayawíyenaxãgü.
16 Rü ngẽmawena i ngẽma chacherdótegüarü ãẽ̱xgacü rü tá íxracü ya nagü nayaxu rü chopataarü aixepewa tá nanange.
17 Rü ngẽma chacherdótegüarü ãẽ̱xgacü rü tá yimá nagüwa naxue, rü chope̱xewa rü 7 e̱xpü̱xcüna tá ngẽma chopataarü tüyemachiãguama nanama̱xgü ya yimá nagü.
18 Rü nüma ya chacherdóte rü íxracü ya yimá nagümaxã tá nanacha i naxchata̱xcuregü i ngẽma pumarate̱xearü guruxü̃ i chope̱xewa ngẽxmaxü̃ i chopatawa. Rü yimá nagü ya tacü ya íyaxücümaxã tá ínanabaegu i ngẽma ãmarearü guruxü̃ i chopatape̱xewa ngẽxmaxü̃.
19 Rü nüma ya chacherdótegüarü ãẽ̱xgacü rü tá mea nanade i guxü̃ma i norü chíxü̃ rü ñu̱xũchi tá ngẽma ãmarearü guruü̃wa nayagu.
20 Rü ngẽma wocaxacü i yatüxü̃ i pecaduarü ütanüca̱x imáxü̃rüxü̃ tá namaxã naxü i ngẽma wocaxacü. Rü nüma ya chacherdóte rü ngẽmaãcü tá ngẽma naxü̃namaxã duü̃xü̃güarü pecadu naxütanü. Rü choma rü tá nüxü̃́ nüxü̃ icharüngüma i norü pecadugü.
21 Rü ngẽmawena rü tá ípepegüxü̃arü düxétüwa nanange, rü ñu̱xũchi ngéma tá nayagu. Rü ngẽma nuxíraxü̃xü̃ i wocaxacü i yaguxü̃rüxü̃ tá nayagu, erü ngẽma rü wüxi i ãmare i duü̃xü̃güarü pecaduarü ütanüruxü̃ nixĩ.
22 Rü ngẽxguma chi wüxi i ãẽ̱xgacü naxü̱xgu i ta̱xacü i chorü mugüwa chu̱xuxü̃, rü nagutama nangu i ngẽma chixexü̃ i naxüxü̃ woo naechita naxüãgu.
23 Natürü ngẽxguma nüxna yacua̱xãchigu nax pecadu naxüxü̃, rü name nax choxna namuaxü̃ i wüxi i chíbu i taxuwama chixexü̃.
24 Rü nüma ya ãẽ̱xgacü rü ngẽma chíbuerugu tá naxǘxme̱x rü tá chopexegu nayawíyenaxã nagu i ngẽma nachica i naxü̃nagü nagu nada̱i̱xü̃ nax yagugüãxü̃ca̱x. Rü ngẽma chíbumaxã naxüxü̃ rü pecaduarü ütanüruxü̃ nixĩ.
25 Rü nagü i ngẽma naxü̃na i pecaduarü ütanüca̱x yamáxü̃ rü nüma i chacherdóte rü íxracü ya nagüwa tá naxue. Rü ñu̱xũchi yimá nagümaxã tá nayachagü i nachaxta̱xcuregü i ngẽma ãmarearü guruxü̃. Rü yimá nagü ya íyaxücü rü tá ãmarearü guruxü̃ namaxã ínabaegu.
26 Rü ngẽma chíbuarü chíxü̃ rü ãmarearü guruü̃wa tá nayagu. Rü ngẽma woca i Cori ya Tupanaarü ngüxmüxẽẽruü̃ca̱x yama̱xgüxü̃arü chíxü̃ i íyagugüxü̃rüxü̃ tá nayagugü i norü chíxü̃ i ngẽma chíbu. Rü nüma ya chacherdóte rü ngẽmaãcü tá ngẽma chíbumaxã ãẽ̱xgacüarü pecadu naxütanü. Rü choma rü tá nüxü̃́ nüxü̃ icharüngüma i norü pecadu.
27 Rü ngẽxguma chi ngexerüxemare ya duü̃xẽ tümaechita pecadu taxü̱xgu, rü tümagagutama nixĩ erü tanaxü i ngẽma chorü mugü chu̱xuxü̃.
28 Rü ngẽxguma yíxema duü̃xẽ nüxü̃ icua̱xãchigu nax pecadu taxüxü̃, rü name nax chopatawa tanagaxü̃ i wüxi i cabra i taxuwama chixexü̃ nax tümaarü pecaduarü ütanüruxü̃ yixĩxü̃ca̱x i ngẽma ãmare.
29 Rü yíxema duü̃xẽ rü naerugu tá taxü̱xme̱x i ngẽma tümaxü̃na i pecaduarü ütanüruxü̃ i ngéma tagagüxü̃. Rü ñu̱xũchi tá ngẽma nachica i naxü̃nagü nawa inaguxü̃gu tá tayawíyenaxã.
30 Rü ngẽxguma i ngẽma chacherdóte rü íxracü ya nagüwa tá naxue. Rü ñu̱xũchi yimá nagümaxã tá nayachagü i nachaxta̱xcuregü i ngẽma ãmarearü guruxü̃. Rü yimá nagü ya íyaxücü rü tá ãmarearü guruxü̃ namaxã ínabaegu.
31 Rü nüma i chacherdóte tá nanade i guxü̃ma i ngẽma cabraarü chíxü̃, ngẽma Cori ya Tupanaarü ngüxmüxẽẽruü̃ca̱x yama̱xgüxü̃ i naxü̃na nadearüchíxü̃ã́xü̃rüxü̃. Rü ngẽma chíxü̃ rü ãmarearü guruü̃wa tá nayagu. Rü naema i ngẽma chíxü̃ rü Cori ya Tupana rü tá namaxã nataãxẽ. Rü nüma ya chacherdóte rü ngẽmaãcü tá ngẽma chíbumaxã nanaxütanü i tümaarü pecadu ya yíxema duü̃xẽ. Rü choma ya Cori ya Tupana rü tá tüxü̃́ nüxü̃ icharüngüma i tümaarü pecadu.
32 Rü ngẽxguma yíxema duü̃xẽarü ãmare rü wüxi i carnéruxacü yixĩxgu, rü name nax wüxi i carnéruxacü i ngexü̃ i taxuwama chixexü̃ nax yixĩxü̃.
33 Rü yíxema duü̃xẽ rü naerugu tá taxü̱xme̱x i ngẽma carnéruxacü i tümaarü pecaduarü ütanüruxü̃. Rü ñu̱xũchi ngẽma nachica i naxü̃nagü nawa ínaguxü̃gu tá tayawíyenaxã.
34 Rü ngẽxguma i ngẽma chacherdóte rü tá nanayaxu ya íxracü ya nagü i ngẽma carnéruxacü i pecaduarü ütanüruxü̃. Rü ñu̱xũchi yimá nagümaxã tá nanacha i ãmarearü guruü̃chata̱xcuregü. Rü yimá nagü ya íyaxücü rü tá ãmarearü guruxü̃ namaxã ínabaegu.
35 Rü ngẽmawena i nüma i chacherdóte rü tá nanade i guxü̃ma i ngẽma carnéruxacüarü chíxü̃, ngẽma Cori ya Tupanaarü ngüxmüxẽẽruü̃ca̱x yama̱xgüxü̃ i naxü̃na nax nayauxarüchíxü̃ã́xü̃. Rü ngẽma chíxü̃ rü ãmarearü guruü̃wa tá nayagu wüxigu namaxã i ngẽma togü i ãmaregü i Cori ya Tupanaca̱x íguxü̃. Rü nüma ya chacherdóte rü ngẽmaãcü tá nanaxütanü i tümaarü pecadu ya yíxema duü̃xẽ. Rü choma ya Cori ya Tupana rü tá tüxü̃́ nüxü̃ icharüngüma i tümarü pecadu.
