Levítico 5:1-19
5 Rü ngẽxguma chi wüxíe ya duü̃xẽ ãẽ̱xgacü tümaca̱x ngẽmagu nax ãẽ̱xgacüpe̱xewa nüxü̃ tixuxü̃ca̱x i wüxi i guxchaxü̃ i nüxü̃ tadauxü̃ rüe̱xna nüxü̃ taxĩnüxü̃, rü ngẽxguma chi tama nüxü̃ tixuchaü̃gu rü tümagu nangu i ngẽma guxchaxü̃.
2 Rü ngẽxguma chi wüxíe nüxü̃ ingógügu i wüxi i naeü̃ i Tupanape̱xewa ãũãchixü̃ ngẽxgumarüxü̃ i wüxi i naeü̃ i dauxchitacüã̱x i yuxü̃, rüe̱xna wüxi i naxü̃na i yuxü̃, rüe̱xna wüxi i naeü̃ i ñaxtüanegu nügü itúxü̃ i yuxü̃ rü nitümaguãchi nax pecadu taxüxü̃ woo tama nüxü̃ tacuáãcüma nüxü̃ tingõgügu.
3 Rü ngẽxguma chi wüxi ya duü̃xẽ rü tümaechita nüxü̃ tingõgücüraxü̃gu i ta̱xacü i ãũãchixü̃ i duü̃xẽwa ixũxũxü̃, rü woo ngexü̃rüüxü̃mare yixĩxgu rü woo tama ngẽxgumatama nüxü̃ tacua̱xgu nax pecadu taxüxü̃, natürü ngẽxguma yixcüra nüxü̃ ticua̱xãchigu nax chixexü̃ taxüxü̃ rü tümagagutama tá nixĩ.
4 Rü ngẽxguma texé tümaechitamare ta̱xacüca̱x itaxunetagu, rü woo mexü̃ca̱x itaxunetagu rüe̱xna chixexü̃ca̱x itaxunetagu rü pecadu taxü. Natürü ngẽxguma yixcama nüxü̃ ticua̱xãchigu nax nachixexü̃ i tümaarü uneta, rü tümagagutama chixexü̃gu tangu.
5 Rü yíxema duü̃xẽ i ngexü̃rüüxü̃mare i ngẽma pecadu üxe, rü name nixĩ i nüxü̃ tixuxü̃ i ngẽma tümaarü pecadu i taxüxü̃.
6 Rü yíxema duü̃xẽ rü tümaarü pecaduarü ütanüruxü̃ tá Cori ya Tupanaca̱x tayama̱x i wüxi i chíbuxacü i ngexü̃ rüe̱xna wüxi i carnéruxacü i ngexü̃ i tümaxü̃naxüchitama ixĩxü̃. Rü nüma ya chacherdóte rü tá Tupanaca̱x nayagu i ngẽma tümaarü ãmare nax ngẽmaãcü Tupana tüxü̃́ nüxü̃ iyarüngü̃maxü̃ca̱x i tümaarü pecadu ya yíxema duü̃xẽ.
7 Rü ngẽxguma tangearü diẽruxã̱xgu nax wüxi i carnéruxacüca̱x tataxexü̃, rü name nixĩ nax taxre i muxtucugü rüe̱xna taxre i muxtucuxacügü Cori ya Tupanana tamugüxü̃. Rü wüxi i ngẽma muxtucugü rü tümaarü pecadu i taxüxü̃arü ütanüruxü̃ tá nixĩ. Rü ngẽma to i muxtucu rü tümaarü ãmare i Tupanaca̱x iguxü̃ tá nixĩ. Rü chacherdótexü̃tawa tá tanagagü i ngẽma taxre. Rü chacherdótena tá tanamu i ngẽma nuxíraxü̃xü̃ i muxtucu i pecaduarü ütanüruxü̃ ixĩxü̃. Rü nüma rü tá nayaxã̱ũ̱xyenaxã natürü taxũtáma nayacaweeru.
8 Rü ngẽma taxre i muxtucugü rü tá chacherdótexü̃tawa tanagagü. Rü nüma ya chacherdóte tá nixĩ i Tupanana naxããxü̃ i ngẽma wüxi i muxtucu i tümaarü pecaduarü ütanüruxü̃ ya yíxema duü̃xẽ ya pecadu üxe. Rü nüma ya chacherdóte tá nixĩ i tüxü̃ yaxã̱ũ̱xyenaaxü̃ ya yíxema muxtucu, natürü taxũtáma tüxü̃ nicaweeru.
9 Rü ngẽmawena rü ngẽma muxtucu i pecaduarü ütanüruxü̃ ixĩxü̃ rü íxracü ya nagümaxã tá nanamaxcu i wüxi i naxtapü̱x i ngẽma ãmarearü guruxü̃. Rü yimá nagü ya íyaxücü rü ãmarearü guruü̃para tá namaxã namacu. Erü ngẽma ãmare rü pecaduarü ütanüruxü̃ nixĩ.
10 Rü yíxema togüe ya muxtucuxacü rü tá tüxü̃ nigu ngẽma choma nüxü̃ chixuxü̃ãcü. Rü nüma ya chacherdóte rü ngẽmaãcü tá ngẽma muxtucuxacümaxã nanaxütanü i tümaarü pecadu ya yíxema duü̃xẽ. Rü choma ya Cori ya Tupana rü tá tüxü̃́ nüxü̃ icharüngüma i tümarü pecadu.
11 Rü yíxema duü̃xẽ rü ngẽxguma tangearü diẽruxã̱xgu nax taxre ya muxtucuca̱x rüe̱xna taxre ya muxtucuxacüca̱x tataxexü̃, rü name nixĩ i taxre i quíru nagu i trigute̱xe i rümemaexü̃ choxna taxãxü̃. Natürü ngẽma trigute̱xe i choxna taxãxü̃ rü tama name nax chíxü̃maxã rüe̱xna pumarate̱xemaxã tanaxüéxü̃. Erü ngẽma rü wüxi i ãmare i pecaduarü ütanüruxü̃ nixĩ.
12 Rü ngẽma ãmare rü tá chacherdótexü̃tawa tanange. Rü nüma i chacherdóte rü tá nanayaxu i wüxi i naxme̱xãcu i ngẽma trigute̱xe. Rü ngẽma ãmarewa tá nüxna tacua̱xãchi nax choma ya Cori ya Tupana chixĩxü̃ i guxü̃wama tüxü̃ charüngü̃xẽẽxü̃. Rü ngẽmawena i nüma ya chacherdóte rü tá ãmarearü guruü̃wa nayagu wüxigu namaxã i ngẽma togü i ãmaregü i cha̱u̱xca̱x yaguxü̃. Rü ngẽma nixĩ i wüxi i ãmare i pecaduarü ütanüruxü̃ ixĩxü̃.
13 Rü ngẽmaãcü i nüma ya chacherdóte rü ngẽma ãmaremaxã tá tüxü̃́ nanaxütanü i ngẽma pecadu i taxüxü̃. Rü choma rü tá tüxü̃́ nüxü̃ icharüngüma i ngẽma tümaarü pecadu. Rü ngẽma ãmaregü i pecaduarü ütanüruü̃güwa íyaxüxü̃ rü chacherdótearü tá nixĩ, ngẽma ãmare i trigute̱xerüxü̃! —ñanagürü.
Ãmare i pecadu i taxüxcüraxü̃arü ütanüruxü̃
14 Rü Cori ya Tupana rü Moichémaxã nidexa rü ñanagürü:
15 —Yíxema tama nüxü̃ cuáxe nax choxna tanaxãxü̃ i ngẽma choxna üxü̃ rü tümagagutama chope̱xewa pecadugu tangu. Rü ngẽma pecaduarü ütanüruxü̃ rü name i tümaarü carnérutanüwa tayayaxu i wüxi i carnéru i yatüxü̃ i taxuwama chixexü̃, rü chopatawa tanaga. Rü tá tanangugü i natanü nax ñuxre i diẽrumü naxãtanüxü̃ i ngẽma carnéru i tümaarü pecaduca̱x itaxãxü̃. Rü ngẽma diẽrumüarü ya rü chopatawa ngẽxmaxü̃ i yáruü̃wa tá tanangugü.
16 Rü yíxema duü̃xẽ ya pecadu üxcüraxü̃xẽ rü tá tanaxütanü i ngẽma diẽru naxca̱x i ngẽma pecadu i taxüxü̃. Rü ngẽma diẽruétü tá tanaxütanü i wüxi i norü 5 arü yauxye. Rü nüma ya chacherdóte rü tá cha̱u̱xca̱x nayagu i ngẽma tümaarü carnéru nax ngẽmaãcü tüxü̃́ nüxü̃ icharüngümaxü̃ca̱x i tümaarü pecadu. Rü choma rü tá tüxü̃́ nüxü̃ icharüngüma i tümaarü pecadu.
17 Rü ngẽxguma texé naxü̱xgu i ta̱xacü i chorü mugüwa chu̱xuxü̃, rü woo tanaxüxcüraxü̃gu, natürü tümagagu nixĩ i ngẽma chixexü̃ i taxüxü̃, rü tümawa nangẽxma i ngẽma chixexü̃.
18 Rü ngẽma pecaduca̱x rü tá tümaxü̃ natanüwa tayayaxu i wüxi i carnéru i taxuwama chixexü̃. Rü cuma rü tá cunangugü i natanü. Rü yíxema duü̃xẽ rü tá chacherdótexü̃tawa tanaga nax yamáaxü̃ca̱x nax ngẽmaãcü choma ya Cori ya Tupana tüxü̃́ nüxü̃ icharüngümaxü̃ca̱x i tümaarü pecadu i tümaechita taxüxü̃. Rü choma rü tá tüxü̃́ nüxü̃ icharüngüma i ngẽma pecadu.
19 Rü ngẽma rü wüxi i ãmare i tümaarü pecadugagu itaxãxü̃ nixĩ, erü yíxema duü̃xẽ rü chope̱xewa tapecaduã̱x —ñanagürü.
