Levítico 6:1-30
6 Rü nüma ga Cori ya Tupana rü Moichémaxã nidexa rü ñanagürü nüxü̃:
2 —Ngẽxguma texé chope̱xewa chixexü̃ uxgux rü tümamücüxü̃ tawomüxẽẽ̱xgu, rüe̱xna tügüxü̃́ tanayaxu̱xgu i ngẽma tüxü̃ namaxã nanguxü̃xẽẽxü̃, rüe̱xna texéaxü̃́ tangĩ̱xgu, rüe̱xna togüna tanapu̱xgu i norü ngẽmaxü̃gü, rü chixexü̃ taxü.
3 Rü ngẽxgumarüxü̃ ta ega texé wüxi i togüarü ngẽmaxü̃ iyarütaxuxü̃ itayangauxgux rü ñu̱xũchi tama nüxü̃ tixuxgu nax nüxü̃ itayangauxü̃, rü chixexü̃ taxü. Rü ngẽxgumarüxü̃ ta ega natüca̱xma tümamücümaxã itaxügagu natürü tama tayangu̱xẽẽgu i ngẽma nüxü̃ tixuxü̃, rü chixexü̃ taxü.
4 6:4-5 Rü ngẽxguma texé ngẽma chixexü̃gü uxgux, rü tá tanawoeguxẽxẽ i guxü̃ma i ngẽma naxca̱x tangĩ́xü̃, rü ngẽma womüxẽẽãcü toguxena tanapuxü̃, rü ngẽma tügüxü̃́ tayaxuxü̃ i ngẽma tüxü̃ namaxã nanguxü̃xẽẽxü̃, rü ngẽma nüxü̃ itayangauxü̃ rü tama tatáeguxẽẽxü̃, rü ngẽma womüxẽẽãcü tayaxuxü̃ rü tá tanawoeguxẽxẽ i guxü̃ma i ngẽma. Rü ngẽmaétü rü tá tanaxütanü i wüxi i norü 5 arü yauxye i natanü i ngẽma ngẽmaxü̃gü i tayaxuxü̃. Rü ñu̱xũchi chope̱xewa tá tanaga i tümaxü̃na i tümaarü chixexü̃ca̱x choxna tayamuxü̃.
5 Nüü̃ nadau 6:4
6 Rü ngẽma tümaxü̃na i cha̱u̱xca̱x timáxü̃ rü name i wüxi i carnéru i taxuwama chixexü̃ nax yixĩxü̃. Rü cumax, Pa Moichéx, rü cuma tá nixĩ i cunangugütanüxü̃ nax ñuxregu naxãtanüxü̃ i ngẽma carnéru rü aixcüma ngẽma carnéru i tümaxü̃natanüwa tayaxuxü̃ rü marü namaxã yangutanü i tümaarü pecadu. Rü ñu̱xũchi chacherdótexü̃tawa tá tanaga nax ngẽxma tayamáxü̃ca̱x tümaarü pecadutanü.
7 Rü nüma ya chacherdóte tá tümaarü chixexü̃ca̱x chopexegu nayagu. Rü choma rü tá tüxü̃́ nüxü̃ icharüngüma i guxü̃ma i ngéma pecadu i taxüxü̃ —ñanagürü.
Ucu̱xẽ nax ñuxãcü yagugüãxü̃ i ngẽma ãmaregü
8 Rü nüma ga Cori ya Tupana rü Moichémaxã nidexa rü ñanagürü nüxü̃:
9 —¡Aróü̃maxã rü nanegümaxã nüxü̃ ixu nax ñuxãcü tá yagugüãxü̃ i ngẽma naxü̃nagü i cha̱u̱xca̱x nada̱i̱xü̃! Rü ngẽma naxü̃nagü i yagugüxü̃ rü guxü̃ma i ngẽma chütaxü̃ rü ãmarearü guruü̃arü ã́xwe ya naicüétügu tá nananu nax ngẽxma yaxaexü̃ca̱x.
10 Rü moxü̃ãcü pa̱xmama rü nüma ya chacherdóte rü tá nicuxcuchi i naxchiru i línuchinaxca̱x rü natüü̃chiru i ngẽmarüü̃tama ixĩxü̃. Rü ngẽmawena rü ngẽma guruü̃wa tá nanayaxu i ngẽma naxü̃naarü tanimaca. Rü ngẽma guruü̃cüwagu tá nanagütaque̱xe.
11 Rü ngẽmawena rü tá ínacuxuchi rü to i naxchirugu tá nicu̱x. Rü ngẽmaãcü wüxi i nachica i mexü̃ i ípepegüxü̃arü ĩxpemawa tá nayagü ya yimá tanimaca.
12 Rü yima üxü ya ngẽma naxü̃naarü guruü̃wa naixü̃ne rü tama name nax yaxoxü̃. Rü nüma ya chacherdóte rü nanaxwa̱xe nax naxüxǘü̃ãxü̃ i guxü̃ma i pa̱xmama. Rü ngẽxma üxüétügu tá nanaxǘnagü i ngẽma naxü̃na i tá yaguxü̃. Rü ngẽxgumarüxü̃ ta rü ngéma tá nayagu i norü chíxü̃ i ngẽma naxü̃nagü i duü̃xü̃gü choxna ãxü̃ nax namaxã icharüngü̃xmüxü̃ca̱x.
13 Rü ngẽmaãcü ya yima üxü i ãmarearü guruü̃wa naixü̃ne rü tagutáma peyaxoxẽxẽ.
Ucu̱xẽ nax ñuxãcü inaxãxü̃ i ngẽma ãmare i trigute̱xe ixĩxü̃
14 Rü ñaa ucu̱xẽgü rü ãmaregü i trigute̱xeca̱x ixĩxü̃ nixĩ: Rü ngẽma Aróü̃ nanegü i chacherdótegü tá nixĩ i ãmarearü guruü̃pe̱xewa choxna naxãgüxü̃ i ngẽma ãmaregü i trigute̱xe ixĩxü̃.
15 Rü wüxi i ngẽma chacherdóte rü tá nanayaxu i wüxi i naxme̱xãcu i trigute̱xe. Rü ngẽxgumarüxü̃ ta nanayaxu i chíxü̃ rü guxü̃ma i ngẽma pumarate̱xe. Rü ñu̱xũchi wüxigu trigute̱xemaxã tá ínanagu i ãmarearü guruü̃wa. Rü ngẽma tá nixĩ i ãmare i nawa nüxna pecua̱xãchixü̃ nax choma chixĩxü̃ i pexna chanaxãxü̃ i guxü̃ma i ta̱xacü i pexü̃́ ngẽxmaxü̃. Rü choma i Cori ya Tupana rü namaxã tá chataãxẽ i ngẽma naema i ngẽma ãmare.
16 Rü ngẽma trigute̱xewa íyaxüxü̃ rü Aróü̃ rü nanegüarü tá nixĩ. Natürü ngẽxguma nangõ̱xgüãgu i ngẽma trigute̱xearü paũ rü ngearü pu̱xẽẽruü̃ã́xü̃ tá nixĩ. Rü ngẽma tá nangõ̱xgü nawa i ngẽma nachica i üünexü̃ i woetama ngẽmaruxü̃ ixĩxü̃ i chopataã̱xtüwa ngẽxmaxü̃.
17 Rü ngẽxguma ngẽma paũ ínagugügu rü ngearü pu̱xẽẽruü̃ã́xü̃ tá nixĩ. Rü tama name nax paũarü pu̱xẽẽruü̃maxã naxüéxü̃güãxü̃. Rü ngẽma ãmare i cha̱u̱xca̱x yaguxü̃wa íyaxüxü̃ tá nixĩ i nüxna tá chaxãxü̃ ya Aróü̃ rü nanegü. Rü ngẽma nüxna chaxãxü̃ rü naxüünexü̃chi narüxü̃ i ngẽma ãmare i pecaduarü ütanüca̱x íguxü̃ rü ngẽma ãmare i pecadugagu íguxü̃.
18 Rü guxü̃gutáma i Aróü̃ rü nataagü i yatüxü̃ rü name i nanangõ̱xgü i ngẽma ãmare i cha̱u̱xca̱x yaguxü̃wa íyaxüxü̃. Rü guxü̃ma i ta̱xacü i ngẽmaxü̃gü i namaxã rüñaxü̃ i ngẽma ãmaregü rü narüxü̃ tá naxüüne —ñanagürü.
Chacherdótegüarü ãmare
19 Rü nüma ga Cori ya Tupana rü Moichémaxã nidexa rü ñanagürü nüxü̃:
20 —Rü ngẽma ngunexü̃ i nagu choxna namugüãxü̃ ya Aróü̃ rü nanegü nax chorü chacherdótegü yixĩgüxü̃ca̱x, rü ngẽma ãmare i tá choxna naxãgüxü̃ rü taxre i quíru i trigute̱xe i rümemaexü̃ tá nixĩ. Rü ẽxü̃wa tá choxna nanaxãgü i wüxi i quíru naguxü̃ i ngẽma trigute̱xe, rü yáuanecü tá choxna nanaxãgü i ngẽma to i quíru i trigute̱xe.
21 Rü ngẽma ãmare rü wüxi i piripáxü̃wa tá nixĩ i yagugüãxü̃ rü ñu̱xũchi mea chíxü̃maxã naxüéxü̃güãxü̃. Rü ngẽmawena rü íxraxü̃gu tá nanawicu rü ñu̱xũchi tá ínanagu. Rü choma rü tá namaxã chataãxẽ i naema i ngẽma ãmare.
22 Rü ngẽma Aróü̃ nane i baeruxü̃ nax Aróü̃chicüxü chacherdótegüarü ãẽ̱xgacü yixĩxü̃ca̱x, rü nüma tá nixĩ i namexẽxẽãxü̃ i ngẽma trigute̱xe i Tupanaarü ãmare ixĩxü̃. Rü ngẽma ãmare rü guxü̃táma nigu erü ngẽma nixĩ i Tupanaarü mu i guxü̃guca̱x ixĩxü̃.
23 Rü guxü̃ma i ngẽma ãmaregü i chacherdótegü choxna ãgüxü̃ rü guxü̃táma ínagu, rü taxúxetáma tanangõ̱x —ñanagürü.
Ãmare i pecaduarü ütanüruü̃chiga
24 Rü nüma ga Cori ya Tupana rü Moichémaxã nidexa rü ñanagürü nüxü̃:
25 —¡Aróü̃maxã rü nanegümaxã nüxü̃ ixu i ñaa ucu̱xẽ nachiga nax ñuxãcü tá inaxãgüãxü̃ i ngẽma ãmare i pecaduarü ütanüruxü̃ ixĩxü̃! Rü ngẽma naxü̃na i pecaduarü ütanüca̱x imáxü̃ rü name nax chopexegu yama̱xgüãxü̃ nagu i ngẽma nachica i naxü̃nagü nagu daixü̃ rü cha̱u̱xca̱x ínaguxü̃. Erü ngẽma ãmare rü wüxi i ãmare i Üünexüchixü̃ nixĩ.
26 Rü ngẽma chacherdóte i ãmare i pecaduarü ütanüruxü̃ cha̱u̱xca̱x iguxü̃, rü name nax tanangṍxü̃ i ngẽma namachi. Natürü ngẽma nachica i üünexü̃ i chopataã̱xtüwa ngẽxmaxü̃wa ta nixĩ i nangṍoxü̃.
27 Rü guxü̃ma i ta̱xacü i namaxã rüñaxü̃ i ngẽma naxü̃namachi rü narüxü̃ tá naxüüne. Rü ngẽxguma chacherdótechiruwa nachaxi̱xgu ya nagü, rü name i wüxi i nachica i üünexü̃wa nayaxu i ngẽma naxchiru.
28 Rü yima buetare ya waixü̃münaxca̱x ya naxü̃namachi nawa pemuxragücü, rü nawena nax nawa penamuxraxü̃ rü name nax peyapuxẽẽxü̃. Natürü ngẽxguma yima buetare rü cobrenaxca̱x yixĩxgu, rü nawena nax ngẽma naxü̃namachi nawa pemuxraxü̃ rü tá penadüxüma rü ñu̱xũchi meatama penayaxuma.
29 Rü ngẽma naxü̃namachi rü wüxi i ãmare i Üünexüchixü̃ nixĩ, rü ngẽmaca̱x ngẽma chacherdótegüxica tá nixĩ i nangõ̱xgüxü̃.
30 Natürü tama name nax nangõ̱xgüãxü̃ i ngẽma naxü̃na i pecaduarü ütanüca̱x imáxü̃ rü chopatawa nangegüãcü ya nagü nax yimamaxã chopatawa yaxütanügüãxü̃ca̱x i duü̃xü̃güarü pecadugü nax ngẽmaãcü choma nüxü̃ icharüngümaxü̃ca̱x i norü pecadugü. Rü ngẽma naxü̃na i ãmare ixĩxü̃ rü üxüwa tá nigu.
