Levítico 8:1-36
8 Rü nüma ga Cori ya Tupana rü Moichémaxã nidexa rü ñanagürü nüxü̃:
2 —¡Ẽcü naxca̱x nangẽma ya Aróü̃ rü nanegü! ¡Rü nanutaque̱xe i ngẽma chacherdótegüchiru, rü ngẽma chíxü̃ i baeruruxü̃, rü ngẽma wocaxacü i yatüxü̃ i chixexü̃arü ütanüca̱x imáxü̃, rü ngẽma taxre i carnérugü rü yimá pexchi i paũ i ngearü pu̱xẽẽruü̃ã́xü̃ nagu nucü!
3 ¡Rü ñu̱xũchi chopataã̱xtüarü ücuchicagu nangutaque̱xexẽxẽ i guxü̃ma i duü̃xü̃gü! —ñanagürü ga Tupana.
4 Rü nüma ga Moiché rü nanaxü ga yema Cori ya Tupana namaxã nüxü̃ ixuxü̃. Rü nümagü ga duü̃xü̃gü rü guma Tupanapataa̱xtüarü ücuchicagu nangutaque̱xegü.
5 Rü nüma ga Moiché rü ñanagürü duü̃xü̃güxü̃: —Ngẽma ñu̱xma tá ixüxü̃ nixĩ i ngẽma Tupana tüxü̃ muxü̃ nax naxüxü̃ca̱x —ñanagürü.
6 Rü nüma ga Moiché rü Aróü̃maxã rü nanegümaxã nüxü̃ nixu nax naxca̱x naxĩxü̃ca̱x. Rü Tupanape̱xewa dexámaxã nayayauxgü.
7 Rü yemawena rü yema mámüxü̃ ga naxchirugu Aróü̃xü̃ nicu̱xcuchi, rü mea nayachota ga norü goyexü̃. Rü nayacu̱xcuchi ga yema düxétüwa üxü̃ ga naxchiru. Rü yemaétüwa nayacu̱xcuchi ga yema efóx. Rü yema rü meama nayagota norü goyexü̃maxãtama.
8 Rü ñu̱xũchi nayanga̱xcuchi ga yema norü türemüxü̃. Rü yema norü türemüxü̃arü chocagu nananucu ga guma nutagü ga Uríü̃ rü Tumíü̃.
9 Rü ñu̱xũchi nayangaxcuchipate̱xe. Rü yema napate̱xecatüwa nayaxǘcuchi ga wüxi ga úirutachinü ga nawa nüxü̃ nacua̱xgüxü̃ nax chacherdótegüarü ãẽ̱xgacü yixĩxü̃, yerü yemaacü nixĩ ga Cori ya Tupana ga Moichémaxã nüxü̃ yaxuxü̃.
10 Rü yemawena rü nüma ga Moiché rü nanayaxu ga yema chíxü̃ ga baeruruxü̃ rü yema chíxü̃maxã nüxü̃ ningõgü ga guma Tupanapata rü guxü̃ma ga norü yemaxü̃gü. Rü yemaacü nayaxüünexẽẽgü.
11 Rü yematama chíxü̃maxã nanamaxcu 7 e̱xpü̱xcüna ga yema ãmaregüarü guruxü̃. Rü ñu̱xũchi yema chíxü̃maxã nanabaétü ga yema ãmaregüarü guruxü̃, rü guxü̃ma ga norü yemaxü̃gü, rü gumá bachía ga ya̱u̱xme̱xü̃páxü̃ rü yema norü ünagüchicaxü̃. Rü yemaacü Tupanaca̱x nüxü̃ naxuneta.
12 Rü ñu̱xũchi ga Moiché rü Aróü̃erugu nanaba ga yema chíxü̃, rü yemaacü Tupanaarü puracüca̱x nüxü̃ naxuneta.
13 Rü yemawena ga Moiché rü Aróü̃ nanegüca̱x nangema nax naxü̃tawa naxĩxü̃ca̱x. Rü nanacu̱xcu ga mámüxü̃ ga naxchiru rü mea nayachotagü ga norü goyexü̃ rü nananga̱xcupate̱xe. Rü yemaacü nayanguxẽxẽ ga yema Cori ya Tupana namaxã nüxü̃ ixuxü̃.
14 Rü yemawena ga Moiché rü nanamu nax naxü̃tawa nagagüãxü̃ca̱x ga yema wocaxacü ga yatüxü̃ nax pecaduarü ütanüca̱x yama̱xgüãxü̃ca̱x. Rü nüma ga Aróü̃ rü nanegü rü yema wocaxacüerugu nanuxme̱xgü.
15 Rü yexguma nüma ga Moiché rü nayawíyenaxã ga yema naxü̃na. Rü ñu̱xũchi nagügu narüxu, rü gumá nagümaxã nayachagü ga nachaxta̱xcuregü ga yema ãmarearü guruxü̃ nax Tupanape̱xewa nangearü ãũãchiã́xü̃ca̱x. Rü gumá nagü ga íyaxücü rü yema ãmarearü guruxü̃ namaxã ínabaegu. Rü yemaacü Tupanaarü puracüca̱x nüxü̃ naxuneta ga yema ãmarearü guruxü̃ nax yéma Tupana nüxü̃́ nüxü̃ rüngü̃maxü̃ca̱x ga duü̃xü̃güarü pecadugü.
16 Rü yemawena ga Moiché rü nanade ga yema wocaxacüarü chíxü̃ ga naü̃nütawa yexmaxü̃ rü nacawa yexmaxü̃, rü guma taxre ga ñuxmi namaxã ga norü chíxü̃. Rü guxü̃ma ga yema rü ãmarearü guruü̃wa ínanagu.
17 Natürü yema naxcha̱xmüxü̃ rü namachi rü naü̃ ga yema wocaxacü rü duü̃xü̃gü ínapegüxü̃arü ĩxpemawa ínanagu yema Cori ya Tupana namaxã nüxü̃ ixuxü̃rüxü̃.
18 Rü nüma ga Moiché rü nanamu nax naxü̃tawa nagagüãxü̃ca̱x ga yema carnéru ga yatüxü̃ ga Tupanaarü ãmareca̱x yaguxü̃. Rü nüma ga Aróü̃ rü nanegü rü yema carnéruerugu nanuxme̱x.
19 Rü ñu̱xũchi ga Moiché rü nayawíyenaxã ga yema carnéru rü gumá nagümaxã nanamaxcu ga yema ãmarearü guruü̃cüwagü.
20 Rü ñu̱xũchi íxraxü̃gu nanadaü̃gü ga yema carnéru. Rü ínanagu ga naeru rü namachi rü norü chíxü̃.
21 Rü yemawena rü dexámaxã nanayaxu ga yema naü̃nütagü rü guma naparagü. Rü ñu̱xũchi ãmarearü guruü̃wa ínanagu ga guxü̃ma ga yema carnéru nax wüxi ga ãmare ga Cori ya Tupana naemamaxã nataãẽxü̃ca̱x. Rü nüma ga Moiché rü yemaacü ínanagu yema Cori ya Tupana namaxã nüxü̃ ixuxü̃rüxü̃.
22 Rü yemawena ga Moiché rü nanamu nax naxü̃tawa nagagüãxü̃ca̱x ga yema to ga carnéru nax yemamaxã Cori ya Tupana nüxü̃ unetaxü̃ca̱x ga Aróü̃ rü nanegü nax norü puracü naxügüxü̃ca̱x. Rü nüma ga Aróü̃ rü nanegü rü yema carnéruerugu nanuxme̱x.
23 Rü yemawena ga Moiché rü nayawíyenaxã ga yema carnéru rü ñu̱xũchi íxracü ga nagü nayaxu rü Aróü̃arü tügünechinüpünewa gumá nagümaxã nanacha. Rü yexgumarüxü̃ ta nanacha ga guma norü tügüneme̱xẽarü tatarene rü guma norü tügünecutüarü tatarene.
24 Rü yemawena ga Moiché rü Aróü̃ nanegüca̱x naca nax naxü̃tawa naxĩxü̃ca̱x. Rü yexguma marü naxü̃tawa naxĩxgu rü íxracü ga nagü nanayaxu rü norü tügünechinüpünewa gumá nagümaxã nayachagü. Rü yexgumarüxü̃ ta nayachagü ga guma norü tügüneme̱xẽarü tatarene rü guma norü tügünecutüarü tatarene. Rü gumá nagü ga íyaxücü rü yema ãmarearü guruxü̃ namaxã ínabaegu.
25 Rü yemawena ga Moiché rü nanade ga yema carnéruarü chíxü̃, rü nareü̃, rü guxü̃ma ga naü̃nütaarü chíxü̃, rü yema chíxü̃ ga nacawa yexmaxü̃, rü guma taxre ga norü ñuxmi namaxã ga norü chíxü̃, rü ñu̱xũchi norü tügüneperema.
26 Rü gumá pexchi ga nagu nanucü ga paũ ga ngearü pu̱xẽẽruü̃ã́xü̃ ga Tupanape̱xegu nuxü̃, rü gumawa Moiché nanayaxu ga wüxi ga paũ ga maicuraxü̃ ga ngearü pu̱xẽẽruü̃ã́xü̃. Rü yexgumarüxü̃ ta nanayaxu ga wüxi ga paũ ga maicuraxü̃ ga chíxü̃maxã ñumüxü̃ rü wüxi ga gayeta. Rü guxü̃ma ga yema rü nananu wüxigu namaxã ga yema chíxü̃ rü guma tügüneperema.
27 Rü yexguma marü wüxigu nanuãgu rü nüma ga Moiché rü Aróü̃na rü nanegüna nanana nax nümagü rü Cori ya Tupanape̱xewa yema ãmaregü yachü̱xüxtegüãxü̃ca̱x.
28 Rü yexguma nüma ga Moiché rü Aróü̃na rü nanegüna nanade ga guxü̃ma ga yema. Rü ãmarearü guruü̃wa ínanagu wüxigu namaxã ga yema ãmare ga Tupanaca̱x yaguxü̃. Rü yemaacü nüxü̃ naxuneta ga Aróü̃ rü nanegü nax Tupanaarü puracü naxügüxü̃ca̱x. Rü yema nixĩ ga ãmaregü ga Tupanaca̱x yaguxü̃ nax naemamaxã nataãẽxü̃ca̱x.
29 Rü yemawena ga Moiché rü nanayaxu ga yema namachiremü ga nüxna üxü̃, rü Cori ya Tupanape̱xewa nayachü̱xüxãcüüxẽxẽ yema Cori ya Tupana namaxã nüxü̃ ixuxü̃rüxü̃.
30 Rü yemawena ga Moiché rü íxraxü̃ ga chíxü̃ ga baeruruxü̃ nayaxu rü ñu̱xũchi íxracü ga nagü ga ãmarearü guruü̃gu ücü ne nayaxu. Rü yemagümaxã Aróü̃xü̃ rü nanegüxü̃ nimaxcuétü rü yema norü chacherdótechiru rü ta nüxü̃́ namaxcucharagü. Rü yemaacü nüxü̃ naxuneta ga Aróü̃ rü nanegü nax naxügüã̱xü̃ca̱x ga Tupanaarü puracü. Rü yemaacü Tupanaarü puracüca̱x nanaxüünexẽxẽ ga yema chacherdótechirugü.
31 Rü yemawena ga Moiché rü Aróü̃maxã rü ñu̱xũchi nanegümaxã nidexa rü ñanagürü: —Rü ngẽma namachi rü Tupanapataarü ĩã̱xü̃tawa tá nixĩ i penamuxraxü̃. Rü ngẽxguma marü pexü̃́ nangẽxẽ̱xgu rü ngéma tátama nixĩ i penangṍxü̃ namaxã i ngẽma paũ i pexna chaxãxü̃ i ngẽxguma Tupanaarü puracüca̱x pexü̃ chaxunetagu. Yerü yemaacü nixĩ ga choxü̃ namuxü̃ ga Cori ya Tupana ga yexguma chomaxã yadexaxgu rü ñanagürü choxü̃: “Aróü̃ rü nanegü tá nixĩ i nangõ̱xgüxü̃ i ngẽma namachi,
32 Rü ngẽma namachi rü ngẽma paũ i íyaxüxü̃ rü tá peyagu.
33 Rü taxũtáma pixĩgachitanü i Tupanapataarü ĩã̱xü̃tawa. Rü ngéma tá pengẽxmagü i 7 i ngunexü̃ erü ngẽxgumaepü̱x i ngunexü̃guwena tá nixĩ i marü pimexü̃ nax penaxügüxü̃ca̱x i Tupanaarü puracü.
34 Erü Cori ya Tupanaarü mu nixĩ nax ngẽmaãcü penaxüxü̃ nax peyangutanüxẽẽxü̃ca̱x i perü pecadugü, ngẽma ñu̱xma pemaxã íchaxüxü̃rüxü̃.
35 Rü ngẽmaca̱x i pema rü 7 i ngunexü̃ rü 7 i chütaxü̃ tá nixĩ i Tupanapataarü ĩã̱xü̃tawa pengẽxmagüxü̃. ¡Rü naga pexĩnüe i Cori ya Tupanaarü mu nax tama peyuexü̃ca̱x! Erü ngẽma nixĩ i Cori ya Tupanaarü mu i choxna naxãxü̃” —ñanagürü ga Moiché.
36 Rü nüma ga Aróü̃ rü nanegü rü nayanguxẽẽgü ga guxü̃ma ga yema Cori ya Tupana Moichémaxã nüxü̃ ixuxü̃.
