Malaquías 1:1-14
1 Rü ñaa nixĩ i ore i Cori ya Tupana Iraétanüxü̃maxã nüxü̃ ixuxü̃ nawa ya norü orearü uruxü̃ ya Maraquía.
2 1:2-3 Rü nüma ya Cori ya Tupana rü ñanagürü: —Choma rü pexü̃ changechaü̃ —ñanagürü. Natürü i pemax rü penangãxü̃ rü ñapegürügü nüxü̃: —¿Ñuxãcü nüxü̃ tacua̱x nax toxü̃ cungechaxü̃xü̃? —ñapegürügü nüxü̃. Rü nüma ya Cori ya Tupana rü pexü̃ nangãxü̃ rü ñanagürü: —Choma rü guma nũxcümaü̃cü ga perü o̱xi ga Acóbuxü̃ changechaü̃ rü ngẽmawa pexü̃ chanawe̱x nax poraãcü pexü̃ changechaü̃xü̃. Rü woo nügüenexẽgü nax yixĩgüxü̃, natürü Acóbuxü̃ changechaü̃ rü Echaúxü̃ chaxo. Rü tama Echaúmaxã chataãxẽ rü yemaca̱x norü naane i máxpü̱xanexü̃ nax yixĩxü̃ rü chianexü̃xü̃ chananguxuchixẽxẽ, rü naeü̃gü i düraexü̃ nawa changexmagüxẽxẽ —ñanagürü.
3 Nüü̃ nadau 1:2
4 Rü ngẽxguma ngẽma Edóü̃cüã̱x i Echaú nataagü rü woo ñagügu: —Yixemagü rü marüchire̱x itarüxogü, natürü wena tá ítanadaxẽẽãma i tachixü̃ane —ñagügu, natürü nüma ya Cori ya Tupana ya Guxãétüwa Ngẽxmacü rü ñaãcü tá nanangãxü̃ rü ñanagürü: —Woo penamexẽẽgu i ngẽma pechixü̃ane, natürü choma rü tá wena ichanaxoxẽxẽ. Rü ngẽma perü naane rü Chixexü̃ i Nachixü̃anemaxã, tá nanaxugü i duü̃xü̃gü. Rü Duü̃xü̃gü ya Tupana Namaxã Nuxü̃maxã tá pexü̃ naxugü.
5 Rü pemax rü pexetümaxã tá nüxü̃ pedau i ngẽma nüxü̃ chixuxü̃. Rü ngẽxguma i pema rü tá ñaperügügü: “Cori ya Tupana rü nataxüchi. Rü ngẽma norü pora rü Iraéanearü üyeanearü yexerawa nangu”, ñaperügügü tá —ñanagürü.
Cori ya Tupana rü chacherdótegüxü̃ ningagü
6 Rü nüma ya Cori ya Tupana ya Guxü̃étüwa Ngẽxmacü rü chacherdótegüxü̃ ñanagürü: —Ngẽma buxü̃gü rü nanatügüxü̃ nangechaü̃, rü ngẽma naxü̃taxü̃gü rü norü coriga naxĩnü. Rü choma nax Penatü chixĩxü̃ ¿rü tü̱xcüü̃ i tama choxü̃ pengechaü̃xü̃? Rü choma nax perü Cori chixĩxü̃ ¿rü tü̱xcüü̃ i tama chauga pexĩnüexü̃? Natürü i pemax rü choxü̃ pexo, rü naétü ñaperügügü: “¿Ta̱xacüwa i cuxü̃ taxoxü̃?” ñaperügügü.
7 Rü pema rü chorü ãmaregüarü guruü̃wa penana i ãmaregü i tama imexü̃, rü ngẽxguma rü ípeca rü ñaperügügüama: “¿Ta̱xacüwa i chixexü̃ cumaxã taxüexü̃?” ñaperügügü. Dücax, pema rü chixexü̃ chope̱xewa pexüe erü chorü ãmarechicawa penana i ãmare i tama imexü̃.
8 ¿Ẽ̱xna tama pexca̱x nachixe ega woo naxü̃na i ngexetüxü̃ rüe̱xna ngemaeparaxü̃ rüe̱xna ida̱xawexü̃ cha̱u̱xca̱x piguxgu? ¡Rü ẽcü perü ãẽ̱xgacügüxü̃tawa penana nax ngẽmaãcü nüxü̃ pecuáxü̃ca̱x rü aixcüma taãẽãcü pexü̃́ nayauxgüã i ngẽma perü ãmaregü! —ñanagürü ya Tupana ya Guxü̃étüwa Ngẽxmacü.
9 Rü ñanagürü ta: —Dücax, Pa Chacherdótegüx, Tupanana peca nax nüxü̃́ pengechaü̃tümüxü̃xü̃ca̱x Natürü ngẽxguma chixemarexü̃ i ãmaregü nüxna pixãgügu ¡rü taxũtáma nagu perüxĩnüe nax ngẽmamaxã nataãẽxü̃ i nümax! —ñanagürü ya Tupana ya Guxü̃étüwa Ngẽxmacü.
10 Rü nüma ya Cori ya Tupana ya Guxü̃étüwa Ngẽxmacü rü pexü̃ ñanagürü: —Chierüx texé i petanüwa tanawãxtagu ya chopata ya taxü̃nearü ĩã̱xgü nax tama natüca̱xmamare chorü ãmarearü guruü̃wa yayauraxü̃ca̱x ya üxü. Erü choma rü tama pemaxã chataãxẽ, rü ngẽmaca̱x taxuxü̃táma i perü ãmaregü i choxna pexãgüxü̃ tá pexü̃́ chayaxu.
11 Rü guxü̃ma i nachixü̃anegü i ñoma i naanecüã̱x rü duü̃xü̃gü choxü̃ nicua̱xüü̃gü, rü pumarate̱xe cha̱u̱xca̱x nigugü rü ãmare choxna naxãgü.
12 Natürü i pema rü choxü̃ pinuxẽxẽ erü tama nüxü̃ pengechaxü̃ i ngẽma chorü ãmarearü guruxü̃ i chorü mecha ixĩxü̃. Rü ngẽmaca̱x i ãmare i tama mexü̃ cha̱u̱xca̱x nawa pigugü.
13 Rü pema rü ñaperügügü: “Marü tipae nax tanaxüechaxü̃ i ngẽma puracü”, ñaperügügü. Rü ngẽmaca̱x choxü̃ pexoe. Rü ngẽmaétüwa rü pema rü nagu perüxĩnüe nax namaxã chataãẽxü̃ i ngẽma naxü̃na i naxca̱x pengĩ́xü̃ rü woca i chixri ixũxü̃ rüe̱xna ida̱xawexü̃ i choxü̃ namaxã pexãmareã́xü̃.
14 ¡Rü guxchaxü̃ namaxã chaxuegu i ngẽma idorata̱xáxü̃ i chomaxã nüxü̃ ixuxü̃ nax naxü̃natanüwa tá wüxi i naxü̃na i mexü̃ choxna muxü̃, natürü chixemarexü̃ nixĩ i cha̱u̱xca̱x yamáxü̃! Rü choma nixĩ i Ãẽ̱xgacü ya Guxãétüwa Changexmaxü̃, rü choxü̃ nixĩ i namuü̃exü̃ i guxü̃ma i nachixü̃anecüã̱xgü —ñanagürü ya Tupana ya Guxü̃étüwa Ngẽxmacü.
