Malaquías 2:1-17
2 Rü nüma ya Tupana rü ñanagürü: —Ñu̱xmax, Pa Chacherdótegüx, rü ñaa nixĩ i chorü ucu̱xẽ i pexca̱x ixĩxü̃:
2 “Rü dücax, rü name nixĩ i chauga pexĩnüe. Rü chanaxwa̱xe i aixcüma choxü̃ pengechaü̃gü. Rü ngẽxguma taxũtáma chauga pexĩnüegu rü choma rü tá guxchaxü̃ pemaxã chaxuegu. Rü ñu̱xma nax tama aixcüma choxü̃ pengechaü̃güxü̃ rü ngẽma perü natanü i peyauxgüxü̃ naxca̱x nax chacherdótegü pixĩgüxü̃ rü choma rü tá perü guxchaxü̃ruxü̃ chayanguxuchixẽxẽ” —ñanagürü ya Cori ya Tupana ya Guxãétüwa Ngẽxmacü.
3 Rü ñanagürüama: —Choma rü tá pexna chanayaxu i ngẽma puracü ga pexna chaxãxü̃. Rü pechiwegu tá chanawogü ya yima naü̃ i ngẽma naxü̃nagü i cha̱u̱xca̱x pedaixü̃. Rü wüxigu yima naü̃maxã tá pexü̃ íchawoxü̃ i pemax.
4 Rü ngẽmaãcü düxwa tá nüxü̃ pecua̱x nax chomax yixĩxü̃ i pexna chaxãxü̃ i ñaa ucu̱xẽ nax naxca̱x pewoeguxü̃ca̱x i ngẽma chorü mugü ga perü o̱xigü ga Lebítanüxü̃maxã nüxü̃ chixuxü̃. Rü choma ya Cori ya Tupana ya Guxãétüwa Ngẽxmaxe nixĩ i nüxü̃ chixuxü̃ i ngẽma.
5 Rü yema chorü uneta ga Lebítanüxü̃maxã chaxueguxü̃ rü yemaacü ichaxuneta nax nüxü̃́ nayexmaxü̃ca̱x ga maxü̃ rü taãxẽ. Rü perü o̱xigü ga Lebítanüxü̃ rü chomaxã nüxü̃ nixugüe rü tá chauga nax naxĩnüexü̃ rü choxü̃ yacua̱xüü̃güxü̃. Rü nümagü rü aixcüma yemaacü nanaxügü.
6 Rü nümagü ga perü o̱xigü ga Lebítanüxü̃ rü ore i aixcüma ixĩxü̃maxã nanangúexẽxẽ ga duü̃xü̃gü rü taguma chixexü̃maxã nayaxucu̱xẽgü. Rü nümagü ga perü o̱xigü ga Lebítanüxü̃ rü aixcüma chomaxã naxãmücügü rü togümaxã tataãẽgü. Rü muxẽma ga duẽxẽgü tüxü̃ narüngü̃xẽxẽ nax chixexü̃na tixĩgachixü̃ca̱x.
7 Rü wüxi i chacherdótearü puracü nixĩ nax duü̃xẽgü tüxü̃ nangúexẽẽxü̃ nax choxü̃ tacua̱xgüxü̃ca̱x. Rü ngẽmaca̱x name nax guxü̃ma i duü̃xü̃gü naxü̃tawa ĩxü̃ nax tüxü̃ nangúexẽẽxü̃ca̱x, erü choma nax guxãétüwa changexmaxü̃ rü nüxü̃ chaxuneta nax chorü orearü uruü̃gü yixĩgüxü̃ca̱x.
8 Natürü i pemax, Pa Chacherdótegüx, rü nüxna pixĩgachi i ngẽma ore i mexü̃. Rü ngẽma perü ngu̱xẽẽtaemaxã muxẽma ya duü̃xẽgü chixexü̃gu tüxü̃ peyixẽxẽ. Rü ngẽmaãcü i pemax rü ípeyatóxẽxẽ ga yema uneta ga perü o̱xigü ga Lebítanüxü̃maxã nüxü̃ chixuxü̃.
9 Rü ñu̱xma i pema rü tama chauga pexĩnüe rü naétü ñuxre i duü̃xü̃gümaxãxica pemecüma rü tama guxãma wüxigu mea tüxü̃ pengúexẽxẽ. Rü ngẽmaca̱x i choma rü pemaxã chanaxuegu nax guxü̃ma i duü̃xü̃gü rü chixexü̃maxã pexü̃ nadaunüxü̃ca̱x rü pexü̃ naxoexü̃ca̱x —ngẽma ñachagürü i chomax ya Cori ya Tupana ya Guxãétüwa ngẽxmaxe.
Tama Tupanamaxã nixaixcümagü ga Yudátanüxü̃
10 ¿Rü tama ẽ̱xna i guxãma i yixema rü wüxitama nixĩ ya Tanatü ya Tupana ya guxãxü̃ma ücü? ¿Rü tü̱xcüü̃ i pema rü tama pegümaxã pixaixcümagü ya wüxíechigü? Rü ngẽma pexüxü̃maxã nagu peyanachixexẽxẽ ga yema uneta ga Tupana perü o̱xigümaxã nüxü̃ yaxuxü̃.
11 Rü ngẽma Yudátanüxü̃ rü tama Tupanaga naxĩnüe, rü taxü̃ i chixexü̃ naxügü i Yerucharéü̃wa rü Iraéanewa. Rü yima Tupanapata ya üünene ya nüma nüxü̃ nangechaxü̃ne rü nagu nayanachixexẽẽgü, erü ngẽma yatügü i Yudátanüxü̃ rü ngexü̃gü i tupananetagüxü̃ icua̱xüü̃güxü̃maxã nixãxma̱xgü.
12 Rü nüma ya Cori ya Tupana rü chierüna nua tachixü̃anewa iyanaxoxẽẽãgu i ngẽma duü̃xü̃gü i chixexü̃ ügüxü̃, rü nüetama ega woo ta̱xacürü duü̃xü̃ yixĩxgu rü woo ãmare ngéma Tupanapatawa nangexgu.
13 Rü pema nax ngexü̃gü i tupananetaxü̃ icua̱xüü̃güxü̃maxã ixãxma̱xgüxe, rü naétü pegüxü̃etümaxã peyawaixẽxẽ i Cori ya Tupanaarü ãmarearü guruxü̃. Rü taxü̃ i perü ngechaü̃maxã pexauxe erü nüma ya Cori ya Tupana rü tama namaxã nataãxẽ i ngẽma perü ãmaregü.
14 Rü pemax rü ípecagüama rü ñaperügügü: —¿Tü̱xcüü̃ tüxna nixũgachi ya Tupana? —ñaperügügü. Rü pemaxã tá nüxü̃ chixu nax tü̱xcüü̃ nax yixĩxü̃, erü nüma ya Cori ya Tupana rü nüxü̃ nadau i ngẽma chixexü̃ i cuxüxü̃ namaxã ga yema uneta ga ngĩmaxã nüxü̃ quixuxü̃ ga yema nge ga ngĩmaxã quingĩcü ga yexguma cungextü̱xügu. Rü cumücü iyixĩ, rü nüxü̃ quixu nax ngĩmaxã tá quixaixcümaxü̃.
15 ¿Rü tama ẽ̱xna yimátama Tupana yixĩxü̃ ya naxücü i taxü̃ne rü taãxẽ? ¿Rü ta̱xacü nixĩ i pexü̃́ nanaxwa̱xexü̃ ya Tupana? Rü ngẽma pexü̃́ nanaxwa̱xexü̃ nixĩ nax noxrü yixĩgüxü̃ i ngẽma pexacügü. ¡Rü mea nüxna peda̱u̱x i perü maxü̃! Rü tama name i nüxü̃ icuyarüngüma ga yema uneta ga cuxma̱xmaxã nüxü̃ quixuxü̃ ga yexguma cungextü̱xügu ngĩmaxã cuxãxma̱xgu.
16 Rü nüma ya Cori ya Iraétanüxü̃arü Tupana ya Guxãétüwa Ngẽxmacü rü ñanagürü: —¡Nüxna peda̱u̱x i perü maxü̃! Rü tama name nax pexma̱xẽchita chixri pemaxẽxü̃. Rü choma rü tama namaxã chataãxẽ i ngẽma yatü i naxma̱xü̃ ítáxü̃ rü ngẽmaãcü nachixexẽẽxü̃ i norü maxü̃ —ñanagürü.
17 Rü pema rü perü dexamaxã marü düxwa peyapaxẽxẽ ya Tupana. Rü ngẽmaétüwa i pemax rü ípecagüama rü ñaperügügü: —¿Rü ñuxũ ñatarügügü i tomax rü ngẽmaca̱x tayapaxẽẽxü̃ nax toxü̃ naxĩnüxü̃? —ñaperügügü. Rü pema rü ñaperügügü: —Nüma ya Cori ya Tupana rü namaxã nataãxẽ i ngẽma duü̃xü̃gü i chixexü̃ ügüxü̃ rü taxũtáma nanapoxcue —ñaperügügü. ¿Tama ẽ̱xna peyaxõgü nax Tupana rü aixcümacü yixĩxü̃?
