Miqueas 1:1-16
1 Rü yexguma Yudáanearü ãẽ̱xgacügü yixĩgügu ga Yotáü̃ rü Acháx rü Echequía, rü yexguma nixĩ ga Cori ya Tupana ga Miquéa ga Moréchecüã̱xü̃ nawéaxü̃ ga yema guxchaxü̃gü ga ĩane ga Chamáriaca̱x tá ínguxü̃ rü ĩane ga Yerucharéü̃ca̱x tá ínguxü̃.
2 Rü nüma ga Miquéa rü ñanagürü: —¡Pa Guxãma i Ñaa Nachixü̃anecüã̱xgüx i Duü̃xü̃güx, rü iperüxĩnüe i ñaa ore! Rü nüma ya Cori ya Tupana rü napata ya üünenewa tá pexü̃ nixu.
3 Rü nüma ya Cori ya Tupana rü tá ngẽma ínangexmaxü̃wa ínaxũxũ, rü ma̱xpǘneétügu yaxũãcüma tá nua naxũ.
4 Rü yima nawa yangachigüne ya ma̱xpǘnegü rü tá nadexe ñoma wera i guxü̃rüxü̃, rü tá narüpüxtegü ñoma dexá i poraü̃chiüxü̃ ngategü üxü̃rüxü̃. Rü ngẽmaãcü tá nixĩ i ngẽxguma núma naxũxgu ya Tupana.
5 ¿Rü tü̱xcüü̃ pexü̃ nixugü? Rü pexü̃ nixugü erü nüma nüxü̃ nacua̱x i ngẽma chixexü̃ i pexüxü̃ rü tama naga nax pexĩnüexü̃ i pema i Acóbutaagü i Iraéanecüã̱x i Chamáriaarü ĩanewa ngẽxmagüxe. Rü ngẽxgumarüxü̃ ta nüxü̃ nacua̱x nax pema i Yudáanecüãx rü Yerucharéü̃wa tupananetachicüna̱xãgüxü̃ picua̱xüü̃güxü̃.
6 Rü ngẽmaca̱x i nüma ya Cori ya Tupana rü ñanagürü: “Yima ĩane ya Chamária rü tá nagu chapogü rü naxtapü̱xgüarü nutagü rü tá nügüétü nayi. Rü ngẽma nachica ga yima ĩane rü úbanecügüxü̃ tá nananguxuchi. Rü yima nutagü ya namaxã ínapoxegune ya yima ĩane, rü tá doxonexü̃gu nawoonemare. Rü ngẽmaãcü tá nango̱x ya yima nutagü ya naxtapü̱xarü ügü.
7 Rü guxü̃ma i ngẽma norü tupananetachicüna̱xãgü rü tá nipue. Rü guxü̃ma i ngẽma norü naigü i namaxã natupanaã̱xgüxü̃ rü tá ínagu. Rü ngẽma diẽru i ngẽma Iraétanüxü̃ norü tupananetachicüna̱xãgüxü̃ namaxã icua̱xüü̃güxü̃, rü norü uanügü rü nachixü̃anewa tá nanana nax ngéma norü tupanachicüna̱xãxgüxü̃ namaxã yacua̱xüü̃güxü̃” —ñanagürü ga Miquéa.
Miquéa rü norü ngechaü̃maxã naxaxu
8 Rü Miquéa rü ñanagürü ta: —Ngẽmaca̱x taxü̃ i chorü ngechaü̃maxã tá chaxaxu, rü ngearü chapatuã́xẽ rü ngexchiruxe tá chixũ, rü airu i dauxchitacüã̱xrüxü̃ tá chaxaxu rü ngẽma abetrúxacürüxü̃ aita tá chaxü.
9 Erü ngẽma Chamáriacüã̱xgüarü chixexü̃ rü nataxüchi rü taxúema tanamexẽxẽ. Rü yima ĩane rü tagutáma wena noxrirüxü̃ nixĩ. Rü ngẽma norü chixexü̃ rü Yudáanewa nangu rü ñu̱xmata nawa nangu ya yima ĩane ya Yerucharéü̃ i chautanüxü̃ nagu ãchiü̃ne.
10 ¡Taxṹ i Gáxarü ĩanewa nüxü̃ pixuxü̃ i ngẽma Iraétanüxü̃ tá ngupetüxü̃ rü taxṹ i pexauxexü̃! ¡Rü ĩane i Bex-reafáarü ãte̱xeanexü̃gu pegü pidixgüxü̃ nagagu i ngẽma ngúxü̃ i pingegüxü̃!
11 Pa Cháficüã̱xgüx, pema rü tá to i nachixü̃anewa pexü̃ nagagü rü ngéma ngexchirugüãcüma rü ãneãcüma tá pexü̃ nacugüe. Rü ngẽma Chaanáü̃cüã̱xgü rü taxũtáma ínachoxü̃ nax pexü̃ nangü̃xẽẽxü̃ca̱x. Rü ĩane ga Bex-échewa rü tá naxauxe i duü̃xü̃gü, natürü taxũtáma pexü̃ narüngü̃xẽxẽ.
12 Rü ngẽma Maróxcüã̱xgü i duü̃xü̃gü rü ngẽma ngúxü̃ i yangegüxü̃maxã tá nügü narüxãũxü̃gü. Rü ínanangu̱xẽẽgü nax texé nüxü̃ rüngü̃xẽẽgüxü̃ erü nüma ya Cori ya Tupana rü marü Yerucharéü̃ca̱x íxücuxü̃wa nanangugüxẽxẽ i ngẽma ĩanearü uanügü,
13 Pa Láquicüã̱xgüx, pema rü Iraétanüxü̃rüxü̃ tama Tupanaga pexĩnüexü̃. Rü pema nixĩ ga chixexü̃gu penayixẽẽxü̃ ga yema Chióü̃cüã̱xgü. ¡Ẽcü perü carugüwa penangacu i cowarugü nax paxa pibuxmüxü̃ca̱x!
14 ¡Rü wüxicana nüxü̃ ípeyarüngümae ya Moréche-gáx! Rü yima ĩane ya Achíx rü Iraéanearü ãẽ̱xgacügüarü toxyepe̱xeruxü̃ tá nixĩ —ñanagürü.
15 Rü nüma ya Cori ya Tupana rü nüxü̃ nixu rü ñanagürü: —Pema nax ĩane ya Marechágu pexãpatagüxü̃ rü wena tá pexca̱x ngéma chanamu i wüxi i ãẽ̱xgacü i pexü̃ íyauxü̃xü̃. Rü woo ngẽma Iraétanüxü̃ i poraexü̃ rü tá na̱xcha̱xwa nibuxmü rü ngẽma ãxmaxü̃ i Aduráü̃gu ãégaxü̃gu tá nicu̱xgü.
16 Rü pemax, Pa Chióü̃cüã̱xgü i duü̃xü̃gü, ¡rü pegü pidügüpü̱xüeru erü ngechaü̃wa tá pengẽxmagü nagagu i ngẽma pexacügü i poraãcü nüxü̃ pengechaxü̃güxü̃! ¡Rü pegü pidügüpü̱xüeru ñu̱xmata ẽxcharüxü̃ piba̱i̱xeru! Erü ngẽma penegü rü pexacügü rü tá to i nachixü̃anewa nanagagü —ñanagürü ya Cori ya Tupana.
