Miqueas 2:1-13
2 Rü wüxi i ngechaü̃ nixĩ naxca̱x i ngẽma duü̃xü̃gü i woo naxchiãü̃wa rü chixexü̃gu rüxĩnüexü̃. Rü ngẽxguma yangunegu rü nayanguxẽxẽ i ngẽma nagu naxĩnüexü̃ erü nadiẽruã̱xgü.
2 Rü nüxü̃́ nangúchaü̃gü i toguxearü naanegü, rü nügüxü̃́ nanayauxgü. Rü nüxü̃́ nangúchaü̃gü i toguxepatagü rü tüxna nanayauxgü. Rü chixri nanaxütanü rü ngẽmaãcü tüxna nayapu ya tümapata. Rü ngẽmaãcü tangepata rü tangeane ya yíxema norü yora tümaãcügümaxã.
3 Rü ngẽmaca̱x ya Cori ya Tupana rü ñanagürü: —Choma rü ta choxü̃́ nangẽxma i wüxi i ĩnü i perü guxchaxü̃ca̱x tá ixĩxü̃. Rü pexca̱x tá íchananguxẽxẽ i wüxi i guxchaxü̃ i taxucürüwa na̱xcha̱xwa pibuxmüxü̃. Rü ngẽmaãcü taxũtáma pegü picua̱xüü̃güãcü ipeyarüxĩĩxü̃, erü taxü̃ i guxchaxü̃ tá pexca̱x ínangu.
4 Rü ngẽma ngunexü̃gu rü perü uanügü i pexü̃ igagüxü̃ rü ngechaü̃arü wiyaegu tá pexca̱x nawiyaegü. Rü pexü̃ nacugüãcüma tá ñaãcü nawiyaegü: “Aixcümaxü̃chi taxuwama time. Rü yíxema i Cori ya Tupanaarü duü̃xü̃gü rü togü i duü̃xü̃güme̱xẽwa tangexmagü rü taxúema taétüwa tachogü. Rü ngẽma taanegü rü nügü nayanugü i ngẽma tüxü̃ igagüxü̃”, ngẽmaãcü tá nawiyaegü —ñanagürü ya Tupana.
5 —Natürü ngẽxguma nachixü̃aneca̱x nawoegu̱xgu i chorü duü̃xü̃gü rü pema i ñu̱xma diẽruã̱xgüxe rü tá pengearü naaneã̱x i natanüwa —ñanagürü ya Tupana.
Orearü uruü̃günetachiga
6 Rü pemax, Pa Orearü Uruü̃günetax, rü ñaperügügü: —Tama torü me nixĩ i tomaxã nua nüxü̃ cuyarüxu i ngẽma ore i ãũcümaxü̃chiga. Erü ngẽma guxchaxü̃ i nüxü̃ quixuxü̃ rü tagutáma towa nangu —ñaperügügü.
7 ¿Ẽ̱xna toma i Acóbutaagü nax tixĩgüxü̃ rü Tupana rü chixexü̃ tomaxã naxuegu? ¿Ẽ̱xna ya Tupana rü marü nüxü̃ narüxo nax yáxna tomaxã naxĩnüxü̃? ¿Rü ngẽmaãcü ẽ̱xna yixĩxü̃ i nacüma ya Tupana? ¿Tama ẽ̱xna i tüxü̃ nangü̃xẽxẽxü̃ i Tupanaarü ore ya yíxema aixcüma mea nagu maxẽxe?
8 Rü pemax, Pa Ãẽ̱xgacügüx, rü Tupana rü ñanagürü pexü̃: —Pema rü namaxã perüxuanü i ngẽma chorü duü̃xü̃gü. Rü yixema churaragü i daiwa ne ĩxẽ rü tataãẽgü erü nagu tarüxĩnüe rü tümapatawa rü marü taxuxü̃táma ta̱xacürü guxchaxü̃ tüxü̃ nangupetü. Natürü ngẽxguma ítangugügu rü pema rü tüxna penapu i tümachiru i mexü̃.
9 Rü pema nax ãẽ̱xgacügü pixĩgüxü̃ rü yíxema ngexegüna penapu ya yima tümapata ya nügümaxã tüxü̃́ wüxicane. Rü yíxema tümaxacügü rü nawa tüxü̃ ípewoxü̃ ya yima ĩpata i tüxna chaxãxü̃ne.
10 ¡Rü ẽcü ipechigü, Pa Ãẽ̱xgacügüx i Chixexü̃güx, rü ípechoxü̃ i nua! Rü daa ĩane rü taxũtáma nawa pengẽxmagüecha. Erü ngẽma chixexü̃ i nua pexüxü̃ rü nataxüchi, rü ngẽmaca̱x i guxü̃ma i ñaa ĩane rü tá inayarüxo.
11 Rü ngẽxguma chi ínanguxgu i wüxi i orearü uruü̃neta i doraxü̃mare ixuxü̃, rü ñaxgu: “Rü ñu̱xma rü choma rü chanaxunagü rü marü name i peyaxaxüxü̃ i bínu rü tooma i axchixügü”, ñaxgu, rü pexca̱x rü ngẽma nixĩ i wüxi i mexü̃ma i orearü uruxü̃ ixĩxü̃ —ñanagürü ya Tupana.
Tupana rü nanaxuegu nax norü duü̃xü̃güxü̃ tá ínanguxü̃xẽxẽxü̃
12 Rü nüma ya Cori ya Tupana rü ñanagürü: —Choma rü tá chanangutaque̱xexẽxẽ i guxü̃ma i Acóbutanüxü̃. Rü ñoma carnérugü i wüxiwa ingexmagüxẽẽxü̃rüxü̃ rü tá chanade i ngẽma íyaxügüxü̃ i Iraétanüxü̃ i aixcüma chauga ĩnüexü̃. Rü woo taxũtáma namu natürü ñoma namuxü̃rüxü̃ tá tagaãcüma naxãũgatanü.
13 Rü chomatama ya Cori ya Tupana ya Iraétanüxü̃arü Ãẽ̱xgacü rü nape̱xegu tá chixũ, rü tá naxca̱x chayaxümachigü nax nüxü̃́ natauxchaxü̃ca̱x nax norü uanügüarü ĩanearü ĩã̱xwa ínachoxü̃xü̃ —ñanagürü ya Cori ya Tupana.
