Miqueas 3:1-12
3 Rü choma i Miquéa rü ñachagürü: —¡Iperüxĩnüe, Pa Iraétanüxü̃arü Ãẽ̱xgacügüx! ¿Ẽ̱xna natüca̱xmamare nixĩ i nüxü̃ pecuáxü̃ i ngẽma mexü̃ rü ngẽma chixexü̃?
2 3:2-3 Pema rü naxchi pexai i ngẽma mexü̃ rü perü me nixĩ i ngẽma chixexü̃. Rü pema rü ñoma woca imáxü̃rüxü̃ pixĩgü namaxã i chorü duü̃xü̃gü. Rü pema rü ñoma woca icauxcha̱xmüxü̃rüü̃ãcü namaxã ipecua̱x. Rü peyacua̱i̱xgü rü ñoma namachi i íxraxü̃gu chexexü̃ nax imuxraxü̃rüxü̃ namaxã pechopetü i ngẽma chorü duü̃xü̃gü.
3 Nüü̃ nadau 3:2
4 Rü wüxi i ngunexü̃ rü tá nüxna pecagü ya Cori ya Tupana nax pexü̃ nangü̃xẽẽxü̃ca̱x, natürü i nüma rü taxũtáma pexü̃ nangãxü̃. Rü ngẽxguma i nüma rü tá pexcha̱xwa inicu̱x nagagu i ngẽma chixexü̃ i pexügüxü̃.
5 Rü ngẽma chorü duü̃xü̃gü rü nacüma i chixexü̃gu naxĩ nagagu i ngẽma orearü uruü̃güneta i doramaxã nangúexẽẽxü̃. Rü yíxema õna nüxna ãxe rü ngẽma orearü uruü̃güneta taãxẽ tümamaxã naxuegu. Natürü yíxema tama õna nüxna ãxe rü dai tümamaxã naxuegu.
6 Rü pemax i orearü uruü̃güneta rü chütacü rü marü taxũtáma pengo̱xetügü. Rü ngẽxguma rü marü taxũtáma nüxü̃ pecua̱x i ngẽma Tupana nagu rüxĩnüxü̃. Rü ñoma üa̱xcü rütaxuxü̃rüxü̃ tá inarütaxu nax pengo̱xetüxü̃ rü taxũtáma Tupana pexü̃ nüxü̃ nacua̱xẽxẽ i ngẽma tá ngupetüxü̃.
7 Rü ngẽma orearü uruü̃güneta, rü ngẽma yuüexü̃ rü taxũtáma nataãẽgü erü cugüruxü̃ tá nixĩgü. Rü guxü̃táma i nümagü rü tá nachianegümare i ngẽxguma tama nayauxgüãgu i Tupanaarü ngãxü̃.
8 Natürü Cori ya Tupanaãxẽ ya Üünecü rü cua̱x choxna naxã rü mexü̃ i nacüma choxna naxã rü pora choxna naxã nax tama chamuü̃xü̃ca̱x ega Iraétanüxü̃maxã nüxü̃ chixuxgu nax nataxü̃ i ngẽma norü chixexü̃gü i Tupanape̱xewa naxügüxü̃ rü naétü nax namaxã nanuexü̃.
9 ¡Iperüxĩnüe i pema i Iraéanearü Ãẽ̱xgacügüx rü pema i Iraétanüxü̃maxã icua̱xgüxe! Pema rü naxchi pexaie i ngẽma mexü̃, rü ñu̱xũchi ípeyatoxẽxẽ i ngẽma mexü̃.
10 Rü Yerucharéü̃wa rü Chióü̃wa penadai i duü̃xü̃gü rü nüxna penapu i norü naane nax nagu penaxüxü̃ca̱x ya pepatagü ya itaxü̃ne.
11 Rü daa ĩanearü guxchaxü̃arü mexẽẽruü̃gü rü ngẽma nüxü̃́ naxütanüxü̃ga nixĩ i naxĩnüexü̃. Rü ngẽma chacherdótegü rü ngẽxguma nüxü̃́ tanaxütanüguxicatama tüxü̃ nangúexẽxẽ. Rü ngẽma orearü uruü̃güneta rü ngẽxguma nüxü̃́ naxãtanüguxicatama tamaxã nüxü̃ nixu i ta̱xacü tá yixcüra naxüpetü. Rü nüxü̃ nixu nax Tupanaégagu yixĩxü̃ nax yadexagüxü̃, rü ñanagürügü: “Cori ya Tupana rü nataxü̃tagu rü taxuxü̃táma i chixexü̃ tüxü̃ nangupetü”, ñanagürügü.
12 Pa Ãẽ̱xgacügüx, pegagu rü yima ma̱xpǘne ya Chióü̃ rü wüxi i naane i ngẽxma maxẽmaxã rüxümarexü̃ tá nixĩ. Rü yima ĩane ya Yerucharéü̃ rü naxtapü̱xgüxica tá ngẽxma naxãũxchita —ñanagürü.
