Miqueas 4:1-13
4 Rü ngẽma nawa iyacuáxü̃ i ngunexü̃gügu rü tá nawa nangu nax yima ma̱xpǘne ya Tupanapata ya taxü̃ne nagu üxü̃ne rü tá guxü̃nema ya naigü ya ma̱xpǘnegüarü yexera natachiga. Erü ngéma Tupanapatawa tá naxĩ i guxü̃ma i nachixü̃anecüã̱xgü i duü̃xü̃gü nax nüxü̃ yacua̱xüü̃güxü̃ca̱x.
2 Rü muxũchixü̃tama i duü̃xü̃gü tá ngéma nangugü rü ñanagürügü tá: —¡Nua pexĩ rü ngĩxã daa ma̱xpǘnewa dauxü̃ taxĩgü nax nawa ingugüxü̃ca̱x ya yima Acóbutanüxü̃arü Tupanapata ya taxü̃ne nax nüma tüxü̃ nangúexẽẽxü̃ca̱x i ngẽma mexü̃ i nacüma nax ngẽmagu ixĩxü̃ca̱x! —ñanagürügü tá. Erü daa ma̱xpǘne ya Chióü̃wa tá nixĩ ya Cori ya Tupana i tüxü̃ nangúexẽxẽxü̃. Rü Yerucharéü̃wa tá nixĩ i ne naxũxü̃ i norü ore.
3 Rü nüma ya Cori ya Tupana tá nixĩ i namexẽxẽãxü̃ i nachixü̃anegüarü guxchaxü̃gü rü woo i ngẽma nachixü̃anegü i yáxü̃wa ngẽxmagüxü̃arü guxchaxü̃gü. Rü ngẽma duü̃xü̃gü rü aiegumüaneruxü̃ tá nayaxĩgüxẽxẽ i norü taragü, rü yima norü wocaxegü, rü tríguarü buxruxü̃ tá nayaxĩgüxẽxẽ. Rü taxuxü̃táma to i nachixü̃ane rü wena naxãxnegü nax togümaxã nügü nada̱i̱xü̃ca̱x rü taxúetama texé tanangúexẽxẽ i daixchiga.
4 Rü guxãtáma taxũtáma muü̃eãcü tamaxẽ. Rü wüxíechigü rü tá tümaarü úbapechitagu, rü tümaarü igunecüpechitagu tarüngü̃. Rü ñaa ore rü noxrütama nixĩ ya yimá Cori ya Tupana ya Guxãétüwa Ngẽxmacü.
5 Rü ngẽma togü i nachixü̃anecüã̱x i duü̃xü̃gü rü noxrütama tupanagüga naxĩnüe, natürü i yixema rü guxü̃gutáma naga taxĩnüe ya yimá tórü Cori ya Tupana.
Tupana tá ínananguxü̃xẽxẽ i norü duü̃xü̃gü
6 Rü nüma ya Cori ya Tupana rü ñanagürü: —Yixcüra rü tá nachixü̃aneca̱x chanawoeguxẽxẽ i ngẽma chorü duü̃xü̃gü i Iraétanüxü̃gü. Rü wüxiwa tá chanangexmagüxẽxẽ i ngẽma noxri to ga nachixü̃anegu woonexü̃ rü turaexü̃ rü ipaexü̃.
7 Rü ngẽma Iraétanüxü̃gü i to i nachixü̃anewa woeguxü̃ rü ngẽma Yerucharéü̃wa yaxǘgüxü̃maxã tá wena ichanachixẽxẽ i wüxi i nachixü̃ane i poraxü̃. Rü choma ya Tupana rü yima ma̱xpǘne ya Chióü̃wa guxü̃gutáma namaxã ichacua̱x i ngẽma chorü duü̃xü̃gü.
8 Rü cumax, Pa Yerucharéü̃ i Iraétanüxü̃arü Poxü̃chicaxü̃ Ixĩxẽ i Ma̱xpǘne ya Chióü̃wa, rü wena táxarü guxü̃ i togü i Iraéanearü ĩanegüétüwa cungexma. Rü cuwa tá nixĩ i nangẽxmaxü̃ i ñaa nachixü̃anearü ãẽ̱xgacü —ñanagürü ya Tupana.
Iraétanüxü̃ rü Babiróniaanewa tá nagagü
9 Natürü i ñu̱xma, Pa Yerucharéü̃x, ¿rü ta̱xacüca̱x ñoma wüxi ya ngexe ya íxraxacüchaü̃xerüxü̃ aita cuxü? ¿Ẽ̱xna aixta cuxü erü cuwa rü marü nataxuma i curü ãẽ̱xgacü? ¿Ẽ̱xna marü nayu i ngẽma curü ucu̱xẽruxü̃?
10 Pa Ĩane ya Chióü̃x, ¡ínaxã̱ũ̱xcüta rü aita naxü ñoma wüxi ya ngexe ya íxraxacüchaü̃xerüxü̃! Erü ngẽma curü duü̃xü̃gü rü cuwa tá ínachoxü̃ rü ngürüanegumare yapexü̃tanüãcü tá Babiróniawa nangugü. Natürü wüxi i ngunexü̃ rü nüma ya Cori ya Tupana rü tá ngéma norü uanügüme̱xẽwa ínananguxü̃xẽxẽ i curü duü̃xü̃gü.
11 Ñu̱xma rü marü muxü̃ i nachixü̃anecüã̱xgü cuxca̱x nügü nanutaque̱xegü rü ñanagürügü: —Rü tá tataãxẽgü i ngẽxguma nüxü̃ idaugügu nax guxchaxü̃gu nanguxü̃ i Yerucharéü̃ —ñanagürügü.
12 Natürü ngẽma nachixü̃anecüã̱xgü rü tama nüxü̃ nacua̱xgü i ngẽma Tupanaarü ĩnü, rü ñu̱xũchi ngẽma naãẽwa nagu naxĩnüxü̃. Rü tama nüxü̃ nacua̱xgü nax nüma ya Cori ya Tupana rü ñoma trigune ínapogüãxü̃gu nutaque̱xexü̃rüxü̃ tá wüxigu nananutaque̱xe i ngẽma nachixü̃anecüã̱xgü nax napoxcueãxü̃ca̱x.
13 ¡Inachi rü nadai, Pa Ĩane ya Chióü̃x! Erü choma ya Cori ya Tupana rü ñachagürü: —Choma rü tá cuxna chanaxã i pora nax ñoma wüxi i woca i yatüxü̃ i fierumaxã ãxchata̱xcurexü̃ rü bróũchemaxã ixãpatüxü̃rüxü̃ cunada̱i̱xü̃ca̱x i muxü̃ma i duü̃xü̃gü. Cuma rü tá nüxna cunapuxü̃ i ngẽma norü ngẽmaxü̃gü i chixexü̃wa nayauxgüxü̃, rü ñu̱xũchi tá choxna cunana i choma nax guxü̃ i naanemaxã ichacuáxü̃ —ñachagürü i choma ya Cori ya Tupana.
