Miqueas 6:1-16
6 ¡Nüxü̃ pexĩnüe i ngẽma ñu̱xma Cori ya Tupana nüxü̃ ixuxü̃ i ñaxü̃: —Inachi rü ma̱xpǘnegümaxã nüxü̃ ixu i ngẽma curü guxchaxü̃gü nax yima ma̱xpǘnegü nüxü̃ ĩnüexü̃ca̱x i ngẽma cuga! —ñaxü̃.
2 Rü pema, Pa Ma̱xpǘnegü ya Taxü̃ne rü Íxrane, ¡iperüxĩnüe! Erü Cori ya Tupana rü pepe̱xewa tá nüxü̃ nixu i norü duü̃xü̃gü i Iraétanüxü̃arü chixexü̃.
3 Rü nüma ya Cori ya Tupana rü ñanagürü: —¡Choxü̃ pengãxü̃, Pa Chorü Duü̃xü̃güx! ¿Ta̱xacürü chixexü̃ pepe̱xewa chaxü? ¿Ẽ̱xna ta̱xacüwa pexü̃ chachixewex?
4 Rü choma nixĩ ga Equítuanewa pexü̃ íchagaxü̃xü̃ rü yema duü̃xü̃güme̱xẽwa pexü̃ íchanguxü̃xẽẽxü̃. Rü choma nixĩ ga petanüwa chamugüxü̃ ga Moiché, rü Aróü̃, rü María nax pemaxã inacua̱xgüxü̃ca̱x.
5 ¡Pa Chorü Duü̃xü̃güx, nüxna pecua̱xãchie i ngẽma Baláx ga Moáarü ãẽ̱xgacü nagu rüxĩnüxü̃, rü ñu̱xũchi yema norü ngãxü̃ ga Balaáü̃ ga Beúx nane nüxna ãxü̃! Rü yexguma Chitíü̃wa pengugügu nax Guirigáwaama pexĩxü̃ca̱x, rü choma nixĩ ga pora pexna chaxãxü̃ nax nüxü̃ perüporamaegüxü̃ca̱x ga perü uanügü —ñanagürü ya Tupana.
Ngẽma Cori ya Tupana duü̃xü̃güaxü̃́ naxwa̱xexü̃
6 ¿Rü ta̱xacümaxã tá nüxü̃ chayarücua̱xüxü̃ ya yimá Cori ya Tupana ya daxũcüã̱x? ¿Ẽ̱xna wocaxacügü i wüxi ya taunecü nüxü̃́ ngẽxmagüxü̃ tá naxca̱x íchaguxü̃ nax ngẽmamaxã nüxü̃ chicua̱xüü̃xü̃ca̱x?
7 ¿Rü tá nataãẽxü̃ ya Cori ya Tupana ega ngẽxguma 1,000 i carnérugü naxca̱x íchaguxgu rüe̱xna 10,000 natügü i chíxü̃ naxca̱x chiguxgu? ¿Rü tá nataãẽxü̃ ega ngẽxguma chorü chixexü̃gagu naxca̱x chayaguxgu ya yimá chaune ya yacü?
8 Rü nüma ya Cori ya Tupana rü marü cumaxã nüxü̃ nixu, Pa Duü̃xü̃x, i ta̱xacü nixĩ i nape̱xewa mexü̃ rü ta̱xacü nixĩ i ngẽma cuxü̃́ nanaxwa̱xexü̃. Rü ngẽma cuxü̃́ nanaxwa̱xexü̃ nixĩ nax mexü̃ cuxüxü̃ rü quixaixcümaxü̃ rü curü Tupanaga nax cuxĩnüxü̃ rü tama cugü quicua̱xüxü̃.
Tupana tá nanapoxcue i duü̃xü̃gü naxca̱x i norü chixexü̃
9 6:9-10 Rü nüma ya Cori ya Tupana rü naxca̱x naca i Yerucharéü̃cüã̱xgü. Rü ngẽma duü̃xü̃gü i naãẽxü̃ cuáxü̃ nixĩ i aixcüma naga ĩnüexü̃. Rü nüma rü ñanagürü: —¡Iperüxĩnüe, Pa Yerucharéü̃cüã̱xgü rü yima ĩanearü ucu̱xẽruxü̃gü! Rü ngẽma duü̃xü̃gü i chixexü̃gu maxẽxü̃patawa nangẽxma i ngẽmaxü̃gü i chixexü̃wa nayaxuxü̃. Rü ngéma nangẽxma i norü yáruxü̃ i chixexü̃ i naxchi chaxaixü̃.
10 Nüü̃ nadau 6:9
11 ¿Rü ñuxãcü tá nüxü̃ changechaü̃xü̃ i ngẽma ngĩ́xwa̱xexü̃ i yáruü̃maxã puracüxü̃?
12 Rü ngẽma diẽruã̱xgüxü̃ i daa ĩanegu ãpatagüxü̃ rü poraãcü duẽxẽgüxü̃́ nangĩ́e. Rü guxü̃ma i daa ĩanewa maxẽxü̃ rü dorata̱xaxgüxü̃ rü womüxẽẽwa̱xegüxü̃ nixĩgü.
13 Rü ngẽmaca̱x tá pexü̃ chapoxcue, rü ngẽma perü chixexü̃gagu tá pexü̃ chadai.
14 Rü tá pechibüe natürü taxũtáma pengãxcharaü̃gü rü tá petaiyaama. Rü perü õnagü tá pede, natürü taxuwatáma pexü̃́ name i ngẽma. Rü woo íxraxü̃maxã penguxü̃gu rü daiwa tá pexna chanapuxü̃xẽxẽ.
15 Rü tá petoe, natürü taxũtáma penabuxu i norü o. Rü tá penawaxi i ngẽma oribugü, natürü taxũtáma pexca̱x nixĩ i norü chíxü̃. Rü tá penama̱i̱xtüxü̃ i ngẽma úbagü, natürü taxũtáma peyaxaxgü i norü bínu.
16 Erü nagu pexĩ ga yema mugü rü nacümagü ga chixexü̃ ga nagu naxĩxü̃ ga ãẽ̱xgacügü ga Omrí rü Acáxtanüxü̃. Rü pema rü yema nümagü namaxẽxü̃ãcütama pemaxẽ. Rü ngẽmaca̱x, Pa Yerucharéü̃x, rü choma rü tá curü uanügüna cuxü̃ chaxã nax cugu napogüexü̃ca̱x. Rü ngẽma curü duü̃xü̃gü rü togü tá nüxü̃ nacugüe rü ãne tá ningegü —ñanagürü.
