Miqueas 7:1-20
7 Rü choma i Miquéa rü ñoma ngẽma nanetügüarü buxgüwena nanetü tayadauxü̃rüxü̃ chixĩ. Rü taxuxü̃ma ichayangau i úbagü rü igugü i changṍxchaü̃chiréxü̃.
2 Rü ñoma i naanewa rü marü nataxuma i duü̃xü̃gü i mexü̃gu rüxĩnüexü̃ rü Tupanamaxã ixaixcümagüxü̃. Rü wüxichigü rü naxca̱x nadau nax ñuxãcü guxchaxü̃ togueca̱x naxüxü̃. Rü ngẽxguma guxchaxü̃ ngẽxmagu, rü guxü̃ma rü ínamemare nax nügü nada̱i̱xü̃.
3 Rü nümagü rü nüxü̃ nicua̱xüchi nax naxügüãxü̃ i guxchaxü̃gü. Rü ngẽma ãẽ̱xgacügü rü naxca̱x ínacagü nax nüxü̃́ naxütanügüãxü̃. Rü ãẽ̱xgacügü i guxchaxü̃arü mexẽẽruü̃gü rü ngẽma nüxü̃́ naxütanüxü̃étüwaama naxü. Rü ngẽma diẽruã̱xü̃chixü̃ rü nanaxügü i ngẽma nagu naxĩnüexü̃ rü ngẽmaãcü nanachixexẽxẽ ya ĩane.
4 Rü ngẽmatanüwa rü ngẽma rümemaexü̃ rü ñoma wüxi i tuxurüxü̃ nixĩ. Rü ngẽma yexera mecümaxü̃ rü ñoma wüxi i chuxchuxü̃etarüxü̃ nixĩ. Natürü tá ínangu i ngunexü̃ i nagu Tupana tá norü chixexü̃ca̱x nüxna ca̱xü̃. Rü ngẽma ngunexü̃gu rü taxũtáma nüxü̃ nacua̱xgü nax ta̱xacü tá naxüexü̃.
5 ¡Rü taxṹ i ngẽma curü ngaicamagu pexü̃ i duü̃xü̃axü̃́ cuyaxõxü̃, rü taxṹ i cumücügu cuyaxõxü̃! ¡Rü cugüna nadau i ngẽxguma cuxma̱xmaxã quidexagu!
6 Rü ngẽma nanegü rü tauxü̃táma nanatüga naxĩnüe, rü ngẽma ingexü̃ i naxacügü rü naémaxã tá nanue. Rü ngẽma naneã̱xgü rü na̱xẽgüchi tá naxai. Rü ngẽma tümaarü uanü ixĩgüxü̃ rü tümatanüxü̃tama nixĩgü.
Tupana rü tüxü̃ narüngü̃xẽxẽ
7 Natürü i chomax rü Cori ya Tupanaaxü̃́ tá chayaxõõma. Rü tá nüxü̃́ chayaxõ ya yimá Tupana ya chorü poxü̃ruxü̃ ixĩcü. Rü nüma rü tá choxü̃ naxĩnü.
8 Pa Chorü Uanüx ¡taxṹ i cutaãxẽxü̃ nax guxchaxü̃ choxü̃ ngupetüxü̃! Erü woo ichayanguxgu, natürü wena táxarü ícharüdaama. Rü woo ẽanexü̃wa changexmagu i ñu̱xmax, rü nümatama ya Cori ya Tupana rü chorü omü nixĩ.
9 Rü aixcüma chixexü̃ chaxü Cori ya Tupanape̱xewa, rü ngẽmaca̱x ñu̱xma nax choxü̃ napoxcuxü̃ rü tá yáxna namaxã chaxĩnü. Rü nüma rü tá choxü̃ ínapoxü̃ nüxna i chorü uanü, rü tá nanapoxcu naxca̱x i ngẽma chixexü̃ i chope̱xewa naxüxü̃. Rü nüma ya Tupana rü tá ẽanexü̃wa choxü̃ ínanguxuchixẽxẽ rü ngóonexü̃wa tá choxü̃ naga. Rü tá choxü̃ nanawe̱x nax ñuxãcü tá chorü uanüxü̃ choxü̃ naporamaexẽẽxü̃.
10 Rü ñu̱xũchi nüma i ngẽma chorü uanü rü tá nüxü̃ nadau i ñuxãcü Tupana choxü̃ rüngü̃xẽẽxü̃ rü ngẽmaca̱x tá poraãcü naxãnee. Rü nüma i ngẽma chorü uanü rü choxü̃ ñanagürüchire̱x: —¿Ngexcü nixĩ ya yimá curü Cori ya Tupana? —ñanagürüchire̱x. Natürü wüxi i ngunexü̃ rü tá chataãxẽ i ngẽxguma nüxü̃ chada̱u̱xgu nax nagu napúgüxü̃ i chorü uanü ñoma namaarü ãcharaxü̃gu napúgüxü̃rüxü̃.
11 Pa Yerucharéü̃x, marü ínanguchaü̃ i ngẽma ngunexü̃ i nagu tá namexẽẽxü̃ i curü poxeguxü̃, rü nagu tá nüxü̃ natanetaxü̃ i ngẽma curü üyeanegü.
12 Marü tá nawa nangu i ngẽma ngunexü̃ i nagu cuwa tá naxĩxü̃ i guxü̃táma i nachixü̃anecüã̱xgü. Rü Achíriaanewa rü ñu̱xmata Equítuanewa tá ne naxĩ nax cuwa naxĩxü̃. Rü natü i Níruwa rü ñu̱xmata natü ya Eufrátewa tá ne naxĩ nax cuwa naxĩxü̃. Rü guxü̃ma i márpechinüwa tá ne naxĩ rü guxü̃nema ya ma̱xpǘneanegüwa tá ne naxĩ nax cuwa naxĩxü̃ca̱x.
13 Rü ngẽma togüarü naanegü rü chianexü̃ tá nananguxuchi nagagu i ngẽma norü duü̃xü̃güarü chixexü̃gü.
14 ¡Pa Cori ya Tupanax, curü naixmena̱xãmaxã nüxna nadau i ngẽma curü duü̃xü̃gü i curü carnérugü ixĩgüxü̃! Ñu̱xma rü nüxicatama naixnecüwa nangẽxmagü i naane i mexü̃wa. ¡Ẽcü ü̃parüxü̃ Bacháü̃anewa rü Garaáxanewa nagagü i ngextá õna íngẽxmaxü̃wa!
15 Rü nüma ya Cori ya Tupana rü ñanagürü: —Choma rü tá ichanawe̱x i taxü̃ i mexü̃ i chorü poramaxã chaxüxü̃ yexguma Equítuanewa pexü̃ íchanguxü̃xẽẽgurüxü̃ —ñanagürü.
16 Rü ngẽmaãcü i ngẽma togü i nachixü̃anegüarü duü̃xü̃gü rü tá nüxü̃ nadaugü i ngẽma taxü̃ i mexü̃gü i curü poramaxã cuxüxü̃. Rü ngẽxguma i nümagü rü tá cupe̱xewa naxãnee rü tá nangea̱xgümare rü tá nügü narüdütamachi̱xẽgü.
17 Rü ngẽma duü̃xü̃gü rü ñoma ãxtaperüxü̃ waixü̃müte̱xe tá nadexgü, ngẽma togü i waixü̃mügu nügü itúgüxü̃rüxü̃. Rü ngẽma íyacu̱xgüxü̃wa tá ínachoxü̃ rü norü muü̃maxã tá cuxca̱x naxĩ, Pa Cori, Pa Torü Tupanax.
Cori ya Tupana rü norü duü̃xü̃güaxü̃́ nüxü̃ narüngüma i norü chixexü̃gü
18 Rü nataxuma i to ya Tupana i curüxü̃ ixĩxü̃, erü cuma rü nüxü̃́ nüxü̃ curüngü̃ma i ngẽma norü chixexü̃gü, rü tama nagu curüxĩnüecha i ngẽma chixexü̃gü i cupe̱xewa naxügüxü̃ i ngẽma noxre i curü duü̃xü̃ i íyaxügüxü̃. Cuma rü toxü̃ cunawe̱x i curü ngechaü̃, rü tama guxü̃guma tomaxã cunuecha.
19 ¡Ẽcü wena cuxü̃́ tangechaü̃tümüü̃gü rü toxü̃́ iyanaxoxẽxẽ i ngẽma torü chixexü̃gü! ¡Ẽcü mártamawa yatáe i ngẽma torü pecadugü!
20 ¡Pa Corix, ẽcü guxü̃guma toxü̃ rüngü̃xẽxẽ rü toxü̃ nangechaxü̃ yema torü o̱xigü ga Abraáü̃maxã rü Acóbumaxã cunaxueguxü̃rüxü̃!
