Números 11:1-35
11 Wüxi ga ngunexü̃gu ga Iraétanüxü̃ rü Cori ya Tupanamaxã nanue rü narüxutagagü naxca̱x ga yema ngúxü̃ ga yangegüxü̃. Rü yemaxü̃ nax naxĩnüxü̃ ga Cori ya Tupana rü nanu. Rü Iraétanüxü̃ ípegüxü̃pechinügu nananguxẽxẽ ga üxüema. Rü ñuxre ga ĩpatagü ga napechinüwa ügüne rü nixae.
2 Rü yema Iraétanüxü̃ rü aita naxüe rü Moichéna ngü̃xẽẽca̱x nacagü. Rü nüma ga Moiché rü Cori ya Tupanana ngü̃xẽẽca̱x naca. Rü yexguma nixo ga üxüema.
3 Rü yemaca̱x ga yema nachica rü Taberá nixĩ ga naéga, yerü yema nachicawa nixĩ ga Cori ya Tupana ga Iraétanüxü̃ca̱x üxüxema ínanguxẽẽxü̃.
4 Rü yema Iraétanüxü̃tanüwa nayexmagü ga togü ga duü̃xü̃gü ga chibüguxicatama rüxĩnüexü̃. Rü yema duü̃xü̃gü nixĩ ga nüxna cua̱xãchiexü̃ ga yema õna ga Equítuanewa nangõ̱xgüxü̃. Rü nüma ga Iraétanüxü̃ rü düxwa yemaga naxĩnüe rü yemaca̱x nidexagü rü ñanagürügü: —Chierüx tüxü̃́ nangẽxmagu i namachi nax nangṍxü̃ca̱x.
5 Rü ñuxãcü nüxna tacua̱xãchie ga yema choxni ga chíxü̃ ga ngetanüãcüma ingõ̱xgüxü̃ ga Equítuanewa. Rü ngẽxgumarüxü̃ ta nüxna tacua̱xãchie ga ñuxãcü nangṍxü̃ ga pepínugü, rü meráũgü, rü chabúragü rü méxẽgü.
6 Natürü i ñu̱xma rü taiyamaxã nua tayuechaü̃, erü nataxuma i to i ta̱xacü i nüxü̃ idauxü̃ rü manáxicatama —ñanagürügü.
7 Rü yema maná rü nanachicúrichireraxü̃ rü nadexra ñoma ta̱xacü i dexragüxü̃rüxü̃.
8 Rü nüma ga duü̃xü̃gü rü nanade ga yema maná ga dauxü̃wa rüyixixü̃. Rü ñu̱xũchi nayacamügü rü nanamuxragü rü ñu̱xũchi nayaxütachinü. Rü yema maná rü ñoma chíxü̃wa ínaguxü̃rüxü̃ nixĩ ga naaca.
9 Rü chütacü ga yexguma nanguxgu ga cherena ga yema ínapegüxü̃étügu, rü yexguma ta nixĩ ga nayixü̃ ga maná.
10 Rü nüma ga Moiché rü nüxü̃ naxĩnü ga Iraétanüxü̃ ga naã̱xpatawachigü nax yema õnaca̱x yadexagüxü̃. Rü nüma ga Cori ya Tupana rü yemaca̱x poraãcü nanu rü yexgumarüxü̃ ta ga Moiché.
11 Rü nüma ga Moiché rü Tupanaxü̃ ñanagürü: —Choma nax curü duü̃xü̃chire̱x chixĩxü̃ ¿rü ta̱xacüca̱x tama chomaxã cutaãxẽ rü ngẽmaca̱x chauxchiama choxü̃ cunangenagüxẽxẽ i ñaa duü̃xü̃güarü guxchaxü̃gü?
12 ¿Ẽ̱xna chauxacügü nixĩgü rü ngẽmaca̱x choxü̃ cumuxü̃ nax ñoma õxchanagürüxü̃ chayagagüxü̃ i nawa i ngẽma naane ga nũxcüma torü o̱xigümaxã nüxü̃ quixuxü̃?
13 ¿Rü ngextá tá namachi choxü̃ ta iyangauxü̃ nax chanachibüexẽẽxü̃ca̱x i guxü̃ma i ñaa duü̃xü̃gü? Rü auxeãcüma nixĩ i choxü̃ yaca̱a̱xü̃güechaxü̃ rü ñagüxü̃ choxü̃: “¡Rü torü ngõ̱xruxü̃ i namachi toxna ta naxã!” ñagüxü̃.
14 Rü choma rü marü tama choxü̃́ natauxcha nax chaxica namaxã ichacuáxü̃ i ñaa duü̃xü̃gü. Erü ngẽma puracü rü nata rü ngẽmaca̱x taxucürüwa chaxica chanaxü.
15 Rü ngẽxguma tá ngẽmaãcü chomaxã quixĩxgu ¡rü noxtacüma choxna nayaxu i ñaa chorü maxü̃, ega choxü̃ cungechaü̃gu! Rü ngẽmaãcü marü taxũtáma chauxchiama chanangenagü i ñaa duü̃xü̃güarü guxchaxü̃gü —ñanagürü ga Moiché.
16 Natürü nüma ga Cori ya Tupana rü Moichéxü̃ nangãxü̃ rü ñanagürü: —¡Ẽcü nanutaque̱xe i 70 i norü ãẽ̱xgacügü i Iraétanüxü̃ i duü̃xü̃gü naga ĩnüexü̃, rü chopatawa nagagü! ¡Rü ngéma choxü̃ namaxã yarüngu̱xẽxẽ!
17 Rü choma rü tá ngẽxma ícharüxĩ, rü ngéma tá cumaxã chidexa. Rü tá ngẽma ãẽ̱xgacügüna chanaxã i ngẽma Chauãxẽ i cuwa ngẽxmaxü̃ nax nümagü cuxü̃ nangü̃xẽẽgüxü̃ca̱x nax namaxã inacua̱xgüxü̃ i ñaa duü̃xü̃gü. Rü ngẽxguma rü marü taxũtáma cuxica namaxã icucua̱x.
18 ¡Rü ñu̱xũchi namaxã nüxü̃ ixu i duü̃xü̃gü nax nügü yamexẽẽgüxü̃ca̱x naxca̱x i moxü̃arü ngunexü̃, rü ngẽmaãcü tá nixĩ i namachi tá nangõ̱xgüxü̃! Erü marü nüxü̃ chaxĩnü nax auxeãcüma ñagüxü̃: “¿Ñuxcü ngexü̃ yixĩ i namachi nax nangṍxü̃ca̱x? Rü yexguma Equítuanewa iyexmagügu rü narümemae”, ñanagürügü. Rü marü name rü choma tá namachi nüxna chaxã nax nangõ̱xgüãxü̃ca̱x.
19 Rü taxũtáma wüxitama i ngunexü̃ nanangõ̱xgü rü bai i taxre, rü bai i 5, rü bai i 10, rü bai i 20 i ngunexü̃guxicatama tá nanangõ̱xgü.
20 Rü wüxi ya tauemacüxüchi tá nixĩ i namachi nangõ̱xgüxü̃ ñu̱xmatáta naemamaxã yangü̃ãtanücüxü rü nawa naxoegagü erü choxü̃ naxoe i chomax i Cori ya Tupana nax natanüwa changexmaxü̃. Rü naxauxeãcüma chope̱xewa ñanagürügü: “¿Rü ta̱xacüca̱x ga Equítuanewa íchoxü̃xü̃?” ñanagürügü —ñanagürü ga Cori ya Tupana.
21 Rü yexguma ga Moiché rü Tupanaxü̃ nangãxü̃ rü ñanagürü: —Rü ngẽma duü̃xü̃gü i chowe rüxĩxü̃ rü 600,000 i yatügü nixĩgü. ¿Rü ñuxãcü nüxü̃ quixuxü̃ rü wüxi ya tauemacü tá nixĩ i namachi toxü̃ cungõ̱xẽxẽxü̃?
22 ¿Rü ngextá nangema i ngẽma muxü̃ i carnérugü rü wocagü nax ngẽma tadaixü̃ca̱x rü guxaxü̃́ yangumachixü̃ca̱x? Rü woo chi guxü̃ma i choxni i taxü̃ i márcüã̱x nüxna ixãxgu rü taxũchima nüxü̃́ ningu —ñanagürü.
23 Natürü nüma ga Cori ya Tupana rü nanangãxü̃ rü ñanagürü: —¿Cuma nagu curüxĩnügu i ngẽma chorü pora rü naxíraxü̃? Rü ñu̱xma tá nüxü̃ cudau nax aixcüma tá yanguxü̃ i ngẽma nüxü̃ chixuxü̃ —ñanagürü.
70 ga yaxguã̱xgü rü orearü uruü̃güãcü nidexagü
24 Rü nüma ga Moiché rü ínaxũxũ rü duü̃xü̃gümaxã nüxü̃ nixu ga yema Cori ya Tupana namaxã nüxü̃ ixuxü̃. Rü Iraétanüxü̃tanüwa nanangutaque̱xexẽxẽ ga 70 ga ãẽ̱xgacügü ga yaxguã̱xgü rü Tupanapatagu ínanachimaeguãchixẽxẽ.
25 Rü yexguma ga nüma ga Cori ya Tupana rü yema caixanexü̃gu ínarüxĩ rü Moichémaxã nidexa. Rü ñu̱xũchi yema Moichéwa yexmaxü̃ ga Naãxẽ ya Üünexü̃ rü yematama Naãxẽ nixĩ ga Tupana nüxna ningu̱xẽẽchigüxü̃ ga yema 70 ga yaxguã̱xgü. Rü yexguma yema 70 ga yaxguã̱xgüna yanguxchigügu ga Naãxẽ ya Üünexü̃ rü inanaxügüe nax yadexagüxü̃ ñoma Tupanaarü orearü uruü̃gürüxü̃. Natürü ga yema rü taguma wena yemaacü namaxã nangupetü ga yema yaxguã̱xgü.
26 Rü yema 70 ga yaxguã̱xgü ga nüxü̃ naxunetagüxü̃tanüwa rü taxre rü tama yéma Moichéxü̃tawa naxĩ rü duü̃xü̃gütanügu narücho. Rü wüxi rü Edáx nixĩ ga naéga, rü yema to rü Medáx nixĩ ga naéga. Natürü yema taxre rü ta nüxna nangu ga yema Naãxẽ ya Üünexü̃. Rü yéma duü̃xü̃gütanüwa inanaxügüe nax yadexagüxü̃ ñoma Tupanaarü orearü uruü̃gürüxü̃.
27 Rü yexguma ga wüxi ga ngextü̱xücü rü Moichéxü̃tawa naña rü namaxã nüxü̃ nayarüxu rü ñanagürü: —Edáx rü Medáx rü orearü uruü̃gürüxü̃ inidexagü i yea duü̃xü̃gü ípegüxü̃wa —ñanagürü.
28 Rü yexguma ga Yochué ga Núü̃ nane ga norü ngextü̱xücürüwa Moichéarü ngü̃xẽẽruxü̃ ixĩcü rü Moichéxü̃ ñanagürü: —¡Pa Chorü Corix, Pa Moichéx, nüxna nachu̱xu i ngẽma taxre nax tama ñoma Tupanaarü orearü uruü̃gürüxü̃ yadexagüxü̃ca̱x! —ñanagürü.
29 Natürü nüma ga Moiché rü nanangãxü̃ rü ñanagürü: —¿Ẽ̱xna choxü̃ quinuxü̃? ¡Chierüx nüma ya Cori ya Tupana rü guxü̃ma i duü̃xü̃güna nangu̱xẽẽãgu i ngẽma Naãxẽ nax ngẽmaãcü guxü̃ma i duü̃xü̃gü Tupanaarü orearü uruü̃gü yaxĩgüxü̃ca̱x! —ñanagürü.
30 Rü yexguma nüma ga Moiché rü ñu̱xũchi yema Iraétanüxü̃arü yaxguã̱xgü rü duü̃xü̃gü ípegüxü̃wa naxĩ.
Cori ya Tupana rü Iraétanüxü̃ca̱x ínanangugüxẽxẽ ga ngugagü
31 Rü nüma ga Cori ya Tupana rü ínananguxẽxẽ ga wüxi ga tacü ga buanecü ga márwa ne buemacü. Rü gumaemagu ínangugü ga muxũchixü̃ ga ngugagü rü yema ínapegüxü̃gu nayi rü namaxã naxãanemare ñu̱xmata wüxi i ngunexü̃ itixũ ga nax namaxã naxãanemarexü̃. Rü wüxi ga metruwa nangu ga norü yaxcü ga nügüétügu nax nayixü̃.
32 Rü guxü̃ma ga yema ngunexü̃gu, rü guxü̃ma ga yema chütaxü̃gu rü moxü̃ãcüarü ngunexü̃gu rü nüma ga duü̃xü̃gü rü nanade ga yema ngugagü. Rü guxema noxremaexü̃ dexe rü 10 chita tüxü̃́ nayexma. Rü yema duü̃xü̃gü rü yema ínayexmagüxü̃ã̱xtügu nayapagü.
33 Natürü yexguma yexwacax nüxü̃ nangõ̱xnetagügu ga namachi ga yema ngugagü, rü nüma ga Cori ya Tupana rü duü̃xü̃gümaxã nanu, rü nanayuexẽxẽ ga muxü̃ma.
34 Rü yemaca̱x nixĩ ga Quibúx-ataabámaxã naxüégagüãxü̃, yerü yexma nixĩ ga nata̱xgüxü̃ ga yema duü̃xü̃gü ga namachigu rüxĩnüexü̃.
35 Rü Quibúx-ataabáwa inaxĩãchi ga Iraétanüxü̃ rü Acheróxwa nangugü. Rü yéma nayexmagü ga ñuxre ga ngunexü̃gü.
