Números 14:1-45
14 Rü yexguma yema ngugütaewa ne ĩxü̃arü orexü̃ naxĩnüegu ga yema Iraétanüxü̃ rü aita naxüe, rü yema chütaxü̃ rü axugu ningunexü̃gü.
2 Rü guxü̃ma ga nümagü rü chixri Moichéchigagu rü Aróü̃chigagu nidexagü, rü ñanagürügü: —Narümemae chi nixĩ ga Equítuanegu nax iyuexü̃ rüe̱xna nuxã ínachianexü̃gu nax iyuexü̃.
3 ¿Rü ta̱xacüwa ya Cori ya Tupana i ngẽma nachixü̃anewa tüxü̃ nagagüxü̃ nax ngẽxma daigu iyuexü̃ca̱x, rü taxma̱xgü rü taxacügü rü tórü uanügüme̱xẽgu tayixü̃ca̱x? Rü narümemae nixĩ i Equítuaneca̱x tawoegu —ñanagürügü.
4 Rü yexguma ga wüxichigü nügümaxã ñanagürügü: —Ngĩxã nüxü̃ taxuneta i wüxi i tórü ãẽ̱xgacü nax tamaxã inacuáxü̃ca̱x rü ngẽmamaxã Equítuaneca̱x iwoeguxü̃ca̱x —ñanagürügü.
5 Rü yexguma ga Moiché rü Aróü̃ rü ñaxtüanegu nanangücuchitanü nape̱xewa ga guxü̃ma ga duü̃xü̃gü.
6 Rü nüma ga Yochué rü Caréx ga yema naane ngugügüxü̃ rü norü ngechaü̃maxã nügü narügáutechirugü.
7 Rü ñanagürügü nüxü̃ ga guxü̃ma ga yema Iraétanüxü̃: —Ngẽma naane ga ítayadaugüxü̃ rü naane i mexü̃ nixĩ.
8 Rü nüma ya Cori ya Tupana rü tá tüxü̃ narüngü̃xẽxẽ rü tüxü̃́ nanatauxchaxẽxẽ nax ngẽma naanegu ichocuxü̃. Rü tá tüxna nanaxã nax tóxrüxü̃ yixĩxü̃ca̱x. Rü ngẽma nachixü̃anewa rü ñoma wüxi i natüarü dexárüxü̃ taguma nataxu i lechi rü ira.
9 Natürü i pemax rü tama name nax Cori ya Tupanamaxã penuexü̃. Rü tama name i nüxü̃ pemuü̃e i ngẽma nachixü̃anecüã̱x i duü̃xü̃gü. Erü nümagü rü tá ñoma paũ i ngṍxü̃rüxü̃ tá tüxü̃́ nixĩgü i taxca̱x erü nataxuma i texé nax nüxna dauxü̃. Natürü i yixema rü tüxü̃́ nangẽxma ya Cori ya Tupana ya tüxna daucü. ¡Rü taxṹ i pemuü̃exü̃! —ñanagürügü.
10 Rü woo yemaxü̃ nax naxĩnüexü̃ ga duü̃xü̃gü rü nanueama rü nutamaxã ínanamuxũchigüchaü̃. Natürü ga Cori ya Tupanaarü üüne rü yéma nango̱x ga gumá Tupanapatawa nape̱xewa ga guxü̃ma ga Iraétanüxü̃.
11 Rü yexguma ga nüma ga Cori ya Tupana rü Moichéxü̃ ñanagürü: —¿Ñuxguratáta nixĩ i choxü̃́ inaxĩnüexü̃ i ñaa duü̃xü̃gü? ¿Rü ñuxguratáta nixĩ i nüxü̃ naxoexü̃ nax tama choxü̃́ yaxõgüãxü̃ rü woo nüxü̃ nax nadaugüxü̃ ga yema mexü̃gü ga chorü poramaxã nape̱xewa chaxüxü̃?
12 Rü naxca̱x tá núma chanamu i wüxi i da̱xaweane i nawa nayuexü̃ nax ngẽmaãcü tama nawa nangugüxü̃ca̱x i ngẽma naane. Natürü cuwa tá nixĩ ichanango̱xẽxẽxü̃ i to i duü̃xü̃gü i ñaa duü̃xü̃güxü̃ rümumaexü̃ rü rüporamaegüxü̃ —ñanagürü.
13 14:13-14 Natürü nüma ga Moiché rü Cori ya Tupanaxü̃ nangãxü̃ rü ñanagürü: —Natürü ngẽma Equítuanecüã̱xgü rü meama nüxü̃ nacua̱xgü ga curü poramaxã nax ícunguxü̃xẽẽxü̃ ga ñaa duü̃xü̃gü. Rü ngẽxguma ngẽma Equítuanecüã̱xgü nüxü̃ cua̱xgügu i ngẽma ñaa duü̃xü̃gümaxã cuxüxchaü̃xü̃ rü tá Canaáü̃anecüã̱xgümaxã nüxü̃ nixugüe, rü nümagü rü tá ta nüxü̃ nacua̱xgü. Rü nümagü i ngẽma Canaáü̃anecüã̱xgü rü marü nüxü̃ naxĩnüe nax cuma rü natanüwa cungexmaxü̃ i ngẽma Iraétanüxü̃, rü cugü naxca̱x cungo̱xẽẽxü̃, rü cuma i guxü̃guma ngẽma caixanexü̃wa naétüwa cungexmaxü̃, rü ngẽma caixanexü̃gu nape̱xe quixũxü̃ i ngunecü rü üxüemagu i chütacü.
14 Nüü̃ nadau 14:13
15 Natürü ngẽxguma tá cunadaixgu i ñaa chautanüxü̃ rü ngẽma torü uanügü i cuxü̃ cuáchigagüxü̃ rü tá ñanagürügü:
16 “Nüma ya Cori ya Tupana rü nüxü̃́ naguxcha nax nawa nangugüxẽẽãxü̃ i ngẽma naane ga namaxã inaxunetaxü̃, rü ngẽmaca̱x nixĩ i ínachianexü̃gu tüxü̃ nayuexẽẽãxü̃”, ñanagürügü tá.
17 Rü ngẽmaca̱x nixĩ, Pa Corix, i namexü̃ nax icunawéxü̃ i curü pora yema tomaxã nüxü̃ quixuxü̃rüü̃tama.
18 14:18-19 Rü woo nüxü̃ quixu nax tama nüxü̃ cuxüpetümarexü̃ i ngẽma chixexü̃ ügüxü̃ rü cunapoxcuxü̃ i ngẽma nanegü rü nataagü nagagu i nanatügüarü chixexü̃, natürü nüxü̃ quixu ta nax tama cunuxwa̱xexü̃ rü nataxüchixü̃ i curü ngechaü̃ rü toxü̃́ nüxü̃ cungechaü̃xü̃ i torü chixexü̃. Rü ngẽmaca̱x cuxü̃ chaca̱a̱xü̃ nax nüxü̃́ nüxü̃ curüngü̃maxü̃ i ñaa duü̃xü̃güarü chixexü̃, yerü marü yáxna namaxã cuxĩnü ga yexguma Equítuanewa ínachoxü̃gutama ñu̱xmata nua ñaa nachicawa nangugü —ñanagürü ga Moiché.
19 Nüü̃ nadau 14:18
Cori ya Tupana rü tama nayanaxoxẽxẽ ga duü̃xü̃gü natürü taxũtáma nawa nangugü ga yema naane ga namaxã inaxunetaxü̃
20 Rü nüma ga Cori ya Tupana rü Moichéxü̃ nangãxü̃ rü ñanagürü: —Marü name. Choma rü tá nüxü̃́ nüxü̃ charüngüma i ngẽma duü̃xü̃güarü chixexü̃ ngẽma cuma choxna naxca̱x cuca̱a̱xü̃rüxü̃.
21 14:21-23 Natürü ngẽma nax aixcüma yixĩxü̃ nax chamaxü̃xü̃ rü guxü̃ i ñoma i naanewa nax changexmaxü̃, rü ngẽxgumarüxü̃ tá ta aixcüma nixĩ nax taxúetama ya yíxema Iraétanüxü̃ ga nüxü̃ daugüxe ga yema chorü üüne rü yema mexü̃gü ga chaxüxü̃ ga Equítuanewa rü nua ínachianexü̃wa, rü bai tá ya wüxíe ya yíxema duẽxẽgü nüxü̃ daugüxü̃ i ngẽma naane ga tümaarü o̱xigümaxã nüxü̃ chixuxü̃. Rü bai tá ya wüxíe ga choxü̃ ügümarexe rü choxü̃ oexe rü tama chauga ĩnüexe nüxü̃ tadau i ngẽma naane. Rü bai tá ya wüxíe.
22 Nüü̃ nadau 14:21
23 Nüü̃ nadau 14:21
24 Rü yimá chorü duü̃ ya Caréxicatama nixĩ ya mexü̃gu rüxĩnücü rü aixcüma chauga ĩnücü. Rü ngẽmaca̱x yimáxü̃xicatatama nixĩ i ngẽxma chaxücuxẽẽxü̃ nawa i ngẽma naane ga yangugüxü̃. Rü ngẽma nataagü rü ngẽxma tá naxãchiü̃gü.
25 (Rü ngẽma Amaréxtanüxü̃ rü Canaáü̃tanüxü̃ rü ngẽma doxonexü̃gu naxãchiü̃gü.) Rü ngẽmaca̱x i pema i moxü̃ rü tá pewoegu rü chianexü̃guama tá pexĩ i Már i Dauchíüxü̃guama —ñanagürü.
26 Rü nüma ga Cori ya Tupana rü Mochéxü̃ rü Aróü̃xü̃ ñanagürü:
27 —Marü nüxü̃ chaxĩnü nax chixri chauchiga yadexagüxü̃ i ngẽma Iraétanüxü̃ i chixexü̃gu rüxĩnüexü̃. ¿Rü ñuxguratáta inaxĩnüexü̃ i ngẽma duü̃xü̃gü i marü yáxna namaxã chaxĩnüchiréxü̃?
28 Rü ngẽmaca̱x i ngẽma duü̃xü̃gü i naxca̱x ícagüxü̃ nax nua ínachianexü̃gu nayuexü̃ ¡rü namaxã nüxü̃ yarüxu rü choma ya Cori ya Tupana rü ngẽma nümatama naxca̱x ínacagüxü̃ãcü tá naxca̱x chanaxü!
29 Rü guxü̃ma i ngẽma duü̃xü̃gü ga iwǘgüxü̃ ga 20 ga taunecüwa ngugüxü̃ i chixri chauchiga idexagüxü̃ rü tá nuxã ínachianexü̃gu nayue.
30 Rü bai tá i wüxi i ngẽma duü̃xü̃gü nagu nachocu i ngẽma naane i pemaxã nüxü̃ chixuxü̃. Rü Caréx rü Yochuéxicatama tá nixĩ i ngéma ngugüxü̃.
31 Rü ngẽma penegü i pema nüxü̃ pixugüegu tá perü uanügüme̱xẽgu yixü̃, rü ngẽmagü tá nixĩ i choma ngẽma nachixü̃ane i pemax nüxü̃ pexoexü̃wa chagagüxü̃, nax ngéma taãẽãcü nawa nangẽxmagüxü̃ca̱x.
32 Natürü i pemax rü yimá pexchina̱xãgü rü nua chianexü̃wa tá nawogümare.
33 Rü penegü rü 40 ya taunecü tá ñaa chianexü̃wa nangẽxmagü rü nua naxü̃nagüarü dauruxü̃ tá nixĩgü. Rü ñu̱xma nax tama chauga pexĩnüexü̃ rü penegü rü tá nanaxütanügü i ngẽma perü chixexü̃ ñu̱xmatáta guxãma i pema rü nuxã chianexü̃gu peyue.
34 Rü pemax rü 40 ga ngunexü̃ pinge nax penangugügüxü̃ i ngẽma nachixü̃ane. Rü ngẽmaca̱x rü 40 ya taunecü tá nixĩ i ñaa chianexü̃gu ipexĩĩxü̃ nax ngẽmaãcü peyangutanüxẽẽxü̃ca̱x i perü poxcu. Rü ngẽma 40 i ngunexü̃ca̱x rü 40 ya taunecü tá nixĩ. Rü ngẽmawa tá nixĩ i nüxü̃ picua̱xãchitanü nax ta̱xacü tüxü̃ nangupetüxü̃ ya yíxema tama chauga ĩnüxe.
35 Rü choma i Cori, rü pemaxã chanaxuegu rü ngẽmaãcü tá namaxã chanaxü i ngẽma duü̃xü̃gü i wüxigu nügümaxã tama chauga ĩnüexü̃. Rü nuxã ñaa chianexü̃gu rü tá nayagu i norü maxü̃ i wüxichigü rü ngẽxma tá nixĩ i nayuexü̃ —ñanagürü.
Nayue ga yema 10 ga ngugütaeruü̃gü ga chixexü̃gu rüxĩnüexü̃
36 14:36-37 Rü yema yatügü ga Moiché ngugüanewa mugüxü̃ nax Canaáü̃ane íyadaugüxü̃, rü yexguma ínangugügu rü nüxü̃ nixugü nax tama aixcüma namexü̃ ga yema naane, rü yemaca̱x ga duü̃xü̃gü rü Tupanape̱xewa chixri nidexagü. Rü yemaca̱x ga Cori ya Tupana rü da̱xaweanemaxã nanadai ga yema yatügü.
37 Nüü̃ nadau 14:36
38 Rü guxü̃ma ga yemagütanüwa rü Yochué ga Núü̃ nane rü Caréx ga Yeponé nanexicatama nixĩ ga maxẽxü̃.
Iraétanüxü̃xü̃ narüporamae ga norü uanügü
39 Rü yexguma yema Iraétanüxü̃maxã nüxü̃ yaxuxgu ga Moiché ga yema Cori ya Tupana namaxã nüxü̃ ixuxü̃, rü guxü̃ma ga duü̃xü̃gü rü poraãcü nangechaü̃gü.
40 Rü yema ga ngunexü̃arü moxü̃ãcü rü pa̱xmamaxü̃chi ínarüdagü rü inaxĩãchi nax ínachoõchixü̃ca̱x ga yema ínamáxpü̱xanexü̃wa. Rü ñanagürügü: —Marü núma tangugü. Rü aixcüma nixĩ nax chixexü̃ taxüxü̃, natürü i ñu̱xma rü marü ítamemare nax nawa ixĩxü̃ i ngẽma naane ga Cori ya Tupana tamaxã nüxü̃ ixuxü̃ —ñanagürügü.
41 Natürü ga Moiché rü ñanagürü nüxü̃: —¿Tü̱xcüü̃ tama naga pexĩnüe i Cori ya Tupanaarü mu? Rü ngẽma nagu perüxĩnüexü̃ rü taxũtáma mea pexü̃ ínanguxuchi.
42 Rü tama name nax ipexĩãmaxü̃, erü ya Cori ya Tupana rü tama napexü̃tagu. Rü ngẽma perü uanügü rü tá pexü̃ narüporamaegü.
43 Rü yea pepe̱xewa rü ngéma pexü̃ nananguxẽẽgü i Amaréxtanüxü̃, rü Canaáü̃tanüxü̃ nax pemaxã nügü nada̱i̱xü̃ca̱x rü pexü̃ nayuexẽẽxü̃ca̱x. Erü pema rü nüxna pixĩgachi ya Cori ya Tupana rü ngẽmaca̱x i nüma rü marü tama pexü̃tawa nangẽxma —ñanagürü ga Moiché.
44 Rü nüma ga Moiché rü yema ínapegüxü̃gutama narüxã̱ũ̱x namaxã ga yema baú ga Tupanaarü mugü nawa yexmaxü̃. Natürü ga nümagü ga Iraétanüxü̃ rü ínachoõchiama ga ma̱xpǘneanewa.
45 Natürü yexguma yema ma̱xpǘneanewa nangugügu rü nümagü ga Amaréxtanüxü̃ rü Canaáü̃tanüxü̃ ga yexma ãchiü̃güxü̃ rü Iraétanüxü̃xü̃ nadai. Rü nawe nangẽgü rü ñu̱xmata Ormáwa nayawogü. Rü yemaacü nüxü̃ narüporamaegü.
