Números 15:1-41
15 Rü Cori ya Tupana rü Moichémaxã nidexa rü ñanagürü nüxü̃:
2 15:2-4 —¡Cutanüxü̃ i Iraétanüxü̃maxã nüxü̃ ixu i ñaa ore!: “Rü ngẽxguma nagu pechocuxgu i ngẽma naane i choma tá pexna chaxãxü̃ nax nagu pexãpatagüxü̃ca̱x, rü ngẽxguma choxna penaxãxgu i wüxi i woca i yatüxü̃ rüe̱xna wüxi i carnéru i ngexü̃ nax cha̱u̱xca̱x peyagugüxü̃ca̱x, rü ngẽma naema rü cha̱u̱xca̱x rü wüxi i naema i choxü̃ taãẽxẽẽxü̃ tá nixĩ. Rü ngẽxguma wüxi i unetaca̱x ãmare choxna pexãxgu, rüe̱xna wüxi i ãmare i perü ngúchaü̃maxã choxna pexãxgu, rüe̱xna wüxi i peta i cha̱u̱xca̱x pexüchigagu, rü ngẽxguma texé tümaarü ãmare chope̱xewa ngexgu rü naétü tá itanaxã i taxre i quíru i trigute̱xe i mexẽchixü̃ i wüxi i litru i chíxü̃maxã meama iñúmücharaxü̃.
3 Nüü̃ nadau 15:2
4 Nüü̃ nadau 15:2
5 Rü ngẽxguma carnéru cha̱u̱xca̱x ípeguxgu rü naétü wüxichigü i carnéruca̱x tá ipenaxã ya wüxi ya litru ya bínu.
6 15:6-7 Rü ngẽxguma wüxi i carnéru cha̱u̱xca̱x pima̱xgu, rü naétü tá ngéma penange i perü ãmare i ãgümücü i quíru i trigute̱xe i wüxi i litruarü yexera i chíxü̃maxã ñumüxü̃. Rü ñu̱xũchi wüxi i litruarü yexera ya bínu tá naétü penaba nax cha̱u̱xca̱x nachixemaxü̃ca̱x i ngẽma ãmare.
7 Nüü̃ nadau 15:6
8 15:8-10 Rü ngẽxguma wüxi i wocaxacü i yatüxü̃ yixĩgu nax cha̱u̱xca̱x pimáxü̃ nax cha̱u̱xca̱x peyaguxü̃ca̱x, rüe̱xna chorü ngüxmüxẽẽruxü̃ nax yixĩxü̃ca̱x, rüe̱xna wüxi i unetaca̱x nax yixĩxü̃ca̱x, rü naétü tá ipenaxã i 6 quíru i arína i taxre i litru i chíxü̃maxã ñumüxü̃. Rü ñu̱xũchi taxre i litru ya bínu tá naétü penaba nax cha̱u̱xca̱x nachixemaxü̃ca̱x i ngẽma ãmare.
9 Nüü̃ nadau 15:8
10 Nüü̃ nadau 15:8
11 Rü ngẽmaãcü tá namaxã penaxü i wüxichigü i woca i yatüxü̃, rüe̱xna wüxichigü i carnéru i yatüxü̃, rüe̱xna wüxichigü i chíbuxacü i yatüxü̃ i choxü̃ namaxã pexãmareã̱xgüxü̃.
12 Rü wüxichigü i naxü̃na i choxna pexãxü̃ca̱x rü naétü tá choxna penaxã i ngẽma ãmare i arína rü chíxü̃ rü bínu.
13 Rü guxü̃ma i Iraétanüxü̃ rü nanaxwa̱xe nax yanguxẽẽgüãxü̃ i ngẽma cumaxã nüxü̃ chixuxü̃ãcüma ega ngẽxguma choxna naxãgügu i norü ãmare i guxü̃ i naema choxü̃ taãẽxẽẽxü̃.
14 Rü ngẽxguma wüxi i duü̃xü̃ i to i nachixü̃anecüã̱x i petanüwa paxaãchi nguxü̃ rüe̱xna marü petanügu ãpataxü̃, rü ngẽxguma choxna naxããgu i norü ãmare i guxü̃ i naema choxü̃ taãẽxẽẽxü̃, rü chanaxwa̱xe i nüma rü ta nayanguxẽxẽ i ngẽma mu i pexna chaxãxü̃.
15 Rü ngẽma mu i pexca̱x ixĩxü̃ rü ngẽmatama mu nixĩ i naxca̱x ixĩxü̃ i ngẽma to i nachixü̃anecüã̱xgü. Rü ngẽma mu rü tá guxü̃gutáma nangẽxmaecha. Rü ngẽma papagü rü tá nanegüwa nanaxüexẽxẽ.
16 Rü ngẽmatama mu rü ngẽmatama ucu̱xẽ i pexca̱x ixĩxü̃ nixĩ i naxca̱x ixĩxü̃ i ngẽma togü i nachixü̃anecüã̱xgü i petanüwa maxẽxü̃” —ñanagürü ga Tupana.
17 Rü Cori ya Tupana rü Moichémaxã nidexa rü ñanagürü:
18 15:18-19 —¡Namaxã nüxü̃ ixu i Iraétanüxü̃ i ñaa ore!: “Rü ngẽxguma tá marü nagu pichocu̱xgu i ngẽma nachixü̃ane i nawa tá pexü̃ chagagüxü̃ rü ngẽxguma marü tá penangõ̱xgügu i ngẽma tríguarü o i ngẽma nachixü̃anewa rüxüxü̃, rü penaxwa̱xe nax cha̱u̱xca̱x ípenaxüxüchixü̃ i ngẽma choxna üxü̃ i norü o nax choxü̃ namaxã pexãmareã́xü̃ca̱x.
19 Nüü̃ nadau 15:18
20 15:20-21 Rü ngẽma trigu i nüxíra pepúxü̃ rü tá choxna penaxãmare. Rü ngẽxgumarüxü̃ ta i ngẽma nüxíraxü̃xü̃ i nacharawa pexüxü̃ i paũ rü tá choxna penaxãmare. Rü ngẽma ãmare tá nixĩ i guxü̃guma choxna pexãxü̃.
21 Nüü̃ nadau 15:20
22 15:22-23 Rü ngẽxguma chi ngürüãchi nüxü̃ perüngümaegu nax peyanguxẽẽgüxü̃ i wüxi i ngẽma mugü ga nüxíra Moichéna chaxãxü̃ nax pema rü petaagü peyanguxẽẽgüxü̃ca̱x, rü ñaãcü tá penamexẽxẽ.
23 Nüü̃ nadau 15:22
24 Rü ngẽxguma chi wüxi i guxchaxü̃ i tama naxügüchaü̃chiréxü̃ naxügügu i guxü̃ma i Iraétanüxü̃, rü chanaxwa̱xe nax guxü̃ma i duü̃xü̃gü wüxi i woca i yatüxü̃ cha̱u̱xca̱x nigu nax naemamaxã chataãẽxü̃ca̱x. Rü ngẽma ãmaremaxã wüxigu tá inanaxãgü i ãmare i arína i chíxü̃maxã ñumüxü̃ rü ñu̱xũchi bínu, yema choma nüxü̃ chixuxü̃rüxü̃. Rü ñu̱xũchi wüxi i chíbu i yatüxü̃ tá choxna naxãmaregü norü chixexü̃arü ütanüruxü̃.
25 Rü ngẽma ãmare rü chacherdóte tá nixĩ i chope̱xewa ínaguxü̃ guxü̃ma i Iraétanüxü̃arü chixexü̃arü ütanüruxü̃. Rü choma rü tá nüxü̃́ nüxü̃ charüngüma i norü pecadu, erü ngẽma chixexü̃ i naxügüxü̃ rü naechita nanaxügü. Rü ngẽmaca̱x chanaxwa̱xe nax ãmare choxna naxãgüxü̃ rü naxü̃na cha̱u̱xca̱x nada̱i̱xü̃ norü chixexü̃ i naxügüxü̃arü ütanüruxü̃.
26 Rü choma rü tá nüxü̃́ nüxü̃ charüngüma i ngẽma Iraétanüxü̃arü pecadu rü ngẽma to i nachixü̃anecüã̱x i petanügu ãpatagüxü̃arü pecadu ega naechita naxügüxü̃ yixĩxgu i ngẽma pecadu.
27 Rü ngẽxguma chi texé tümaechita chixexü̃ taxü̱xgu, rü yíxema duü̃xẽ rü tá itanamu i wüxi i chíbu i ngexü̃ i wüxi ya taunecü nüxü̃́ ngẽxmaxü̃ tümaarü chixexü̃arü ütanüruxü̃.
28 Rü nüma i chacherdóte tá nixĩ i cha̱u̱xca̱x yaguxü̃ i ngẽma tümaarü ãmare nax tüxü̃́ nüxü̃ charüngümaxü̃ca̱x i ngẽma chixexü̃ i tama taxüxchaü̃chiréxü̃. Rü choma rü tá tüxü̃́ nüxü̃ charüngüma i ngẽma chixexü̃.
29 Rü ngẽxguma togü i nachixü̃anecüã̱xgü i petanügu ãpatagüxü̃ naechita naxü̱xgu i pecadu rü ngẽma mu i pexca̱x ixĩxü̃ rü ngẽmatama mu nixĩ i naxca̱x ixĩxü̃.
30 Natürü ngẽxguma chi wüxi i Iraétanüxü̃ rüe̱xna wüxi i to i nachixü̃anecüã̱x norü ngúchaü̃maxã chomaxã chixexü̃ ixugügu rü choxü̃́ nangu̱x. Rü ngẽmaca̱x i ngẽma duü̃xü̃ rü wüxicana tá ípenata̱xüchi i petanüwa.
31 Erü nüxü̃ naxo i chorü ore rü tama nayanguxẽxẽ i chorü mugü. Rü ngẽmaca̱x tá petanüwa ípenata̱xüchi rü ngẽmaãcü guxü̃gutáma nayange i ngẽma chixexü̃ i naxüxü̃” —ñanagürü.
Poxcu tümaca̱x ya yíxema duü̃xẽ ya tama ngü̃xchigaarü ngunexü̃gu rüngü̃xe
32 Rü yexguma chianexü̃wa nayexmagügu ga Iraétanüxü̃, rü nüxü̃ nadaugü ga wüxi ga yatü ga ngü̃xchigaarü ngunexü̃gu norü üxü tanutaque̱xexü̃.
33 Rü yema nüxü̃ daugüxü̃ rü Moichépe̱xewa rü Aróü̃pe̱xewa rü guxü̃ma ga Iraétanüxü̃pe̱xewa nanagagü.
34 Rü nümagü nüxna nadaugü nax tama yañaxü̃ca̱x, yerü tama nüxü̃ nacua̱xgüéga nax ta̱xacü tá namaxã naxügüxü̃ ga yema yatü.
35 Rü yexguma ga Cori ya Tupana rü Moichémaxã nidexa rü ñanagürü: —Ngẽma yatü rü nanaxwa̱xe nax wüxicana nayuxü̃. Rü ípenagaxüchi i pegütanüwa rü ípengexmagüxü̃arü yéamaxü̃ra penaga. Rü guxü̃ma i duü̃xü̃gü i Iraétanüxü̃ tá ínanamuxũchigü —ñanagürü.
36 Rü yexguma ga Iraétanüxü̃ rü ínanagaxüchigü ga yema ínayexmagüxü̃wa rü yéamaxü̃ra nanagagü. Rü nutamaxã ínanamuxũchigü ñu̱xmata nayu̱x, yema Cori ya Tupana Moichémaxã nüxü̃ ixuxü̃ãcü.
Tüarü ãxnütanechapa̱xa ga naxchiruchipenügu ibáxü̃güãcü inucuxü̃
37 15:37-38 Rü Cori ya Tupana rü Moichémaxã nidexa rü ñanagürü: —¡Iraétanüxü̃maxã nüxü̃ ixu i ñaa ore!: “Pemax rü penegü rü petaagü rü chanaxwa̱xe i tü ya yauxnütanemaxã penanga̱xãẽpechinü i pexchiru.
38 Nüü̃ nadau 15:37
39 Rü ngẽxguma nüxü̃ pedaugügu i ngẽma perü nga̱xãẽpechinüchiru rü ngẽmawa tá nüxna pecua̱xãchie i chorü mugü i pexna chaxãxü̃. Rü ngẽmaãcü i pema rü tá nagu pemaxẽ i chorü mugü. Rü taxũtáma perü ĩnügumare pemaxẽ rü taxũtáma perü ngúchaü̃gumare pemaxẽ, yerü yemagagu nixĩ ga choxna pixĩgachitanüxü̃.
40 Rü ngẽmawa tá nüxna pecua̱xãchie i guxü̃ma i chorü mugü rü ngẽmaãcü tá aixcüma mea nagu pemaxẽ rü aixcüma choxna pegü pexãgü i choma nax perü Cori ya Tupana chixĩxü̃.
41 Rü choma nixĩ i Cori ya perü Tupana chixĩxü̃. Rü choma nixĩ i Equítuanewa pexü̃ íchagaxü̃xü̃ nax perü Tupana chixĩxü̃ca̱x. Rü choma nixĩ i perü Cori ya Tupana chixĩxü̃” —ñanagürü.
