Números 18:1-32
18 Cori ya Tupana rü Aróü̃xü̃ ñanagürü: —Cuma rü cunegü rü wüxigu namaxã i ngẽma togü i Lebítanüxü̃ tá nixĩ i choxna naxca̱x pecaxü̃ nax nüxü̃́ nüxü̃ icharüngümaxü̃ca̱x i ngẽma Iraétanüxü̃arü chixexü̃gü i chope̱xewa naxügüxü̃. Natürü ngẽma chixexü̃ i cuma rü cunegü chope̱xewa pexügüxü̃, rü pemax i chacherdótegü tátama nixĩ i chauxü̃tawa naxca̱x ípecaxü̃ nax pexü̃́ nüxü̃ icharüngümaxü̃ca̱x i ngẽma chixexü̃gü i chope̱xewa pexügüxü̃.
2 Natürü ngẽma togü i Lebítanüxü̃ i cutanüxü̃ ixĩgüxü̃ rü cunaxwa̱xe nax cuxü̃ rü cunegüxü̃ nangü̃xẽẽgüxü̃ nawa i Tupanapataarü puracü.
3 Rü nümagü i Lebítanüxü̃ rü tá ínamemare nax naxügüã̱xü̃ca̱x i ngẽma Tupanapataarü puracü i nawa cunamuxü̃. Natürü tama name nax Tupanapatawa ngẽxmagüxü̃ i nawechigüna rü ãmarearü guruü̃na nangaicamagüxü̃, erü ngẽxguma nüxna nangaicamagügu rü tá nayue rü pema rü tá ta peyue.
4 Rü ngẽma Tupanapatawa cuxüxü̃ i puracüwa rü cunaxwa̱xe nax ngẽma Lebítanüxü̃ cuxü̃ rüngü̃xẽẽgüxü̃ i wüxichigü i ngẽma puracü i cuxüxü̃wa. Natürü taxũtáma ngexü̃rüüxü̃mare i duü̃xü̃ i tama nüxü̃ chaxunetaxü̃ pexna nangaicama.
5 Erü pexme̱xwa nixĩ i nangẽxmaxü̃ ya chopata rü ñu̱xũchi ngẽma ãmarearü guruxü̃. Rü ngẽxguma ngẽma pexü̃ chamuxü̃ãcü peyanguxẽẽgu rü tagutáma wena Iraétanüxü̃maxã chanu.
6 Rü natanüwa i ngẽma togü i Iraétücumügü rü choma rü chanade i cuenexẽgü i Lebítanüxü̃. Rü ñu̱xũchi pexna chanamugü nax pexü̃ nangü̃xẽẽgüxü̃ca̱x i chopataarü puracüwa.
7 Natürü cuma rü cunegüxica tá nixĩ i penaxügüxü̃ i ngẽma chacherdótegüarü puracü rü chope̱xewa ãmare pigugüxü̃ rü tüyemachiü̃ruxü̃arü aixepeguama pichocuxü̃ nagu i ucapu i Üünexüchixü̃. Rü ngẽma puracü rü pexica tátama nixĩ i penaxügüxü̃ erü choma rü nagu pexü̃ chamugü nax chacherdótegü pixĩgüxü̃ rü chacherdótegüarü puracü pexügüxü̃ca̱x. Rü ngẽxguma chi texé chacherdótearü puracü uxgu natürü tama chacherdóte tixĩxgu, rü tá yu tümamaxã naxuegu —ñanagürü.
Ãmaregü i chacherdótegüca̱x rü Lebítanüxü̃ca̱x ixĩxü̃
8 Rü Cori ya Tupana rü Aróü̃xü̃ ñanagürü: —Choma rü cuxü̃ chamu nax nüxna cudauxü̃ca̱x i ngẽma ãmaregü i duü̃xü̃gü choxna naxü̃. Rü guxü̃ma i ngẽma ãmaregü i üünexü̃ i Iraétanüxü̃ choxna naxü̃, rü choma rü cuxna rü cunegüna chanaxã, erü ngẽma nixĩ i pexna üxü̃. Rü ngẽma mu i cumaxã nüxü̃ chixuxü̃ rü tá guxü̃gutáma nagu pexĩ.
9 Rü cuxrü tá nixĩ i ngẽma ãmaregü i Iraétanüxü̃ choxna ãgüxü̃. Rü ngẽma naxü̃nagü i cha̱u̱xca̱x peguxü̃wa rü cuxrü tá nixĩ i ngẽma namachi i cuxna üxü̃. Rü cuxrü tá nixĩ i ngẽma ãmaregü i trigute̱xe, rü ãmaregü i pecaduarü ütanüruü̃gü, rü ãmaregü i Iraétanüxü̃ choxna naxü̃ norü guxchaxü̃gü i naxügüxü̃arü ütanüruxü̃. Rü guxü̃ma i ngẽma ãmaregü i üünexü̃ rü tá cuxrü rü cunegüarü nixĩ.
10 Rü guxü̃ma i petanüwa i yatüxü̃ rü marü name nax nangõ̱xgüãxü̃ i ngẽma ãmaregü, natürü nanaxwa̱xe nax wüxi i nachica i üünexü̃wa nax nangõ̱xgüãxü̃ erü ngẽma ãmaregü rü nixüüne.
11 Rü ngẽma ãmaregü i chorü ngüxmüxẽẽruü̃gü i Iraétanüxü̃ choxna ãgüxü̃ rü cuxna rü cunegüna rü cuxacügü i cupatawa ngẽxmagüxü̃na chanaxã. Rü ngẽma rü wüxi i mu i guxü̃gutáma pingu̱xẽẽxü̃ nixĩ. Rü ngexü̃rüüxü̃mare i cupatacüã̱x i chope̱xewa mearü maxü̃xã́xü̃ rü name nax nangõ̱xgüãxü̃ i ngẽma ãmaregü.
12 Rü ngẽxgumarüxü̃ ta cuxna chanaxã i ngẽma nanetügüarü o i nüxíraxü̃güxü̃ i wüxichigü ya taunecügu choxna naxãgüxü̃ i Iraétanüxü̃. Rü ngẽxgumarüxü̃ ta cuxna chanaxã i ngẽma chíxü̃ i rümemaexü̃ rü yimá bínu ya rümemaecü rü ñu̱xũchi ngẽma trigu i rümemaexü̃.
13 Rü ngẽxgumarüxü̃ ta cuxna chanaxã i ngẽma togü i nanetügüarü o i nüxíraxü̃güxü̃ i choxna naxãgüxü̃ i Iraétanüxü̃. Rü ngexü̃rüüxü̃mare i cupatacüã̱x i chope̱xewa mearü maxü̃xã́xü̃ rü name nax nangṍoxü̃ i ngẽma ãmaregü.
14 Rü guxü̃ma i ãmaregü i Iraétanüxü̃ cha̱u̱xca̱x inuxũchixü̃ rü cuxrügü tá nixĩ.
15 Rü ngẽma Iraétanüxü̃ nanegü i nüxíra buexü̃ rü ñu̱xũchi naxü̃nagü i yatüxü̃ i nüxíra buexü̃ i choxna namugüxü̃ rü cuxrügü tá nixĩgü. Natürü nanegüchicüxü rü ñu̱xũchi ngẽma naxü̃nagü i tama ngõ̱xwa mexü̃chicüxü rü ngẽma Iraétanüxü̃ tá diẽru cuxna naxã.
16 Rü ngẽma diẽru i nane i nüxíra buxü̃tanü rü tá cuxü̃́ nanaxütanü i ngẽxguma marü wüxi ya tauemacü nüxü̃́ ngẽxmagu i ngẽma nane. Rü ngẽma natanü tá nixĩ i wüxime̱e̱xpü̱xtachinü i diẽrumünaxca̱x i diẽru i wüxichigü 11 gramu yáxü̃ ega Tupanapataarü yáruü̃wa nayaxgu.
17 Natürü ngẽma nüxíra buxü̃ i wocaxacügü, rüe̱xna carnéruxacügü rüe̱xna chíbuxacügü rü taxucürüwama nachicüxü diẽru inaxã i duü̃xü̃gü erü ngẽmagü rü chaugüca̱x nüxü̃ chaxunetaxü̃ nixĩ. Rü tá cunadai rü yimá nagü rü ãmarearü guruü̃étügu tá cunaba. Rü norü chíxü̃ rü tá cuyagu nax wüxi i ãmare i choma namaxã chataãẽxü̃ yixĩxü̃ca̱x i ngẽma naema.
18 Rü ngẽxguma chorü ngüxmüxẽẽruü̃ca̱x penadaixgu i naxü̃nagü rü yima tügüneperema rü naremümachi rü cuxna naxǘ. Rü ngẽxgumarüxü̃ ta cuxna naxǘ i namachi i ngẽma naxü̃na i nüxíra buxü̃ i cha̱u̱xca̱x pedaixü̃.
19 Rü guxü̃ma i ãmaregü i Iraétanüxü̃ choxna naxü̃ rü cuxna chanana nax cuxrü rü cunegüarü rü cuxacügü i cuxü̃tawa ngẽxmagüxü̃arü yixĩgüxü̃ca̱x. Rü ngẽma rü wüxi i mu i guxü̃gutáma pingu̱xẽẽxü̃ nixĩ. Rü ngẽma uneta i cumaxã rü cunegümaxã rü cutaagümaxã i chomatama chaxüxü̃ rü wüxi i uneta i ñoma yucürarüxü̃ taguma gúxü̃ nixĩ —ñanagürü.
20 Rü Cori ya Tupana rü Aróü̃xü̃ ñanagürü: —Cuma rü taxũtáma ngẽma togü i Iraétanüxü̃rüxü̃ cuxü̃́ nangẽxma i curü naane i Iraéanewa. Erü choma tá nixĩ i cuxrü ãmare chixĩxü̃ rü cunegüarü ãmare rü cutaagüarü ãmare chixĩxü̃ i Iraéanewa.
21 Rü ngẽma diésmu i choxna naxãgüxü̃ i Iraétanüxü̃ norü nanetügüarü owa, rü choma rü tá Lebítanüxü̃na chanaxã nax ngẽmamaxã nüxü̃́ naxãtanüxü̃ca̱x i norü puracü i chopatawa naxügüxü̃.
22 Rü ngẽma togümare i Iraétanüxü̃ rü tama name nax chopatana nangaicamagüxü̃ erü ngẽxguma nüxna nangaicamagügu rü pecadu naxügü erü tama chauga naxĩnüe. Rü tá nayue.
23 Rü Lebítanüxü̃xica tá nixĩ i naxügüxü̃ i ngẽma puracü i chopatawa. Rü nümagü tá nixĩ i chope̱xewa ãmare inaxãgüxü̃ nax nüxü̃́ nüxü̃ charüngümaxü̃ca̱x i ngẽma Iraétanüxü̃arü pecadugü. Rü ngẽma tá nixĩ i mu i guxü̃gutáma pingu̱xẽẽxü̃, rü papagü rü tá nanegüwa nanaxüexẽxẽ. Rü ngẽma Lebítanüxü̃ rü taxũtáma nüxü̃́ nangẽxma i norü naane i Iraéanewa.
24 Rü ngẽma diésmu i choxna naxãgüxü̃ i Iraétanüxü̃ norü nanetügüarü owa, rü choma rü Lebítanüxü̃na chanaxã. Rü ngẽmaca̱x nüxü̃ chixu rü taxũtáma nüxü̃́ nangẽxma i norü naane i Iraéanewa —ñanagürü.
25 Rü nüma ga Cori ya Tupana rü Moichéxü̃ ñanagürü:
26 —¡Lebítanüxü̃maxã nüxü̃ ixu rü ngẽxguma nayauxgüãgu i ngẽma diésmu i Iraétanüxü̃ norü nanetüarü owa choxna ãgüxü̃, rü name nixĩ i ngẽmawa choxna nanaxãgü i norü diésmu!
27 Rü ngẽma tá nixĩ i norü ãmare i choxna naxãgüxü̃ i Lebítanüxü̃, ngẽma Iraétanüxü̃ norü ãmare choxna ãgüxü̃rüxü̃ i ngẽxguma choxna naxãxgüãgu i ngẽma choxna üxü̃ nawa i norü trigu rü norü bínu.
28 Rü ngẽmaãcü i ngẽma diésmu i Iraétanüxü̃ Lebítanüxü̃ca̱x ixãxü̃ rü nümagü i ngẽma Lebítanüxü̃ rü ngẽmawa tá cha̱u̱xca̱x ínanaxüxüchigü i norü diésmu. Rü ngẽma diésmu tá chacherdóte ya Aróü̃na nanaxãgü.
29 Rü ngẽmaãcü i ngẽma Lebítanüxü̃ rü ngẽma diésmu i Iraétanüxü̃ nüxna ãgüxü̃wa tá cha̱u̱xca̱x ínanaxüxüchigü i diésmu. Rü chanaxwa̱xe nax ngẽma rümemaegüxüchixü̃ yixĩxü̃ i ngẽma choxna naxãgüxü̃.
30 ¡Rü ngẽxgumarüxü̃ ta Lebítanüxü̃maxã nüxü̃ ixu i ñaa ore! “Rü ngẽxguma marü cha̱u̱xca̱x ínaxüxüchigüãgu i ngẽma rümemaexü̃ i diésmu, rü noxrü tá nixĩ i ngẽma trigu i íyaxüxü̃ rü yima bínu ya íyaxücü.
31 Rü name i nüma rü naxacügümaxã nanangõ̱xgü i ngexü̃rüüxü̃mare i nachicawa. Rü ngẽma nixĩ i norü natanü naxca̱x nax chopatawa napuracüexü̃.
32 Rü ngẽxguma marü cha̱u̱xca̱x ínaxüxüchigüãgu i ngẽma ãmare i rümemaexü̃chixü̃ i choxrü ixĩxü̃, rü tama chixexü̃ naxügü i ngẽxguma nangõ̱xgüãgu i ngẽma nüxna üxü̃. Rü ngẽmaãcü taxũtáma nanaxãũãchigü i ngẽma ãmaregü i üünexü̃ i Iraétanüxü̃ choxna ãgüxü̃, rü taxũtáma nayue” —ñanagürü ga Tupana.
