Números 19:1-22
19 Cori ya Tupana rü Moichémaxã rü Aróü̃maxã nidexa rü ñanagürü nüxü̃:
2 —Choma nixĩ i Cori ya Tupana chixĩxü̃. ¡Rü Iraétanüxü̃maxã nüxü̃ ixu i ñaa mu!: “¡Rü cuxü̃tawa nagagüã i wüxi i woca i ngexü̃ i dauchapa̱xaxü̃ i taxuwama chixexü̃ i taguma namaxã napuracüexü̃!
3 Rü pema rü tá chacherdóte i Ereachána penamu. Rü nüma tá nixĩ i ngẽma ípengexmagüxü̃arü düxétüwa nagaãxü̃. Rü tá nanamu nax nape̱xegu yama̱xgüãxü̃.
4 Rü chacherdóte i Ereachá rü naxme̱xmaxã tá íxracü ya nagü nayaxu. Rü ñu̱xũchi 7e̱xpü̱xcüna tá chopata íngexmaxü̃guama nanamaxgü.
5 Rü ngẽmawena rü Ereachápe̱xewa tá nayagu i ngẽma woca, guxü̃ma i naxcha̱xmüü̃maxã, rü namachimaxã, rü nagümaxã rü naü̃maxã.
6 Rü ngẽxguma i nüma i chacherdóte rü tá nanayaxu i ñuxre i ocayiwachacüxü, rü wüxi i maxcuruxü̃ i ichópuchacüxü, rü wüxi i naxchiru i daucharaxü̃. Rü guxü̃ma i ngẽma rü wüxigu tá yima üxü ya woca nawa yagugünewa nayawocu nax ínaguaxü̃.
7 Rü ngẽmawena i nüma i chacherdóte rü tá nügü naya̱u̱xchiru rü tá nügü naxaiya. Rü ngẽmawena rü name nax wenaxarü duü̃xü̃gü íxãpataxü̃wa naxũxü̃. Natürü tauxta aixcüma namexü̃ ñu̱xmata nayáuane.
8 Rü ngẽma yatü i woca iguxü̃ rü ngẽxgumarüxü̃ tá ta nügü naya̱u̱xchiru rü nügü naxaiya. Natürü tauxta aixcüma name ñu̱xmata nayáuane.
9 Rü wüxi i yatü i marü chope̱xewa mexü̃ rü tá nanagücu ya norü tanimaca i ngẽma woca i guxü̃. Rü wüxi i nachica i tama ãũãchixü̃gu tá namaxã nanguxü̃ ya yima tanimaca i duü̃xü̃gü íxãpataxü̃arü yáxü̃wa. Rü yima tanimaca tá nixĩ i nawa nagüeãcü i ngẽma dexá i mexẽẽruxü̃ ixĩxü̃ nax ngẽma dexá rü Iraétanüxü̃arü chixexü̃arü mexẽẽruxü̃ yixĩxü̃ca̱x. Rü guxü̃ma i ngẽma rü pecaduarü ütanüruxü̃ nixĩ.
10 Rü ngẽma duü̃xü̃ i tanimaca nagugü̱xüxü̃, rü tá nügü naya̱u̱xchiru. Natürü tauxta aixcüma namexü̃ ñu̱xmata nayáuane. Rü ngẽma nixĩ i wüxi i mu i guxü̃gutáma yanguxẽẽgüxü̃ i Iraétanüxü̃ rü ñu̱xũchi ngẽma duü̃xü̃gü i to i nachixü̃anecüã̱xgü i petanüwa ngẽxmagüxü̃.
11 Rü texé ya yuxetaxü̃ ingógüxe rü 7 i ngunexü̃ tátama nixĩ i Cori ya Tupanape̱xewa taxãũãchixü̃.
12 Rü ngẽxguma norü tomaepü̱x i ngunexü̃wa nanguxgu nawena nax duü̃xẽ ya yuxexü̃ tingõgüxü̃ rü name nixĩ i ngẽma dexá i wocaarü tanimacamaxã ãéü̃xü̃wa tügü tayauxune rü ñu̱xũchi ngẽxguma norü 7 i ngunexü̃wa nanguxgu rü wena tügü tayaxu nawa i ngẽma dexá. Natürü ngẽxguma taxũtáma norü tomaepü̱x i ngunexü̃gu rü norü 7 i ngunexü̃gu ngẽma dexáwa tügü tayaxunegu rü taxũtáma chope̱xewa tame.
13 Rü ngẽxguma texé yuxe ya duü̃xẽxü̃ ingógügu rü ñu̱xũchi tama ngẽma dexáwa tügü tayaxu̱xgu rü chopatamaxã chixexü̃ taxü. Rü ngẽmaca̱x name nax wüxicana itarüxoxü̃ i Iraétanüxü̃tanüwa. Erü tama ngẽma dexá i wocaarü tanimacamaxã ãéü̃xü̃maxã tamaxcuxü̃ne, rü ngẽmaca̱x chope̱xewa taxãũãchi.
14 Rü ngẽxguma wüxíe ĩpatagu yu̱xgu rü ñaa nixĩ i ngẽma chorü mugü. Rü guxü̃ma i duü̃xü̃gü ya yima ĩpataarü aixepewa ngẽxmagüxü̃ rü guxü̃ma i ngẽma nagu chocuxü̃ rü 7 i ngunexü̃ nixĩ i yaxãũãchixü̃ i chope̱xewa.
15 Rü guxü̃ma i nawechigü i tama rüngataxü̃güxü̃ rüe̱xna tama mea rüngataü̃xü̃ rü tá ta chope̱xewa nixãũãchi.
16 Yíxema duü̃xẽ ya nüxü̃ ingógüxe i wüxi i duü̃xü̃ i naanegu yama̱xgüxü̃ rüe̱xna ngẽxma yumarexe, rüe̱xna yuxetachina̱xãxü̃ ingógüxe, rüe̱xna wüxi i naxchique̱xexü̃ ingógüxe, rü 7 i ngunexü̃ tá chope̱xewa taxãũãchi.
17 Tümaarü mexẽẽca̱x ya yíxema chope̱xewa ãũãchíxe, rü name i wüxi ya naxpáü̃gu tanayaxu ya íxracü ya norü tanimaca i ngẽma woca i pecaduarü ütanüruxü̃ ixĩxü̃. Rü ñu̱xũchi natüacüwa yaxuxü̃ i dexámaxã taname.
18 Rü ngẽmawena, rü wüxi i duü̃xü̃ i chope̱xewa mexü̃ rü tá nanayaxu i wüxi i maxcuruxü̃ i ichópuchacüxü. Rü ngẽma dexá i wocaarü tanimacamaxã ãéü̃xü̃maxã tá nanamaxcu ya yimá ĩpata, rü nawechigü, rü ngẽma duü̃xü̃gü i ngéma ngẽxmagüxü̃. Rü ngẽxgumarüxü̃ tá ta nanamaxcuxü̃ne i ngẽma duü̃xü̃ i yuetachina̱xãxü̃ ingógüxü̃, rüe̱xna duü̃xẽ ya yuxe ya tüxü̃ yama̱xgüexü̃ ingógüxü̃, rüe̱xna duü̃xẽ ya tüechama yuxexü̃ ingógüxü̃, rüe̱xna yuetachique̱xexü̃ ingógüxü̃.
19 Rü ngẽma duü̃xü̃ i chope̱xewa mexü̃, rü tá tüxü̃ namaxcuxü̃ne ya yíxema duü̃xẽ ya ãũãchíxe i ngẽxguma norü tomaepü̱x rü norü 7 i ngunexü̃wa nanguxgu nawena nax ãũãchixü̃ tingõgüxü̃. Rü ngẽxguma ya yixema duü̃xẽ ya ãũãchíxe rü tá tügü tayauxchiru, rü tá tügü taxaiya. Natürü tauxta aixcüma tame ñu̱xmata nayáuane.
20 Rü yíxema duü̃xẽ ya ãũãchíxe ya tama tügü mexẽẽchaü̃xẽ, rü tanaxwa̱xe nax wüxicana itarüxoxü̃ i petanüwa erü chopataxü̃ taxãũãchixẽxẽ. Rü taxãũãchiecha, erü tama ngẽma dexá i mexẽẽruü̃maxã tamaxcuxü̃ne.
21 ¡Rü ngẽma mu rü guxü̃gutáma peyangu̱xẽxẽ! Rü yíxema toguxexü̃ maxcuxü̃nexe namaxã i ngẽma dexá i mexẽẽruxü̃ rü tanaxwa̱xe nax tügü tayauxchiruxü̃. Rü yíxema nüxü̃ ingógüxe i ngẽma dexá i mexẽẽruxü̃ rü Tupanape̱xewa taxãũãchi ñu̱xmata nayáuane.
22 Rü guxü̃ma i ta̱xacü i yíxema duü̃xẽ ya ãũãchíxe nüxü̃ ingógüxü̃ rü taxãũãchi, Rü yíxema ãũãchíxe ya duü̃xẽxü̃ ingógüxe rü tümarüxü̃ taxãũãchi ñu̱xmata nayáuane” —ñanagürü ga Tupana.
