Números 25:1-18
25 Rü yexguma Chitíü̃gu naxãchiü̃gügu ga Iraétanüxü̃, rü yema norü yatügü rü inanaxügüe ga Moáanecüã̱xgüarü ngexü̃gümaxã nax namaxẽxü̃.
2 Rü nüma ga ngexü̃gü rü norü tupanagüca̱x ínangutaque̱xegüxü̃wa yema yatügüxü̃ nagagü. Rü nüma ga yema Iraétanüxü̃ rü natanüwa nachibüe rü ñu̱xũchi yema Moáanecüã̱xgüarü tupanaxü̃ nicua̱xüü̃gü.
3 Rü yemaacü muxü̃ma ga yema Iraétanüxü̃ rü natanügu naxãgü nax Baá-peúxü̃ yacua̱xüü̃güxü̃. Rü yemaca̱x ga Cori ya Tupana rü poraãcü Iraétanüxü̃maxã nanu.
4 Rü yemaca̱x ga Tupana rü Moichéxü̃ ñanagürü: —¡Ẽcü nangutaque̱xexẽxẽ i guxü̃ma i ngẽma Iraétanüxü̃arü ãẽ̱xgacügü i nayauxgüxü̃ nax Baá-peúxü̃ yacua̱xüü̃güxü̃! ¡Rü chope̱xegu nadai i ngunecü rü ñu̱xũchi naixtanüwa natugüxẽxẽ i naxü̃negü nax guxü̃ma i duü̃xü̃gü nüxü̃ nadaugüxü̃ca̱x! Rü ngẽxgumaxica tá nixĩ i charüngüxmüxü̃ namaxã i ngẽma Iraétanüxü̃ —ñanagürü ga Tupana.
5 Rü yexguma ga nüma ga Moiché rü nanamu ga norü ngü̃xẽẽruü̃gü ga ãẽ̱xgacügü ga wüxitücumüchigü ga Iraétanüxü̃maxã icua̱xgüxü̃, rü ñanagürü nüxü̃: —Wüxichigü i pema rü tá penadai i ngẽma petanüxü̃chigü ixĩgüxü̃ i nügü ixãgüxü̃ nax Baá-peúxü̃ yacua̱xüü̃güxü̃ —ñanagürü.
6 Natürü yexguma Moichémaxã Tupanapataa̱xtüwa nangutaque̱xegügu ga Iraétanüxü̃ ga íxauxexü̃, rü yexgumayane rü wüxi ga Iraétanüxü̃ rü wüxi ga ngexü̃ ga Madiáü̃anecüa̱xmaxã yéma naxüpetü nax napatawa nagaãxü̃ca̱x.
7 Rü yexguma yema yatüxü̃ nada̱u̱xgu ga Fineéx ga Ereachá nane ga chacherdóte ga Aróü̃taxa, rü nixũgachi ga yema Iraétanüxü̃ íngutaque̱xegüxü̃wa. Rü nanayaxu ga norü wocae.
8 Rü nawe nangẽ ga yema yatü ga chixexü̃ üxü̃ ñu̱xmata norü pechicawa. Rü yexma nayatoxpetütanü ga yema taxre norü wocaemaxã. Rü yemaacü inarüxo ga yema da̱xaweane ga Iraétanüxü̃ namaxã yuexü̃.
9 Natürü 24,000 ga Iraétanüxü̃ nixĩ ga yema da̱xaweanemaxã yuexü̃.
10 Rü yemawena ga Cori ya Tupana rü Moichémaxã nüxü̃ nixu rü ñanagürü:
11 —Yimá Finéegagu nixĩ i charüngüxmüxü̃ namaxã i ngẽma Iraétanüxü̃ erü nüma ga Fineéx rü chauxrüxü̃ poraãcü nayanuxũ i ngẽma Iraétanüxü̃. Rü ngẽmaca̱x nixĩ i yáxna ngẽma duü̃xü̃gümaxã chaxĩnüxü̃, rü tama guxü̃ chadaixü̃.
12 25:12-13 ¡Rü Finéemaxã nüxü̃ ixu rü tá nüxü̃ chaxuneta nax nüma rü nataagü Iraétanüxü̃arü chacherdótegü yixĩgüxü̃ca̱x i guxü̃gutáma! Erü nüma rü cha̱u̱xca̱x nayanuxũ rü yemagagu nixĩ ga choxü̃ nangüxmüxẽẽxü̃ namaxã i ngẽma Iraétanüxü̃ —ñanagürü.
13 Nüü̃ nadau 25:12
14 Rü yema Iraétanüxü̃ ga ngecü ga Madiáü̃tanüxü̃maxã icatanüxü̃ rü Zimrí nixĩ ga naéga. Rü nüma rü Charú nane nixĩ. Rü nüma ga Charú rü wüxitücumü ga Chimeóü̃tanüxü̃arü ãẽ̱xgacü nixĩ.
15 Rü yéma ngecü ga Madiáü̃tanüxü̃ ixĩcü rü Cosbí nixĩ ga ngĩéga. Rü ngĩma rü Chúxacü iyixĩ. Rü nüma ga Chú rü wüxitücumü ga Madiáü̃tanüxü̃arü ãẽ̱xgacü nixĩ.
16 Rü Cori ya Tupana rü Moichémaxã nidexa rü ñanagürü:
17 25:17-18 —Madiáü̃tanüxü̃ca̱x ípeyaxüãchi rü penadai yerü nümagü rü Iraétanüxü̃ca̱x ínayachoõchi namaxã ga nacüma ga chixexü̃ nax Baá-peúxü̃ yacua̱xüü̃güxü̃ca̱x. Rü yema Cosbí ga Madiáü̃tanüxü̃arü ãẽ̱xgacüxacü rü yema ngunexü̃ ga nagu yéma chamuxü̃ ga yema da̱xaweane rü Baa-peúgagu wüxi ga wocaemaxã ngĩxü̃ nicatanü rü iyu —ñanagürü.
18 Nüü̃ nadau 25:17
