Números 27:1-23
27 Manachétanüxü̃tanüwa rü tayexma ga 5 ga tügüeya̱xgü ga Maará, rü Noá, rü Oxlá, rü Milcá, rü Tirchá. Guxemagü rü Cherupáxacügü tixĩ, rü nüma ga Cherofáx rü Éfe nane nixĩ, rü Éfe rü Garaáx nane nixĩ, rü Garaáx rü Maquí nane nixĩ, rü Maquí rü Manaché nane nixĩ, rü Manaché rü Yúche nane nixĩ.
2 Rü yema 5 ga nügüeya̱xgü rü guma ngutaque̱xepataü̃wa naxĩ nax Moichémaxã rü chacherdóte ga Ereachámaxã rü ñu̱xũchi natücumügüarü ãẽ̱xgacügümaxã yanadexagüxü̃ca̱x. Rü nüxü̃ ngĩgürügügü:
3 —Rü gumá tonatü rü chianexü̃gu nayu, natürü tüma rü tama yema Cori ya Tupanamaxã nuexü̃ ga Corétanüxü̃ tixĩ. Rü tümaarü chixexü̃gagutama tayu rü nataxuma ga tümane ga yatüxü̃.
4 Rü tama name nax ngẽmaca̱x iyanaxoxü̃ i tümatanüxü̃tanüwa i ngẽma tonatüéga nagagu nax nataxuxü̃ma i wüxi ya tümane i yatüxü̃. ¡Rü ngẽmaca̱x ngẽma tonatüenexẽgütanüwa rü toxna naxã i wüxi i naane! —ngĩgürügügü.
5 27:5-6 Rü nüma ga Moiché rü Cori ya Tupanamaxã nüxü̃ nixu ga yema ngecügüxü̃ ngupetüxü̃. Rü nüma ga Cori ya Tupana rü Moichéxü̃ nangãxü̃ rü ñanagürü:
6 Nüü̃ nadau 27:5
7 —Ngẽma Cherofáxacügü naxca̱x ínacagüxü̃ rü aixcüma name. ¡Ẽcü wüxi i naane ngĩxna naxãgü natanüwa i ngẽma ngĩnatüenexẽgü! ¡Rü yema naane ga ngĩnatü naxüxü̃ rü ngĩxnagü naxüe nax ngĩxrügü yaxĩgüxü̃ca̱x!
8 ¡Rü ñu̱xũchi Iraétanüxü̃maxã nüxü̃ ixu rü ngẽxguma texé taxuxü̃ma i tümane i yatüxü̃ tüxü̃́ ngẽmaãcüma tayu̱xgux, rü ngẽma tümaarü naane rü tümaxacü i ngexü̃na tá nixĩ inaxüxü̃!
9 Rü ngẽxguma taxuxü̃ma i naxacü i ngexü̃ nüxü̃́ ngẽxmagu ya yimá yucü, rü ngẽma norü naane rü naenexẽgüna tá naxǘ.
10 Rü ngẽxguma nataxuguma i naenexẽgü i yatüxü̃ ya yimá yucü, rü ngéma nanatüenexẽgüna tá naxǘ i ngẽma norü naane.
11 Rü ngẽxguma nataxuguma i ngẽma nanatüenexẽgü, rü ngẽma yexera natanüxü̃xüchi ixĩxü̃na tá naxǘ i ngẽma norü naane. Rü ngẽma cumaxã nüxü̃ chixuxü̃ rü wüxi i mu tá nixĩ i nagu naxĩxü̃ i ngẽma Iraétanüxü̃ —ñanagürü.
Moiché rü Yochuéxü̃ naxuneta nax nüxí Iraétanüxü̃maxã inacuáxü̃ca̱x
12 Nüma ga Cori ya Tupana rü Moichéxü̃ ñanagürü: —¡Daa ma̱xpǘne ya Abaríü̃gu naxĩnagü, rü nagu nadawenü i ngẽma naane i Iraétanüxü̃na chaxãxü̃!
13 Rü nawena nax nagu cudawenüxü̃ i ngẽma naane rü tá cuyu, rü yema nũxcümaü̃güxü̃ ga curü o̱xigü íngẽxmaxü̃wa tá cuxũ, cuenexẽ i Aróü̃rüxü̃.
14 Yerü yexguma chianexü̃ ga Chíü̃wa duü̃xü̃gü pemaxã nuegu rü dexáca̱x ínacagügu, rü pema i taxre rü tama chauga pexĩnüe. Rü yexguma nutawa peyagoxü̃chiüxẽẽgu ga dexá, rü tama duü̃xü̃güpe̱xewa choxü̃ picua̱xüü̃gü i choma nax chaxüünexü̃. Rü yema nixĩ ga Meribáarü dexá ga Cadéwa yexmaxü̃ ga chianexü̃ ga Chíü̃wa —ñanagürü ga Tupana.
15 Rü nüma ga Moiché rü Cori ya Tupanaxü̃ nangãxü̃ rü ñanagürü:
16 27:16-17 —Pa Cori Pa Tupanax, cuma nixĩ i guxü̃ma i duü̃xü̃güna cunaxãxü̃ i maxü̃. ¡Chanaxwa̱xe i nüxü̃ cuxuneta i wüxi i ãẽ̱xgacü nax nüxí curü duü̃xü̃gümaxã inacuáxü̃ca̱x rü guxü̃wama namaxã naxũxü̃ca̱x nax tama ñoma carnérugü i ngearü dauruü̃ã̱xgüxü̃rüxü̃ naxĩanemareãxü̃ca̱x —ñanagürü.
17 Nüü̃ nadau 27:16
18 Rü nüma ga Cori ya Tupana rü Moichéxü̃ nangãxü̃ rü ñanagürü: —Yochué i Núü̃ nane rü wüxi i yatü i chauãxẽ nawa ngẽxmaxü̃. ¡Rü naerugu naxǘxme̱x!
19 27:19-20 ¡Rü ngẽmawena rü chacherdóte ya Ereachápe̱xewa rü guxü̃ma i duü̃xü̃güpe̱xewa naga! ¡Rü ngéma duü̃xü̃güpe̱xewa rü Yuchuémaxã nüxü̃ ixu rü nüma tá nixĩ i duü̃xü̃gümaxã inacuáxü̃! Rü cumatama tá nixĩ i nüxna cunaxãxü̃ i ngẽma puracü nax ngẽmaãcü guxü̃ma i Iraétanüxü̃ naga ĩnüexü̃ca̱x.
20 Nüü̃ nadau 27:19
21 Natürü nüma i Yochué rü nanaxwa̱xe nax chacherdóte ya Ereacháxü̃tawa naxũxü̃. Rü nüma i Ereachá rü tá Uríü̃wa choxna naca nax ta̱xacü tá naxüxü̃ i Yochué. Rü nüma i Yochué tá nixĩ i ngẽma Iraétanüxü̃xü̃ namuxü̃ rü namaxã inacuáxü̃ i guxü̃ma i naxügüxü̃wa —ñanagürü.
22 Rü nüma ga Moiché rü yema Cori ya Tupana namuxü̃ãcüma nanaxü. Rü Yochuéca̱x naca rü chacherdóte ga Ereachápe̱xewa rü guxü̃ma ga yema duü̃xü̃güpe̱xewa nanaga.
23 Rü nüma ga Moiché rü Yochuéerugu naxǘxme̱x rü nüxna nanaxã ga yema puracü, yema Cori ya Tupana Moichéwa nüxü̃ ixuxü̃ãcüma.
