Números 29:1-40
29 Rü yimá norü 7 ya tauemacüarü nüxíraxü̃xü̃ i ngunexü̃gu rü cha̱u̱xca̱x tá pengutaque̱xegü i pemax. Rü cornétagügamaxã tá penaxunagü i ngẽma ngunexü̃. Rü ngẽma ngunexü̃gu rü taxuxü̃táma i puracü pexüe!
2 Rü cha̱u̱xca̱x tá peyama̱x rü peyagu i wüxi i wocaxacü i yatüxü̃, rü wüxi i carnéru i yatüxü̃, rü 7 i carnéruxacügü i iyatüxü̃ i wüxi ya taunecü nüxü̃́ ngẽxmaxü̃ i taxuwama chixexü̃. Rü ngẽmaãcü tá chauãẽgu nayatãũxü̃ i ngẽma naema, rü namaxã tá chataãxẽ.
3 29:3-4 Rü ngẽma wocaxacümaxã tá peyagu i 6 quíru i arína i chíxü̃maxã ñumüxü̃. Rü ngẽma carnérumaxã tá peyagu i 4 quíru i arína. Rü wüxichigü i carnéruxacümaxã tá peyagu i taxre i quíru i arína.
4 Nüü̃ nadau 29:3
5 29:5-6 Rü ñu̱xũchi cha̱u̱xca̱x tá peyama̱x rü peyagu i wüxi i chíbu i yatüxü̃ nax pexü̃́ nüxü̃ charüngümaxü̃ca̱x i perü chixexü̃gü. Rü ngẽma ãmaregü i guxü̃guma wüxichigü ya tauemacügu rü wüxichigü i ngunexü̃gu ípeguxü̃maxã tá wüxigu ípenagu i ãmaregü i arína rü bínu ngẽma pemaxã nüxü̃ chixuxü̃rüxü̃. Rü naema i ngẽma ãmaregü rü tá chauãẽgu nayatãũxü̃ rü namaxã tá chataãxẽ.
6 Nüü̃ nadau 29:5
Ngunexü̃ i nagu ãmaregü inaxãgüxü̃ nax Tupana duü̃xü̃güaxü̃́ nüxü̃ iyanarüngümaxü̃ca̱x i norü pecadugü
7 Rü yimátama 7 ya tauemacüarü 10 i ngunexü̃gu rü cha̱u̱xca̱x tá pengutaque̱xegü i pema. Rü ngẽma ngunexü̃gu rü taxũtáma pechibüe rü ñu̱xũchi taxuxü̃táma i puracü pexüe.
8 Rü cha̱u̱xca̱x tá peyama̱x rü peyagu i wüxi i wocaxacü i yatüxü̃, rü wüxi i carnéru i yatüxü̃. Rü tá penadai rü ípenagu i 7 i carnéruxacü i iyatüxü̃ i wüxi ya taunecü nüxü̃́ ngẽxmaxü̃ i taxuwama ichixexü̃. Rü ngẽma naema rü tá chauãẽgu nayatãũxü̃, rü namaxã tá chataãxẽ.
9 29:9-10 Rü ngẽma wocaxacü i piguxü̃maxã tá ípenagu i 6 quíru i arína i chíxü̃maxã ñumüxü̃. Rü ngẽma carnérumaxã tá ípenagu i 4 quíru i arína i chíxü̃maxã ñumüxü̃. Rü wüxichigü i carnéruxacümaxã tá ípenagu i taxre i quíru i arína i chíxü̃maxã ñumüxü̃.
10 Nüü̃ nadau 29:9
11 Rü ñu̱xũchi cha̱u̱xca̱x tá peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü pecadugü. Rü naétü i ngẽma ãmaregü i Pecaduarü Ütanüruü̃chigagu ípeguxü̃ rü naétü i ngẽma ãmaregü i wüxichigü i ngunexü̃gu ípeguxü̃ rü ngẽmaétü tá ta ípenagu i ngẽma ãmare ya yima 7 ya tauemacüarü 10 arü ngunexü̃gu ípeguxü̃. Rü arínamaxã rü bínumaxã tá nixĩ i ípenaguxü̃ i ngẽma chíbu nax ngẽmaãcü pexü̃́ nüxü̃ charüngümaxü̃ca̱x i perü pecadugü.
Ãmaregü i naixatünaxca̱x ya düxenügüarü petachigagu ixãxü̃
12 Rü yimá 7 ya tauemacüarü 15 i ngunexü̃gu rü cha̱u̱xca̱x tá pengutaque̱xegü. ¡Rü ngẽma ngunexü̃gu rü taxuxü̃táma i puracü pexüe! Rü 7 i ngunexü̃ tá chauégagu penaxü i ngẽma petachiga.
13 Rü ngẽma ngunexü̃ i nagu ipenaxügüxü̃ i ngẽma peta rü cha̱u̱xca̱x tá penadai rü ípenagu i 13 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃ i taxuwama ichixexü̃. Rü ngẽmaãcü tá chauãẽgu nayatãũxü̃ i ngẽma naema rü namaxã tá chataãxẽ
14 29:14-15 Rü wüxichigü i wocaxacü i ípeguxü̃maxã tá ípenagu i 6 quíru i arína i chíxü̃maxã ñumüxü̃. Rü wüxichigü i carnérumaxã tá ípenagu i 4 quíru i arína i chíxü̃maxã ñumüxü̃. Rü wüxichigü i carnéruxacümaxã tá ípenagu i taxre i quíru i arína i chíxü̃maxã ñumüxü̃.
15 Nüü̃ nadau 29:14
16 Rü ngẽma ãmaregü i wüxichigü i ngunexü̃gu cha̱u̱xca̱x peguxü̃ rü norü arínamaxã rü norü bínumaxã tá ípenagu. Rü ngẽmaétü tá cha̱u̱xca̱x peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃.
17 Rü ngẽma petaarü taxre i ngunexü̃gu rü cha̱u̱xca̱x tá penadai rü ípenagu i 12 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃ i taxuwama ichixexü̃.
18 Rü ngẽma wüxichigü i wocaxacü, rü carnéru, rü carnéruxacü, rü norü arínamaxã rü norü bínumaxã tá ípenagu, ngẽma choma pexü̃ chamuxü̃ãcüma.
19 Rü ngẽma ãmaregü i wüxichigü i ngunexü̃gu cha̱u̱xca̱x ípeguxü̃ rü norü arínamaxã rü norü bínumaxã tá ípenagu. Rü ngẽxgumarüxü̃ tá ta cha̱u̱xca̱x peyama̱x i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃.
20 Rü ngẽma norü tomaepü̱x i ngunexü̃gu rü cha̱u̱xca̱x tá penadai rü ípenagu i 11 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃ i taxuwama ichixexü̃.
21 Rü nae̱xpü̱x i wocaxacügü, rü carnérugü, rü carnéruxacügü rü norü arínamaxã, rü norü bínumaxã tá ípenagu, ngẽma choma pexü̃ chamuxü̃ãcüma.
22 Rü ngẽma ãmaregü i wüxichigü i ngunexü̃gu cha̱u̱xca̱x ípeguxü̃ rü norü arínamaxã rü norü bínumaxã tá ípenagu. Rü ngẽxgumarüxü̃ tá ta cha̱u̱xca̱x peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃.
23 Rü ngẽma norü ãgümücü i ngunexü̃gu rü cha̱u̱xca̱x tá penadai rü ípenagu i 10 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmaxü̃ i taxuwama ichixexü̃.
24 Rü nae̱xpü̱x i wocaxacügü, rü carnérugü, rü carnéruxacügü rü norü arínamaxã, rü norü bínumaxã tá ípenagu, ngẽma choma pexü̃ chamuxü̃ãcüma.
25 Rü ngẽma ãmare i wüxichigü i ngunexü̃gu cha̱u̱xca̱x ípeguxü̃ rü norü arínamaxã rü norü bínumaxã tá ípenagu. Rü ngẽxgumarüxü̃ tá ta cha̱u̱xca̱x peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü pecadugü.
26 Rü ngẽma norü wüxime̱e̱xpü̱x i ngunexü̃gu rü cha̱u̱xca̱x tá penadai rü ípenagu i 9 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmaxü̃ i taxuwama ichixexü̃.
27 Rü nae̱xpü̱x i ngẽma wocaxacügü, rü carnérugü, rü carnéruxacügü rü norü arínamaxã, rü norü bínumaxã tá ípenagu, ngẽma choma pexü̃ chamuxü̃ãcüma.
28 Rü ngẽma ãmaregü i wüxichigü i ngunexü̃gu cha̱u̱xca̱x ípeguxü̃ rü norü arínamaxã rü norü bínumaxã tá ípenagu. Rü ngẽxgumarüxü̃ tá ta cha̱u̱xca̱x peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃.
29 Rü ngẽma norü 6 i ngunexü̃gu rü cha̱u̱xca̱x tá penadai rü ípenagu i 8 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmaxü̃ i taxuwama ichixexü̃.
30 Rü nae̱xpü̱x i ngẽma wocaxacügü, rü carnérugü, rü carnéruxacügü rü norü arínamaxã, rü norü bínumaxã tá ípenagu, ngẽma choma pexü̃ chamuxü̃ãcüma.
31 Rü ngẽma ãmaregü i wüxichigü i ngunexü̃gu cha̱u̱xca̱x ípeguxü̃ rü norü arínamaxã rü norü bínumaxã tá ípenagu. Rü ngẽxgumarüxü̃ tá ta cha̱u̱xca̱x peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃.
32 Rü ngẽma norü 7 i ngunexü̃gu rü cha̱u̱xca̱x tá penadai rü ípenagu i 7 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃ i taxuwama ichixexü̃.
33 Rü nae̱xpü̱x i ngẽma wocaxacügü, rü carnérugü, rü carnéruxacügü rü norü arínamaxã, rü norü bínumaxã tá ípenagu, ngẽma choma pexü̃ chamuxü̃ãcüma.
34 Rü ngẽma ãmaregü i wüxichigü i ngunexü̃gu cha̱u̱xca̱x ípeguxü̃ rü norü arínamaxã rü norü bínumaxã tá ípenagu. Rü ngẽxgumarüxü̃ tá ta cha̱u̱xca̱x peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃.
35 Rü ngẽma norü 8 i ngunexü̃gu rü cha̱u̱xca̱x tá pengutaque̱xegü. ¡Rü ngẽma i ngunexü̃gu rü taxuxü̃táma i puracü pexüe!
36 Rü cha̱u̱xca̱x tá peyama̱x rü peyagu i wüxi i wocaxacü i yatüxü̃, rü wüxi i carnéru iyatüxü̃, rü tá penadai rü ípenagu i 7 i carnéruxacügü i iyatüxü̃ i wüxi ya taunecü nüxü̃́ ngẽxmaxü̃ i taxuwama ichixexü̃. Rü ngẽmaãcü tá chauãẽgu nayatãũxü̃ i ngẽma naema, rü namaxã tá chataãxẽ.
37 Rü ngẽma wocaxacü, rü carnéru, rü carnéruxacügü rü norü arínamaxã, rü norü bínumaxã tá ípenagu, ngẽma choma pexü̃ chamuxü̃ãcüma.
38 Rü ngẽma ãmaregü i wüxichigü i ngunexü̃gu cha̱u̱xca̱x ípeguxü̃ rü norü arínamaxã rü norü bínumaxã tá ípenagu. Rü ngẽxgumarüxü̃ tá ta cha̱u̱xca̱x peyama̱x rü peyagu i wüxi i chíbu i yatüxü̃ nax ngẽmaãcü pexü̃́ nüxü̃ charüngümaxü̃ca̱x i perü chixexü̃.
39 Rü ngẽma nixĩ i ãmaregü i choxna tá pexãgüxü̃ nagu i ngẽma ngunexü̃gü i marü nüxü̃ chaxunetagüxü̃. Rü naétüwa i ngẽma ãmaregü rü tá choxna penaxã i ngẽma ãmaregü i namaxã peyanguxẽẽxü̃ i wüxi i perü uneta i chomaxã nüxü̃ pixuxü̃. Rü ngẽxgumarüxü̃ tá ta choxna penaxã i ngẽma ãmaregü i perü ngúchaü̃maxã choxna pexãgüxü̃. Rü ngẽma ãmaregü i tá choxna pexãgüxü̃ nixĩ i ãmaregü i cha̱u̱xca̱x pedaixü̃ rü piguxü̃, rü ãmaregü i arína rü bínu, rü ãmaregü i cha̱u̱xca̱x pedaixü̃ rü piguxü̃ nax pemaxã icharüngü̃xmüxü̃xü̃ca̱x —ñanagürü ga Tupana.
40 Rü nüma ga Moiché rü Iraétanüxü̃maxã nüxü̃ nixu ga guxü̃ma ga yema Cori ya Tupana namaxã nüxü̃ ixuxü̃.
