Números 3:1-51
3 3:1-2 Rü yexguma ma̱xpǘne ga Chinaíwa Cori ya Tupana Moichémaxã yadexaxgu, rü nüma ga Aróü̃ rü ãgümücü ga nanegü nüxü̃́ nayexma. Rü guma nanegü nixĩgü ga Nadáx ga yacü, rü Abiú, rü Ereachá, rü Itamá.
2 Nüü̃ nadau 3:1
3 Rü wüxichigü ga yema ãgümücü ga nanegü rü nüxü̃ naxunetagü rü nayabaerugü nax Chacherdótegü yixĩgüxü̃ca̱x.
4 Natürü ga Nadáx rü Abiú rü Chinaíarü chianexü̃gu nayue. Rü Tupana rü nüxna nanade ga norü maxü̃gü, yerü tama Tupana naxwa̱xexü̃ãcüma Tupanapatawa ínanagugü ga pumarate̱xe. Rü yema taxre rü taguma nixane. Rü yemaca̱x Ereachá rü Itamáxicatama nixĩ ga Chacherdóte ixĩgüxü̃. Rü nanatü ga Aróü̃me̱xẽwa nayexmagü.
5 3:5-6 Rü Tupana rü Moichémaxã nidexa rü ñanagürü: —¡Naxca̱x nangema i Lebítanüxü̃ nax Chacherdóte i Aróü̃xü̃arü ngü̃xẽẽruü̃gü yaxĩgüxü̃ca̱x!
6 Nüü̃ nadau 3:5
7 3:7-8 Rü nümagü i Lebítanüxü̃ rü tá nüxna nadaugü ya chopata rü guxü̃ma i naxpáü̃gü rü norü ngẽmaxü̃gü i nawa ngẽxmagüxü̃. Rü tá Aróü̃xü̃ narüngü̃xẽxẽ nawa i guxü̃ma i chopataarü puracü rü tá nüxü̃ narüngü̃xẽxẽ i ngẽma Iraétanüxü̃ i ngéma choxü̃ yarücua̱xüü̃güxü̃.
8 Nüü̃ nadau 3:7
9 3:9-10 Rü natanüwa i guxü̃ma i Iraétanüxü̃ rü nade i ngẽma Lebítanüxü̃ nax ngẽmagü Aróü̃xü̃ rü nanegüxü̃ rü nataagüxü̃ rüngü̃xẽẽgüxü̃ca̱x. Rü nüma i Aróü̃ rü nanegü rü nataagüxicatama nixĩ i chacherdótegü ixĩgüxü̃. Rü yíxema Chacherdótewa tügü nguxẽẽxe i tama Aróü̃tanüxü̃ ixĩxẽ rü tá tayu —ñanagürü ga Tupana.
10 Nüü̃ nadau 3:9
Lebítanüxü̃ rü Tupana nanade nax norü puracü naxügüxü̃ca̱x
11 Rü nüma ga Cori ya Tupana rü Moichémaxã nidexa rü ñanagürü:
12 3:12-13 —Rü Iraétanüxü̃tanüwa chanade i Lebítanüxü̃ nachicüxü i ngẽma nüxíraxü̃xü̃ i nane i wüxichigü i ĩpatacüã̱xwa. Rü nümagü rü chorü nixĩgü, erü guxü̃ma i nüxíraxü̃güxü̃ i nanegü rü chorü nixĩgü. Rü yexguma chanadaixgu ga nüxíraxü̃güxü̃ ga nanegü ga Equítuanecüã̱xgü rü choma rü chaugüaxü̃́ íchayaxügüxẽxẽ ga yema nüxíraxü̃güxü̃ ga nanegü ga Iraétanüxü̃ rü yema nüxíraxü̃güxü̃ ga naxü̃naxacügü. Rü ngẽmaca̱x choxrü nixĩgü. Rü choma nixĩ ya Cori ya Iraétanüxü̃arü Tupana chixĩxü̃ —ñanagürü.
13 Nüü̃ nadau 3:12
Nayaxugügü ga Lebítanüxü̃
14 Tupana rü Moichémaxã nidexa ga Chinaíarü chianexü̃wa rü ñanagürü:
15 —¡Yaxugü i Lebítanüxü̃ i wüxichigü ya ĩpatacüã̱xchigü natanüxü̃chigümaxã! ¡Rü yawǘgü i guxü̃ma i Lebítanüxü̃ i yatüxü̃ i wüxi ya tauemacü rüe̱xna yexera nüxü̃́ ngẽxmaxü̃! —ñanagürü.
16 Rü Moiché rü nanaxü ga yema. Rü nayaxugü ga yema Lebítanüxü̃ yema Cori ya Tupana namaxã nüxü̃ ixuxü̃ãcü.
17 Rü ñaa nixĩ ga Lebí nanegü: Guerchóü̃ rü Queáx rü Merarí.
18 Rü Guerchóü̃ nanegü nixĩ ga Lixní rü Chimí. Rü nümagü rü nanegü rü nataagü rü Guerchóü̃tanüxü̃ nixĩgü.
19 Rü Queáx nanegü nixĩ ga Amráü̃, rü Ichá rü Ebróü̃ rü Uchié. Rü nümagü rü nanegü rü nataagü rü Queáxtanüxü̃ nixĩgü.
20 Rü Merarí nanegü nixĩ ga Mári rü Muchí. Rü nümagü rü nanegü rü nataagü rü Merarítanüxü̃ nixĩgü. Rü guxü̃ma ga yema Lebí nanegü rü nataagü rü Lebítanüxü̃ nixĩgü.
21 Rü yema Lixnítanüxü̃ rü Chimítanüxü̃, rü yemagü rü Guerchóü̃tanüxü̃ nixĩgü.
22 Rü guxü̃wama ga yema Guerchóü̃tanüxü̃ ga iyatüxü̃ ga wüxi ga tauemacü rüe̱xna yexera nüxü̃́ yexmagüxü̃ rü niwǘgü. Rü 7,500 nixĩ ga norü mu.
23 Rü yema Guerchóü̃tanüxü̃ rü Tupanapataarü oésteguama nixĩ ga napegüxü̃ ga Tupanapataca̱xwena.
24 Rü yema Guerchóü̃tanüxü̃maxã icuáxü̃ nixĩ ga Ereachá ga Laé nane.
25 3:25-26 Rü nümagü ga Guerchóü̃tanüxü̃ nixĩ ga nüxna nadaugüxü̃ ga Tupanapata, rü norü tüétüruü̃gü, rü yema tüétüruü̃gü ga naxchaxmünaxca̱x, rü yema Tupanapataarü ĩã̱xarü tütaruxü̃, rü yema naã̱xtüarü ĩã̱xarü tütaruxü̃, rü yema naxchirutachinügü ga namaxã ínapoxeguxü̃ ga naa̱xtü ga Tupanapata rü ãmarearü guruxü̃, rü guxü̃ma ga yema natü̱xügü ga yema poxeguxü̃.
26 Nüü̃ nadau 3:25
27 Rü yema Amráü̃tanüxü̃, rü Ichátanüxü̃, rü Ebróü̃tanüxü̃, rü Uchiétanüxü̃, rü yemagü rü Queáxtanüxü̃ nixĩgü.
28 Rü guxü̃wama ga yema Queáxtanüxü̃ ga iyatüxü̃ ga wüxi ga tauemacü rüe̱xna yexera nüxü̃́ yexmagüxü̃ rü niwǘgü. Rü 8,600 nixĩ ga norü mu. Rü nümagü ga Queáxtanüxü̃ nixĩ ga Tupanapataarü dauruxü̃.
29 Rü nümagü rü Tupanapataarü súrguama nixĩ ga napegüxü̃.
30 Rü yema Queáxtanüxü̃maxã icuáxü̃ nixĩ ga Erichapáü̃ ga Uchié nane.
31 Rü nüma ga Queáxtanüxü̃ rü naxme̱xwa nayexma ga yema baú ga üünexü̃ ga Tupanaarü mugü nagu nucuxü̃, rü yema mecha ga paũ ga üünexü̃ nagu nuxü̃, rü yema omüpaweru, rü yema ãmaregüarü guruü̃gü, rü yema norü yemaxü̃gü ga namaxã Tupanaxü̃ yacua̱xüü̃güxü̃, rü yema norü tüyemachiãruxü̃, rü ñu̱xũchi guxü̃ma ga yema togü ga Tupanapataarü yemaxü̃gü.
32 Rü Ereachá ga chacherdóte ga Aróü̃ nane nixĩ ga namaxã icuáxü̃ ga guxü̃ma ga Lebítanüxü̃. Rü naétü namaxã inacua̱x ga yema Tupanapatana daugüxü̃.
33 Rü yema Máritanüxü̃, rü Muchítanüxü̃, rü yemagü nixĩ ga Merarítanüxü̃.
34 Rü guxü̃wama ga yema Merarítanüxü̃ ga iyatüxü̃ ga wüxi ga tauemacü rüe̱xna yexera nüxü̃́ yexmagüxü̃ rü niwǘgü. Rü 6,200 nixĩ ga norü mu.
35 Rü yema Merarítanüxü̃maxã icuáxü̃ nixĩ ga Churié ga Abiyáinane. Rü yema Merarítanüxü̃ rü Tupanapataarü nórteguama nixĩ ga napegüxü̃.
36 3:36-37 Rü nüma ga Merarítanüxü̃ rü naxme̱xwa nayexma ga yema Tupanapataarü mürapewagü, rü yema naxpawerugü i norü mürapewagüarü taixẽẽruü̃gü, rü naparagü, rü nachipatüparagü namaxã ga guxü̃ma ga norü yemaxü̃gü, rü guxü̃nema ga naã̱xtüarü poxeguxü̃paragü rü yema nachipatüparagü, rü natü̱xügü, rü yema natü̱xügü nagu ngagüxü̃ ga tairuü̃gü.
37 Nüü̃ nadau 3:36
38 Rü nüma ga Moiché rü Aróü̃ rü nanegümaxã Tupanapatape̱xearü ésteguama nixĩ ga napegüxü̃. Rü yema nachica ga nagu napegüxü̃ rü nape̱xewa nayexma ga guma tügümüne ga napata ga nawa Moiché Tupanamaxã yadexaxü̃ne. Rü nümagü ga Moiché rü Aróü̃ rü nanegü rü nüxna nadaugü ga guma Tupanapata naégagu ga Iraétanüxü̃. Rü yexguma texé chacherdótearü puracü uxgu natürü tama chacherdóte tixĩxgu rü tüxü̃ nima̱xgü.
39 Rü nüma ga Moiché rü Aróü̃ rü nayanguxẽẽgü ga yema Tupana namuxü̃. Rü nügütücumüchigüacü nayaxugügü ga yema Lebítanüxü̃ ga iyatüxü̃ ga wüxi ga tauemacü rüe̱xna yexera nüxü̃́ yexmagüxü̃. Rü guxü̃wama rü 22,000 nixĩ ga norü mu.
Tupana nanade ga nüxíra buexü̃ ga Iraétanüxü̃ nanegü
40 Rü Tupana rü Moichéxü̃ ñanagürü: —¡Yaxugü rü yawǘgü i naégagü i ngẽma Iraétanüxü̃ nanegü i nüxíra buexü̃ i wüxi ya tauemacü rüe̱xna yexera nüxü̃́ ngẽxmagüxü̃!
41 ¡Rü choxü̃́ yadexechi i ngẽma Lebítanüxü̃ nachicüxü i ngẽma Iraétanüxü̃ nanegü i nüxíra buexü̃! ¡Rü ngẽxgumarüxü̃ ta choxü̃́ yadexechi i ngẽma Lebítanüxü̃arü naxü̃nagü nachicüxü i ngẽma Iraétanüxü̃arü naxü̃nagü i nüxíra buexü̃! Rü choma nixĩ i Iraétanüxü̃arü Tupana chixĩxü̃ —ñanagürü.
42 Rü nüma ga Moiché rü yema Tupana namaxã nüxü̃ ixuxü̃ãcü nanaxü. Rü nayaxugü ga yema Iraétanüxü̃ nanegü ga nüxíra buexü̃ ga wüxichigü ga ĩpatawa.
43 Rü guxü̃wama ga yema Iraétanüxü̃ nanegü ga nüxíra buexü̃ ga wüxi ga tauemacü rüe̱xna yexera nüxü̃́ yexmagüxü̃ rü iwǘgüxü̃ rü 22,273 nixĩ ga norü mu.
44 Rü yemawena ga Tupana rü Moichéxü̃ ñanagürü:
45 —¡Ngẽma Lebítanüxü̃ rü choxü̃́ nade nachicüü i ngẽma Iraétanüxü̃ nanegü i nüxíra buexü̃! Rü ngẽxgumarüxü̃ ta i ngẽma Lebítanüxü̃arü naxü̃nagü ¡rü choxü̃́ nade nachicüxü i ngẽma Iraétanüxü̃arü naxü̃nagü i nüxíra buexü̃! Erü ngẽma Lebítanüxü̃ rü choxrü nixĩgü. Rü choma nixĩ ya Tupana chixĩxü̃.
46 3:46-47 Natürü ngẽma Lebítanüxü̃xü̃ narümumae i ngẽma Iraétanüxü̃ nanegü i nüxíra buexü̃. Rü ngẽma nax naxütanügüãxü̃ca̱x i ngẽma 273 i Iraétanüxü̃ nanegü i nüxíra buexü̃, rü wüxichigü i duü̃xü̃xü̃tawa naxca̱x ínaca i wüximeepü̱xtachinü ya diẽru ya chopataarü yáruü̃wa 11 gramu yáxe ya wüxitachinüchigü, nax ngẽmaãcü naxütanügüãxü̃ca̱x.
47 Nüü̃ nadau 3:46
48 ¡Rü Aróü̃na rü nanegüna tüxü̃ nana ya yíxema diẽru nax yíxemamaxã naxütanügüãxü̃ca̱x i ngẽma 273 i Iraétanüxü̃ nanegü i nüxíra buexü̃! —ñanagürü ga Tupana.
49 Rü nüma ga Moiché rü tüxü̃ nade ga guxema diẽru natanüwa ga yema Iraétanüxü̃ nax naxütanügüãxü̃ca̱x ga yema nanegü ga íyaxüxüchixü̃ ga nüxíra buexü̃.
50 Rü tüxü̃ nade ga 1,365 tachinü ga diẽru ga Tupanapataarü yáruü̃wa 11 gramu iyachigüxe.
51 Rü yemawena rü Aróü̃na rü nanegüna tüxü̃ nana ga guxema diẽru, yema Cori ya Tupana nüxü̃ ixuxü̃ãcü.
