Números 30:1-16
30 30:1-2 Moiché rü yema ãẽ̱xgacügü ga Iraétanüxü̃maxã icua̱xgüxü̃xü̃ ñanagürü: —Cori ya Tupana rü ñanagürü: “Ngẽxguma texé tümamücümaxã itaxunetagu rüe̱xna chauégagu itaxunetagu rü tanaxwa̱xe nax aixcüma tayanguxẽẽxü̃ i tümaarü uneta, rü tanaxüxü̃ i guxü̃ma i ngẽma nüxü̃ tixuxü̃.
2 Nüü̃ nadau 30:1
3 30:3-4 Rü ngẽxguma wüxi ya pacü i ngĩnatüme̱xẽwatama ngẽxmacü rü Cori ya Tupanamaxã wüxi i uneta naxü̱xgu rüe̱xna ta̱xacüca̱x namaxã inaxügagu, rü ngẽxguma ngĩnatü nüxü̃ cua̱xgux i ngẽma ngĩrü uneta rüe̱xna ngĩrü üga rü taxu ñamaregu ya ngĩnatü, rü inaxwa̱xe nax yangu̱xẽẽãxü̃ i ngẽma ngĩrü uneta rüe̱xna ngẽma ngĩrü üga.
4 Nüü̃ nadau 30:3
5 Natürü ngẽxguma ngĩnatü nüxü̃ cua̱xgu, rü tama tanaxwa̱xegu nax yanguxẽẽãxü̃ca̱x i ngẽma ngĩrü uneta rüe̱xna ngĩrü üga, rü ngẽxguma i ngĩma i ngẽma pacü rü marü taxũtáma yanguxẽxẽ i ngẽma ngĩrü uneta rüe̱xna ngẽma ngĩrü üga. Rü ngẽma nax tama tanaxwa̱xexü̃ ga ngĩnatü nax yanguxẽẽãxü̃ca̱x, rü nüma ya Cori ya Tupana rü taxũtáma ngĩxü̃ nanaxwa̱xe nax yangu̱xẽẽãxü̃.
6 30:6-7 Rü ngẽxguma wüxi ya nge marü Cori ya Tupanamaxã inaxunetagu rüe̱xna ñu̱xãẽãcü ta̱xacüca̱x namaxã inaxügagu, rü ngẽmawena naxãtegu rü ngẽxguma ngẽma ngĩte nüxü̃ cua̱xgu rü taxu ñamaregu ngĩxü̃, rü inaxwa̱xe nax yangu̱xẽẽãxü̃ i ngẽma ngĩrü uneta rüe̱xna ngẽma ngĩrü üga.
7 Nüü̃ nadau 30:6
8 Natürü ngẽxguma ngĩte nüxü̃ cua̱xgu rü tama nanaxwa̱xegu nax yanguxẽẽãxü̃ i ngẽma ngĩrü uneta rüe̱xna ngẽma ngĩrü üga, rü ngẽxguma i ngĩma i ngẽma nge rü marü taxũtáma yanguxẽxẽ i ngẽma ngĩrü uneta rüe̱xna ngẽma ngĩrü üga, rü nüma ya Cori ya Tupana rü taxũtáma ngĩxü̃ nanaxwa̱xe nax yangu̱xẽẽãxü̃.
9 Rü ngẽxguma wüxi i yutecü rüe̱xna wüxi i ta̱xtecü wüxi i uneta naxü̱xgu, rü inaxwa̱xe nax yanguxẽẽãxü̃ i guxü̃ma i ngẽma unetagü i nüxü̃ yaxuxü̃.
10 30:10-11 Natürü ngẽxguma wüxi i nge i ãtecü i ngĩtechiü̃wa nangẽxmayane wüxi i uneta naxü̱xgu rüe̱xna Tupanaégagu ta̱xacüca̱x inaxügagu, rü ngẽxguma ngĩte nüxü̃ cua̱xgu rü taxu ñamaregu naxca̱x i ngẽma ngĩrü uneta rüe̱xna ngẽma ngĩrü üga, rü ngẽxguma i ngĩma rü inaxwa̱xe nax yangu̱xẽẽãxü̃ i ngẽma ngĩrü uneta rüe̱xna ngẽma ngĩrü üga.
11 Nüü̃ nadau 30:10
12 Natürü ngẽxguma ngĩte nüxü̃ cua̱xgu rü iyanaxoxẽẽã̱xgu i ngẽma ngĩrü uneta rüe̱xna ngẽma ngĩrü üga, rü ngẽxguma i ngĩma i ngẽma nge rü marü taxũtáma yanguxẽxẽ i ngẽma ngĩrü uneta rüe̱xna ngẽma ngĩrü üga erü ngĩte rü marü inayanaxoxẽxẽ. Rü nüma ya Cori ya Tupana rü taxũtáma ngĩxü̃ nanaxwa̱xe nax yanguxẽẽãxü̃.
13 Rü ngẽma ngĩte rü naxme̱xwa nangẽxma nax yanguxẽẽãxü̃ rüe̱xna yanaxoxẽẽãxü̃ i ngẽma ngĩrü uneta rüe̱xna ngẽma ngĩrü üga i Tupanamaxã naxüxü̃ i ngẽma naxma̱x.
14 Rü ngẽxguma ngĩte taxu ñamaregu rü ngẽmaãcü ñuxre i ngunexü̃ ngupetümaregu, rü ngẽmawa ngĩxü̃ nüxü̃ nacua̱xẽxẽ nax namexü̃ nax yanguxẽẽãxü̃ i guxü̃ma i ngĩrü unetagü rü ügagü i nüxü̃ yaxuxü̃ i ngẽma naxma̱x.
15 Natürü ngẽguma ngĩte nüxü̃ nacua̱xgu i ngĩrü uneta rüe̱xna ngĩrü üga, rü ñuxre i ngunexü̃ ngupetüwena iyanaxoxẽẽã̱xgu, rü ngẽxguma rü ngĩtewa nixĩ i nangẽxmaxü̃ i ngẽma guxcha nax tama yangu̱xẽẽãxü̃ i ngẽma ngĩrü uneta rüe̱xna ngĩrü üga” —ñanagürü.
16 Rü yemagü nixĩ ga yema mugü ga Cori ya Tupana Moichémaxã nüxü̃ ixuxü̃ nachiga nax ñuxãcü tá naxma̱xmaxã inacuáxü̃ i wüxi i yatü, rü ngẽxgumarüxü̃ ta i wüxi i papa rü ñuxãcü tá ngĩmaxã inacuáxü̃ i naxacü i napatawa ngẽxmacü.
