Números 35:1-34
35 Rü yexguma Moiché Moáarü doxonexü̃wa nayexmagu ga Yudáü̃cutüwa ga Yericúarü to̱xma̱xtawa, rü Cori ya Tupana namaxã nidexa rü ñanagürü nüxü̃:
2 —¡Namaxã nüxü̃ ixu i Iraétanüxü̃ rü ngẽma naanegü i nüxna ixüchigüxü̃wa rü ñuxre ya ĩanegü ya ngẽma naanewa ngẽxmagüne rü Lebítanüxü̃güna tá nanana nax yimáwa namaxẽxü̃ca̱x! ¡Rü ngẽxgumarüxü̃ ta namaxã nüxü̃ ixu nax nüxna nanaxãxü̃ca̱x i ngẽma wocachitaü̃gü ya yimá ĩanegü namaxã íxümaeguãchixü̃!
3 Rü yimá ĩanegüwa tá namaxẽ i ngẽma Lebítanüxü̃, rü ñu̱xũchi ngẽma wocachitaü̃güwa tá nanayaexẽxẽ i norü wocagü rü toamachigü i naxü̃nagü.
4 Rü ngẽma wocachitaü̃gü i Lebítanüxü̃güna penaxü̃ nax norü woca nawa nayaexẽẽxü̃ca̱x rü yima ĩanearü poxeguxü̃arü guxü̃cüwawa rü 450 metruwa ta inaxügü.
5 Rü guxü̃ma i nacüwagü i ngẽma naane rü tá nawüxigumare. Rü ngẽma wüxicüwawachigü rü 900 metru tá nixĩ i norü ma̱x. Rü éstewaama, rü oéstewaama, rü nórtewaama, rü súrwaama rü tá nawüxigumare i ngẽma norü ma̱x. Rü nüma ya yimá ĩane rü ngẽma wocachitaü̃güarü ngãxü̃wa tá nangẽxma. Rü ngẽma wocachitaü̃gümaxã tá ínaxümaeguãchi.
Iraétanüxü̃arü ĩanegü ya cu̱xchicaruxü̃ ixĩgüne
6 Rü yima ĩanegü ya Lebítanüxü̃güna naxãgünetanüwa rü 6 ya ĩanegü tá nixĩ ya cu̱xchicaruü̃gü ixĩgüne nax ngẽmaãcü ngẽxma tayarücúxü̃ca̱x ya yíxema máetaxe. Rü naétü ya yimá 6 ya ĩanegü, rü nai ya 42 ya ĩanegü tá Lebítanüxü̃na naxãgü.
7 Rü guxü̃wama rü 48 ya ĩanegü tá nixĩ i Lebítanüxü̃na naxãgüxü̃ne namaxã i norü wocachitaü̃gü.
8 Rü ngẽxguma wüxichigü i Iraétücumü nayauxgügu i norü naane, rü ngẽma norü naanewachigütama tá Lebítanüxü̃na nanaxãgü ya ĩanegü. Rü ngẽxgumarüxü̃ nax nañuxraxü̃xü̃ i norü naanearü ta rü ñuxre ya ĩanegü nüxü̃́ ngẽxmaxü̃ i norü naanewa rü tá Lebítanüxü̃na nanaxãgü ya ĩanegü. Rü ngẽma natücumü i yexera rütamaearü naaneã̱xgüxü̃ rü yexera muxü̃ne ya ĩanegü ta nüxna naxãgüchigü. Rü ngẽma natücumü i rüxíxramaearü naaneã̱xgüxü̃ rü noxretátama ya ĩanegü tá nüxna nixãchigü —ñanagürü.
Ĩanegü ya cu̱xchicaruü̃gü
9 Rü nüma ya Cori ya Tupana rü Moichéxü̃ ñanagürü:
10 35:10-11 —¡Iraétanüxü̃maxã nüxü̃ ixu i ñaa ore!: “Rü ngẽxguma natü i Yudáü̃ pichoü̃gu nax Canaáü̃anegu pechocuxü̃ca̱x, rü penaxwa̱xe nax ñuxre ya ĩanegüxü̃ tá pexunetaxü̃ cu̱xchicaruü̃gü nax ngẽmaãcü yima ĩanegügu tayarücúxü̃ca̱x ya yíxema máetacüraxü̃xe.
11 Nüü̃ nadau 35:10
12 Rü ngẽxma tá nixĩ i tayarücúxü̃ ya yíxema máetacüraxü̃xe naxcha̱xwa i ngẽma yuxü̃tanüxü̃ i ütanüchaü̃güxü̃. Rü taxũtáma yaxtacüma tüxü̃ nima̱xgü naxü̃pa nax duü̃xü̃güpe̱xewa tüxü̃ nagagüxü̃ nax mea tüxna nacagüxü̃ca̱x rü nüxü̃ tixuxü̃ca̱x nax tama woetama tayamáxü̃.
13 35:13-14 Rü yima ĩanegü ya Tupana pexna naxãgünetanüwa rü 6 tá nixĩ ya cu̱xchicaruü̃gü ixĩgüne. Rü 3 tá nixĩ i Yudáü̃arü éstewa ngẽxmagüne, rü 3 tá nixĩ i Canaáü̃anewa ngẽxmagüne.
14 Nüü̃ nadau 35:13
15 Rü yima 6 ya ĩanegü rü cu̱xchicaruü̃gü tá nixĩ naxca̱x i ngẽma Iraétanüxü̃, rü ñu̱xũchi ngẽma to i nachixü̃anecüã̱xgü i marü ñuxgumama petanügu ãxchiü̃güxü̃ rü ngẽma ngexwaca petanügu ãxchiü̃güxü̃. Rü ngẽxma tá nixĩ i yanacúxü̃ i ngẽma máetacüraxü̃xü̃.
16 Rü ngẽxguma texé wüxi i fierumaxã toguxexü̃ yapi̱xẽẽgu, rü tayu̱xgu ya yíxema yapíxe, rü ngẽma rü wüxi i máeta nixĩ. Rü yíxema máetaxe rü noxtacüma tá yu tümamaxã naxuegugü.
17 Rü ngẽxguma texé nutamaxã toguxexü̃ yapi̱xẽẽgux, rü tayu̱xgu ya yíxema yapíxe, rü ngẽma rü wüxi i máeta nixĩ. Rü yíxema máetaxe rü noxtacüma tá yu tümamaxã naxuegugü.
18 Rü ngẽxguma texé wüxi i naimaxã toguxexü̃ yapi̱xẽẽgux, rü tayu̱xgu ya yíxema yapíxe, rü ngẽma rü wüxi i máeta nixĩ. Rü yíxema máetaxe rü noxtacüma tá yu tümamaxã naxuegugü.
19 Rü ngẽma tümatanüxü̃ ya yíxema yuxe, rü tá nayama̱x i ngẽma tüxü̃ imáxü̃ ega nüxü̃ iyangauxgu.
20 35:20-21 Rü ngẽxguma tümachi taxaiãcüma texé toguxexü̃ cuxnetagu, rüe̱xna nuãcüma texé ta̱xacümaxã tüxü̃ ímuxuchigu, rüe̱xna tümachi taxaiãcüma texéxü̃ tidagügu rü tayu̱xgux, rü ngẽxguma ya yíxema máetaxe rü noxtacüma tá yu tümamaxã naxuegugü, erü wüxi i máetaxü̃ tixĩ. Rü ngẽma tümatanüxü̃ ya yíxema yuxe, rü tá nayama̱x i ngẽma tüxü̃ imáxü̃ ega ngextá nüxü̃ nanga̱u̱xgu.
21 Nüü̃ nadau 35:20
22 35:22-23 Natürü ngẽxguma wüxíe toguxexü̃ cuxnetacüraxü̃gu rü tayu̱xgu rü taxũtáma tümagagu nixĩ. Rü ngẽxguma wüxíe ta̱xacü tüxü̃ ñaxcüraxü̃gu rü tayu̱xgu rü taxũtáma tümagagu nixĩ. Rü ngẽxguma wüxíe togueétügu nuta tanguxẽẽcüraxü̃gu, rü tayu̱xgu, rü taxũtáma tümagagu nixĩ. Erü tamachire̱x tügüarü uanü tixĩ rü tama nagu tarüxĩnüãcüma tüxü̃ tayuxẽxẽ.
23 Nüü̃ nadau 35:22
24 Rü ngẽma ĩanecüã̱x i duü̃xü̃gü rü ngẽma mugü nüxü̃ ixuxü̃rüxü̃ tá naétüwa nachogü i ngẽma máetacüraxü̃xü̃ nape̱xewa i ngẽma yuxü̃tanüxü̃ i yamáxchaü̃xü̃.
25 Rü ngẽmaãcü i ngẽma duü̃xü̃gü rü tá naétüwa nachogü i ngẽma máetacüraxü̃xü̃ nape̱xewa i ngẽma yuxü̃tanüxü̃ i yamáxchaü̃xü̃. Rü nüma i duü̃xü̃gü rü tá nanamugü nax yima ĩane ya nagu yanacúxü̃neca̱x nataeguxü̃. Rü nüma i ngẽma máetacüraxü̃xü̃ rü nanaxwa̱xe nax ngéma nangẽxmaechaxü̃ ñu̱xmatáta nayu̱x ya yimá chacherdótegüarü ãẽ̱xgacü ya chíxü̃maxã nabaerucü.
26 35:26-27 Natürü ngẽxguma ngẽma máetacüraxü̃xü̃ ínaxũxũxgu nawa i norü naane ya yima ĩane ya cu̱xchicaxü̃ rü ngẽxma düxétügu nüxü̃ nanga̱u̱xgu rü yamáagu i ngẽma ütanüchaü̃xü̃, rü taxuxü̃táma chixexü̃ naxü.
27 Nüü̃ nadau 35:26
28 Rü ngẽmaca̱x i ngẽma máetacüraxü̃xü̃ rü nanaxwa̱xe nax yimá ĩane ya cu̱xchicaxü̃wa nangẽxmaechaxü̃ ñu̱xmatáta nayu̱x ya yima chacherdótegüarü ãẽ̱xgacü. Rü ngẽmawena rü marü name nax noxrütama naaneca̱x nataeguxü̃.
29 Rü ngẽma cumaxã nüxü̃ chixuxü̃ rü pexca̱x rü penegüca̱x rü petaagüca̱x rü wüxi i mu tá nixĩ i nagu pexĩxü̃ i ngextá ípemaxẽxü̃wa.
Mugü nachiga nax ñuxãcü tá napoxcuxü̃ i máetaxü̃
30 Rü ngẽxguma ñuxre i duü̃xü̃gü nüxü̃ da̱u̱xgu rü nüxü̃ ixuxgu nachiga i wüxi i máetaxü̃, rü ngẽxgumaxicatama tá nixĩ nax yu namaxã pexueguxü̃ i wüxi i máetaxü̃. Natürü ngẽxguma wüxitama yixĩxgu i nüxü̃ dauxü̃ rü nüxü̃ ixuxü̃ nachiga i wüxi i máetaxü̃ rü taxucürüwama texémaxã yu taxuegu.
31 Rü wüxi i máetaxü̃ i marü yu namaxã naxuegugüxü̃ rü ngẽxguma chi texé diẽrumaxã naxütanüchaü̃gu ¡rü taxũtáma penayaxu i ngẽma diẽru! Rü nanaxwa̱xe nax nayuxü̃.
32 ¡Rü taxũtáma penayaxu i diẽru ega wüxi i máetaxü̃ naxütanüchaü̃gu nax ínaxũxũxü̃ca̱x nawa ya yima ĩane ya nagu yanacúxü̃ne nax norü naaneca̱x nataeguxü̃ naxü̃pa nax taxũta nayuxü̃ ya yima chacherdótegüarü ãẽ̱xgacü!
33 ¡Rü taxṹ i máetamaxã penaxãũãchixẽxẽ i ngẽma nachixü̃ane i nawa tá pemaxẽxü̃! Erü ngẽma máeta rü poraãcü nanachixexẽxẽ i wüxi i nachixü̃ane. Rü nüma i máetaxü̃ rü ma̱xgu tá nayu. Rü taxucürüwa i ta̱xacü i tomaxã tanaxütanü i ngẽma máeta.
34 ¡Rü taxũtáma chixexü̃maxã peyapaxẽẽxü̃ i ngẽma naane i nawa tá pemaxẽxü̃ rü nawa choma rü tá ta chamaxü̃! Erü choma ya Cori ya Tupana rü natanüwa chamaxü̃ i ngẽma Iraétanüxü̃” —ñanagürü ga Tupana.
