Números 36:1-13
36 Rü Garaáx rü Maquí nane nixĩ. Rü Maquí rü Manaché nane nixĩ. Rü Manaché rü Yúche nane nixĩ. Rü yema Garaáxtanüxü̃arü ãẽ̱xgacügü rü Moichéxü̃tawa rü yema Iraétücumügüarü ãẽ̱xgacügüxü̃tawa naxĩ nax namaxã yanadexagüxü̃ca̱x, rü ñanagürügü nüxü̃:
2 —Pa Moichéx, Cori ya Tupana rü cuxü̃ namu nax sortéuãcüma Iraétanüxü̃xü̃ cuyanuxü̃ i ngẽma naane i wüxitücumüchigüna üxü̃. Rü ngẽxgumarüxü̃ ta cuxü̃ namu nax naxacügüna cunaxãxü̃ i ngẽma naane i totanüxü̃ ya Cherofáxna üxü̃.
3 Natürü ngẽxguma chi togümare i Iraétücumügü i yatüxü̃maxã yaxãtegügu i ngĩmagü, rü ngẽma naane ga ngĩxrügü ixĩxü̃ rü taxũtáma marü totücumüarü nixĩ, rü ngẽma namaxã yaxãtegüxü̃tücumüarü tá nixĩ. Rü ngẽmaãcü i ngẽma torü naane rü tá nixíxrachigü.
4 Rü ñu̱xũchi ngẽxguma nawa nanguxgu ya yimá Taunecü ya Nagu Natáeguxẽẽãcü i Naane rü ngẽma ngĩanegü rü marü ngĩtetücumüarü tá nixĩ, rü marü taxũtáma totücumüarü nixĩ —ñanagürügü.
5 Rü yemaca̱x ga Moiché rü yema Cori ya Tupana namaxã nüxü̃ ixuxü̃ãcüma Iraétanüxü̃maxã nüxü̃ nixu rü ñanagürü: —Rü ngẽma Yúchetanüxü̃ nüxü̃ ixugüxü̃ rü aixcüma name.
6 Rü nüma ya Cori ya Tupana rü nüxü̃ nixu nax ngẽma Cherofáxacügü rü ngĩma nanaxwa̱xegüxü̃maxã yaxãtegüxü̃. Natürü nanaxwa̱xe nax ngẽma ngĩnatü natücumüwa ngẽxmaxü̃tanügu nax yaxãtegüxü̃.
7 Rü ngẽma naane i Iraéanewa wüxíechigüarü ixĩxü̃ rü taxucürüwa totücumüna naxüe. Rü ngẽmaca̱x i guxü̃ma i Iraétanüxü̃ rü nanaxwa̱xe nax nüxna nadaugüxü̃ i ngẽma naane i norü o̱xigütücumüwa nüxna naxãgüxü̃.
8 Rü ngẽxguma wüxi i pacü i ngẽxü̃rüxüxü̃tücumüwa ücü rü ngĩxna naxü̱xgu i ngĩnatü ya yucüarü naane, rü nanaxwa̱xe nax wüxi i yatü i tümatücumüwa ücümaxã taxãtexü̃. Rü ngẽmaãcü wüxichigü i Iraétanüxü̃ rü tá nüxna nadau i ngẽma naane i nanatü nüxna ãxü̃.
9 Rü ngẽma naane i nanatü nüxna ãxü̃ rü taxuxü̃táma totücumüme̱xẽwa naxüe. Rü wüxichigü i Iraétücumü rü nanaxwa̱xe nax nüxna nadaugüxü̃ i ngẽma naane i nüxna ixüchigüxü̃ —ñanagürü.
10 36:10-12 Rü yexguma ga yema Cherofáxacügü ga Maará, rü Tirchá, rü Oxlá, rü Milcá, rü Noá rü naga ixĩnüe ga yema Cori ya Tupana Moichémaxã nüxü̃ ixuxü̃. Rü ngĩnepügü nanegü ga Manachétaagümaxã iyaxãtegü. Rü yema Manachétanüxü̃ rü Yúchetaagü nixĩgü, rü yemaacü ga yema ngĩanegü rü tama totücumüwa naxüe.
11 Nüü̃ nadau 36:10
12 Nüü̃ nadau 36:10
13 Rü yemagü nixĩ ga yema mugü rü ucu̱xẽgü ga Iraétanüxü̃ca̱x Cori ya Tupana Moichémaxã nüxü̃ ixuxü̃ ga yexguma Moáarü doxonexü̃wa nayexmagu ga Yudáü̃cutüwa ga Yericúarü to̱xma̱xtawa.
