Números 5:1-31
5 Rü nüma ga Cori ya Tupana rü Moichémaxã nüxü̃ nixu rü ñanagürü:
2 5:2-3 —¡Namaxã nüxü̃ ixu i Iraétanüxü̃ nax ngẽma ínapegüxü̃wa ínamuxü̃ãxü̃ i guxü̃ma i ngẽma duü̃xü̃gü i chaxünemaxã ida̱xaweexü̃ rü ngẽma yatügü i norü yatüwa ida̱xaweexü̃ rü ngẽma chope̱xewa ãũãchiexü̃ nagagu nax yuetaxü̃ yangógügü̃xü̃! ¡Rü woo yatüxü̃ rü woo ngexü̃ rü ínamuxü̃ã i nügütanüwa i ngẽma Iraétanüxü̃! Rü ngẽmaãcü taxũtáma naxãũãchi i ngẽma nachica i Iraétanüxü̃ íngẽxmagüxü̃wa rü choma natanüwa íchamaxü̃xü̃wa —ñanagürü.
3 Nüü̃ nadau 5:2
4 Rü yexguma ga nüma ga Iraétanüxü̃ rü nayanguxẽxẽ ga yema Tupana Moichémaxã nüxü̃ ixuxü̃. Rü yema ínapegüxü̃wa ínanamuxü̃ ga yema duü̃xü̃gü ga ida̱xaweexü̃.
Mugü naxca̱x ga duü̃xü̃gü ga chixexü̃ ügüxü̃
5 Rü nüma ga Tupana rü Moichéxü̃ ñanagürü:
6 —¡Namaxã nüxü̃ ixu i Iraétanüxü̃ rü ngẽxguma texé naxca̱x ngĩ̱xgu rüe̱xna togüaxü̃́ guxchaxü̃ üxgu rü chope̱xewa nixĩ i chixexü̃ taxüxü̃!
7 Rü ngẽma duü̃xü̃ i chixexü̃ üxü̃ rü name nax nüxü̃ yaxuxü̃ i ngẽma norü chixexü̃. Rü nanaxwa̱xe nax naxütanüãxü̃ i ngẽma naxca̱x nangĩ́xü̃. Rü ngẽmaétü tá tanaxütanü i wüxi i norü 5 arü yauxye i ngẽma naxca̱x nangĩ́xü̃.
8 Natürü ngẽxguma marü nayu̱xgu i ngẽma norü yora rü nataxuxguma i to i natanüxü̃ nax ngẽmaaxü̃́ tanaxütanüxü̃ca̱x i ngẽma tümaarü ngetanüxü̃ rü tanaxwa̱xe nax Tupanana tanaxãxü̃ i ngẽma diẽru. Rü ñu̱xũchi i ngẽma diẽru rü tá Chacherdótearü nixĩ. Rü ngẽmaétüwa ya yíxema naxca̱x ngĩ́xe rü tanaxwa̱xe nax chacherdótexü̃tawa tanagaxü̃ i wüxi i carnéru nax chacherdóte Tupanape̱xewa yaguxü̃ca̱x rü ngẽmaãcü Tupana tüxü̃́ nüxü̃ rüngü̃maxü̃ca̱x i ngẽma chixexü̃ i taxüxü̃.
9 Rü guxü̃ma i ngẽma norü ãmaregü i Iraétanüxü̃ Cori ya Tupanana naxãgüxü̃ rü tá chacherdótexü̃tawa nanana, rü chacherdótearü tá nixĩ.
10 Rü guxü̃ma i ngẽma Cori ya Tupanana naxãgüchaü̃xü̃ rü tá chacherdótexü̃tawa nanana rü ngẽmaãcü chacherdótearü tá nixĩ —ñanagürü ga Tupana.
Mugü i yugütaechiga
11 Rü Tupana rü Moichéxü̃ ñanagürü:
12 5:12-14 —¡Rü namaxã nüxü̃ ixu i Iraétanüxü̃ rü ngẽxguma chi wüxi i nge rü ngĩtena chixri maxü̱̃xgu rü to i yatümaxã namaxü̱̃xgu natürü ngĩte tama nüxü̃ cua̱xgu nax chixexü̃ naxüxü̃ rü taxúema ngĩxü̃ da̱u̱xgu nax naxüaxü̃ i ngẽma guxchaxü̃, natürü ya yimá ngĩte rü ngĩxü̃ nacua̱xtügu nax nüxna nangeãẽxü̃ rüe̱xna woo tama chixexü̃ naxü̱xgu i ngĩma rü ngĩxü̃ nacua̱xtümaregu nax chixexü̃ naxüxü̃, rü ñaãcü tá penamexẽxẽ i ngẽma guxchaxü̃!
13 Nüü̃ nadau 5:12
14 Nüü̃ nadau 5:12
15 Rü woo chixexü̃ naxü̱xgu rüe̱xna tama chixexü̃ naxü̱xgu, rü tá chacherdótexü̃tawa ngĩxü̃ naga. Rü taxre i quíru naguxü̃ i chebádaarü arína tá ngéma nange Tupanaarü ãmareruxü̃. Natürü taxũtáma chíxü̃ nagu naba rüe̱xna pumarate̱xe nagu nagü i ngẽma arína, erü ngẽma ãmare rü nayugütaeca̱x nixĩ rü pecadu i cúxü̃ nax ngóxü̃ca̱x nixĩ.
16 Rü ngẽxguma i nüma i chacherdóte rü tá ngĩxca̱x naca rü Tupanape̱xewa tá ngĩxü̃ naga.
17 Rü ñu̱xũchi nüma i chacherdóte rü wüxi i naxpáü̃ i waixü̃münaxca̱x ixĩxü̃gu tá nanaba i íxraxü̃ i dexá i üünexü̃. Rü íxraxü̃ i waixü̃müte̱xe i Tupanapatachiãwa ngẽxmaxü̃ tá nawa nagüe.
18 Rü nüma i chacherdóte rü tá Tupanape̱xewa ngĩxü̃ naga, rü ñu̱xũchi tá ngĩxü̃ íniwẽgüyae. Rü nüma i Chacherdóte rü tá ngĩxme̱xgu nanaxǘ i ngẽma ãmare i nayugütaeca̱x ixĩxü̃. Rü nüma i chacherdóte rü tá nanayaxu i ngẽma dexá i üxchíüxü̃ i guxchaxü̃ ínguxẽẽxü̃ ega chixexü̃ ixüxgu.
19 Rü nüma i Chacherdóte rü tá ngĩxü̃ namu nax Tupanaégagu nüxü̃ yaxuxü̃ca̱x rü aixcüma yixĩxü̃ i chixexü̃ naxüxü̃ rüe̱xna tama. Rü ñanagürü tá ngĩxü̃: “Rü ngẽxguma tama to i yatümaxã cumaxü̱̃xgu, rü tama cutexü̃ cuwomüxẽẽgu rü tama to i yatümaxã cunaxü̱xgu i ngẽma tama Tupanape̱xewa mexü̃, rü ñaa dexá i üxchíüxü̃ i guxchaxü̃ ínguxẽẽxü̃ rü taxũtáma chixexü̃ cuxca̱x ínangu i ngẽxguma cuyaxaxügu.
20 5:20-22 Natürü ngẽxguma aixcüma yixĩxgu nax cutexü̃ cuwomüxẽẽxü̃ rü to i yatümaxã cumaxü̃xü̃, rü choma rü Tupanana naxca̱x chaca nax cuxü̃ napoxcuxü̃ i ngẽxguma cuyaxaxügu i ñaa dexá. Rü tá curüchaanü rü taxuacütáma wena cuxãxãcü. Rü ngẽma rü tá wüxi i cua̱xruxü̃ nixĩ naxca̱x i guxü̃ma i duü̃xü̃gü. Rü ngẽma tá nixĩ i curü poxcu”, ñanagürü. Rü ngẽxguma i ngĩma rü ngĩgürügü tá: “Ngẽmaãcü yixĩ, ngẽmaãcü yixĩ”, tá ngĩgürügü.
21 Nüü̃ nadau 5:20
22 Nüü̃ nadau 5:20
23 Rü ngẽxguma i nüma i ngẽma Chacherdóte rü wüxi i poperagu tá nanaxümatü i ngẽma ore i chixexü̃ ueguxü̃ rü ñu̱xũchi ngẽma dexá i üxchíüxü̃maxã tá ínanapi.
24 Rü ngẽmawena i nüma i chacherdóte rü tá ngĩxna nanaxã i ngẽma dexá i üxchíüxü̃ nax yaxaxãxü̃ca̱x. Rü ngẽma dexáwa rü taxü̃ i ngúxü̃ tá ngĩxca̱x ínangu.
25 Rü nüma i chacherdóte rü tá ngĩxme̱xwa nanayaxu i ngẽma ãmare i nayugütaeca̱x ixĩxü̃ nax Cori ya Tupanape̱xewa nangeaxü̃ca̱x. Rü ñu̱xũchi ngẽma ãmarearü guruü̃étügu tá nayaxǘ i ngẽma ãmare.
26 Rü ngẽxguma i nüma i chacherdóte rü tá wüxi i naxme̱xãcu nayaxu i ngẽma arínate̱xe rü ãmarearü guruü̃wa tá nayagu nax wüxi i cua̱xruxü̃ yixĩxü̃ca̱x. Rü ngẽmawena rü tá ngĩxü̃ nayaxaxẽxẽ i ngẽma dexá i üxchíüxü̃.
27 Rü ngẽxguma ngĩtexü̃ nawomüxẽẽgu, rü ngẽma dexá rü tá taxü̃ i ngechaü̃ ngĩxca̱x ínanguxẽxẽ. Rü tá irüchaanü rü taxuacütáma wena ixãxãcü. Rü ngẽma nax tama wena naxãxacüxü̃ rü guxü̃ma i duü̃xü̃güarü cua̱xruxü̃ tá nixĩ.
28 Natürü ngẽxguma ngĩma rü tama ngĩtexü̃ iwomüxẽẽgu rü taxuxü̃táma ngĩxü̃ nangupetü rü wena tá ixãxãcü.
29 5:29-30 Rü ngẽma nixĩ i chorü mu ega ngẽxguma wüxi i nge rü ngĩtexü̃ nawomüxẽẽgu rü to i yatümaxã namaxü̱̃xgu. Rü ngẽxguma wüxi i yatü rü naxma̱xü̃ yanuxü̃gu rü chixexü̃ca̱x ngĩxü̃ nacua̱xtügu, rü woo aixcüma yixĩxgu rüe̱xna tama aixcüma yixĩxgu rü nanaxwa̱xe nax Cori ya Tupanape̱xewa ngĩxü̃ nagaxü̃. Rü nüma i chacherdóte rü tá nanaxü i guxü̃ma i ngẽma cumaxã nüxü̃ chixuxü̃.
30 Nüü̃ nadau 5:29
31 Rü nüma ya yatü rü taxũtáma napoxcu, natürü ngĩma i naxma̱x i chixexü̃ üxcü rü tá ipoxcu —ñanagürü ga Tupana.
