Números 6:1-27
6 Rü Tupana rü Moichémaxã nüxü̃ nixu rü ñanagürü:
2 6:2-3 —¡Namaxã nüxü̃ ixu i Iraétanüxü̃ rü ngẽxguma wüxi i yatü rüe̱xna wüxi i ngexü̃ choxna nügü naxãxgu nax Nacharéu yixĩxü̃ca̱x, rü taxũtáma nayaxaxü ya bínu rüe̱xna ta̱xacü i nacuchiü i ngúxü̃! Rü taxũtáma nayaxaxü i binágre i bínuwa üxü̃ rüe̱xna ta̱xacü i to i axchiü i ngúchiáxü̃ rü bai i úbachiü. Rü taxũtáma nanangõ̱x i úba rüe̱xna úbaarü patanüxü̃.
3 Nüü̃ nadau 6:2
4 Rü taxuacütáma nanangõ̱x i ta̱xacü i úbanaxca̱x ixĩxü̃, ñu̱xmatáta yangu i ngẽma chomaxã naxunetaxü̃.
5 Rü ngẽma ngunexü̃gügu rü taxũtáma niyoeru, ñu̱xmatáta yanguxẽẽã nax chomaxã inaxunetaxü̃. Rü nüma rü wüxi i duü̃xü̃ i cha̱u̱xca̱xicatama maxü̃xü̃ tá nixĩ.
6 6:6-7 Rü taxuacütáma yuetana nangaicama, woo nanatü tixĩxgu, rüe̱xna naé tixĩxgu, rüe̱xna naenexẽ tixĩxgu, rüe̱xna naeya̱x tixĩxgu, nax tama chope̱xewa natagüxü̃ca̱x. Erü cha̱u̱xca̱xicatátama namaxü̃.
7 Nüü̃ nadau 6:6
8 Rü guxü̃ma i ngẽma ngunexü̃gü i nagu chomaxã naxunetaxü̃ rü nanaxwa̱xe nax cha̱u̱xca̱xicatama namaxü̃xü̃.
9 Rü ngẽxguma ngürüãchi wüxi ya duü̃xẽ naxü̃tagu yuxgu i wüxi i Nacharéu rü ngẽmaca̱x natagügu i nayae i Tupanaca̱x ixĩxü̃, rü nanaxwa̱xe nax wüxi ya yüxüguwena nügü naba̱i̱xeruxẽẽxü̃ nax ngẽmaãcü Tupanape̱xewa namexü̃ca̱x.
10 Rü norü 8 i ngunexü̃gu rü nanaxwa̱xe nax Tupanapataca̱x ixücuxü̃wa tüxü̃ nagaxü̃ ya taxre ya muxtucugü rüe̱xna taxre ya muxtucuxacügü nax chacherdótena tüxü̃ yamugüxü̃ca̱x.
11 Rü nüma i chacherdóte rü pecaduca̱x tá tüxü̃ nigu ya wüxi ya yíxema muxtucu rü yíxema toguxe ya muxtucu rü tá cha̱u̱xca̱x tüxü̃ nigu nax ngẽmaãcü ngẽma Nacharéxaxü̃́ naxütanüãxü̃ca̱x i ngẽma guxchaxü̃ i nagu ãchixü̃ nagagu nax yueta tüxü̃ yangógüxü̃. Rü ngẽma ngunexü̃gu rü wena tá choxna nanaxuaxü̃ i ngẽma nayae.
12 Rü ngẽma i ngunexü̃gu rü ngẽma Nacharéu tá chomaxã inanaxügü i wüxi i ngexwaca̱xü̃xü̃ i norü uneta. Rü yema nüxíraxü̃xü̃ ga nayae ga tagüxü̃ rü taxũtáma nagu charüxĩnü. Rü naétü chanaxwa̱xe nax cha̱u̱xca̱x yaguãxü̃ i wüxi i carnéruxacü i wüxi ya taunecü nüxü̃́ ngẽxmaxü̃ norü pecaduarü ütanüruxü̃.
13 Rü ngẽxguma yagu̱xgu i norü ngunexü̃gü i nagu chomaxã inaxunetaxü̃ i ngẽma Nacharéu rü nanaxwa̱xe nax chopataca̱x ixücuxü̃wa naxũxü̃.
14 Rü ngéma ãmarechicawa tá cha̱u̱xca̱x nayagu i wüxi i carnéru i yatüxü̃ i wüxi ya taunecü nüxü̃́ ngẽxmaxü̃ i taxuwama chixexü̃ chorü ãmareruxü̃. Rü tá cha̱u̱xca̱x nayagu i wüxi i carnéru i ngexü̃ i wüxi ya taunecü nüxü̃́ ngẽxmaxü̃ i taxuwama chixexü̃ norü pecaduarü ütanüruxü̃. Rü tá cha̱u̱xca̱x nayagu i wüxi i carnéru i yatüxü̃ i taxuwama chixexü̃ chorü ngüxmüxẽẽruxü̃.
15 Rü ngẽxgumarüxü̃ ta i ngẽma Nacharéu rü nanaxwa̱xe nax chopatawa nangeaxü̃ i paũgü i wüxi ya pexchixacügu nuxü̃. Rü ngẽma paũ rü mexẽchixü̃ ya arínawa üxü̃ tá nixĩ. Rü tá nangearü pu̱xẽẽruxü̃ã̱x rü chíxü̃maxã tá niñuxmü. Rü naétü tá choxna nanaxã i paũ i ãtachinüxü̃ i ngearü pu̱xẽẽruü̃ã́xü̃ i chíxü̃maxã maxcutanüxü̃. Rü ngẽmamaxã tá wüxigu choxna nanaxã i ãmaregü i trigute̱xe rü bínu.
16 6:16-17 Rü nüma i chacherdóte rü tá chope̱xewa nanange i ngẽma ãmare i pecaduarü ütanüruxü̃. Rü tá cha̱u̱xca̱x nayagu i ngẽma carnéru i chorü ngüxmüxẽẽruxü̃. Rü ngẽma carnérumaxã wüxigu tá choxna nanaxã i ngẽma paũgü i ngearü pu̱xẽẽruü̃ã́xü̃ i wüxi ya pexchixacügu nuxü̃. Rü ngẽmamaxã tá wüxigu choxna nanaxã i ngẽma ãmaregü i trigu rü bínu.
17 Nüü̃ nadau 6:16
18 Rü ngẽmawena i nüma i Nacharéu rü Tupanapataca̱x ixücuxü̃wa tá nayayo i ngẽma nayae i Tupanaca̱x nayaxẽẽxü̃. Rü nüma i Nacharéu rü tá nanade i ngẽma nayae rü tá nayagu nawa ya yima üxü i ngẽma ãmare i carnéru i chorü ngüxmüxẽẽruü̃tüxü̃wa ngẽxmane.
19 Rü ngẽmawena i nüma i chacherdóte rü tá nanayaxu i ngẽma carnéruca̱xwemachi i marü ngẽxẽxü̃, rü wüxi i paũ i ngearü pu̱xẽẽruü̃ã́xü̃ i pexchixacüwa ngẽxmaxü̃, rü wüxi i paũtachinü i ngearü pu̱xẽẽruü̃ã́xü̃. Rü guxü̃ma i ngẽma rü Nacharéuna tá nanaxã nawena nax nügü yayoeruxü̃.
20 Rü yachü̱xüxãcüüxẽẽãcüma Cori ya Tupanape̱xegu nayaxǘ i ngẽma ãmaregü i namachiremü i ngẽma carnéru rü naca̱xwemachi i Tupanana ãxü̃. Erü ngẽma namachigü rü naxüüne, rü chacherdóteca̱xicatama nixĩ. Rü nawena i guxü̃ma i ngẽma, rü nüma i Nacharéu rü marü name nax bínu yaxaxüxü̃.
21 Rü ngẽma nixĩ i ngẽma chorü mu i tá yanguxẽẽxü̃ i ngẽma duü̃xü̃ i chomaxã ixunetaxü̃ nax Nacharéu yixĩxü̃ca̱x. Rü ngẽma tá nixĩ i norü ãmaregü i tá choxna nanaxü̃. Rü ngẽxguma ngẽmaétü inaxãxchaü̃gu i to i ãmare i norü ngúchaü̃maxã inaxãxü̃ rü ngẽma rü ta rü name. Natürü nanaxwa̱xe nax aixcüma yanguxẽẽãxü̃ i ngẽma chomaxã naxueguxü̃ ngẽma choma Nacharéuca̱x nüxü̃ chixuxü̃rüxü̃ —ñanagürü ga Tupana.
Tupana nanamu ga chacherdótegü nax duü̃xü̃gümaxã mexü̃ naxueguxü̃ca̱x
22 Rü Tupana rü Moichéxü̃ ñanagürü:
23 —¡Namaxã nüxü̃ ixu i Aróü̃ rü nanegü rü ngẽxguma Iraétanüxü̃maxã mexü̃ naxuegugügu, rü ñaãcü tá nixĩ!:
24 “¡Rü Tupana cuxü̃ rüngü̃xẽxẽ rü guxü̃guma cuxna nada̱u̱x!
25 ¡Rü Tupana cumaxã taãxẽ, rü cuxü̃ nangechaü̃!
26 ¡Rü Tupana taãxẽ cuxna naxã rü taãẽmaxã cuxü̃ yapaxẽxẽ! Rü ngẽmaãcü tá nixĩ”.
27 Rü guxü̃gutáma i ngẽxguma ngẽma ñagügu i chacherdótegü rü choma rü tá chayanguxẽxẽ i ngẽma chauégagu nüxü̃ yaxugüxü̃ —ñanagürü ga Tupana.
