Oseas 1:1-11
1 Ñaa nixĩ ga ore ga Cori ya Tupana nüxü̃ ixuxü̃ namaxã ga Ochéa ga Beerí nane ga yexguma Yudáanewa ãẽ̱xgacügü yixĩgügu ga Uchía rü Yotáü̃ rü Acháx rü Echequía. Rü Iraéanewa rü Yeruboáü̃ ga Yoá nane nixĩ ga norü ãẽ̱xgacü ixĩxü̃.
2 Rü ñaa nixĩ ga yema nüxíraxü̃xü̃ ga ore ga Cori ya Tupana Ochéamaxã nüxü̃ ixuxü̃. Rü ñanagürü nüxü̃: —Ngẽma Iraéanecüã̱x rü ñoma wüxi i ngexü̃ i natena ngeãẽxü̃rüxü̃ choxna nixĩgachi. Rü cumax, Pa Ochéax, rü wüxi i cua̱xruxü̃ tá quixĩ naxca̱x i ngẽma duü̃xü̃gü. ¡Rü ngẽmaca̱x i ñu̱xma rü wüxi i nge i naxü̃nemaxã taxexü̃maxã naxãxma̱x rü ngĩwa naxãxacü! Rü ngẽmaãcü i ngẽma cuxacügü rü wüxi i nge i ngeãẽcüxacügü tá nixĩgü —ñanagürü.
3 Rü yemawena ga Ochéa rü ngĩmaxã naxãxma̱x ga Góme ga Dibraíü̃acü. Rü ngĩma rü nüxü̃́ ixãxacü rü nayatü.
4 Rü ñu̱xũchi ga nüma ga Cori ya Tupana rü ñanagürü Ochéaxü̃: —Yimá cune rü Yereé tá nixĩ i naéga. Erü paxaxüchitáma chanapoxcue i ngẽma nataagü ya yimá ãẽ̱xgacü ya Yeú naxca̱x ga yema taxü̃ ga máeta ga naxüxü̃ nawa ga guma ĩane ga Yereé. Rü ngẽma Iraéanecüã̱xgü rü ngẽxma tá chayacua̱xẽxẽ nax nügümaxãtama inacua̱xgüechaxü̃.
5 Erü ngẽma ngunexü̃gu rü yima ĩane ya Yereéarü doxonexü̃arü metachinüanexü̃gu tá chanadai i ngẽma norü churaragü i Iraéanecüã̱xgü rü ngẽxma tá nagu̱x i Iraéanearü pora —ñanagürü.
6 Rü yexguma ga ngĩma ga Góme rü wena ixãxacü, rü nange ga ngĩxacü. Rü nüma ga Cori ya Tupana rü Ochéaxü̃ ñanagürü: —Ngẽma ngĩéga i ngẽma cuxacü rü Lo-ruáma tá nixĩ.* Erü ñu̱xmawena rü marü taxũtáma choxü̃́ nangechaü̃tümüxü̃gü i Iraéanecüã̱xgü. Rü marü taxũtáma nüxü̃́ nüxü̃ icharüngüma i ngẽma norü chixexü̃gü.
7 Natürü ngẽma Yudáanecüã̱xgü rü tá choxü̃́ nangechaü̃tümüxü̃gü. Rü chomatama i norü Tupana nax chixĩxü̃ rü tá norü uanügüna íchanapoxü̃. Natürü taxũtáma ta̱xacürü churaragümaxã rüe̱xna naxnegümaxã rüe̱xna ngẽma churaragü i cowaruã́xü̃maxã tá norü uanügüna íchanapoxü̃ —ñanagürü ga Tupana.
8 Rü yexguma Góme marü Lo-ruáma ngĩxü̃ yamaieguwena, rü wena ixãxacü, rü nayatü.
9 Rü yexguma ga nüma ga Cori ya Tupana rü Ochéaxü̃ ñanagürü: —Ngẽma cune rü Lo-amígu naxüéga, erü pema i Iraéanecüã̱xgü rü marü tama chorü duü̃xü̃gü pixĩgü rü choma rü marü tama perü Tupana chixĩ —ñanagürü.
Tupana rü wena tá ínanadaxẽxẽ i Iraéane nax noxrirüxü̃ wena naporaxü̃ca̱x
10 Natürü wüxi i ngunexü̃gu i ngẽma Iraétanüxü̃ rü tá namuxũchi ñoma naxnecü i márpechinüwa ngẽxmacürüxü̃. Rü ngẽmaca̱x taxucürüwa texé tayaxugü nax ñuxre yixĩxü̃. Rü woo noxri pemaxã nüxü̃ chixu nax tama chorü duü̃xü̃gü pixĩgüxü̃, natürü wüxi i ngunexü̃ rü choma ya Tupana ya Maxü̃cü tá pemaxã nüxü̃ chixu nax chorü duü̃xü̃gü pixĩgüxü̃.
11 Rü ngẽma ngunexü̃gu rü ngẽma Yudáanecüã̱xgü rü Iraéanecüã̱xgü rü wüxitama i nachixü̃ane tá nixĩ, rü wüxi tátama nixĩ i norü ãẽ̱xgacü. Rü yíxema to i nachixü̃anewa tüxü̃ nagagüxe rü tá wena Yerucharéü̃ca̱x tawoegu. Rü ngẽma Yereéarü ngunexü̃gu rü taxü̃ i taãxẽ tá nangẽxma.
Notas
^ 1:6 Rü ngẽma naéga rü: “tama choxü̃́ nangechaü̃tümüxü̃gü”, ñaxü̃chiga nixĩ.
