Oseas 11:1-12
11 Rü Tupana rü ñanagürü ta: —Rü yexguma noxri nangóegu ga chorü duü̃xü̃gü ga Iraétanüxü̃, rü choma rü nüxü̃ changechaü̃ yerü chauxacügü nixĩgü. Rü yemaca̱x íchananguxü̃xẽxẽ ga Equítuanewa.
2 Natürü yexguma yexeraãcü naxca̱x chacagu nax chowe naxĩxü̃ca̱x, rü nüma ga Iraétanüxü̃ rü yexeraãcü choxna nixĩgachi. Rü nüma ga chorü duü̃xü̃gü rü tupananetagüca̱x ínanagu ga ãmaregü rü ngẽmachicüna̱xãgüca̱x ínanagu ga pumarate̱xe.
3 Choma nixĩ ga yema Efraíü̃tanüxü̃maxã ichacuáxü̃ ga yexguma noxri tauta nüxü̃ nacua̱xgügu ga ñuxãcü tá napugüãxü̃ ga ñaa naane. Rü chanangúexẽxẽ nax ñuxãcü tá inaxĩxü̃. Rü cho̱xme̱xmaxã nüxü̃ chingĩ natürü ga nümagü rü tama nüxü̃ nacua̱xgü nax choma yixĩxü̃ ga nüxna chadauxü̃.
4 Rü nüxü̃ changechaü̃ rü chaugüca̱x chayagagü nax chanameãẽxü̃ca̱x ñoma buxü̃gü i maiexü̃rüxü̃. Rü naxca̱x ichayarüma̱xãchi nax chanachibüexẽẽxü̃ca̱x.
5 Natürü i nümagü rü tama cha̱u̱xca̱x nawoeguchaü̃. Rü ngẽmaca̱x woo taxũtáma Equítuaneca̱x nawoegu natürü Achíriaaneme̱xẽwa tá nangẽxmagü, erü tama cha̱u̱xca̱x nawoeguchaü̃.
6 Rü norü uanügü rü tá taramaxã Iraéanearü ĩanegüca̱x ínayaxüãchi. Rü tá nagu napogüe ya yima ĩanegüarü poxeguxü̃. Rü ngẽmaãcü tá namaxã nangupetü yerü choxna nixĩgachi nax norü tupananetagüwe naxĩxü̃ca̱x.
7 Rü nüma i ngẽma chorü duü̃xü̃gü rü nanaxügüama nax choxna yaxĩgachixü̃. Rü tagaãcü nayumüxẽgüchire̱x, natürü taxúema tanangãxü̃, erü nawe narüxĩama i ngẽma tupananetagü i taxucürüwa nüxü̃ rüngü̃xẽẽxü̃.
8 Natürü taxucürüwa pexna chixũgachi, Pa Efraíü̃tanüxü̃x. Rü taxucürüwa pexü̃ íchawogü, Pa Iraéanecüã̱xgüx. Rü taxucürüwa pexü̃ chadai yexgumarüxü̃ ga yema Axmácüã̱xgüxü̃ chadaixgurüxü̃. Rü taxucürüwama pexü̃ charüxoxẽxẽ guma ĩane ga Cheboíü̃xü̃ charüxoxẽẽxü̃rüxü̃. Erü daa chorü maxü̃newa rü pexü̃ changechaü̃ rü íchamemare nax choxü̃́ pengechaü̃tümüxü̃güxü̃.
9 Rü marü taxũtáma wena pemaxã chanu, Pa Efraíü̃tanüxü̃x, rü taxũtáma wena pexü̃ chadai, erü choma rü tama duü̃xü̃mare chixĩ. Rü choma ya Tupana ya Üünecü nax chixĩxü̃ rü petanüwa chamaxü̃. Rü tama perü daiwa nixĩ i nua chaxũxü̃.
10 Rü choma rü ñoma wüxi i leóü̃rüxü̃ tá chataga rü chorü duü̃xü̃gü rü tá chauga naxĩnüe. Rü ngẽxguma tagaãcü naxca̱x chacaxgu rü nümagü rü nidu̱xruãcüma tá oéstewaama ne naxĩ.
11 Rü ñoma werigürüxü̃ tá nidu̱xruãcü Equítuanewa ne naxĩ. Rü ñoma muxtucurüxü̃ Achíriaanewa tá ne naxĩ. Rü choma rü tá wena napatagüwa chanagagü nax wena nawa yamaxẽxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
Iraéanecüã̱xgüarü pecadu
12 Rü ñanagürü ta: —Ngẽma Efraíü̃tanüxü̃x, rü guxü̃guma chope̱xewa nidorata̱xagü. Rü ngẽma Iraéanecüã̱xgü rü guxü̃guma choxü̃ nawomüxẽẽgü. Rü ngẽma Yudáanecüã̱xgü rü choxna nixĩgachi, rü ñu̱xma rü norü tupananetagüxü̃ nicua̱xüü̃gü —ñanagürü.
