Oseas 14:1-9
14 Pa Iraéanecüã̱xgüx, pema nax perü chixexü̃gagu guxchaxü̃gu peyixü̃x ¡rü naxca̱x pewoegu ya Cori ya perü Tupana!
2 Rü name nax ñaãcü peyumüxẽgüxü̃ rü ñaperügügü: —¡Pa Torü Cori ya Tupanax, rü toxü̃́ nüxü̃ irüngüma i guxü̃ma i torü chixexü̃gü! ¡Rü mea toxü̃́ nayaxu i ñaa torü cua̱xüxü̃ i cuxna taxãxü̃!
3 Rü marü nüxü̃ tacua̱x rü ngẽma Achíriaanecüã̱xgü rü tama aixcüma toxü̃ ínapoxü̃. Rü woo chi cowarumaxã tibuxmügu rü taxũchima tamaxẽ. Rü ngẽmaca̱x i ñu̱xma rü marü taxũtáma namaxã tatupanaã̱x i ta̱xacürü naxchicüna̱xã i tomatama taxüxü̃. Erü toma nax tangearü yoraáxü̃ rü cuxicatama nixĩ i aixcüma cuxü̃́ tangechaü̃tümüxü̃güxü̃ —ñaperügügü tá.
Cori ya Tupana rü Iraéanecüã̱xgümaxã inaxuneta nax ngexwaca̱xü̃xü̃ i maxü̃ tá nüxna naxãxü̃
4 Rü ñanagürü ya Cori ya Tupana: —Ngẽma duü̃xü̃gü i tama chauga ĩnüexü̃ rü tá chaugümaxã ichanangüxmüexẽxẽ. Rü tá nüxü̃ changechaü̃ama woo tamachire̱x ngẽma nixĩ i norü natanü. Erü marü choxü̃ nangupetü nax namaxã chanuxü̃.
5 Rü ñu̱xma i choma rü tá nüxü̃ charüngü̃xẽxẽxü̃ i ngẽma Iraéanecüã̱xgü ñoma cherena ya nanetügüxü̃ iwaixẽẽcürüxü̃. Rü ngẽma Iraéanecüã̱xgü rü tá nataãẽgü ñoma putüra i líriu meama ixãchacuxü̃rüxü̃. Rü yima ma̱xpǘne ya Líbanuarü ocayiwagü ya guxü̃guma ngẽxmaechanerüxü̃ tá nixĩ i ngẽma Iraéanecüã̱xgü nax guxü̃gutáma nachixü̃anewa nangẽxmagüxü̃.
6 Rü ñoma oribu itaetaxü̃ rü ibaxcaxü̃rüxü̃ rü tá meama nüxü̃ naxüpetü i ngẽma Iraéanecüã̱xgü i nachixü̃anewa. Rü ngẽma nachixü̃ane rü duü̃xü̃güarü taãẽxẽẽruxü̃ tá nixĩ ñoma Líbanuarü ocayiwaemarüxü̃.
7 Rü ngẽma Iraéanecüã̱xgü rü wena tá cho̱xme̱xwa nangẽxmagü rü tá nüxna chadau. Rü ñoma trigurüxü̃ rü úbarüxü̃ tá nimu. Rü yimá bínu ya Líbanucüã̱xrüxü̃ tá natachigagü i ngẽma Iraéanecüã̱xgü.
8 Rü Efraíü̃tanüxü̃ rü tá ñanagürügü: “Marü taxuwama choxü̃́ name i ngẽma tupananetachicüna̱xãgü”, ñanagürügü tá. Rü choma rü tá nüxü̃ charüngü̃xẽxẽ rü nüxna chadau i chorü duü̃xü̃gü. Rü guxü̃gutáma namaxã chamecüma ñoma wüxi i pinu i guxü̃guma ya̱u̱xtanüxü̃rüxü̃. Rü chorü duü̃xü̃gü rü chaugu tá nüxü̃ nayangau i maxü̃ i mexü̃ —ñanagürü.
Norü gu̱x i ñaa ore
9 Rü yíxema cua̱x tüxü̃́ ngẽxmaxe rü yíxema aixcüma tümaãẽxü̃ cuáxe rü name i naga taxĩnü i ñaa ore. Rü ngẽma nacüma ya Cori ya Tupana rü aixcüma nawe̱xgu. Rü ngẽma duü̃xü̃gü i aixcüma naga ĩnüexü̃, rü ngẽma nacümagu naxĩ. Natürü ngẽma tama Tupanaga ĩnüexü̃ca̱x, rü ngẽma nacüma rü wüxi i guxchaxü̃ nixĩ.
